ዶናልድ ትራምፕ ኣቐዲሙ ኣብ ትሩዝ ሶሻል ኣብ ዝዘርግሖ ጽሑፍ "እቲ ተኹሲ ደው ምባል ሕጂ ተግባራዊ ኰይኑ ኣሎ። በጃኹም ኣይትጥሓሱዎ!” ኢሉ።
ምንጪ ስእሊ, POOL
ቀዳማይ ሚኒስተር ብሪጣንያ ኬር ስታርመር፡ ቀዳምነት ሃገሩ ድሕነት ኣብ ማእከላይ ምብራቕ ዝርከቡ ዜጋታት ምውሓስ ከም ዝዀነ ተዛሪቡ።
እታ ሃገር ንጹርን ቀጻልን ዕላማታት ከም ዘለዋን፡ እቲ ቀዳምነት "ኣብቲ ዞባ ዘሎ ህዝብና" ምሕላው ምዃኑን ገሊጹ።
ስታርመር፡ ዓባይ ብሪጣንያ ናብቲ ሰፊሕ ኲናት ክትጽንበር ከም ዘይትስሓብ ይገልጽ።
ንሱ ወሲኹ፡ ዓባይ ብሪጣንያ ካብ ኢራን ክመጽእ ዝኽእል ስግኣታት ደው ንምባል ክትሰርሕ ምዃና ግን ኣይሓብአን።
ምንጪ ስእሊ, EPA
ኣባላት ሃገራት ሕብረት ኤውሮጳ መጻብቦ ሆርሙዝ ንምኽፋት፡ ብወገን ኤውሮጳ እንታይ ክግበር ከም ዝኽእል ክዝትያ ምዃነን ሓላፊ ፖሊሲ ወጻኢ እቲ ሕብረት ገሊጹ።
ካጃ ካላስ ቅድሚ ኣብ ብራስለስ ዝካየድ ኣኼባ ሚኒስተራት ጉዳያት ወጻኢ ኣባል ሃገራት ናይቲ ሕብረት ኣብ ዝሃቦ ቃል፡ “ምኽፋት መጻብቦ ሆርሙዝ የርብሓና'ዩ፡" ከምዝበለ ማዕከን ዜና ሮይተርስ ሓቢሩ።
ግጭት ማእከላይ ምብራቕ ካብ ዝጅምር ኣትሒዙ ብርክት ዝበላ መራኽብ ነቲ ኣስታት 20% ነዳዲ ዓለም ዝሓልፈሉ መጻብቦ ክሓልፋ ኣብ ዝፈተናሉ እዋን መጥቃዕቲ ከም ዝበጽሐን ይግለጽ።
ፕረዚደንት ኣመሪካ ዶናልድ ትራምፕ፡ መሻርኽቲ ኣመሪካ ነዚ መጻብቦ ኣብ ምውሓስ እንተዘይሓጊዘን "መጻኢ ኔቶ ኣዝዩ ሕማቕ ክኸውን'ዩ፡" ክብል ኣፈራሪሑ'ዩ።
ብሰንበት፡ ቤት ጽሕፈት ቀዳማይ ሚኒስትር ብሪጣኒያ፡ ኬር ስታርመር "ኣብ ዓለማዊ መራኽብ ዝፍጠር ምዝንባዕ ንምውጋድ" ብዛዕባ ኣገዳስነት ምኽፋት መጻብቦ ሆርሙዝ ምስ ትራምፕ ከም ዝተዘራረበ ገሊጹ።
ምንጪ ስእሊ, EPA
ሚኒስተር ስራሕን ጡረታን ፓት ማክፋደን፡ ኣመሪካን እስራኤልን ኣብ ልዕሊ ኢራን ዝኸፈትኦ መጥቃዕቲ ኲናት ኔቶ ኣይኰነን ኢሉ።
ንሱ፡ ኪዳን ምክልኻል ኔቶ፡ ነቲ "ኣብ ማእከላይ ምብራቕ ንርእዮ ዘለና ዓይነት ኲነታት" ኣብ ግምት ብምእታው ከም ዘይተወደበ ተዛሪቡ።
ኔቶ ኣብ 1949 ብኣመካን ዓባይ ብሪጣንያን ሓዊሱ ብ12 ሃገራት ዝተመስረተ ልፍንቲ ምክልኻል ኰይኑ፡ ሓደ ካብቲ ቀንዲ መትከላቱ ድማ ኣብ ልዕሊ ሓንቲ ኣባል ሃገር መጥቃዕቲ እንትፍጸም ኣብ ልዕሊ ኩለን ዝፍጸም መጥቃዕቲ እዩ ዝብል እዩ።
ዶናልድ ትራምፕ ምስ ፋይናንሻል ታይምስ ኣብ ዝገበሮ ቃለ መሕትት፡ መሓዙት ሃገራት ነቲ ንዓለምለኻዊ መራኽብ ነዳዲ ወሳኒ ዝዀነ መጻብቦ ሆርሙዝ ንምውሓስ እንተዘይሓጊዘን "መጻኢ ኔቶ ኣዝዩ ሕማቕ፡" ክኸውን እዩ ምባሉ ይዝከር።
ሓላፊ ምክልኻል ነበር - ጀነራል ሰር ኒክ ካርተር - እውን ኔቶ "ሓደ ካብ መሓዙት ሃገራት ኣብ ምርጫ ኲናት ክኣቱን ድሕሪኡ ኩሉ ሰብ ክስዕብ ክግደድን ዝተዳለወ ኪዳን ኣይኰነን፡" ኢሉ።
ማክፋደን በዚ ርእይቶ ከም ዝሰማማዕ ብምግላጽ፡ ጀነራል ካርተር "ትኽክል" እዩ ብምባል፡ ነቲ ሕጂ ዘሎ ግጭት "ኲናት ኔቶ ዘኰነስ" "ስጉምቲ ኣመሪካን እስራኤልን" ክብል ይገልጾ።
ማክፋደን ወሲኹ "ንኔቶ ውፉያት ኢና፡" ይብል።
ምንጪ ስእሊ, Abiy Ahimed
ቀዳማይ ሚኒስትር ኣብዪ ኣሕመድ፡ እቲ መበል 16 መዓልቱ ዝሓዘ ኣብ ማእኸላይ ምብራቕ ዝካየድ ዘሎ ኲናት ስዒቡ "ነደዲ ብቑጠባ፡" ክንቀጥም ይግባእ ክብል ኣተሓሳሲቡ።
እቲ ቀዳማይ ሚኒስትር ብማሕበራዊ መራኸቢ ኣብ ዘሕለፎ መልእኽቲ፡ ነዳዲ ገዚአን ዝጥቀማ ሃገራት ከም ዝተሸገራ ብምግላጽ "ብቑጠባን ንመሰረታዊ ነገራትን ቀዳምነት ምሃብ፡" ኣገዳሲ እዩ ኢሉ።
ኣብ ዝሓለፈ ሰሙን፡ ሚኒስትር ገንዘብ ኣሕመድ ሸዴ፡ ምትእጉጓል ሰንሰለት ቀረብ ነዳዲ ክሳብ ክንደይ እዋን ከም ዝጸንሕ ስለ ዘይፍለጥ፡ ሕብረተሰብን ትካላትን ነዳዲ "ብልዑል ቁጠባ፡" ንክቀጥሙ ኣተሓሳሲቡ ነይሩ።
ብምኽያት እቲ ኲናት ዝተራእየ ወሰኽ ዋጋ "ዘስግእ" እዩ ብምባል ዝገለጾ እቲ ሚኒስትር፡ መንግስቲ "ኣብ ቀረባ ተወሳኺ ስጉምቲታት ቁጠባ ነዳዲ፡" ወግዓዊ ከም ዝገብር ኣፍሊጡ።
ኣብዪ ኣሕመድ ብወገኑ፡ ኣከፋፈልቲ ነዳዲ ኰነ ተጠቀምቲ ከምኡ'ዉን ነቁጣታት ነዳዲ ንመሰረታዊ ኣገልግሎት ቀዳነምት ክህቡን ብቑጠባ ክጥቀሙ ከም ዘለዎምን ኣተሓሳሲቡ።
ኣብ ማእከላይ ምብራቕ ምስ ኢራን ዝካየድ ዘሎ ኲናት ካብ ዝውላዕ ንድሓር፡ 20 ሚእታዊት ነዳዲ ዓለም ዝሓልፈሉ ወሽመጥ ሆርሙዝ ተጸልዩ'ዩ፤ ካብዚ ብዝሰገረ ኣመሪካ ኣብ ልዕሊ ትሕተ ቕርጺ ነዳዲ ኢራን ብዝፈጸመቶ መጥቃዕቲ ዋጋ ነዳዲ ብልዑል ዋጋ ወሲኹ ኣሎ።
በዚ ምኽንያት ዋጋ ነዳዲ ካብ 2022 ናብዚ ልዑል ወሰኽ ብምርኣይ ንበርሚል 120 ዶላር ይሽየጥ ኣሎ።
ነዚ ስዒቡ፡ ዓለምለኸ ኤጀንሲ ነዳዲ ዝለዓለ መጠን ዘለዎ ዕቑር ነዳዲ ብምውጻእ ንኤዥያን ሃገራት ኦሺንያን ከም ዘከፋፍል ገሊጹ።
ምንጪ ስእሊ, Getty Images
ደሴት ካርግ ካብ ገማግም ኢራን 28 ኪሎሜትር ርሒቓ እትርከብ ንእሽተይን ከውሒ ዝበዝሐን ደሴት'ያ።
እዛ ደሴት ዋላ ድኣ ንእሽተይ ትኹን'ምበር ብመዳይ ነዳድን ጸዓትን ኣብ ቁጠባ ኢራን ዘለዋ ኣበርክቶ ኣዝዩ ልዑል'ዩ።
ኣመሪካ ነዛ ደሴት ምጥቓዓ ከኣ ኣብ መትኒ ቁጠባ ኢራን ሃስያ ከተውርድ ስለዝደለየት'ያ ትመስል።
90 ሚኢታዊት ካብ ነዳዲ ኢራን በዚ ኣብዛ ደሴት ዘሎ መኣከቢ ነዳዲ ኣቢሉ'ዩ ዝሓልፍ።
ምንጪ ስእሊ, EPA
ኣመሪካ ስም ዝርዝር ናይቶም ብሓደጋ ነፋሪት ዝሞቱ ሽዱሽተ ወተሃደራታ ገሊጻ።
ኣቐድም ኣቢሎም ሽዱሽተ ወተሃደራት ኣመሪካ ኣብ ኩዌት ሓደ ድማ ኣብ ስዑድያ ተቐቲሎም ነይሮም'ዮም።
እዚ ኵናት ካብ ዝውላዕ፡ ብውሕዱ ኣርባዕተ ነፈርቲ ኣመሪካ ተሃሪመን ወዲቐን ኣለዋ፤ ሓንቲ ካብአን ከኣ እታ ንላዕለዋይ ሃይማኖታዊ መራሒ ኢራን ኣያቶላህ ዓሊ ኻመኒ ዝደብደበት ነፋሪት'ያ።
ኣብ መጀመርታ መጋቢት ሰለስተ ኤፍ-15 ዝዓይነተት ነፈርቲ ውግእ ኣመሪካ ኣብ ሰማያት ኩዌት ከምዝወደቃ ዝዝከር ኮይኑ፡ ኣብተን ነፈርቲ ዝነበሩ ሽዱሽትኦም ኣባላት ብሰላም ከም ዝወጽኡ'ውን ኣብ ግዜኡ ተሓቢሩ ነይሩ።
እዘን ስርሓት ቦይንግ ዝዀና ከይሲ-135 ሰራዊት ኣመሪካ ካብ መወዳእታ 1950ታትን መጀመርታ 1960ታትን ጀሚሩ ዝጥቀመለን ዓበይቲ ወተሃደራውያን ነፈርቲ'የን።
እዘን ነፈርቲ ኣብ ሰማይ እንከለዋ ንነፈርቲ ውግእ ነዳዲ ናይ ምምላእ ዓቕሚ ዘለወን ኮይነን፡ እተን ነፈርቲ ውግእ ነዳዲ ንምምላእ ናብ መሬት ወይ ናብ መራኽብ ከይዓለባ ኣብ ሰማይ ንነዊሕ ሰዓታትን ንነዊሕ ርሕቐትን ንክጉዓዛ የኽእለአን።
በዚ ከኣ ዓንዲ ሕቖ ሓይሊ ኣየርርን ሓይሊ ባሕርን ኣመሪካ እናተባሃላ'የን ዝግለጻ።
ምንጪ ስእሊ, IRTV
ሚልዮናት ኢራናውያን ኣብ ወጻኢ ሃገራት ዝመደበሮም ብቋንቋ ፋርስ ዝሰርሑ ሳተላይት ቲቪ ቻነላት እኳ እንተተኸታተሉ፡ ናጻ ሓበሬታ ምርካብ ግን ኣጸጋሚ ክኸውን ይኽእል እዩ።
ምጥፋእ ኢንተርነት፡ ሳንሱርን ዝተገደበ ቻነላትን፡ ኢራናውያን ኣብ እዋን ናዕብን ግጭትን ብዓቢኡ ካብቲ ዝተረፈ ዓለም ክፍለዩ ይገብሮም።
ቢቢሲ ንመጀመርታ ሰሙን ብመንግስታዊ መራኸቢ ብዙሃን ኢራን ብዛዕባ እቲ ኲናት ዝነበረ ሽፋን ኣድሂቡ ብዝገበሮ ምጽራይ፡ እቶም ጸብጻባት ኣብ ሲቪላዊ ስቓይ፡ ኢራን ኣብ ልዕሊ "ጸላእታ ሕነ ትፈዲ" ከም ዘላ፡ ንእስላማዊት ሪፓብሊክ ህዝባዊ ተኣማንነት ዝደፍኡ ምንባሮም ክግንዘብ ክኢሉ።
ኣብ ርእሲኡ ድማ ብእስራኤልን ኣመሪካን ዝተሃርሙ ወተሃደራውን መንግስታውን መሳለጥያታት ብዙሕ ኣቓልቦ ከም ዘይተዋህቦም ተዓዚቡ። ኣብነታት ዝተሰነዐ ሓበሬታ እውን ረኺቡ።
ምንጪ ስእሊ, Reuters
ሰብ መዚ ሕቡራት ኢመራት ዓረብ፡ ብሰንኪ "ምስ ሰብ ኣልቦ ነፈርቲ ዝተኣሳሰር ክስተት፡" መኽዘን ነዳዲ ድሕሪ ምጽላዉ ዝተላዕለ ባርዕ ሓዊ ስዒቡ ንሓደ ለይቲ በረራታት ንግዚኡ ከም ዝቋረጹ ኣፍሊጦም።
እዚ ድማ። ዝዀነ መጉዳእቲ ከም ዘየብጽሐ'ኳ እንተዘይተገልጸ፡ ድሕነት ህዝቢ ንምርግጋጽ "ኩሉ ኣድላዪ ስጉምትታት" ይወስዱ ከም ዘለዉ ገሊጾም።
ሰብ-መዚ ሕቡራት ኢመራት ዓረብ ኣብ ኤክስ ኣብ ዝጸሓፍዎ ጽሑፍ፡ ምቁራጽ ትራፊክ ኣየር "ድሕነት ኩሎም ተጓዓዝትን ሰራሕተኛታትን ንምርግጋጽ ዝውሰድ ናይ ጥንቃቐ ስጉምቲ፡" ምዃኑ ብምግላጽ፡ ተጓዓዝቲ ሓድሽ ሓበሬታ ንምርካብ ንዝጉዝሉ መገዲ ኣየር ክውከሱ መኺሮም።
ገለ በረራታት ናብቲ ኣብ ዱባይ ዝርከብ ካልእ ኣህጉራዊ መዓርፎ ነፈርቲ ኣል ማክቱም እውን ከም ዝተቐየረ ይፍለጥ።
ኣህጉራዊ መዓርፎ ነፈርቲ ዱባይ ኣብ 2025 ኣስታት 90 ሚልዮን ተጓዓዝቲ ኣአንጊዱ።
ሰብ መዚ እታ ሃገር፡ ኣብዚ እዋን እቲ ኣብቲ መዓርፎ ነፈርቲ ዱባይ ዘጋጠመ ባርዕ ኣብ ትሕቲ ቁጽጽር ከም ዘእተውዎ ገሊጾም።
ኢራን ኣብ እዋን ኲናት ናብ ሕቡራት ኢማራት ዓረብ ኣስታት 2000 ሚሳይላትን ሰብ ኣልቦ ነፈርትን ተኲሳ፤ መብዛሕትኦም ብመከላኸሊ ኣየር ተዓጊቶም።
ስዑዲ ዓረብ ኣብ ሓደ ለይቲ ብዓሰርተታት ዝቑጸራ ሰብ ኣልቦ ነፈርቲ ከም ዘውደቐትን ዒራቕን ኩዌትን ድማ ሓድሽ መጥቃዕቲ ከም ዘጋጠመን ገሊጻ።
ኣመሪካን እስራኤልን ኣብ ልዕሊ ኢራን መጥቃዕቲ ኣብ ዝቕጽላሉ ዘለዋ እዋን፡ ኣብ ቴህራን ከቢድ መጥቃዕቲ ቦምባታት ከም ዝተፈጸመ ዝሕብር ጸብጻባት ኣሎ።
ኣብታ ሰራዊት እስራኤል ንትሕተ- ቅርጺ ሕዝቦላህ ዒላማ ዝገብረላ ዘሎ ከተማ ቤይሩት'ዉን ዓቢ ፍንጀራ ከም ዝተሰምዐ ይፍለጥ።
ብሰንኪ ብሰሜንን ደቡብን ሕዝቦላህን ኢራንን ናብ እስራኤል ዘወንጨፉዎ ሚሳይል ድማ ኣብታ ሃገር ድምጺ ደወል መጠንቀቕታ ተሰሚዑ።
ምንጪ ስእሊ, Reuters
ኣብዚ ቀጥታዊ ጸብጻባት ኲናት ኣመሪካ፡ እስራኤልን ኢራንን ነቕርበልኩም።
ኣብ መንጎ ኣመሪካ፡ እስራኤልን ኢራንን ዝካየድ ዘሎ ኲናት ዝምልከት እዋናዊ ምዕባለታት ንምክትታል ምሳና ጽንሑ።
ኣብ ኵናት 'ዝዀነ ተዓዋቲ የለን' እዩ ዝበሃል፡ እቲ ንጹህ ህዝቢ'ዩ ምሒር ዋጋ ዝኸፍል።
ኣብዚ ኲናት ኢራን፡ ብሓፈሽኡ፡ ብደረጃ ዓለም ዋጋ ነዳድን ጽዓት ወሰኽ ኣብ ዘርኣየሉ ዘሎ፡ ብዙሓት ሃገራት ብቁጠባ ክህሰያ'የን።
እንተዀነ፡ ገለ ሃገራት ነዚ ዘሎ ዕግርግር ናብ ረብሐአን ብምቕያር ክኸስባ ክኽእላ'የን።
ኵናት ኣመሪካን እስራኤልን ምስ ኢራን፡ ኣብ ዞባ ማእከላይ ምብራቕን ዓለም ኣብ ቁጠባ ካብ ትጽቢት ወጻኢ ዝዀኑ ጽልዋታት ኣስዒቡ ይርከብ።
እቲ ኵናት ንሃገራት ወሽመጥ ዓረብን ሃገራት ማእከላይ ምብራቕን ከናውጸን እንከሎ ኣማኢታ ኣሽሓት ካብ ቤት ንብረቶም ንኽፈናቐሉ ምኽንያት ኰይኑ ኣሎ።
እቲ ኣብ ማእከላይ ምብራቕ ዝካየድ ዘሎ ኵናት፡ ካብቲ ዞባ ሓሊፉ፡ ብሰንኪ እቲ ሓደ ሕምሲት ነዳዲ ዓለም ዝመሓላለፈሉ መጻብቦ ሆርሙዝ ብኢራን ምዕጻዉ፡ ብዙሓት ሃገራት ብሕጸረት ነዳዲ ንክጥቐዓን ቅልውላው ቀረብ ነዳዲ ንከጋጥመንን ደሪኹ ኣሎ።
እዚ ኩሉ ኣብ ግምት ብምእታው፡ ካብ ኵናት ኢራን መን'የን ክኸስባ፡ መንከ ክህሰያ'የን?
ምንጪ ስእሊ, Getty Images
ሚኒስትሪ ጥዕና እስራኤል: መጥቃዕቲ ሚሳየል ኢራን ስዒቡ፡ ኣብ ዝሓለፉ 24 ሰዓታት ጥራይ፡ 108 ሰባት ጉድኣት በፂሑዎም ናብ ሆስፒታል ከምዝተወስዱ ኣፍሊጡ።
ካብዚኦም፡ እቶም 96 ቀሊል መጉዳእቲ በፂሑዎም፡ ትሽዓተ ድማ ገና ኩነታቶም ኣይተፈልጠን።
እቲ ግጭት ካብ ዝጅምር ኣትሒዙ፡ 3,195 ሰባት ኣብ ሆስፒታል ክኣትዉ እንከለዉ፡ 81 ድማ ክሳብ ሰንበት ኣብ ሆስፒታል ሓገዝ ይግበረሎም ከምዘሎ ይሕብር።
ሚኒስትሪ ጥዕና’ታ ሃገር፡ ዛጊድ ብዝሒ ሞት ኣይፀብፀበን።
እዚ ከምዚ ኢሉ እንከሎ፡ እስራኤል ኣብ ምዕራብ ኢራን ሓድሽ ማዕበል መጥቃዕቲ ብምፍናው ምላሽ ምሃብ ጀሚራ ኣለ።
ምንጪ ስእሊ, Getty Images
ትማሊ ቀዳም ኣብ ባቕዳድ ዝርከብ ኤምባሲ ኣመሪካ፡ ብሚሳይል ድሕሪ ምውቃዑ፡ ዜጋታቱ ካብ ዒራቕ ክወፁ’ቲ ኢምባሲ ሓድሽ መጠንቀቕታ ኣውጺኡ።
ኤምባሲ ኣመሪካ ኣብ ዝሃቦ መጠንቀቕታ፡ ዜጋታት ኣመሪካ "ብህፁፅ ካብ ዒራቕ ክወጹ" ከምዘለዎም ገሊጹ።
"ኣብ ዒራቕ ክፀንሑ ዝመረፁ ዜጋታት ኣመሪካ፡ ምስ ኢራን ምትእስሳራት ዘለዎም ግብረሽበራዊ ጉጅለታትን ምልሻታትን ከብፅሕዎ ዝኽእሉ ሓደጋታት ከስተውዕሉ" እቲ ኤምባሲ ጽሒፉ።
ኢራን፡ ኣብ መላእ ማእከላይ ምብራቕ ኣብ ዝርከባ ዒላማታት ኣመሪካ መጥቃዕቲ ኣብ ዝጀመረትሉ እዋን፡ ኣመሪካ ዜጋታታ ካብ ልዕሊ ደርዘን ሃገራት ክወፁ ሓቲታ’ላ።
ትማሊ ቀዳም፡ ኣገዳሲ ዘይኮኑ ሰራሕተኛታት መንግስትን ኣዝማድ ሰራሕተኛታት መንግስትን፡ ካብ ዖማን ክወጹ ብፍሉይ ከምዝኣዘዘት ድማ ሮይተርስ ሓቢሩ።
ምንጪ ስእሊ, Reuters
ሓይልታት ምክልኻል እስራኤል፡ ኢራን ናብ እስራኤል ገጻ ሚሳይላት ከምዝውንጨፈት ገሊጹ።
ከምኡ ድማ፡ ነቲ ስግኣት ንምዕጋት ስርዓታት ምክልኻል ይሰርሑ ከምዘለዉን ኣብ ገለ ከባቢታት ናብ ሞባይል ቴሌፎናት ናይ ጥንቃቐ መልእኽቲ ከምዝተላእከን ይገልጽ።
ህዝቢ ኣብ ውሑስ ቦታታት ክዀኑን፡ ክሳብ ተወሳኺ ሓበሬታ ዝወሃቦም ኣብኡ ክጸንሑን የጠንቅቕ።
ምስ እስላማዊ ሓለዋ ሰውራ ኢራን ምትእስሳር ዘለዎ ማዕከን ዜና ፋርስ ፡ ካብ ኢራን ሓድሽ ማዕበል ሚሳይላት ከምዝተወንጨፈ ሓበሩ።
ዕጡቕ ጉጅለ ሕዝቦላህ'ውን ሚሳይላት ወይ ሰብ ኣልቦ ነፈርቲ ናብ ሰሜናዊ ዞባታት እስራኤል ከምዝተኰሰ ይሕብር።
ምንጪ ስእሊ, Reuters
ዶናልድ ትራምፕ፡ ትማሊ ቀዳም ምስ ማዕከን ዜና ኤንቢሲ ኣብ ዝገበሮ ናይ ቴሌፎን ቃለ መሕተት፡ ኢራን ምስ ኣመሪካ ስምምዕ ንምግባር ትደሊ’ያ ድሕሪ ምባል፡ ንሱ ግን ስምምዕ ንምግባር ድሉው ከምዘይኰነ ገሊጹ።
ነቲ ምክንያት ከረድእ እንከሎ ኸኣ፡ እቲ ዘሎ ነጥብታት ምስ ኢራን ናብ ሓደ ስምምዕ ንምብጻሕ እኹል ከምዘይዀነ’ዩ ኣብሪሁ።
እንተኾነ እቲ ነጥብታት እንታይ ምዃኑ ኣብ ዝተሓተተሉ ክነግር ፍቓደኛ ኣይዀነን። እንተዀነ ኢራን ነዚ ሒዛቶ ዘላ ናይ ንዩክለር ምምዕባል መደባት ከተዕንዎ ኣለዋ ዝብል ሓደ ካብቲ ነጥብታት ምዃኑ ትራምፕ ጠቂሱ።
ኣብዚ ቃል መሕተት፡ ብዙሓት ሃገራት፡ ድሕነት መጻብቦ ሆርሙዝ ንምውሓስ እጃመን ከበርክታ ድልውነተን ኣረጋጊጸን ኣለዋ ኢሉ፤ እተን ሃገራት በዓል መን ምዃነን ግን ኣይገለጸን።
