Faransiiska oo wajahaya hubanti la'aan siyaasadeed kadib markii doorashadii baarlamaanka aaney cidna helin aqlabiyad

Tebin toos ah

1. 17 Maajo 2026Maxaa lagu sheegay ujeedada socdaalka wasiirka arrimaha gudaha Pakistan uu ku gaaray Iiraan

   Pakistan ayaa sii wada dadaallada diblomaasiyadeed ee lagu doonayo in lagu fududeeyo wada-xaajoodyada hakadka galay ee u dhexeeya Iran iyo Maraykanka , iyadoo wasiirka arrimaha gudaha ee Pakistan Mohsin Naqvi uu Sabtidii gaaray Tehran, sida ay sheegtay warbaahinta Iiraan.

   Wakaaladda Tasnim News Agency ayaa soo warisay in Naqvi uu “u yimid Jamhuuriyadda Islaamiga ah qayb ka mid ah booqasho rasmi ah oo laba maalmood ah, taas oo ka mid ah dadaallada Pakistan ee fududeynta wada-hadallada iyo horumarinta nabadda gobolka.”

   Wasiirka arrimaha gudaha ee Iiraan Eskandar Momeni ayaa qaabilay dhiggiisa Pakistan, iyadoo booqashadan ay timid maalmo kaddib booqasho uu sameeyay Taliyaha Ciidanka Pakistan Asim Munir, sida ay sheegtay AFP.

   Pakistan ayaa sii wada dadaallada dhexdhexaadinta ee u dhexeeya Maraykanak iyo Iran, kaddib markii ay martigelisay kulamo heer sare ah oo u dhexeeyay wafdiyo ka kala socda labada dal bishii hore.

   Xabbad-joojinta lagu tilmaamay inay tahay “mid jilicsan,” oo bilaabatay 8-da Abriil, ayaa gacan ka geysatay in la xakameeyo xiisaddii ka dhalatay weerarradii ay Maraykanka iyo Israa’iil oo isku dhana ku qaadeen Iiraan 28-kii Febraayo.

   Warbixinnada la xaqiijiyay ayaa muujinaya in Pakistan ay sii wado doorkeeda dhexdhexaadinta, iyadoo wada-hadallada u dhexeeya Washington iyo Tehran ay weli yihiin kuwo adag oo aan si buuxda loo heshiin.

2. 17 Maajo 2026Qiso xanuun badan: Laba arrimood filo hadii aad guursato qof ajanabi ah

   Soomaalidu waxay ka mid tahay bulshooyinka aduunka sida wayn u ilaaliya hanaanka guurka iyo isdhexgalka,waxaa jirta sheekooyin badan oo la xidhiidha Guurka.

   Soomaalida dhexdeeda waxaa ku badan haybsooca sida in laysku diido laba qof ee is doortay iyada oo la tixraacayo qoysaska ay lamaanuhu ka soo jeedaan arintan ayaa ah faquuq mudooyin soo jiray.

   Soomaali badan ayaa u qaxday dalka dibadiisa gaar ahaan wadamada reer galbeedka,dhaqanka guurka soomaalidu waxba iskama aysan badalin marka ay timaado guurka ajanabig iyo soomaalida

   Arintan ayaa keentay in ay yaraadaan isdhex galka soomalaida iyo bulshooyinkii ay u tageen.

   Halkan ka sii akhri sheekada

3. 17 Maajo 2026Iiraan oo war ka soo saartay dilka hoggaamiye sare oo ka tirsan Xamaas

   Wasaaradda arrimaha dibadda ee Iiraan ayaa si “xooggan” u cambaareysay dilka Ezzeddine Haddad, oo ahaa taliyaha guud ee Qassam Brigades, iyo sidoo kale xaaskiisa iyo ilmihiisa.

   War-saxaafadeedka wasaaraddu ayaa lagu sheegay: “Ficilkan argagixiso iyo dilalka la midka ah waa qayb ka mid ah qorshaha dembiyeed ee Israa’iil l ee lagu doonayo in si gumeysi ah loogu tirtiro Falastiin.”

   Wasaaradda Arrimaha Dibadda ee Iiraan ayaa sheegtay in 'shaki la'aan, khaarajinta taliyayaasha iska caabinta iyo haldoorka reer Falastiin aysan kaliya carqaladeyn doonin dugsiga iyo dhabbada iska caabinta, laakiin ay sidoo kale dhiirigelin doonto socotada iyo dagaalyahannada ku taagan dhabbada sharafta iyo xorriyadda Falastiin.'"

   Ra'iisul Wasaare Benjamin Netanyahu iyo Wasiirka Gaashaandhigga Israel Katz ayaa bayaan wadajir ah ku sheegay in Ezzedine Haddad uu "mas'uul ka ahaa dilka, afduubka, iyo dhaawicidda kumanaan shacab Israeli ah iyo ciidamada IDF)."

   Aaska Izz al-Din Haddad ayaa Sabtidii lagu dilay magaalada Qasa.

   In kasta oo ay jirto xabbad-joog tan iyo bishii Oktoobar, haddana dawladda Israa'iil waxay sheegaysaa inay weli u leedahay awood ay ku beegsato xubnaha Xamaas.

4. 17 Maajo 2026Kooxda Xisbullah oo war cusub soo saaray

   Kooxda Xisbullah ayaa sheegtay in ay weerareen bartilmaameed ciidan oo ku yaalla waqooyiga Israa’iil, iyadoo xabbad-joojin jilicsan oo u dhexeysay Lebanon iyo Israa’iil ay ku guuldareysatay inay soo afjarto dagaalka billowday 2-dii Maarso.

   Kooxda ay taageerto Iiraan ayaa bayaan ku sheegtay in ciidamadeedu ay bartilmaameedsadeen “xerada Yaara” iyagoo adeegsanaya “koox diyaarado weerar ah oo aan duuliye lahayn.”

   Xisbullah ayaa horey u shaacisay dhowr weerar oo ka dhan ah ciidamada Israa’iil ee ku sugan koonfurta Lebanon, halkaas oo, sida ay kooxdu sheegtay.

5. 16 Maajo 2026Asal ahaan dalka uu ka soo jeedo ninka shilka argagaxa leh ka gaystay Talyaaniga

   Nin ayaa baabuurkiisa jiirsiiyey dad lugeynayay hareeraha wadada magaalada Modena ee waqooyiga Talyaaniga, isagoo dhaawacay siddeed qof, afar kamid ahna dhaawacoodu aad ayuu u culus yahay, sida ay sheegeen masuuliyiintu.

   Dadka dhaawacmay waxaa kamid ah haweeney la sheegay in labada lugood burrbureen..

   Kadib markii gaarigu ku istaagay daaqadda dukaan, darawalkii ayaa kasoo degay isagoo sita mindi, wuxuuna dhaawacay qof waddada marayay oo isku dayay inuu cayrsado, kahor inta aan tuhmanaha la qaban oo la xakamayn.

   Tuhmanaha oo 31 jir ah ayaa masuuliyiintu ku sheegeen inuu yahay muwaadin Talyaani ah oo asal ahaan kasoo jeeda Morocco.

   Ra’iisul Wasaaraha Giorgia Meloni ayaa dhacdadan ku tilmaantay “mid aad u daran.”

   Dhacdadan ayaa dhacday abaaro 16:30 (14:30 GMT), markii gaariga oo ku socday xawaaraha sare uu dadka lugaynayay ku jiiray jidka Via Emilia oo ku dhow kaniisadda caanka ah ee Modena, oo dhanka koonfur-bari ka xigta magaalada Milan.

   "Waxaan arnayn gaariga oo soo dhowaanaya, wuxuuna ku socday dhanka cidhifka wadada," ayuu yiri qof goobjooge ah.

   "Si kedis ah ayuu xawaaraha u kordhiyay, wuxuu ku socday ugu yaraan 100km Saacadii)."

   "Waxaan arnayn dad hawada u duulaya," ayuu goobjoogei u sheegay warbaahinta Talyaaniga.

   Duqa magaalada Modena, Massimo Mezzetti, ayaa sheegay inay u muuqato in darwalku "uu si ula kac ah gaariga u mariyay dhabaddii dadka lugaynayay, isagoo jiiray dhowr qof, ka dibna ku dhacay daaqadda dukaan."

   "Ka dib wuxuu ka soo degay gaarigiisii, wuxuuna la soo baxay mindi," ayuu yiri Mezzetti.

6. 16 Maajo 2026Farsamo cusub oo rajo siinaysa ragga hore loogu sheegay inay madhalays yihiin

   Tignoolajiyad cusub oo ku shaqaysa AI ayaa heshay unugyada shahwada ee rag loo sheegay inaysan lahayn shahwo, taas oo siinaysa lammaane sannado badan isku dayayay inay carruur helaan fursad cusub.

   Waxay ahayd horraantii Nofeembar 2025 markii Penelope ay wicitaan ka heshay dhaqtarkeeda iyadoo baabuur wadata kuna sii jeedda gurigeeda New Jersey, Mareykanka. Warkaasi wuxuu ahaa mid ay aad u sugaysay: ka dib laba sano iyo bar oo dhibaato ah, Penelope ugu dambayn uur ayay yeelatay.

   Ka dib tijaabooyin badan, Penelope iyo ninkeeda Samuel (magacyadu waa la beddelay si loo ilaaliyo iyaga) waxay ogaadeen in Samuel uu qabo Klinefelter syndrome, oo ah xaalad hidde-side oo ku dhacda ragga leh hal koromosoom oo X ah oo dheeraad ah.

   Badanaa lama ogaado ilaa qaan gaarnimo. Dadka qaba xaaladdan inta badan waxay soo saaraan shahwo aad u yar ama gebi ahaanba ma soo saaraan, waana xaalad loo yaqaan azoospermia. Qiyaastii 10% ragga aan wax dhalin ayaa la kulma azoospermia.

   Iyadoo aad u faraxsan isla markaana yaabban, Penelope waxay sugaysay ilaa Samuel uu guriga yimaado si ay ugu sheegto warka. "Wajigiisu wuxuu ahaa mid uu ka muuqday isbeddel shucuur," ayay tiri. "Wuu ooyay… in la gaaro heerkan waxay qaadatay dadaal, waqti iyo cilmi baaris badan. In kasta oo aan haysannay hal embriyo oo keliya, haddana wuu hirgalay. Aad ayaan u faraxnay."

   Halkan ka sii akhri sheekada

7. 16 Maajo 2026Trump oo sheegay war weyn oo uu sheegay inuu ku raacay madaxweynaha Shiinaha

   Madaxweynaha Maraykanka Donald Trump ayaa sheegay in Madaxweynaha Shiinaha Xi Jinping uu ku raacay in Tehran ay tahay inay dib u furto marin-biyoodka Strait of Hormuz, inkastoo Shiinaha aanu muujin wax calaamad ah oo muujinaysa inuu arrinta ka dhex muuqan doono.

   Trump, oo Jimcihii ka laabtay Beijing kadib laba maalmood oo wada-hadallo ah oo uu la yeeshay Xi, ayaa sheegay inuu ka fiirsanayo in la qaado cunaqabateynta Maraykanka ee saaran shirkadaha shidaalka Shiinaha ee iibsada shidaalka Iran. Shiinaha ayaa ah dalka ugu weyn ee iibsada shidaalka Iran.

   Trump ayaa yiri: “Ma codsanayo wax raalli-gelin ah, sababtoo ah marka aad codsato raalli-gelin, waa inaad adiguna wax beddelkeeda sameysaa,” isagoo ka jawaabayay su’aal uu wariye ku weydiiyay diyaaradda Air Force One oo ku saabsan in Xi uu sameeyay ballan adag oo uu cadaadis ugu saarayo Iran inay dib u furto marin-biyoodka.

8. 16 Maajo 2026Xog ku saabsan wadahadal dhexmaray FIFA iyo IFF- Iiraan oo ka dhacay Turkiga

   Xoghayaha Guud ee FIFA iyo Mehdi Taj, madaxweynaha Xiriirka Kubadda Cagta Iran, ayaa maanta ku kulmay Istanbul.

   Ilo xog-ogaal ah ayaa wakaaladda wararka Reuters u sheegay in Matthias Grafström la rabay inuu “u xaqiijiyo” masuuliyiinta Iran ka qaybgalka Iran ee Koobka Adduunka intii uu socday kulankan.

   Iran ayaa loo qorsheeyay inay saddexdeeda kulan ee heerka guruubyada Koobka Adduunka ku ciyaarto Maraykanka, balse tan iyo weerarkii Maraykanka iyo Israa’iil ku qaadeen Iran 28 Febraayo, ka qaybgalka xulka qaranka Iran ee tartanka oo dhici doona ayaa shaki galay.

   Hubanti la’aanta ku saabsan xaaladda Iran ayaa sii xoogaysatay kadib markii Mehdi Taj laga mamnuucay inuu galo Canada sababo la xiriira xiriirka uu la leeyahay Ciidanka Ilaalada Kacaanka Islaamiga ah (IRGC). Wuxuu u safrayay Vancouver si uu uga qayb galo shir ay qabanaysay FIFA, balse waxaa loo diiday gelitaanka Canada.

   iyadda Islaamiga ah ee Iran, isla xilligii weerarrada Maraykanka iyo Israa’iil ay dhaceen, waxay markii hore shaacisay in xulka qaranka Iran ay u badan tahay inuusan ka qayb geli doonin Koobka Adduunka, balse markii dambe masuuliyiinta wasaaradda ciyaaraha Iran waxay ka qaybgalka xulka ku xireen go’aan ka soo baxa Golaha Sare ee Ammaanka Qaranka.

   Maraykanka iyo Canada, oo si wadajir ah ula martigelinaya Koobka Adduunka dalka Mexico, ayaa Ciidanka Ilaalada Kacaanka Islaamiga ah (IRGC) ku tilmaamay “urur argagixiso” waxayna shaaciyeen in aysan dalalkooda u oggolaan doonin dadka xiriirka la leh ciidankaas.

   Xulka qaranka kubadda cagta Iran ayaa lagu wadaa inuu laba maalmood gudahood u ambabaxo xero tababar oo ku taalla Türkiye.

9. 16 Maajo 2026Ruushka iyo Imaaraadka Carabta oo ka wadahadlay dagaalka Iiraan

   Madaxweynaha Ruushka Vladimir Putin ayaa sabtida maanta kalahadlay Madaxweynaha Imaaraadka Carabta Mohammed bin Zayed Al Nahyan arrimaha la xiriira dagaalka Iran.

   Sida lagu sheegay bayaan kasoo baxay Kremlin-ka, “labada dhinac waxay carrabka ku adkeeyeen muhiimadda ay leedahay sii wadista geeddi-socodka siyaasadeed iyo diblomaasiyadeed ee lagu doonayo in lagu gaaro heshiisyo nabadeed oo ku saleysan tanaasul iyo is-afgarad.”

   Mr. Putin ayaa sidoo kale uga mahadceliyay Imaaraadka taageerada ay ka geystaan arrimaha bani’aadannimo ee la xiriira dagaalka Ukraine.

   Xiisadda u dhaxaysa Iran iyo Imaaraadka Carabta ayaa sii korortay tan iyo markii uu billowday dagaalka Maraykanka iyo Israa’iil ay kula jiraan Iran iyo weerarrada aargudashada ah ee Iran ka fulisay gobolka.

10. 16 Maajo 2026Saddex waxyaabood oo aad ku yarayn karto gabowga maskaxda

11. 16 Maajo 2026Yaa dhisay Kacbada? Goorma ayaana la dhisay?

12. 16 Maajo 2026Xamaas oo xaqiijisay in taliye sare lagu dilay duqeyn cirka ah oo Israa'iil ay geysatay

    Sarkaal ka tirsan Xamaas ayaa BBC-da u xaqiijiyay in Izz ad-Din al-Haddad, oo ahaa taliyihii garabka hubaysan ee kooxda, lagu dilay weerar cirka ah oo Israa'iil ay ka geysatay magaalada Gaza Jimcihii.

    Ra'iisul Wasaaraha Israa'iil Benjamin Netanyahu iyo Wasiirka Difaaca Israa'iil Katz ayaa bayaan wadajir ah oo ay soo saareen ku sheegay in Haddad uu "mas'uul ka ahaa dilka, afduubka iyo dhaawaca kumanaan rayid ah oo Israa'iiliyiin ah iyo askarta IDF [Ciidamada Difaaca Israa'iil]".

    Israa'iil waxay ku tilmaantay "mid ka mid ah naqshadeeyayaasha weerakii Oktoobar 7".

    Dagaalkan ayaa ah kii ugu dambeeyay ee Israa'iil ay ka geysato Gaza inkastoo ay xabbad joojin la gashay Xamaas.

13. 16 Maajo 2026Maxay kawada hadleen Safiirka Turkiga iyo Madaxweynaha Soomaaliya

    Saafiirka Turkiga u fadhiya Soomaaliya Alper Aktas ayaa kulan madaxtooyada kula qaatay Madaxweynaha Soomaaliya Xasan Sheekh Maxamuud.

    Kulanka kadib ayaa hadal qoraal ah oo safiirku uu ku daabacay barta Twitter waxa uu ku sheegay sida tan: Waxa si sharaf leh noo qaabilay Madaxweynaha Jamhuuriyadda Federaalka Soomaaliya Mudane Xasan Sheekh Maxamuud.

    Intii uu socday kulanka, waxa aan mar kale adkaynay taageeradeena joogtada ah ee ku aaddan midnimada iyo wadajirka Soomaaliya, ilaalinta madaxbannaanideeda, amnigeeda iyo barwaaqadeeda, ayuu sheegay safiirku.

    Safiirka aya intaas ku daray, waxa aan si mug leh uga mahadcelineynaa Madaxweynaha soo dhoweyntiisa iyo martigelintiisa diirran.

14. 16 Maajo 2026Chelsea oo oo wajaheysa Man City ciyaarta kama danbeysta ee koobka FA Cup

    Waxa goor dhaw ka bilaabaneysa garoonak Wembley Stadium ee magaalada London ciyaarta kama danbeysta ah ee koobka FA, taas oo dhex mari doonto koocaha Chelsea Vs Man City.

    Amiir William, oo ah taageere kubadda cagta oo xamaasad leh isla markaana ah taageere u ah Xiriirka Kubadda Cagta, ayaa ku sugan Wembley wuxuuna koobka FA guddoonsiin doonaa kabtanka kooxda ku guuleysta ciyaarta.

15. 16 Maajo 2026Michael Carrick oo loo magacaabayo tababaraha rasmiga ah ee kooxda Manchester United

    Manchester United ayaa heshiis la gaartay Michael Carrick si uu u noqdo tababaraha joogtada ah ee kooxda.

    Habka rasmiga ah ee isdhaafsiga qandaraasyada ayaa hadda socda, iyadoo la filayo in lagu dhawaaqo 48-ka saacadood ee soo socda.

    Sida ay wax u socdaan waxaa jira shaki ku saabsan in qaab ciyaareedka la dhameystiri karo ka hor kulanka Axadda ee ay la ciyaarayaan Nottingham Forest, laakiin waxaa jira rabitaan ah in la dhammeeyo waqtigii loogu talagalay ciyaarta ugu dambeysa ee gurigooda ee xilli ciyaareedka.

    Carrick ayaa saxiixi doona heshiis bilow ah oo laba sano ah iyadoo la dooran karo 12 bilood oo dheeraad ah.

    Michael Carrick oo hadda ah tababare ku meel gaar ah ee kooxda Man Utd ayaa si wanaagsan ugu soo shaqeeyay Man Utd. Isagoo kooxda kasoo qaaday laga bilaabo kaalinta 14aad ee shaxda, ilaa kaalinta saddexaad iyo in ay u soo baxaan Champions League.

16. 16 Maajo 2026Dibad-baxyo iskasoo hor jeedo oo ka dhacaya magaalada London

    Tobanaan kun oo dibadbaxayaal ah ayaa iskugusoo baxay London si ay u sameeyaan laba mudaaharaad oo iska soo horjeeda - isu soo baxa UK oo uu soo qabanqaabiyay nin midigta fog ah oo lagu magacaabo Tommy Robinson, iyo dibadbax laguu taageerayo Falastiiniyiinta.

    In ka badan 4,000 oo askari oo booliis ah ayaa la geeyay caasimadda, waxayna maamulayaan waxa loogu yeero "aag kalq celinaya" labada dibadbax. Saraakiishu waxay sidoo kale isticmaalayaan diyaaradaha aan duuliyaha lahayn, fardaha booliiska iyo eeyaha, waxayna haystaan ​​​​gawaarida gaashaaman oo heeganka ku jira.

    Booliska Metropolitan-ka ayaa ku tilmaamay mid ka mid ah howlgallada booliiska ee ugu muhiimsanaa sannado badan.

    Marka laga soo tago dibadbaxyada, tobanaan kun oo taageerayaal kubadda cagta ah ayaa u socda garoonka Wembley si ay u ciyaaraan ciyaarta Finalka ee Koobka FA-ga galabnimada manta oo Sabti ah.

17. 16 Maajo 2026Madaxa CIA-da oo booqday Cuba iyadoo dhibaatada tamarta ay kasii darayso

    Agaasimaha CIA John Ratcliffe ayaa la kulmay dhiggiisa Cuba xarunta wasaaradda arrimaha gudaha ee Havana, ka dib markii Mareykanku uu dib u cusbooneysiiyay dalab gargaar ah oo dhan $100 milyan (£74 milyan) si loo yareeyo saameynta xayiraadda saliidda.

    War-saxaafadeed kasoo baxay Cuba ayaa lagu sheegay in kulanku uu ahaa isku day lagu horumarinayo wadahadalka, waxaana saraakiisha Mareykanka loo sheegay in Havana aysan khatar ku ahayn amniga qaranka Mareykanka.

    Horumarkan ayaa yimid iyadoo dowladda Mareykanka ay isku diyaarineyso inay dacwad ka gudbiso Raúl Castro oo lagu soo oogay dacwado ku saabsan soo rididdii laba diyaaradood oo yaryar 30 sano ka hor, sida laga soo xigtay CBS, oo ay bahwadaag yihiin BBC-da.

    Xaaladda Shidaalka oo ay sii xumeeyay xayiraadda shidaalka ee Mareykanka uu saaray dalka ayaa sababtay in isbitaallada aysan si caadi ah u shaqeyn karin, waxaana lagu qasbay iskuulada iyo xafiisyada dowladda inay xirmaan.

    Sarkaal ka tirsan CIA ayaa u sheegay CBS News in Mareykanku "uu diyaar u yahay inuu si dhab ah uga qayb qaato arrimaha dhaqaalaha iyo amniga, laakiin waa haddii Cuba ay sameyso isbeddello aasaasi ah".

    Madaxweynaha Cuba Miguel Diaz-Canel ayaa sheegay in halkii ay gargaar siin lahaayeen, xaaladaha si dhakhso ah loo fududeyn karo haddii Mareykanku uu qaado xayiraadda.

18. 16 Maajo 2026Adiga oo caato u muuqda hadana gudaha maka buurnaan kartaa?

19. 16 Maajo 2026Ciidamada Mareykanka iyo Nayjeeriya oo dilay hoggaamiye sare oo ka tirsan IS

    Madaxweynaha Nigeria Bola Tinubu ayaa xaqiijiyay dilka hoggaamiye sare oo ka tirsan Kooxda Daacish (IS) holwgal ay si wadajir ah u wada sameeyeen Mareykanka.

    "Ciidamadeenna Qalabka Sida ee Nigeria ee go'aanka leh, oo si dhow ula shaqeynayay Ciidamada Qalabka Sida ee Mareykanka, ayaa sameeyay hawlgal wadajir ah oo geesinimo leh oo dhabar jab xooggan ku keenay ciidamada Dowladda Islaamiga ah," ayuu Tinubu ku yiri hadal uu soo saaray.

    Hawlgalkan waxaa markii ugu horreysay ku dhawaaqay Madaxweynaha Mareykanka Donald Trump, kaas oo ku tilmaamay Abu-Bilal al-Minuki "hoggaamiyaha labaad ee ISIS adduunka oo dhan".

    Hawlgalkan waxaa markii ugu horreysay ku dhawaaqay Madaxweynaha Mareykanka Donald Trump, kaas oo ku tilmaamay Abu-Bilal al-Minuki "hoggaamiyaha labaad ee ISIS adduunka oo dhan".

    Al-Minuki waxa Washington ku tilmaantay Argagixiso Caalami ah oo si gaar ah loogu aqoonsaday sannadkii 2023.

    Dilkan ayaa calaamad u ah dib u dhac kale oo weyn oo soo gaaray kooxda Daacish (IS) ka dib dilkii hoggaamiyahooda Abu Bakr al-Baghdadi sanadkii 2019.

    Isagoo ku qoray barta Bulshada ee Truth Social,, Trump wuxuu sheegay in howlgalka wadajirka ah ee Afrika "si aan cillad lahayn loo fuliyay... si loo tirtiro argagixisada ugu firfircoon adduunka".

    Tinubu ayaa bayaan uu soo saaray ku sheegay in Al-Manuki la dilay "isagoo la socday dhowr ka mid ah saraakiishiisa, intii lagu jiray weerar ka dhacay xaruntiisa oo ku taal Harada Chad".

20. 16 Maajo 2026Xasan Sheekh: Muddo xileedka Dowladda waxa uu ku egyahay 15-ka May 2027.”

    Madaxweynaha Soomaaliya, Xasan Sheekh Maxamuud oo maalintii shalay ahayd Khudbad ka jeediyay munaasabad ku aadaneyd 15 May ayaa sheegay in waqti xileedka Baarlamaanka iyo Dowladda Soomaaliya ee madaxweynuhu ugu horeeyo “waxa u dhacayaa 15 May 2027”.

    Xasan Sheeikh waxa uu sheegya in hay’addii sharciga u lahayd ay gaartay go’aankaas , taas oo macnaheedu yahay buu yiri shacbiga Soomaaliyeed ayaa gaaray, taas oo uu sheegay in ay tahay rabitaanka shacabka.

    Hadalka madaxweynaha ayaa kusoo aadaya iyadoo lagu kala tagay shir wadaxaajood oo u socday Dowladda iyo Golaha Mustaqbalka kaas oo ay gar wadeen ka ahaayeen xubno ka tisran beesha caalamka.