Faransiiska oo wajahaya hubanti la'aan siyaasadeed kadib markii doorashadii baarlamaanka aaney cidna helin aqlabiyad

Tebin toos ah

1. 7 Juunyo 2026Maraykanka oo sheegay in ay soo rideen laba daroon oo Iran leedahay

   Milateriga Mareykanka ayaa sheegay in ay soo rideen labo diyaaradood oo kuwa daroonka ah oo ay Iran leedahay, xilli ay marayeen marin biyoodka Hormuz.

   Soo ridida diyaaradahan ayaa dhacday inkastoo ay jirto xabad joojin labada dal u dhaxeysa.

   Horaantii, Sabtidii, mowjado weeraro ah oo Iran ay ku qaaday Bahrain iyo Kuwait ayaa la soo sheegay.

   Sida laga soo xigtay Tehraan, weeraradan ayaa loo qaaday aargudasho weerarrada Maraykanku ku qaaday qalabka Raadaarka Iran ee ku sugan xeebaha dalkaas.

   Ilaalada Kacaanka ayaa sheegay in iyaga oo ka jawaabaya weerarka Maraykanku ku qaaday munaaradaha isgaarsiinta ee jasiiradaha Qeshm iyo Sirik, "laba saldhig oo ciidamada cirka Maraykanku ku leeyihiin Kuwait, oo lagu magacaabo Ali al-Salem, iyo tas-hiilaadka muhiimka ah ee haray ee qaybta shanaad ee ciidamada badda ee Maraykanka ee Baxrayn, ayaa lala beegsaday gantaalaha ballistic-ga ee ciidamada hawada sare ee IRGC."

   Mareykanka ayaa sidoo kale sheegay in ay ka jawaabeen dhaq-dhaqaaqyada diyaaradaha aan duuliyaha lahayn ee Iran ee ka dhanka ah maraakiibta isku dayaya in ay maraan marin biyoodka Hormuz.

2. 7 Juunyo 2026Gabar yar oo qayb ka ahayd tijaabo sir ah oo CIA-du ku kontorooleyso maskaxda qofka

3. 7 Juunyo 2026Wuqooyiga Kuuriya oo sheegtay in barnaamijkeeda Nukeerlka uusan gorgortan galin

   

   Xigashada Sawirka, Getty Images

   Kim Yo-jong, oo la dhalatay hogaamiyaha Kuuriyada Waqooyi Kim Jong-un, ayaa bayaan ay soo saartay ku sheegtay in barnaamijka Nukliyeerka ee dalkaasi uu yahay “mid aan gabi ahaanba gorgortan laga geli karin”.

   "Mawqifkayaga quwadda nukliyeerka ah maaha mid laga gor-gortami karo sinaba," ayay ku tiri bayaanka, oo lagu daabacay wargeyska rasmiga ah ee xisbiga talada haya, Rodong Sinmun.

   Waxa ay sidoo kale intaa ku dartay in Kuuriyada Waqooyi " aysan u dulqaadan doonin hanjabaad kasta."

   Kim Yo-jong, oo xubin muhiim ah u ah isgaarsiinta iyo siyaasadda arrimaha dibadda ee Kuuriyada Waqooyi, ayaa hadalkan jeedisay ka hor booqasho uu ku tagayo Kuuriyada Waqooyi madaxweynaha Shiinaha Xi Jinping, oo lagu wado in uu safarkiisa bilaabo Isniinta, uuna sii socdo ilaa Talaadada, sida ay sheegtay warbaahinta dowladda.

   Safarka Xi Jinping uu ku tagayo Pyongyang ayaa noqonaya kii ugu horeeyay ee uu ku tago Kuuriyada Waqooyi muddo 7 sano ah.

   Arrintan ayaa timid ka dib markii madaxweynaha Shiinaha uu kulamo xiriir ah la qaatay madaxweynaha Mareykanka Donald Trump iyo madaxweynaha Ruushka Vladimir Putin bishii hore.

   Shiinaha ayaa lagu tiriyaa mid ka mid ah taageereyaasha ugu muhiimsan ee dhanka siyaasadda iyo dhaqaalaha Kuuriyada Waqooyi.

4. 6 Juunyo 2026Waxuu lahaa 'Cod ka soo kacaya culayska dhulka oo u socda meelaha ay gaadhaan malaa'igtu'

5. 6 Juunyo 2026Ruushka oo "ku dhawaaqay inuu diyaar u yahay" inuu dib u dhiso kaabayaasha ku burburay dagaalka ee Iran

   Madaxa Xarunta Arrimaha Caalamiga ah ee Wasaaradda Tamarta ayaa ku dhawaaqay in Ruushka uu diyaar u yahay in uu kaalmeeyo dib u dhiska kaabayaasha dhaqaalaha Iran ee ku waxyeeloobay dagaalka.

   Mohammad Vali Alaedini ayaa yiri: "Kadib dhaawaca soo gaaray kaabayaasha muhiimka ah ee dalka intii uu socday dagaalka, ku xigeenka wasiirka tamarta ee Ruushka Marshavin ayaa ku dhawaaqay in dalkiisa uu diyaar u yahay ka qayb qaadashada dib u dhiska kaabayaashan." Waxa uu sheegay in marka la eego awoodda farsamo iyo awoodda sare ee shirkadaha Ruushka ee tamarta, ay muhiim tahay in Moscow ay ku dhawaaqdo inay diyaar u tahay inay ka qayb qaadato dib u dhiska iyo dayactirka kaabayaasha burburay iyo bixinta qalabka lagama maarmaanka ah.

   Alaedini ayaa rajo ka muujiyay in iskaashigan uu dhabaha u xaari karo xoojinta iyo ballaarinta iskaashiga farsamo iyo fulinta ee labada dal ee dhinacyada biyaha iyo korontada.

6. 6 Juunyo 2026Saddex askari oo Lubnaan u dhashay oo ay Israa'iil dishay

   

   Xigashada Sawirka, Lebanese Army

   Ciidamada Israel ee IDF, ayaa sheegay in ay bilaabeen baaritaan, kadib markii ay qirteen in ay fuliyeen weerar la sheegay in lagu dilay saddex askari oo Lubnaan ah aroornimadii hore ee saakay.

   Ciidamada Lubnaan ayaa sheegay in labo askari oo booliis ah iyo askari lagu dilay weerar lala beegsaday gaari ay saarnaayeen.

   Lubnaan ayaa weerarka ku tilmaantay mid waxashnimo ah.

   IDF ayaa sheegtay in gaariga loo waday dhanka ciidamada Israel oo ay ka shakiyeen, taasoo keentay in ciidamada ay rasaas furaan.

   Israa'iil iyo kooxda Hezbollah ayaa tan iyo bishii March ku dagaallamayay koonfurta Lubnaan.

7. 6 Juunyo 2026Baadari Leo oo ku amaanay Spain inaysan taageerin dagaalada Gaza, Iran, iyo Ukraine

   

   Xigashada Sawirka, EPA

   Baadari Leo, oo ah hogaamiyaha Catholics-ka adduunka, ayaa Sabtidii ku amaanay Spain “sida ay uga go’an tahay nabadda iyo midnimada ummadaha” mar uu booqasho rasmi ah ku yimid dalka.

   Dowladda Spain ayaa ka soo horjeesatay dagaalada Gaza,Iran, iyo Ukraine sanadihii u dambeeyay.

   “Waxaan aad ugu mahad-celinayaa dalkiina oo ah waddan had iyo jeer u hoggaansama shuruucda caalamiga ah iyo is-dhexgalka dhinacyada badan leh, qaabkanina wuxuu si cad u muujinayaa sida ay uga go’an tahay nabadda iyo wadajirka ummaddaha dhexdooda,” ayuu Pope-ka ka yiri xaflad soo dhaweyn ah oo lagu qabtay qasriga boqortooyada ee Madrid.

8. 6 Juunyo 2026Xiriirka Kubadda Cagta Iiraan oo ku eedeeyay dowladda Mareykanka in ay si takoor ah ula dhaqmeen xulka qaranka

   

   Xigashada Sawirka, Getty Images

   Xiriirka Kubadda Cagta Iiraan ayaa dhaleeceeyay ku guuldareysiga in fiisaha la siiyo qaar ka mid ah xulka qaranka ee loo diray Koobka Adduunka, iyagoo ku eedeeyay dowladda Mareykanka inay ku kacday habdhaqan takoor ah.

   Xiriirku waxa uu ku eedeeyay Maraykanka “in uu hab-dhaqankiisa naceybka ah ee ka dhanka ah qaranka Iran uu ku fidinayo dhanka ciyaaraha, isaga oo si wax ku ool ah u diidaya xulka qaranka Iran fursad uu ku helo xaalad siman oo uu ku tartamo takoor la’aan”.

   Xiriirka Kubadda Cagta ayaa sheegay in fiisaha aan la siinin "Maamulka iyo xubnaha muhiimka ah ee xulka qaranka Iran" iyo in ay daba gal ku sameyn doonaan arrinta FIFA.

   Bayaanka ayaa lagu yiri: "Martigeliyahu wuxuu abuuray jawi takoorid iyo sinaan la'aan iyadoo loo marayo takoorid iyo habdhaqan bartilmaameed ah oo ka dhan ah xulka qaranka kubada cagta Iran, taas oo ah faragelinta siyaasadeed ee isboortiga sida ugu xun."

   Hadda ka hor, Safaaradda Iran ee Turkiga oo tixraacaysa hadalladii Tom Barrack, Safiirka Maraykanka ee Turkiga, ee ku saabsanaa bixinta fiisaha ee ciyaartoyda Iran, ayaa qoray. "Maxaad u oran weyday fiisaha lama siinin qayb badan oo ka mid ah maamulka iyo shaqaalaha fulinta, la-taliyayaasha farsamada, iyo dadka kale ee qayb ka ah koox kasta oo kubbadda cagta ah?"

   "Hadda waxaad si ula kac ah oo takoorid ah ula dhaqanteen xulka qaranka kubadda cagta Iran heerkii ugu sarreeyay."

9. 6 Juunyo 2026Imaaraatka Carabta oo mamnuucay dadka safarka ah ee ka imaanaya Uganda, Congo iyo Koonfurta Sudan cabsi laga qabo Ebola

   

   Xigashada Sawirka, Getty Images

   Sida lagu sheegay war-murtiyeed ay si wada jir ah u soo saareen Hay’adda Gurmadka Qaran iyo Maareynta Musiibooyinka ee Imaaraatka Carabta (NCEMA) iyo Hay’adda Federaalka ee Aqoonsiga, Jinsiyadaha, Kastamka iyo Amniga Dekedda (ICP), awaamiirtan ayaa dhaqan galaysa maalinta Sabtida ee taariikhdu tahay 6-da Juun 2026.

   Mamnuucidda safarku waxay saamaynaysaa dhammaan fiisooyinka cusub, oo ay ku jiraan fiisaha booqashada, waxayna saamayn doontaa Jamhuuriyadda Dimuqraadiga ah ee Congo, Koonfurta Suudaan, iyo Uganda.

   Talaabooyinkan ayaa qeyb ka ah dadaallada Imaaraadka ay ku xoojinayaan diyaargarowga qaran ee looga hortagayo cudurka Ebola,” ayuu yiraahdeen mas’uuliyiinta Imaaraadka oo intaas ku daray in go'aanka la kordhin karo.

   Sida ku cad tilmaamaha cusub, dadka safarka ah ee si toos ah uga imanaya saddexda waddan ee liiska ku jira, ama kuwa ku soo gudbay, waa loo diidi doonaa inay galaan Imaaraadka.

   Dadka loo ogolaan doono in ay galaan Imaaraadka ayaa ah kuwa in ka badan 21 maalmood ka maqnaa dalalka ay dhibaatadu saameysey ka hor inta aysan imaan.

   Si kastaba ha ahaatee, hawlaha socdaalka hawada ee UAE iyo duulimaadyada xamuulka ayaa sii socon doona iyada oo aan hakad lahayn.

   Maamulka Imaaraatka Carabta ayaa xusay in ay la shaqeynayaan saaxiibada caalamiga ah si ay ula socdaan xaaladda ayna wax ka beddeli doonaan xannibaadaha ku saleysan qiimeynta halista ee socota.

10. 6 Juunyo 2026Sidee aabbe iyo wiilkiisu u badbaadiyeen Soomaali iyo dad kale oo ku jiray huteelkii gubtay ee Delhi?

11. 6 Juunyo 2026Garaadka Macmalka ah oo markii ugu horraysay loo adeegsaday in uu sameeyo tallaal

12. 6 Juunyo 2026Bahrain oo cambaareysay gantaalada Iran ay ku dhufatay Kuwait

    Wasaaradda arrimaha dibadda Baxrayn "si adag" u cambaaraysay weerarrada Iran ay ku qaaday "dhulkeeda" iyo Kuwait.

    Warka kasoo baxay wasaaradda ayaa lagu sheegay in weerarrada cusub ee Iran ay ku qaaday Bahrain iyo Kuwait ay yihiin “cadaawad cad” iyo “xadgudub weyn” oo ka dhan ah madax-banaanida labadan dal.

    Ilaalada Kacaanku waxay hore u sheegeen in iyaga oo ka jawaabaya weerarka Maraykanku ku qaaday munaaradaha isgaarsiinta ee jasiiradaha Qeshm iyo Sirik.

    “laba saldhig oo ciidamada cirka Maraykanku ku leeyihiin Kuwait, oo lagu magacaabo Ali al-Salem, iyo tas-hiilaadka muhiimka ah ee haray ee qaybta shanaad ee ciidamada badda Maraykanka ee Baxrayn, ayaa lala beegsaday gantaalaha ballistic-ga ah ee ciidamada cirka ee IRGC.

    Taliska dhexe ee Mareykanka (CENTCOM) ayaa sidoo kale ku dhawaaqay weerar lagu qaaday "goobaha radar-ka ilaalada xeebaha Iran ee Goruk iyo Jaziiradda Qeshm" si looga hortago "khatar degdeg ah oo ku wajahan isu socodka badda."

    War ka soo baxay militariga Mareykanka oo lagu soo daabacay shabakadda X-ayaa lagu sheegay in Iran ay todobo gantaal oo ballistic ah ku ridday dhanka Kuwait iyo Baxreyn saacado kadib markii ciidamada Mareykanka ay soo rideen afar diyaaradood oo is-miidaamin ah oo loo soo riday marinka Hormuz.

13. 6 Juunyo 2026Xiddigaha caanka ah ee Afrika ee ciyaari doona Koobka Adduunka 2026

14. 6 Juunyo 2026Baasaboor Soomaaliga oo mar kale isbeddel ka sameeyay liiska baasaboorrada caalamka

    Hay’adda Passport Index ee qiimeysa baasaboorrada caalamka ayaa cusbooneysiisay liiska ay kusoo bandhigto kala sarreynta aqoonsiga lagu safro ee waddamada adduunka.

    Sida muuqata waxba iskama beddelin qeybta ugu sarreysa ee liiska, balse waxaa la arki karaa in boos kala qaadasho cusub ay ka dhacay meesha ugu hooseysa.

    Baasaboorka Soomaaliya oo billowgii sanadkan u muuqday inuu sii xoogeysanayay ayaa dhowr jeer sameeyay isbeddel isugu jiray sare u kac iyo hoos u dhac.

    Hadda waxa uu baasaboorka Soomaaliya mar kale sameeyay soo rogaal celin uu ugu siqayo xagga sare.

    Dalalka Yemen iyo Pakistan oo baasaboorradooda uu horay uga sarreeyay midka Soomaaliya ayaa dhawaan sare u kacay, iyagoo hoos u riixay dal ku galka Soomaaliga.

    Halkaan ka sii aqri

15. 6 Juunyo 2026Colombia oo ku eedeeysay Mareykanka inuu faragelin ku sameeyay doorashadii dalkaasi

    

    Xigashada Sawirka, cbs

    Madaxweynaha xilka ka sii dagaya ee Colombia Gustavo Petro ayaa ku eedeeyay Mareykanka inuu faragelin ku hayo doorashada dalkaasi ka dib markii madaxweynaha Mareykanka Donald Trump uu taageeray musharaxa garabka midig ee Abelardo de la Espriella.

    Isagoo la hadlayay CBS News, Petro ayaa sheegay in taageerada Trump ay tahay faragelin lagu hayo arrimaha gudaha ee Colombia, iyadoo dalku isku diyaarinayo wareegga labaad ee doorashada madaxtinimo, kaasoo la qaban doono labada toddobaad ee soo socda.

    Trump ayaa baraha bulshada ku muujiyay taageerada uu u hayo Abelardo de la Espriella wuxuuna sheegay in natiijada doorashada ay muhiim u tahay mustaqbalka Colombia iyo xiriirka ay la leedahay Mareykanka.

    Petro ayaa sheegay in kala duwanaanshaha dowladiisa iyo Washington uu salka ku hayo mowqifyo siyaasadeed, isagoo ku andacoonaya in Mareykanka uu kasoo horjeeday dowladdiisa maadaama ay tahay garabka bidix.

    Hadalladan ayaa imaanaya iyadoo uu weli socdo tartan xooggan oo u dhexeeya musharraxa garabka midig iyo senetarka garabka bidix, Iván Cepeda, xilli ay isku diyaarinayaan dib-u-doorashada Colombia.

16. 6 Juunyo 2026Kooxda kubada cagta ee Iran ayaa heshay fiisaha ay ku galayaan Mareykanka

    

    Xigashada Sawirka, Reuters

    Xulka qaranka Iran ayaa helay fiisaha ay ku galayaan dalka Maraykanka ka hor tartanka koobka aduunka ee bilaabmi doona todobaadka soo socda.

    Ogolaanshaha ayaa la bixiyay kaliya 10 maalmood ka hor kulankooda ugu horreeya ee New Zealand, oo loo qorsheeyay in lagu ciyaaro Los Angeles 15ka Juun.

    War qoraal ah oo ay soo saareen saraakiishu ayaa lagu sheegay in la siiyay fiisaha Iran si ay uga qaybgasho koobka aduunka oo ay ku jiraan ciyaartoyda iyo shaqaalahooda taageera.

    War saxaafadeedka ayaa intaa ku daray in “Maraykanku aanu ogolaan doonin in kooxda Iran ay nidaamkan u adeegsadaan in ay argagixisada ku soo galiyaan Maraykanka si been abuur ah”.

    Xiriirka Kubadda Cagta Iiraan ayaan weli war rasmi ah ka soo saarin qaadashada fiisaha.

    Koobka Adduunka 2026 ayaa lagu wadaa inuu furmo 11-ka June, iyadoo Mareykanka, Canada iyo Mexico ay martigelinayaan ciyaaraha.

17. 6 Juunyo 2026Falastiini lagu dilay duqeymo ay Israa’iil ku garaacday teendhooyin qaxooti oo ku yaalla Khan Yunis

    Telefishinka Aljazeera ee Qatar ayaa sheegay in Israa’iil ay duqeysay teendhooyin ay degan yihiin Qaxooti Falastiiniyiin ah oo ku yaalla magaalada Khan Yunis ee koonfurta Marinka Gaza.

    Wararka ayaa intaasi ku daraya in hal qof uu ku dhintay weerarka, halka hal qof uu ku dhaawacmay.

    Shabakadda Telefishinka ayaa sheegtay in weerarka uu dhacay xalay.

18. 6 Juunyo 2026Wasiirka arimaha dibadda Iran oo u jawaabay madaxweynaha Lubnaan

    

    Xigashada Sawirka, .

    Wasiirka arrimaha dibadda Iran Cabbaas Araqchi, oo ka jawaabayay hadal ka soo yeeray madaxweynaha Lubnaan, Joseph Aoun, ayaa sheegay in haddii Lubnaan ay ahaan lahayd "kaar gorgortan" ee Iran ee wada xaajoodka Mareykanka, Tehran ay heshiis la gaari lahayd Washington waqti hore.

    Waxa kale oo uu ku qoray boggiisa X: "Sida ku cad hadalka Aoun, sida muuqata waa Iran cidda qabsatay shan meelood meel ka mid ah dhulka Lubnaan, barakicisay rubuc ka mid ah Lubnaan, oo ay duqeyso dalkiisa maalin kasta. Lubnaan ka badbaadi cadowgeeda dhabta ah, Mudane Madaxweyne."

    Joseph Aoun ayaa wareysi uu siiyay CNN ku sheegay in Iran iyo xulafadeeda Hezbollah ay Lubnaan u isticmaalayaan "qalab gorgortan" oo ay kula xaajoodaan Mareykanka.

    Waxa uu ku nuux-nuux saday: “Shacabka Lubnaan waxa ay xaaladdan ku bixinayaan qiimaha ugu badan, sababtoo ah danaha Iran oo ay ka daaleen dagaalka u dhexeeya Israa’iil iyo Xisbullah”.

19. 6 Juunyo 2026Kuwayt: Nidaamyada difaaca ayaa dhexda ka qabtay gantaallo iyo diyaaradaha aan duuliyaha lahayn

    Wakaaladda wararka rasmiga ah ee Kuwayt oo soo xiganaysa taliska guud ee ciidanka dalkaas, ayaa sheegtay in nidaamyada difaaca hawada ee Kuwayt ay Sabtidii maanta dhexda ka qabteen gantaallo iyo diyaaradaha aan duuliyaha lahayn oo weerar ku ahaa dalkaasi.

    Taliska Guud ee Ciidanka Kuwayt ayaa intaas ku daray in qaraxyada la maqlayay ay ahaayeen kuwo ka dhashay markii dhexda laga qabtay bartilmaameedyadaas oo ay gubeen nidaamyada difaaca.

    Hoggaanka ciidanka Kuwayt ayaa ku boorriyay muwaadiniinta inay raacaan habraacyada badbaadada iyo amniga ee ay soo saareen hay'adaha mas'uulka ka ah.

20. 6 Juunyo 2026Iiraan oo ka hadashay 'weerar ay ku qaadday maraakiibta Maraykanka'

    

    Xigashada Sawirka, Getty Images

    Kacaanka Iiraan ayaa sheegay in "laba xero oo ciidammada cirka Maraykanka ay ku leeyihiin Kuwayt oo magacyadooda lagu sheegay Cali Al-Saalim, iyo tashiilaadkii muhiimka ahaa ee u hadhay Guutada Shanaad ee Ciidanka Badda Maraykanka ee Baxrayn, lagu beegsaday gantaallada balastikada ah oo ay rideen Ciidammada Cirka IRGC."

    Kacaanka Iiraan ayaa sheegay in saaka, afar markab oo nooca shidaalka qaada ah oo ay "kiciyeen isla markaana horkacayeen milatariga Maraykanku oo baal maray digniinaha loo hore loo soo saaray ee ka soo baxay Ciidanka Badda ee IRGC, ay damceen in ay si sharci-darro ah uga baxaan Marinka Hormuz.

    Digniinta kaddib, mid ka mid ah maraakiibta shidaalka ayaa la beegsaday oo la joojiyay, halka maraakiibtii kalena ay dib u laabteen."

    Bayaanka IRGC ayaa lagu sheegay in dhacdadan kaddib, "diyaaradaha aan duuliyaha lahayn ee Maraykanku ay laba gantaal ku dhufteen goob isgaadhsiineed oo ku taal Qeshm.