لوېدیځ ته د ایران ځواب؛ له ښځو سره ستاسې چلند "له ناورینه ډک دی"
د عکس سرچینه، Getty Images
ایران د امریکا او اتو نورو هېوادونو د بهرنیو چارو وزیرانو نیوکو ته په ځواب کې ویلي، لویدیځو هېوادونو کې د نورو هېوادونو پرتله د ښځو وضعیت خورا "له ناورین ډک" او " خواشینوونکی" دی.
د ایران قضایه قوې د بشري حقونو مرکز له لوري خپره شوې خبرپاڼه کې راغلي: "دا د خندا وړ خبره ده چې امریکا او نورو لویدیځو هېوادونو د بهرنیو چارو وزیرانو د یوې ګډې اعلامیې په خپرولو سره مداخله کړې، ایران یې د ښځو او نجونو د حقونو په سرغړونه تورن کړی، او ځان د ښځو د حقونو مدافع ګڼي."
امریکا، چیلي، کاناډا، بریتانیا، آیسلنډ، نیوزیلنډ، سویلي کوریا، سویډڼ او استرالیا هغه هېوادونه دي چې د یوې ګډې اعلامیې په خپرولو سره یې له نړیوالې ټولنې غوښتي، د تکنالوژۍ له شرکتونو سره مرسته وکړي چې،ایراني مېرمنو او نجونو ته د دې اجازه ورکړي، په ازاده توګه د ایران په اړه مالومات د انټرنټ له لارې تبادله کړي.
د ایران قضایه قوې د بشر حقونو مرکز دفتر دغه هېوادونه تورن کړي چې "د ښځو او نجونو حقونه یوازې خپلو سیاسي موخو لپاره د یوې وسیلي په توګه کاروي."
د دغه هېواد قضایه قوې د ښځو په اړه د دغو نهو هېوادونو "طرحه" ناسمه بللې او لیکلي یې دي چې" دوی هڅه کوي د ښځو د حقونو په اړه خپله ناسمه تګلاره پر نورو ملتونو او کلتورونو تحمیل کړي."
له دې وړاندې د امریکا د بهرنیو چارو وزیر انتونی بلینکن پر ټوېټر لیکلي و چې: "ایراني ښځي په زړورتیا سره د احتجاجونو مشري کوي، داسې حال کې چې ایراني چارواکي د دوی د ګواښلو او غلي کولو لپاره د تکنالوژۍ پر بنسټ له جنسیتي تاوتریخواليکار اخلي."
نوموړي ایران کې د لاریون کوونکو ښځو د ځپلو لپاره د ټکنالوژۍ د کارولو د بندولو غوښتنه وکړه.
ایران کې روان احتجاجونه وروسته له هغې پیل شول چې ۲۲ کلنه ایرانۍ مهسا امیني د ایران امربالمعروف پولیسو په بند کې مړه شوه.
په دغو احتجاجونو کې ښځو مخکښ رول لوبولی او "ښځه، ژوند، ازادي" یې له اصلي شعارونو و.
"د ښځو د وضعیت" له کمیسیونه د ایران د ایستلو هڅې
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
د امریکا د چارشنبې پر ورځ (ډسمبر۱۴مه) ملګرو ملتونو کې د ښځو د وضعیت له کمیسونه د ایران د ایستلو پر پرېکړه لیک رایه اچونه کوي.
ملګرو ملتونو کې د امریکا سفیرې لینډا توماس ګرینفیلډ پر خپله ټوېټر پاڼه په دې اړه لیکلي:" مونږ باید د ایران د ښځو او مدني ټولنې غوښتنو ته غوږ شو، ایران باید ملګرو ملتونو کې د ښځو د وضعیت له کمیسیونه و ایستل شي."
د ملګرو ملتونو د ښځو له کمیسونه د ایران د ایستلو وړاندیز د امریکا د ولسمشر مرستیالې،کاملا هارس کړی و.
څه موده وړاندې د نړۍ یو شمېر مشهور مېرمنو په یوه خپره شوې خبرپاڼه کې د "ښځه، ژوند او ازادۍ" غورځنګ ملاتړ کړی و.
دوی د ایران حکومت له خوا د لاریونوالو ځپل او دوی سره ترسره شوی تاوتریخوالی غندلی و او ایرانۍ ښځو سره یې خپله خواخوږي څرګنده کړې وه.
دوی هم په دغه خبرپاڼه کی، ملګرو ملتونو کې د ښځو د وضعیت له کمیسیونه د ایرن اسلامي جمهوریت د استازي د ایستلو غوښتنه کړې وه.
د بشر حقونو ۱۳ نورو سازمانونو هم د یوې خبرپاڼې په خپرولو سره له نړیوالې ټولنې ورته غوښتنه کړې وه.
