‘నా భార్య ప్రసవ వేదన చూడలేక పిల్లలు పుట్టకుండా ఆపరేషన్ చేయించుకున్నాను’

తొలి కాన్పులో భార్య అనుభవించిన నొప్పులను చూసి అలెక్స్ వెస్ట్.. తీవ్రమైన మానసిక వేదనకు గురయ్యారు.

రెండో బిడ్డ ప్రసవం అయినా సులభంగా జరగాలని ఆయన కోరుకున్నారు.

అనుకున్నట్లుగానే ఆయన భార్యకు రెండో ప్రసవం బాగానే జరిగింది. కానీ, అలెక్స్ మాత్రం ఆ భయం నుంచి బయటపడలేక మానసికంగా నలిగిపోయారు.

'నేను చాలా భయపడ్డాను, ఆందోళన చెందాను. అసలు ఏం జరుగుతుందో అర్థం చేసుకునే, ఆ పరిస్థితిని తట్టుకునే శక్తి నాలో లేకపోయింది' అని అలెక్స్ గుర్తు చేసుకున్నారు.

మొదటి కాన్పు సందర్భంగా ఎదుర్కొన్న ట్రామా, ఆ తర్వాత వచ్చిన డిప్రెషన్ వల్ల నలుగురు పిల్లలను కనాలనే తమ ఆలోచనను విరమించుకున్నట్లు అలెక్స్ తెలిపారు.

తన ఇద్దరు కుమారులు పుట్టిన తర్వాత, కొన్ని నెలలు భారంగా గడిచినట్లు ఆయన గుర్తు చేసుకున్నారు. అదే సమయంలో తండ్రి కావడం అనేది ఒక గొప్ప అనుభూతి అని అందరూ తనకు చెబుతుండేవారని అలెక్స్ చెప్పారు.

''అందరూ చెప్పినట్లు ఆ ప్రేమను, అనుబంధాన్ని నేను అనుభూతి చెందలేకపోయాను'' అని అలెక్స్ అన్నారు.

మళ్లీ ప్రసవ వేదనను ఎదుర్కోవద్దనే ఉద్దేశంతో ఇద్దరు పిల్లలతోనే ఆగిపోవాలని వారు నిర్ణయించుకున్నారు.

ముఖ్యంగా ఇది తన నిర్ణయమే అయినందున, గర్భనిరోధక బాధ్యతను భార్యపైనే మోపడం సరికాదని భావించినట్లు అలెక్స్ చెప్పారు.

అందుకే వాసెక్టమీ చేయించుకోవాలని అలెక్స్ నిర్ణయించుకున్నారు. ఈ మధ్యకాలంలో ఇంగ్లండ్‌లో వేల మంది పురుషులు వాసెక్టమీ కోసం ముందుకు వచ్చారు.

వాసెక్టమీ ఆపరేషన్‌లో బీజకోశాల నుంచి మూత్రనాళానికి శుక్రకణాలను తీసుకెళ్లే నాళాన్ని (వాస్ డిఫరెన్స్) కట్ చేసి తర్వాత దాన్ని మూసివేస్తారు. దీన్ని సాధారణంగా 'ది స్నిప్' అని పిలుస్తారు.

ఎన్‌హెచ్‌ఎస్ ఇంగ్లండ్ లెక్కల ప్రకారం, 2024-25లో దాదాపు 26,385 వాసెక్టమీ ఆపరేషన్లు జరిగాయి. ఇది 2023-24తో పోలిస్తే 16% ఎక్కువ.

మిగతా వయస్సుల వారితో పోలిస్తే 35-39 ఏళ్ల మధ్య ఉన్న పురుషులే ఎక్కువగా ఈ శస్త్రచికిత్సను చేయించుకున్నారు. 2024-25లో వీరి సంఖ్య దాదాపు 8,400 వరకు ఉంది.

ఇంతకంటే తక్కువ వయస్సున్న పురుషులు కూడా ఈ శస్త్రచికిత్స వైపు మొగ్గు చూపడం కాస్త పెరిగిందని గణాంకాలు చూపుతున్నాయి.

2024-25లో ఇంగ్లండ్‌లో 30 ఏళ్లలోపు ఉన్న పురుషులకు దాదాపు 950 వ్యాసెక్టమీలు జరిగాయి.

గర్భం వస్తుందనే భయాలు..

మోర్ట్‌గేజ్ బ్రోకర్‌గా పనిచేస్తున్న అలెక్స్, 30 ఏళ్లు కూడా రాకముందే ఈ ఆపరేషన్ చేయించుకోవాలని నిర్ణయించుకున్నారు. అయితే భవిష్యత్‌లో అతను తన మనసు మార్చుకుంటాడేమోనని, 30 ఏళ్లు వచ్చేవరకు ఆగడం మంచిదని ఎన్‌హెచ్‌ఎస్ డాక్టర్ సలహా ఇచ్చారు.

అయితే ఆపరేషన్ కోసం ఆయన 2024 మేలో అపాయింట్‌మెంట్ తీసుకున్నారు.

ఆ ఆపరేషన్ చాలా త్వరగా, అసలు నొప్పే లేకుండా అయిందని అలెక్స్ చెప్పారు.

'నేను నా హెడ్‌ఫోన్స్ పెట్టుకుని దాదాపు మూడు పాటలు వినేలోపే... ఆపరేషన్ పూర్తయిందని డాక్టర్లు చెప్పారు. చాలా ఆశ్యర్యంగా అనిపించింది. ఎంత వేగంగా అయిపోయిందో' అని ఇప్పుడు 33 ఏళ్ల వయస్సున్న అలెక్స్ గుర్తు చేసుకున్నారు.

అమెరికాకు చెందిన సామ్ నైట్ కూడా తనకు అసలు పిల్లలే వద్దని ముందే నిర్ణయించుకున్నట్లు చెప్పారు.

గతంలో తన భాగస్వామి గర్భవతి అయినప్పుడు ఆమె అబార్షన్ చేయించుకుందని ఆయన తెలిపారు.

'నా వల్ల ఒకరు ఎంతటి ఇబ్బందికి గురయ్యారో అర్థమైంది. ఇలాంటిది మళ్లీ నా జీవితంలో ఎప్పుడూ జరగకూడదని అనుకున్నా' అని 22 ఏళ్ల వయస్సులో తన జీవితంలో ఎదుర్కొన్న అనుభవం గురించి సామ్ వివరించారు.

న్యూయార్క్‌లోని ఒక యురాలజీ క్లినిక్‌కు వెళ్లి, తాను వాసెక్టమీ ఎందుకు చేయించుకోవాలని అనుకుంటున్నాడో అక్కడి వైద్యులకు వివరించినట్లు సామ్ చెప్పారు.

ఈ ఆపరేషన్ మళ్లీ రివర్స్ చేయడం (మళ్లీ మునుపటిలా మార్చడం) కొన్ని ప్రత్యేక పరిస్థితుల్లో మాత్రమే కుదురుతుందని, కాబట్టి దీన్ని శాశ్వత శస్త్రచికిత్సగానే భావించాలని సామ్‌కు వైద్యులు సలహా ఇచ్చారు.

రివర్స్ చేయడానికి కఠినమైన నిబంధనలు

అంత చిన్న వయస్సులోనే వాసెక్టమీ కోసం రావడంతో తనను వైద్యులు కొన్ని ప్రశ్నలు అడిగినట్లు సామ్ చెప్పారు.

పిల్లలు వద్దనుకునేంత వయస్సు మీకింకా రాలేదని మీకు తెలుసా? భవిష్యత్తులో మీ మనసు మారే అవకాశం ఉందా? దీన్ని రివర్స్ చేయడం చాలా ఖరీదుతో కూడినదని అలాగే రివర్స్ చేయడం ఎల్లప్పుడూ విజయవంతం కాదని మీకు తెలుసా? వంటి ప్రశ్నలు తనను వైద్యులు అడిగినట్లు ఆయన వెల్లడించారు.

క్లినిక్‌ను సంప్రదించిన రెండు నెలల తర్వాత సామ్‌కు వాసెక్టమీ జరిగింది.

సామ్ తీసుకున్నది ఏమాత్రం పశ్చాత్తాపం లేని సరైన నిర్ణయమేనా అని నిర్ధారించుకోవడానికి డాక్టర్ అన్ని ప్రశ్నలు అడిగారు. ఇప్పుడు సామ్ వయస్సు 25 ఏళ్లు.

30 ఏళ్లలోపు పురుషులు వాసెక్టమీ చేయించుకున్న తర్వాత పశ్చాత్తాపపడే అవకాశాలు ఎక్కువగా ఉంటాయని ఎన్‌హెచ్ఎస్ స్కాట్లాండ్ గైడ్‌లైన్స్‌లో పేర్కొన్నారు.

వాసెక్టమీ అనేది చాలా సురక్షితమైన, ప్రభావవంతమైన ప్రక్రియ అని డాక్టర్ సారా సాల్కెల్డ్ చెప్పారు.

ఎన్‌హెచ్‌ఎస్‌తో పాటు ప్రైవేట్ రోగులకు వివిధ గర్భనిరోధక సేవలను అందించే 'ఎమ్‌ఎస్‌ఐ రీప్రొడక్టివ్ చాయిసెస్' క్లినిక్స్ మెడికల్ డైరెక్టర్‌గా సారా పనిచేస్తున్నారు.

అయితే, వాసెక్టమీ తమకు సరైనదేనా కాదా అని పురుషులు బాగా ఆలోచించుకోవడం చాలా ముఖ్యమని ఆమె హెచ్చరిస్తున్నారు.

''సరైన నిర్ణయం తీసుకోవడానికి కావాల్సిన పూర్తి సమాచారం వారికి ఉందో లేదో చూస్తాం. ఎవరైనా కోరుకుంటే కౌన్సెలింగ్ ఇస్తాం" అని సారా చెప్పారు.

దీనికి కఠినమైన నిబంధనలు ఉన్నందున ఎన్‌హెచ్‌ఎస్‌లో రివర్సల్స్ సాధారణంగా దొరకవని ఆమె తెలిపారు.

పురుషులకు కండోమ్‌లు లేదా మహిళల్లో అండం విడుదలయ్యే రోజుల్లో కలయికకు దూరంగా ఉండటం, లేదా కండోమ్ వాడటం వంటి ఇతర గర్భనిరోధక మార్గాలు కూడా అందుబాటులో ఉన్నాయని ఎన్‌హెచ్‌ఎస్ వెబ్‌సైట్ పేర్కొంది.

నేషనల్ సర్వే ఆఫ్ ఫ్యామిలీ గ్రోత్ ప్రకారం, 2022-23లో అమెరికాలో 18-29 ఏళ్ల వయస్సు ఉన్న పురుషుల్లో వాసెక్టమీ చేయించుకున్నవారు 1% కంటే తక్కువే ఉన్నారు. వారిలో సామ్ ఒకరు.

మామూలుగా 40 ఏళ్లు దాటిన పురుషులే ఎక్కువగా వాసెక్టమీ చేయించుకుంటున్నట్లు నేషనల్ సర్వే ఆఫ్ ఫ్యామిలీ గ్రోత్ సర్వేలో తేలింది.

ఆపరేషన్ జరిగిన ఒక వారం తర్వాత సామ్‌కు ఒకసారి తీవ్రమైన నొప్పి వచ్చింది. వాసెక్టమీలో ఇది అరుదుగా వచ్చే సైడ్ ఎఫెక్ట్ అని, అది కొన్ని గంటల తర్వాత తగ్గుతుందని డాక్టర్ సారా చెప్పారు.

దీనివల్ల ఇతర పురుషులు వాసెక్టమీ అంటే భయపడాల్సిన పనిలేదని సామ్ అంటున్నారు.

పిల్లలను పెంచడంలో ఉండే త్యాగాలు, ఆందోళనలు... ముఖ్యంగా తమ పిల్లలు భవిష్యత్తులో ఎలాంటి వారిగా తయారవుతారో అనే భయం వల్లే తాను 27 ఏళ్లకే వాసెక్టమీ చేయించుకున్నానని మరొక వ్యక్తి చెప్పారు.

తమకు అందుబాటులో ఉన్న అత్యంత ప్రభావవంతమైన గర్భనిరోధక మార్గంగా వాసెక్టమీని భావించామని కెంట్‌కు చెందిన అలెక్స్ దంపతులు అన్నారు. కొన్ని నెలల పాటు బాగా ఆలోచించాకే ఈ నిర్ణయం తీసుకున్నట్లు చెప్పారు.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)