BBC News, Pidgin
Waka go wetin de inside

You’re viewing a text-only version of this website that uses less data. View the main version of the website including all images and videos.

Take me to the main website

Children fit spread coronavirus if schools reopen?

All di latest tori ontop coronavirus from all ova di world.

Live Coverage

Daniel Semeniworima

  1. China 'dey willing to look at' how dem go relief di gbese wey African nations dey owe

    China fit temporarily freeze di gbese wey African nations dey owe to free up cash for di kontris to fight coronavirus outbreak.

    Tori pipo for Reuters report am. China na major creditor to African economy after dem don borrow dem billions of dollars ova di last two decades.

    "Di origin of Africa gbese dey complex and di moni wey each kontri dey owe dey different. " China foreign ministry tell Reuters.

    "We dey aware say some kontris and international organisations don call for debt relief programmes for African kontris, and we dey willing to study am with international community to see how e fit dey possible.

    ” Di International Monetary Fund (IMF) and World Bank dey also push for debt relief to help poor kontris during dis outbreak.

  2. ‘Why Ghana govment do virtual concert take launch COVID-19 app wey people no fit download?’

  3. Bollywood actor Shah Rukh Khan wan donate PPE kits to health workers

    India biggest Bollywood star, Shah Rukh Khan don tok say im go fund 25,000 personal protective equipment (PPE) kits for health workers wey dey helep fight di spread of coronavirus for the western state of Maharashtra.

    Di 54-year-old actor bin dey for news last month after im announce plenti initiative to helep tackle di virus for India.

    He even tok say im go provide free food and offer im four story storey office space for treating patients wey get di virus.

    As e be, India don report 339 coronavirus deaths and dem don confam ova 10,000 cases.

  4. Kenya MP, Magistrate, Police officers chop arrest after dem go drink for bar

    Kenya police arrest plenti pipo during Easter afta dem catch dem for bar dey drink and break goment rules on wetin to do to helep fight di spread of coronavirus for di kontri.

    Di pipo wey dem detain na one member of parliament, one magistrate and plenti police officers wey dey drink for bar.

    Police bin dey raid di bars wey dey di kontri capital, Nairobi as some of dem open afta di ogbonge warning wey goment don give against social gathering.

    Police say dem carry out di arrest after informate reach dem from members of di public.

    Dis raid and arrests dey come afta di kontri don record 208 cases of Coronavirus and nine pipo don die from am.

  5. Ugandan politician say im ready to comot Africans wey dem pursue from dia homes for China.

    Ugandan opposition politician Robert Kyagulanyi, popularly known as Bobi Wine, don tok say Im go partner with one American businessman to use plane go carry Africans wey dem dey maltreat for China comot.

    Reports bin dey say dem pursue plenti Africans wey dey live for di Chinese city of Guangzhou comot from dia apartments and hotels ova di fears of di spread of coronavirus for di African communities wey dey di city.

    Bobi Wine say together with Neil Nelson dem ready to go use plane comot di Africans if any African kontri go like receive dem.

    Nigeria, through im embassy for Beijing, tok say dem dey prepared to comot dia citizens from China.

    Bobi Wine and Oga Nelson don ask Chinese goment to make sure say di attacks on Africans end.

  6. Wetin Nigeria fit learn from di deadly 1918–1919 Influenza for Lagos

  7. Di main reason why Buhari extend coronavirus lockdown for Nigeria

  8. Nigerians ask goment for cash transfer afta 14 day lockdown extension

  9. Nigeria record 20 new cases of Covid-19

    Afta Nigeria president Muhammadu Buhari announce extension of lockdown for Lagos, Ogun and Abuja di kontri capital, di Nigeria centre for disease control bin drop anoda twenty new cases of Covid-19.

    13 for Lagos, 2 for Edo, 2 for Kano, 2 for Ogun and 1 in Edo

    As e be today, di kontri confam 343 cases. 91 don dey discharged with 10 pipo wey don die.

  10. If you just dey join us...

    Make we ginger you with this proverb wey Ekene Onumonu send us. How you take see am ontop this lockdown mata?

  11. Coronavirus: 130 more pipo don recover but Covid-19 di spread for, ministries

    Health Minister Manaouda Malachie say 130 more pipo don recover for Cameroon, and show say de treatment protocol weh doctors compose di work.

    Dis number don total 228 pipo weh deh recover for Cameroon. But de disease dis still spread for different areas, ministries and prison. Authorities no di tok how many new cases dey or how many pipo die.

    Last week health authorities say deh di use Chloroquine inside dia treatment den tok make ministry for Scientific Research produce dis merecine weh e di lack already.

    For Immeuble Rose, building, weh e di house, Trade, Economy, Planning and Regional Development, Tourism ministries, one worker test positive for Covid-19.

    Health minister Manaouda Malachie give order and deh dis-infect the building for afternoon taim.

    For Yaoundé kondengui prison today, prisoners protest as deh suspect say some Covid-19 positive pipo die for inside prison and deh komot dem for night for bury’am.

    But authorities nova tok weti weh e happen for prison today. Human Rights watch bi don signal danger as pleti pipo flop for Cameroon prisons.

    Health authorities say dia focus na for prevent and treat de pandemic weh e don travel for five regions, and plenti health patients get Covid-19.

    Campaign for search more cases go cover de whole kontri now. Health boss announce say huge quantity for tests go kam for test plenti pipo.

    “We di regret say some pipo di hide no go for hospital wen deh get signs for Covid-19 di put de lives for pipo weh deh love and odas for danger. Covid-19 no bi shameful disease”, Malachie tok.

  12. Africa Union appoint envoys wey go help find support for Coronavirus

    Di African Union don appoint one team of special representatives to try find international support wey go help di continent for dis Coronavirus pandemic period.

    AU chairman Cyril Ramaphosa tok say time don reach to gada resources wey no go make di pandemic kill di continent economy wey no too strong.

    Di team include Nigeria former finance minister, Ngozi Okonjo-Iweala, di former chief executive of Credit Suisse, Tidjane Thiam, Trevor Manuel, one former finance minister for South Africa, and Rwandan former head of the African Development Bank, economist Donald Kaberuka.

    Di appointment of Mr Thiam, wey come from Ivory Coast, na surprise afta e comot for im former work as oga of di Credit Suisse for February, afta one quanta happun for di bank.

    For inside statement, di AU tok say di envoy work na to find how di 20, European Union and oda financial institutions go take support dem.

  13. Una Goodmorning!

    Welcome to our live coverage of all di tori ontop coronavirus and how e dey affect di world.

    For tori from Monday, make una scroll down.

  14. In case you just dey join us...

    Dis na di latest updates from around di world.

    • Kano goment for Nigeria don fumigate di five places wey di only pesin wey get covid 19 for di state visit before dem know say e get di disease.
    • Di African Union don appoint one team of special envoy wey go try hustle international support to help di continent fight Coronavirus pandemic.
    • Woman weh deh test e Covid-19 positive don born pikin for Yaounde Central hospital.
    • Ghana Police Service warn citizens to stay house or dem go chop arrest if dem catch dem for beach.
    • Ethiopia don ban make hand shake and large gathering, anybody wey disobey dis order go chop three years for prison.
    • Spain don begin allow some workers wey no follow for essential workers to begin work on Monday
    • Senior UN official say make dem ban all wildlife market for di world
    • China don report dia highest number of new daily cases at 108 afta almost six weeks.

  15. Spain don begin open business

    Spain don begin allow some workers wey no follow for essential workers to begin work on Monday as di kontri partially reduce lockdown.

    Manufacturing and construction business follow among di ones dey allow to start work, as long as dem obey di strict rule.

    Shops wey no dey sell medicine and food, plus restaurants dem, all di places pipo dey gada for entertainment dey close.

    Dem go also give ten million masks to pipo wey go travel for public transport dis week as workers begin move upanda again.

    Coronavirus hit Spain no be small wit more dan 166,000 confam case, nearly 17,000 pipo die. But di number of new infection don dey drop.

  16. Coronavirus vaccine fit ready by September - Professor

    One Coronavirus vaccine fit dey available for di general public by September, according to one professor of vaccinology for Oxford University.

    Professor Sarah Gilbert tell BBC say di clinical trials of di vaccine “go start soon”and dem need to set di production processes in motion fast-fast.

    "We need start to dey manufacture large amount of di vaccine.” She add am.

    "E no dey uncommon say kompanis go first start dey produce new vaccine before dem go really dey sure how e go work.

    Nobody wan dey for position where you go get vaccine wey dey work, make you no come get di vaccine for pipo to use.

    "Di sooner we start to dey produce am, we go fit produce billion dose.

    “E fit no be dis year but if we no start, we fit no reach there next year. ”

  17. Covid-19 positive mother deliver by operation for Cameroon

    Woman weh deh test e Covid-19 positive don born pikin for Yaounde Central hospital.

    Na de second baby from Covid-19 positive mother for Cameroon but dis taim na through operation.

    Minister for Health Manaouda Malachie announce de news dis morning as e hail doctors Ngo Dingom M, and Dr. Sone and prof Owono e bi organise anaesthesia.

    E go for mimba say when de 19-year old ngondere bin deliver, Dr. Yaneu Ngaha bi tell BBC News Pidgin say plent oda woman dem weh deh bi Covid positive di wait for deliver.

    Yaneu Ngaha bi say authorities get for put more facilities for isolation so dat doctors fit take operate woman dem if deh no fit deliver normally.

    “If you bi Covid-19 positive no fear, if you get any alarming signs, call your doctor”, Yaneu bi advice Covid-19 positive woman dem weh deh di wait for deliver.

    Just now Cameroon don confirm 848 cases for Covid-19, 12 new cases for April 12, 98 pipo don well and 14 pipo don die.

    Goment don order all man for kontri for wear mask and pesin weh no follow dis rule go fit pay fine or get punishment.

  18. Kano goment don fumigate places wey covid 19 case visit

    Kano goment under ministry of environment announce say dem don fumigate di five places wey di only pesin wey get covid 19 for di state visit before dem know say e get di disease.

    Among di places wey goment fumigate include mosque wey di covid 19 patient visit on Friday and Prime Clinics wia di patient first go as e fall sick.

    One goment official tell BBC say di patient visit Dan Adalan and Da’awah mosque wey be 6km from im house wey dey UDB road for Kano city on Friday and e also visit FAN diagnostic centre and Prime Clinic wey be 9km from im house on di same Friday, dis na di only movement wey goment know say e make be dat.

    Commissioner of environment Dr Kabiru Getso yan say all those places dey locked for now and goment go still continue to dey fumigate dem for sometime before dem re-open dem for pipo to use.

  19. Coronavirus fit kill, hunger sef fit kill- Elderly woman

  20. Shun dey visit beaches else u go chop arrest - Ghana police warn, Video of beach goers wey dey circulate show hundreds of people who dey chill for the sea shore

    Ghana Police Service warn citizens to stay dem go chop arrest of dem catch dem for beach.

    Police release statement to caution citizens say dem for follow de ban on social gatherings else dem go face arrest and prosecution.

    Hundreds of residents for Chorkor on Sunday storm de beaches dey chill as part of Easter holidays celebrations.

    Video of beach goers wey dey circulate show hundreds of people who dey chill for the sea shore.

    According to police statement “apart from security service or essential service providers, anyone dem go catch for de beach from now on within de ban on public gathering go chop arrest.”

    Per de laws of Ghana, menerz wey go defy de orders of President Akufo-Addo during dis period go chop between up to between 12,000 to 60,000 cedis fine or risk between 4 to 10 years jail term.

    Police encourage citizens make dem just stay home den help reduce de spread of coronavirus.

    Coronavirus cases count for Ghana reach 566 now, 4 recover wey 8 die so far.