د ایران سپاه پاسداران پر یوه غړي د امریکا ملي امنیت سلاکار وژنې پلان چمتو کولو تور لګېدلی
د عکس سرچینه، Reuters
امریکا متحدو ایالتونو یو ایرانی سړی د امریکا پخواني ولسمشر ډونلډ ټرمپ د ملي امنیت سلاکار جان بولټن د وژلو دسیسې په چمتو کولو تورن کړی دی.
د امریکايي چارواکو په وینا دا سړی چې شهرام پور صفي نومېږي د ایران سپاه پاسداران انقلاب ځواک غړی دی، په ایران کې و او په دې قضیه کې مطلوب دی.
امریکايي چارواکي وايي، ښايي شهرام پور صفي د ایران یوه وژل شوي ځواکمن قومندان قاسم سلیماني د غچ اخیستنې لپاره دا توطئه چمتو کړې وه.
د یادونې ده، چې قاسم سلیماني په منځني ختیځ کې د ایران پوځي چارې پر مخ بیولې.
نوموړي د سپاه پاسدران ځواک القدس نومې څانګې مشري کوله او د ۲۰۲۰ کال په جنورۍ کې د امریکا مخکیني ولسمشر ډونلډ ټرمپ په امر د عراق پلازمېنې بغداد په هوايي ډګر کې ووژل شو.
د ایران حکومت یوه ویندوی بیا له ځايي دولتي رسنیو سره خبرو کې پر شهرام پور صفي لګېدلي تورونه ''بې بنسټه '' بللي دي.
بل لور د امریکا عدلیې مسوولینو ویلي، پور صفي اقا مهدي رضايي چې ۴۵ کلن او د تهران اوسېدونکی دی، ''هڅه کړې په واشنګټن ډي سي یا میريلنډ کې د یوې وژنې لپاره په متحدو ایالتونو کې ځینې کسانو ته تر درې زرو ډالرو پورې پیسې ورکړي. ''
د عکس سرچینه، AFP/Getty
په لګول شویو تورونو کې ویل شوي چې دې ایراني سړي په امریکا کې له یوه کس سره په دې هکله انلاین اړیکه نیولې او له هغه کسه یې غوښتي و، چې د ښاغلي بولټن تصویرونه واخلي چې د ده د ادعا له مخې په یوه کتاب کې ترې کار اخیستل کېږي.
د هغه کس نوم نه دی یاد شوی، چې د چارواکو په وینا وروسته یې یو بل کس پور صفي ته ورمعرفي کړی او ورته ویل شوي وو، باید ښاغلی بولټن ووژني او د وژنې ویډیو ثبت کړي.
ښاغلي بولټن بیا په یوه اعلامیه کې د تحقیقاتي ادارې ایف بي ای او عدليې چارواکو مننه کړې.
