BBC News, Pidgin
Waka go wetin de inside

You’re viewing a text-only version of this website that uses less data. View the main version of the website including all images and videos.

Take me to the main website

Children fit spread coronavirus if schools reopen?

All di latest tori ontop coronavirus from all ova di world.

Live Coverage

Daniel Semeniworima

  1. Trump wan reveal coronavirus origin

      • Author, Olaronke Alo
      • Role, Broadcast Journalist, BBC Pidgin

    US President Donald Trump don tok say im go release details to support di theory say dem release coronavirus from one laboratory for di Chinese city of Wuhan where di COVID-19 pandemic bin start from.

    "We go dey report as e be over a period of time," di president tell tori pipo for di White House on Tuesday.

    Dem bin link di early cases of di to one food market for Wuhan late last year and di head of di US national intelligence has reject dj conspiracy theories say dem bin wan use di virus as weapon.

    But information wey Washington Post see say diplomats don send two warnings to Washington about one Chinese research facility, over fears say di institute's research on bat coronaviruses fit bring a new Sars-like pandemic.

    China rejects di idea and dem don criticise di way US dey respond to di crisis.

  2. Coronavirus: Rivers State go soon begin give license to private centres to treat Covid-19 – UPTH CMD

      • Author, Karina Igonikon
      • Role, BBC Pidgin, Lagos

    Di University of Port Harcourt Teaching Hospital UPTH don open 14 bed Isolation and Treatment Centre to treat Covid19 cases for oil rich Rivers State inside southern Nigeria.

    Chief Medical Director UPTH, Prof. Henry Ugboma wey open di Centre say dis na di second holding centre wey dey di hospital get as di first one, dem bin use am dey treat Lassa fever patients before Coronavirus disease come and dem bin dey use am dey hold some suspected Covid-19 cases before dem come build dis centre specially for coronavirus treatment.

    Prof. Ugboma say na Federal Goment na im provide di centre with support from NCDC and Shell and oda private donors wey support dem build and equip di place come add say so far, all di suspected cases wey bin come dia facility test negative.

    Prof Ugboma say di 14 bed isolation/treatment and testing centre go dey work with di Rivers State Isolation/Treatment Centre to treat Coronavirus patients for di State even as di State Accreditation Team go soon begin accredit oda private centres to treat Covid19.

    Rivers State get 14 Covid-19 cases; 10 dey active, two don die and two don recover and dem don discharge dem. Dis new isolation centre add to di 30 bed isolation and treatment centre wey dey for Nchia Health centre for Eleme and di 250 bed isolation centre wey dey for Yakubu Gowon Stadium, Port Harcourt.

  3. Nigeria Health Minister don reveal wetin dem learn from 15 Chinese health experts wey dem bin invite sake of Covid-19 palava

    Nigeria Health Minister don reveal wetin dem learn from di 15 Chinese doctors wey dem bin invite sake of Covid-19 palava,

    Dr. Osagie Ehanire tok say di Chinese health workers teach dem to be tough wit contact tracing ontop coronavirus palava.

    Di Health Minister tok dis one wen e appear for BBC Pidgin COVID-19 tok tok.

    "All Nigerians for abroad wey go return home must enta quarantine" E add.

    Dr. Ehanire add say health workers don begin house to house test.

    Watch di video hia:

  4. Lagos don discherge 60 more COVID-19 patients for di state

    Lagos State for south west Nigeria don discherge 60 more COVID-19 patients for di state.

    Di state get di highest number of COVID-19 cases wit 1183 pipo wey don test positive and 30 pipo wey don die.

  5. How prisoners dey cope behind bars wit coronavirus for Cameroon - Amnesty

  6. "We no dey against herbal medicine to treat symptoms of coronavirus"

  7. Nigeria don put total waiver for importing all kinds of medical equipment

      • Author, Onyinye Chime
      • Role, BBC Pidgin, Lagos

    Nigeria president Muhammadu Buhari, don approve blanket waiver for di importing all kain of medical equipment plus supplies.

    Di no tri finance Minister wey make dis announcement say, dis na part of goment effort make health infrastructure stronger to beta help fight the coronavirus pandemic.

    Di approval don take effect since May 1, 2020.

    Also, oga Presido don give order to Nigeria Customes Service make dem sharpaly clear all di medical and pharmacy equipment wey Dem don already import to di kontri.

  8. Made in Ghana Covid-19 Rapid Diagnostic Test kit dey under evaluation

  9. South Africa don begin test weda tuberculosis vaccine fit work for coronavirus

    Trial don begin for South Africa to test weda tuberculosis vaccine wey dem dey call BCG fit work for coronavirus - sometin wey no get any proof as e be so.

    500 health workers dey follow do di study wey dem don give di injection to 250 of dem and anoda 250 don collect placebo injection.

    Pikin wey don collect BCG immunization dey at very low risk of respiratory sickness like asthma, Prof Andreas Deacon of Task, di clinical researchers organisation wey dey fund di study, tell AFP tori pipo.

    “South Africa dey vaccinate all newborn pikin dem wit BCG. If we give adults do vaccine again, e fit help reduce di effect of dis pandemic,” di Task tok for statement.

    Covid-19 na respiratory sickness but World Health Organization (WHO) say no evidence dey day BCG fit protect pipo from Covid-19 infection.

    Upon say no medical evidence dey, di search for di term “BCG” don increase, according to Google.

    Anoda concern wey WHO get be say di increase for di demand of dis vaccine fit mean e go dey scarce for pikin dem.

  10. 4000 Nigerians abroad wan return, dis na how e go happun - FG

  11. Federal Goment fit return to anoda total lockdown - NCDC

  12. Kano test 80 medical workers afta 10 doctors catch coronavirus

    Dr Abubakar Nagoma wey be chairmo for resident doctors for Aminu Kano Hospital for northwest Nigeria confam to BBC say 10 doctors for dia hospital don get covid 19 and dem don test 80 oda workers for di disease.

    Di doctor add say di biggest issue wey dem dey face for Kano na lack of equipments wey go protect dem as dem dey attend to patients.

    “10 of our doctors don get covid-19 and we dey await test result for 80 oda health workers. Di thing wey dey dia be say we dey lack protective equipments like shields and face masks and we tell di hospital to provide am for us so we dey expect.”

    Dr Abubakar say na dis lack of equipments make one unit for Aminu Kano hospital no dey operate again as many of dia staff don dey infected.

    At di moment Kano get 334 cases of covid 19 and 8 deaths.

  13. See village wey dey use ghost to force social distancing

  14. How security pipo for Abuja border town stop movement

  15. Tanzania sack Lab director afta sample from pawpaw test positive for coronavirus

    Tanzania don suspend di kontri director of di national health laboratory after dem disguise non-human samples, secretly send am go di lab and im come test positive for coronavirus.

    Di sample include pawpaw fruit dem label as one wey come from 26 year old woman.

    Di president challenge di credibility of di test wey dey comont from di centre and don call for investigation into di mata.

    In anoda controversial matter, Tanzania wan import herbal drug from Madagascar wey dey claim say dey cure coronavirus but World Health Organisation don tok say cure for di virus never dey.

  16. coronavirus vaccine ready: US wan borrow $3tn for pandemic fight

    US goment don tok say dem wan borrow $3 trillion for di second quarter, as coronavirus rescue packages don blow up di kontri budget.

    Di moni na more dan five times di former quarterly record wey US bin get for di 2008 financial crisis.

    For di whole of 2019, di kontri bin borrow $1.28 trillion. Di US don approve about $3 trillion for relief package, including health funding and direct payouts.

    Total gbese wey US goment dey owe don almost reach $25 trillion.

  17. Police for Lagos dey do street to street patrol to maintain curfew

    Lagos state Police don begin patrol inside streets as way to maintain curfew for di state.

    Nigeria President Muhammadu Buhari bin announce say di relaxation of di lockdown for Lagos, Abuja and Ogun states go come wit curfew from 6am-8pm.

    Di police tok for Twitter say if e no be emergency, dem no wan see anybodi outside. Dem ginger pipo to respect diasef to helep stop di spread of di virus.

    As e be so, Lagos state get one of di highest cases for di kontri wit 1,183 confam cases and 30 deaths.

  18. Plane wit coronavirus supplies crash for Somalia, kill six pipo

    Somali authorities say one plane wey carry coronavirus aid supplies don crash and six pipo wey dey on board die for di crash.

    Na African Airways get di aircraft.

    Di plane commot for di kontri capital Mogadishu and e stop briefly for di city of Baidoa before e continue di journey go di town of Bardale, for di southern Bay region, where e crash and di distance to reach airport no plenty again.

    Dem neva know wetin cause dis accident wey happun for Monday evening.

    Di South-West State Minister of Transport Hassan Hussein Mohamed tell BBC say part of those wey die include pipo from Somali and Kenyan.

  19. Coronavirus: Madagascar go begin clinical trials for artemisia vaccine

    Madagascar Presido Andry Rajoelina say di kontri go begin clinical trials for one artemisia- based vaccine.

    Dem develop di vaccine from extracts from di artemisia plant, just like di drink wey dem call Covid-Organics.

    He encourage Malagasy pipo to plant artemisia.

    President Rajoelina say im dey in touch wit scientists from America wey go help wit di research.

    He add join say, di kontri dey try make di World Health Organization (WHO) give Covid-Organic pass mark.

    Di WHO for inside statement wey dem send go BBC say dem no recommend "self-medication for any melecine... as prevention or cure for Covid-19".

    Dem don deliver di Covid-Organics drink to other African kontris like Guinea-Bissau and Equatorial Guinea.

    Tanzanian President John Magufuli say im go send plane go Madagascar to collect one batch of di drink.

  20. Nigeria confam 245 new cases of Covid-19

    Nigeria now get 2,802 positive cases of coronavirus as di kontri centre for disease control bin announce anoda 245 new cases on Monday night.

    As e be now, 417 pipo dey discharged and 93 don die.