کووېډ-۱۹: د وېنټيلېټور چاودنې ترکیه کې د کورونا وېروس ۹ ناروغان ووژل
د عکس سرچینه، Getty Images
د ترکیې سویل کې د کورونا ویروس د ناروغانو د درملنې په یوه روغتون کې وېنټیلېټور چاودلی او نهه ناروغان یې وژلي دي.
ځايي چارواکو ویلي دا پېښه غازیاتېپ ښار کې د سانکو پوهنتون د خصوصي روغتون د جدي څارنې څانګه کې شوې او اور هم ترې لګېدلی دی.
ویل کېږي د کورونا یو ناروغ له دې کبله مړ شوی چې تر پېښې وروسته بل روغتون ته لېږدول کېده.
جان هاپکنېز پوهنتون لخوا د خپرېدونکو شمېرو له مخې ترکیه کې د کورونا وېروس نږدې ۲ میلیون مثبتې پېښې ثبت شوي او ۱۷۶۱۰ کسان ترې مړه شوي دي.
د سانکو پوهنتون روغتون په یوه علامیه کې ویلي چې د پېښې قربانیان د ۵۶ او ۸۵ کلونو ترمنځ وو.
د پېښې د لامل مالومولو لپاره څېړنې پېل شوې دي.
د غازیانېپ د والي دفتر ویلي د سانکو پوهنتون د روغتون د جدي څارنې څانګه کې چې چاودنه پکې شوې د نورو ناروغانو درملنه هم کېده او هغوي نورو روغتونونو ته لېږدول شوي دي.
د ترکیې د ولسمشر ویاند ابراهیم کالین په یوه ټویټ کې "ټپیانو ته د عاجلې روغتیا" هیله کړې ده.
تېره میاشت رومانیا کې پر کووېډ-۱۹ د اخته کسانو د درملنې یوه روغتون کې اور لګېدو ۱۰ ناروغان وژلي وو.
رپوټونو ویلي و دا اور له یوې روغتیايي وسیلې لګیدلی او د اکسیجن یوې نږدې ډبې ته رسیدلی و.
اکتوبر کې د روسیې په چېلیابینڅک سیمه کې د کورونا د درملنې په یوه لنډمهاله روغتون کې د اکسیجن غرفه کې چاودنه شوې وه.
د روسیې بېړنو چارو وزارت ویلي و د دې چاودنې او اورلګیدو له کبله اړ شول چې د کورونا وېروس د ۱۵۰ ناروغانو د ژغورلو لپاره لاس په کار شي او هغوي د پېښې له ځایه وباسي.
