آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
پاکستان کی سپریم کورٹ نے وزیر اعلیٰ پنجاب کے انتخاب کے حوالے سے ڈپٹی سپیکر پنجاب اسمبلی کی رولنگ کو کالعدم قرار دیتے ہوئے حمزہ شہباز کے وزارت اعلیٰ کے نوٹیفیکیشن کو غیرقانونی قرار دے دیا ہے اور گورنر پنجاب کو حکم دیا گیا ہے کہ وہ رات ساڑھے گیارہ بجے تک پرویز الٰہی سے وزارت اعلیٰ کا حلف لیں۔
پنجاب کی 20 صوبائی سیٹوں پر ضمنی الیکشن کے غیر حتمی اور غیر سرکاری نتائج کے مطابق 15 نشستوں پر تحریک انصاف کو برتری حاصل ہے جبکہ چار نشستوں پر مسلم لیگ ن اور ایک پر آزاد امیدوار آگے ہیں۔
تاہم یہ ابتدائی نتائج ہیں اور ابھی سینکڑوں پولنگ سٹیشنز میں گنتی باقی ہے۔
پنجاب اسمبلی کی 20 نشستوں پر ضمنی الیکشن کے حتمی نتائج آنے سے قبل تحریک انصاف نے اپنی فتح کا اعلان شروع کر دیا ہے۔
ترجمان تحریک انصاف فواد چوہدری نے وزیر اعلیٰ پنجاب حمزہ شہباز سے کہا ہے کہ وہ ’نتائج قبول کریں اور فوری طور پر عہدے سے علیحدہ ہو جائیں۔‘
اسد عمر کہتے ہیں کہ ’ابتدائی نتائج بتا رہے ہیں کے پنجاب کی جعلی حکومت کا سورج غروب ہونے والا ہے۔‘
ترجمان صوبائی الیکشن کمشنر پنجاب کا کہنا ہے کہ ڈسٹرکٹ مانیٹرنگ آفیسر لودھراں کے احکامات پر ٹیچر گورنمنٹ ہائر سکول لودھراں محمد آصف کو معطل کر دیا گیا۔
اس بیان میں کہا گیا ہے کہ ’محمد آصف نے سرکاری ملازم ہوتے ہوئے انتخابی مہم میں شرکت کی اور سیاسی سرگرمیوں میں ملوث رہا۔‘
’ ضابطہ اخلاق کی خلاف ورزیوں پر سخت سے سخت کارروائی کی جائے گی.‘
غیر حتمی اور غیر سرکاری نتائج کے مطابق پنجاب کے 20 صوبائی حلقوں میں ضمنی الیکشن میں 3131 میں سے 359 پولنگ سٹیشنز میں تحریک انصاف 46.9 فیصد ووٹوں کے ساتھ آگے ہے جبکہ مسلم لیگ ن 38.2 ووٹوں کے ساتھ پیچھے ہے۔
پی ٹی آئی کے سربراہ عمران خان نے دعویٰ کیا ہے کہ اب تک ہم نے کم ازکم 15 نشستوں پر کامیابی حاصل کی ہے۔
تاہم انھوں نے اپنی ٹویٹ میں یہ پیغام بھی دیا کہ یہ بہت ضروری ہے کہ ہمارے ڈیوٹی پر موجود تمام لوگ اپنی نشستوں کو تب تک نہ چھوڑیں جب تک ریٹرننگ افسران سے سرکاری نتائج حاصل نہ کر لیں۔
مسلم لیگ (ن) کی مرکز میں قائم شہباز شریف کی مخلوط حکومت بھی پنجاب میں 20 حلقوں میں کامیابی کی صورت میں سکھ کا سانس لے گی بصورت دیگر اس کے لیے بھی زندگی تنگ ہو جائے گی اور جلد عام انتخابات کے انعقاد کے تحریک انصاف کے نعرے کی تکمیل کی راہ بھی ہموار ہو سکتی ہے۔
یہ انتخابات نہ صرف ملک کی سیاست کے رخ کا تعین کریں گے بلکہ آئندہ آنے والے دنوں میں ملک میں جمہوری نظام کے خد و خال، ریاستی اداروں کے دائرہ اختیار اور ملکی معیشت کے علاوہ ملکی کی خارجہ پالیسی پر بھی اثر انداز ہو سکتے ہیں۔
ان ضمنی انتخابات کی اہمیت کا اندازہ دونوں جماعتوں کی طرف سے چلائی جانے والی انتخابی مہم سے بخوبی لگایا جا سکتا ہے۔
ایک طرف تحریک انصاف کے سربراہ اور سابق وزیر اعظم عمران خان اپنی جماعت کی انتخابی مہم کی قیادت کر رہے تھے تو دوسری طرف ن لیگ کی طرف سے مریم صفدر میدان میں سرگرم تھیں۔
آج پنجاب میں ضمنی الیکشن کا دن کیسا رہا، جانیے ہماری نامہ نگار ترہب اصغر سے۔۔۔
وفاقی وزیر داخلہ رانا ثنا اللہ کا کہنا ہے کہ پنجاب کے 20 حلقوں میں ضمنی الیکشن کے دوران ووٹر ٹرن آؤٹ 40 فیصد سے زیادہ رہا ہے جو کہ اس سے پہلے کبھی نہیں ہوا۔
اسلام آباد میں اپنی پریس کانفرنس کے دوران انھوں نے کہا کہ کل 3140 پولنگ سٹیشنز میں سے 14 میں معمولی جھگڑے ہوئے مگر پنجاب پولیس ’نیوٹرل‘ رہی۔
انھوں نے الیکشن کمیشن سے مطالبہ کیا کہ نتائج فارم 44 کے ذریعے جاری کیے جانے چاہییں جن پر متعقلہ افسران کے دستخط ہوتے ہیں۔
وفاقی وزیر اطلاعات مریم اورنگزیب نے کہا ہے کہ پنجاب کے ضمنی الیکشن میں ’نہ الیکشن کمشن کا عملہ اغوا ہوا، ووٹ کا کوئی تھیلہ چوری ہوا، نہ ڈبے اٹھائے گئے۔‘
’کسی جان کا نقصان ہوا اور نہ ہی پنجاب کی ایڈمنسٹریشن کا فون بند ہوا۔ پنجاب کے 20 حلقوں میں پُرامن انتخابی عمل مکمل ہوا جو ملک میں ترقی، خوش حالی اور مہنگائی میں کمی کی نوید ہوگا۔‘
وفاقی وزیر اطلاعات مریم اورنگزیب نے کہا ہے کہ پنجاب کے 20 حلقوں میں پرامن انتخابی عمل مکمل ہو گیا ہے۔
اپنی ٹویٹ میں ان کا کہنا تھا کہ نے الیکشن کمیشن کا عملہ اغوا ہوا اور نہ کوئی ووٹ کا تھیلا چوری ہوا ہے۔
پنجاب کے وزیر داخلہ عطا تارڑ کہتے ہیں کہ ’پنجاب میں پُرامن الیکشن ہوا اور کہیں پر کوئی سنگین واقعہ پیش نہیں آیا اور نہ ہی کوئی جانی نقصان ہوا۔
’کچھ مقامات پر معمولی جھگڑے ہوئے مگر حالات پر قابو پا لیا گیا۔ پنجاب کو اسلحے سے پاک کرنے کی کی کیمپین بلا امتیاز اور موثر طریقے سے چلائی گئی اور ایک گولی نہیں چلی۔‘
پنجاب کے وزیر داخلہ عطا تارڑ کا کہنا ہے کہ لاہور اور شیخوپورہ سمیت مختلف شہروں سے تحریک انصاف کے ایسے کارکنان کو گرفتار کیا گیا ہے جو اسلحے کی نمائش کر رہے تھے۔
انھوں نے ٹوئٹر پر لکھا کہ ’اسلحے سے لیس غنڈوں کو لاہور کے مختلف مقامات سے گرفتار کر لیا گیا۔ کسی کو غنڈہ گردی نہیں کرنے دیں گے۔
’اطلاعات تھیں کہ شیخوپورہ میں پی ٹی آئی کے کارکنان اسلحہ لے کر پھر رہے ہیں اور امن خراب کرنے کی کوشش کریں گے۔ موقع پر کارروائی کرتے ہوئے، گرفتاری عمل میں لائی جا چکی ہے۔‘
گرفتاری کے موقع پر کارکنان سے خطاب کرتے ہوئے شہباز گل نے کہا کہ ’آپ نے پُرامن رہنا ہے‘ اور صوبے میں دھاندلی کے خلاف ’پہیہ جام ہڑتال کرنی ہے۔‘
مظفرگڑھ میں ضمنی انتخابات کے دوران ان کا کہنا تھا کہ ’میرے پر ایف آئی آر غلط ہے۔ سکیورٹی ایجنسی کے تین گارڈ میرے ساتھ تھے جنھیں وزارت داخلہ نے اجازت دی ہوئی ہے۔‘
’15 جون کے ضابطہ اخلاق کے مطابق میں نے کوئی خلاف ورزی نہیں کی۔‘
انھوں نے کہا کہ ’آج دھاندلی کر کے ہرایا گیا تو ہر شہر میں پہیہ جام ہڑتال کریں۔ امپورٹڈ حکومت کو پتا چلے یہ غیرت مندوں کی قوم ہے۔‘
اس خطاب کے بعد شہباز گل کو قیدیوں کی وین میں منتقل کر دیا گیا اور اب انھیں تھانہ شہر سلطان لے جایا جا رہا ہے۔
خیال رہے کہ وزیر داخلہ پنجاب عطا تارڑ کا کہنا تھا کہ شہباز گل کو اسلحے کی نمائش پر گرفتار کیا گیا ہے۔
سابق وزیر اعظم عمران خان نے کہا ہے کہ ’آج پنجاب حکومت نے غیر قانونی بیلٹ سٹیمپنگ کے ذریعے پنجاب کے انتخابات میں دھاندلی کے لیے تمام سرکاری/ریاستی مشینری کا کھلے عام استعمال کرتے ہوئے سپریم کورٹ کے احکامات اور انتخابی قواعد کی ڈھٹائی سے خلاف ورزی کی ہے۔
ان کا الزام ہے کہ ’پی ٹی آئی کے رہنماؤں کو گرفتار کرتے ہوئے ووٹرز کو ہراساں کیا گیا ہے۔ اس کے ذریعے ای سی پی (الیکشن کمیشن) نے آنکھیں بند کر لیں۔ عدالتیں اب کھلیں اور کارروائی کریں۔‘
شہباز گل کی گرفتاری کے بعد الیکشن کمیشن کا ایک مراسلہ سامنے آیا ہے جس میں چیف سیکریٹری اور آئی جی پنجاب کو حکم دیا گیا ہے کہ شہباز گل کو ضابطہ اخلاق کی خلاف ورزی پر گرفتار کیا جائے۔
اس کے مطابق شہباز گل نے الیکشن کمیشن کے ضابطہ اخلاق کے کلاز 15 اور 16 کی خلاف ورزی کی ہے۔
اس میں کہا گیا کہ ’شہباز گل مظفر گڑھ میں نقص امن کا باعث بن رہے ہیں۔ پولیس، انتظامیہ شہباز گل کو گرفتار کرکے الیکشن کمیشن کے احکامات پر عمل درآمد یقینی بنائے۔‘
مقامی ذرائع ابلاغ کے مطابق شہباز گل کو مظفرگڑھ کے تھانہ شہر سلطان منتقل کیا جا رہا ہے۔
الیکشن کمیشن کے مطابق پولنگ کا وقت پانچ بجے تک تھا اور اب پولنگ سٹیشن کے اندر موجود لوگوں کو ووٹ ڈالنے کا وقت ملے گا۔ اس کے بعد گنتی کا عمل شروع ہوجائے گا۔
چھ بجے کے بعد میڈیا کو ابتدائی غیر حتمی نتائج دینے کی اجازت ہوگی۔
رہنما تحریک انصاف شہباز گل کی میڈیا ٹیم نے تصدیق کی ہے کہ مظفرگڑھ میں انھیں گرفتار کر لیا گیا ہے۔
ٹوئٹر پر پیغام میں کہا گیا ہے کہ ’پولیس گردی پہلے سے علم تھا کہ فاشسٹ حکمران اپنے ڈوبتے اقتدار کے غم میں ہر حد تک جائیں گے یہی وجہ ہے کہ اس کے لیے ذہنی طور پر تیار ہو کر اپنے ساتھ کام کرنے والی ٹیم کو ہدایات گذشتہ روز ہی جاری کر دی گئی تھیں مر جائیں گے لیکن یزید کی بیعت نہیں کریں گے۔‘
مسلم لیگ ن کے مستعفیٰ رکن صوبائی اسمبلی جلیل شرقپوری نے ایک ویڈیو پیغام میں کہا ہے کہ ’شیخ رشید نے کسی کے کہنے پر آڈیو ریکارڈ کرائی اور وہ عمران خان کا دشمن ہے۔ میری شیخ رشید سے کوئی جان پہچان نہیں۔ عمران خان کو کہا تھا کہ علیم خان اس کے ساتھ نہیں ہے اور میری بات سچ ثابت ہوئی۔‘
خیال رہے کہ آج سے مقامی میڈیا پر جلیل شرقپوری سے متعلق عوامی مسلم لیگ کے رہنما شیخ رشید کی ایک مبینہ آڈیو گردش کر رہی ہے جس میں مبینہ طور پر ایک شخص کو یہ کہتے سنا جاسکتا ہے کہ ’پھر کل شرقپوری کو بھی آپ نے پیمنٹ دے دی۔‘
’جلیل شرقپوری ایک دیانتدار شخص ہیں‘
شیخ رشید نے بھی ایک ویڈیو پیغام جاری کیا ہے کہ جس میں وہ کہتے ہیں کہ وہ جلیل قرقپوری کا احترام کرتے ہیں۔
الیکشن کمیشن کی جانب سے بعض جماعتوں کے ان الزامات کی تردید کی گئی ہے کہ ووٹر فہرستوں میں ردوبدل کیا گیا۔
اس بیان میں کمیشن نے کہا ہے کہ ’اگر کسی ووٹر کا نام انتخابی فہرست میں موجود ہے تو وہ ووٹ ڈال سکتا ہے۔
’کسی بھی شخص کا الزام کہ اس کا ووٹ مردہ لسٹ میں ہے، یہ سراسر غلط اور بے بنیاد پراپیگنڈا ہے۔ انتخابی عمل کو خراب کرنے کی سازش ہے۔ عوام خبردار رہیں۔ اس پر یقین نہ کریں۔‘
وزیر اعظم شہباز شریف کا کہنا ہے کہ ’عمران نیازی کی ہر تقریر ان کے کسی عوامی عہدے کے لیے نااہل ہونے کا ثبوت ہے.
’پی ٹی آئی نے ان کی براہِ راست سر پرستی میں قومی اداروں پر کیچڑ اچھالنے کی منظم مہم چلائی، جس سے پاکستان کو نا قابلِ تلافی نقصان پہنچا۔ اقتدار کی ہوس میں عمران نیازی میکاویلین سیاست کا شرمناک باب رقم کر رہا ہے.‘