Lagos Govnor promise security for dis lockdown
Lagos state govnor Babajide Sanwo-Olu say security pipo go increase dia patrol for every area of di state for dis lockdown period.
Di govnor give dis tok afta im meet wit di state security council to find solution to how arm robbery work don plenty and how peace no dey for communities wey get boundaries.
Plenty tori na im dey of how jaguda pipo dey raid pipo for dia house to collect dia money and food for dis lockdown period.
Lagosians for social media don lament how dis jaguda pipo dey terrorize dem for dia area, collect dia money, foodstuff and property. Dey beg di govnor say make he help dem.
But di Police Public Relations Officer for Lagos, Bala Elkana tell BBC say di tori say jaguda pipo dey attack some areas for di state no be true as dem don receive plenty calls and wen dem reach di area, dey see say noting dey happun, na panic call because of di rumours wey dey fly upandan for social media.
Oga Bala say dem dey respond to all di calls, but if dem reach there ask how far, dey go say dem still dey expect dem. Because of that, many youths don turn vigilante begin carry cutlass and burn tyre for street say dem dey guard dia area. But the question na how you go take know which youth get pure mind?
He say dem don follow community leaders and landlords for different communities tok, to select pipo wey dey trust to do vigilante. Meanwhile oga Bala say di Inspector General of Police don send one Deputy Inspector General of Police come di state, he also send special force unit wey join body wit Lagos security force to ensure say everywhere for di state dey safe.