۲۳ برتانوي دیپلوماتانو ته له روسیې د وتلو امر
د عکس سرچینه، Reuters
روسي چارواکو ۲۳ برتانوي دیپلوماتانو ته ویلي، چې له دغه هېواده ووځي. مسکو لندن کې یوه پخواني روسي جاسوس او لور ته یې د زهرو ورکړې له پېښې وروسته دغه اقدام کوي. له دې مخکې برتانیا ورته شمېر روسي دیپلوماتانو ته له هېواده د وتلو ویلي و.
د روسيې بهرنیو چارو وزیر وايي:
''مسکو کې به د برتانوي سفارت ۲۳ کسان د منلو وړ وبلل شي او په یوه اونۍ کې دننه به ورته له هېوادوه د وتلو وویل شي. ''
روسي چارواکو دغه راز په یوه اعلامیه کې ویلي، دغه هېواد کې به برټش کونسل هم وتړي او سینټ پېټرزبرګ کې به د کونسګلرۍ پرانیستلو ورکړل شوې اجازه هم بېرته واخلي.
برتانیا له دې مخکې سیلسبري سیمه کې یوه پخواني روسي جاسوس او لور ته یې د زهرو ورکول کېدو له پېښې وروسته له ۲۳ روسي دیپلوماتانو غوښتي وو، چې یوه اوونۍ کې دننه له هېواده ووځي.
د روسيې څارګرې ادارې پخوانی ۶۶ کلن جاسوس سرګي سکریپال او لور یې یولیا سکریپال له هغه وروسته تر یوې اوونۍ پورې روغتون کې وو، چې سیلسبري سیمه کې زهر ورکړل شوي وو.
له دې مخکې د روسیې ولسمشر ولادمیر پوتین ویاند ویلي و، بالاخره به ولسمشر پوتین هغه چاره غوره کړي، چې د 'مسکو د ګټو ' لپاره تر ټولو مناسبه وي.
سرګي سکریپال د روسیې یو پخوانی افسر و چې په ۲۰۰۶ کال کې برتانیا ته د جاسوسۍ په تور په ۱۳ کال زندان محکوم شو، خو دی په ۲۰۱۰ کال کې د جاسوسانو په یوه 'تبادله ' کې برتانیا ته راغی او همدلته اوسېده.
د عکس سرچینه، EPA/ YULIA SKRIPAL/FACEBOOK
ښاغلی سکریپال او لور یې یوه رسټورانټ ته تللي وو، خو له هغه ځایه له راوتلو وروسته د بې هوشۍ په حال کې وموندل شول.
د برتانیا لومړۍ وزیرې تېرېزا مې ویلي و، څېړنو ښودلې چې په دغه برید کې د 'نافیچوک ' هغه عصبي ګاز کارول شوي چې روسیه یې تولیدوي.
