Nigeria election bodi INEC still dey announce results for different states as e concern Saturday govnorship election.
Daniel Semeniworima
Imam Nazifi Inuwa of Kano state for north west Nigeria pray for peaceful conduct of Saturday elections for di state, e tok say make every voter choose di candidate wey im want without allowing anybodi to force am.
“Tomorrow everybodi get right to vote any candidate wey im want, our prayer na to God to help us choose leaders wey go move di state forward."
See wetin some pipo for Calabar, Cross River State inside south southern Nigeria feel about Saturday govnorship and state house of assembly election.
Jaguda pipo don burn down INEC office for Ibesikpo Asutan LGA for Akwa Ibom state. For now, nobody know wetin cause di fire.
State INEC Resident Electoral Commissioner, Mike Igini don go visit di area to see how di building burn reach and if election materials follow burn.
Tension dey for Akwa Ibom ahead of di Governorship election wey Gov Udom Emmanuel of PDP dey seek second term.
Wia dis foto come from, Cletus Ukpong
Meanwhile, election mata no stop women, both young and old to gather for Port Harcourt to celebrate di International Women's Day wit waka-waka to promote peace and justice.
Security arrangement no change from wetin im be during di presidential and National Assembly election for Edo state.
Na still Danmallam Mohammed be di Commissioner of Police for di state.
15,000 men and women of di security forces n aim dem go send out on state house of assembly election duty for di state.
Dem come from police, army, civil defence, immigration FIRS, NDLEA.
Independent National Electoral commission for Benue State, for north central Nigeria don distribute all di sensitive and non sensitive material to di 23 local goment for di state.
According to Emmanuel Okpe di Makurdi LGA Electoral oga, by afternoon on Friday all di materials go land for RAC centers to ensure say delay no dey for di like di presidential one.
Supervising officers dey rush to check dia names and wia INEC post dem go against tomorrow for Kano state.
Fisher men and local sand miners for Benue State, north central Nigeria say dem prepare to go vote tomorrow.
Some of dem wey speak to BBC Pidgin say dem wan elect leader wey go provide dem employment and give dia pikin dem school.
New commissioner of police don land for Yenegoa Bayelsa State south south Nigeria.
Im name na Shola David and im go dey incharge of House of Assembly elections for di state.
CP David dey replace CP Aminu Pai Saleh wey bin dey in charge for di Presidential election for Bayelsa state.
Federal High Court for Abuja don dismiss case against Governor Nyesom Wike ontop birth certificate forgery case wey for disqualify am from contesting for di 9 March Governorship election.
Justice Ekwo say di case don become 'status barred' and no dey qualified for law as dem file am outside di mandatory 14 days as Section 385 subsection 9 of di 1999 constitution tok.
Only few days ago, one court judgement for Federal High Court Jalingo bin knack di APC Governorship Candidate for Taraba State Alh. Sani Abubakar Danladi comot but Court of Appeal for Abuja grant stay of execution order against dat judgement.
Wia dis foto come from, Miebaka Fubara
Protest dey happun for Okochiri, Okrika to vex ontop how sojas burst enta di alace of one former Niger Delta militant Ateke Tom wey don become clan chef for Okochiri village inside for Okrika local goment for Rivers State, south-south Nigeria.
Tori be say di sojas bin arrest some boys for di palace but Nigeria Army neva tok anytin on top di mata.
Pesin wey dey live for Okochiri area tell BBC Pidgin say e bin happun around 4-5pm on Thursday eveningb but no fit confirm if any pesin die for di attack.
Ateke bin no dey palace wen di sojas burst enta. Dis one dey coem afta anoda raid bin happun inside di same Okrika but for Ogu community.
Meanwhile Chiefs and community pipo protest inside Okochiri, Okrika sake of di mata.
Wia dis foto come from, Miebaka Fubara
INEC for Bayelsa state don begin distribute election materials for dia head office for Yenegoa.
Bayelsa get eight local goments only but 24 constituency seats na im pipo dey contest.
Govnorship election no go hold for di state till December 2019
Inter-Agency Consultative Committee on Election Security say 17,000 security pipo dey ground to make sure di election dey peaceful, free, fair and credible and dem go deploy three security polipo for all di 4442 polling units for di state.
Head of di Committee and Rivers state police commissioner Usman Belel say no movement go dey for both land and water and e go start from 12 midnight on Friday till 6pm on Saturday and dem go block all di entry and exit points for di state.
Delta state police command say dem don prepare well well for the election and na like over 8,000 police officers dem don deploy for di election.
Di Acting Police PRO ASP Chuks Orisewezie say dem don send officers go everi place wey dem get small small palava before.
Dem don even drop numbers for ground wey pipo fit call dhould in case gbege dey hsppun for dia area.
Meanwhile Delta state police deny di rumour wey dey spread say dem gon change dia commissioner of police.
Police tell BBC Pidgin say na lie for di rumour wey dey spread say dem change the Commissioner of police inside Delta state.
E say Adeyinka Adeleke na im still be di commissioner of police inside di state.
"Maybe pipo dey miss issues, with di first commissioner wey come and no stay long before dem promote am to DIG and transfer am. Dis one happun even before di presidential election."
INEC don complete distribution of both sensitive and non sensitive materials for all di local goment areas for Rivers State as dem start di distribution on Thursday.
Head of Voter Education and Publicity for INEC Rivers State Edwin Enabor confam dis one to BBC Pidgin, come add say all di Adhoc Staff go di refresher training on Friday for di Registration Area Centres RAC to prepare dem for work tomorrow.
Im say investigation still dey go on for all di Adhoc Staff Security pipo arrest for election malpractice and dem don replace those ones with some Adhoc Staff wey bin dey on standby and dem sef go follow di di refresher course toda.
INEC tok tok pesin for Kano State Garba Lawal say dem finish distribution of all sensitive and non sensitive materials to all 44 LGAs of Kano Thursday night and dem dey 100 percent ready for Saturday vote.
Afta di way presidential election take waka for Edo state, e no clear weda voters for di state go still wan comot vote for di State Assembly election.
Na dis one make Edo state govnor Godwin Obaseki meet wit labour leaders on Wednesday March 6.
Obaseke tell NLC leaders for di state say make dem helep am ginger dia pipo to go vote on Saturday.
Na on Wednesday 6 of March Edo state INEC send out all di materials wey dem go take do State Assembly Election.
Both di sensitive and nonsensitive election materials don already dey wit di local goment electoral officers for di 18 local goment areas for di state.
Edo state no go do govnorship election until 2020.
Resident Electoral Commissioner for Akwa Ibom, Mike Igini say di state INEC dey ready for Saturday Governorship elections as everything dey on ground.
Igini tell tori pipo say make everyone come out come exercise dia civic rights and make dem no fear anything. Im say:
"tok of how military personnel dey plan to hijack di elections and intimidate pipo no dey true as dem only dey to do dia security work."
Already di Akwa Ibom state goment don declare today as public holiday so dat civil servants go fit travel go dia LGA go vote.
Di Work free day wey Rivers State goment declare on Friday don take effect as workers no come work.
Dis na to allow pipo travel go wia dem register so dem for participate for di governorship and state assembly elections wey go hold tomorrow for all di 23 local goment areas for di state.
