ټرمپ: له ایران سره د امریکا خبرې ښايي "په دوو ورځو کې" بیا پیل شي

ژوندی پوښښ

1. ۱۲ وری ۱۴۰۵ - ۱ اپریل ۲۰۲۶وروستی, بغداد کې د یوې امریکايي خبریالې د تښتونې په تړاو یو مشکوک تن نیول شوی

   د امریکا د بهرنیو چارو وزارت د اړیکو او نړیوالو عامه چارو مرستیال وزیر ډېلان جانسن ویلي چې د امریکا د بهرنیو چارو وزارت په بغداد کې د یوې امریکايي خبریالې د تښتونې په اړه د خپرو شویو راپورونو څخه خبر دی.

   جانسن د "اېکس" په یوه پیغام کې زیاته کړه چې وزارت تر دې وړاندې یادې خبریالې ته د هغې پر وړاندې د موجودو ګواښونو په اړه خبرداری ورکړی و او دا چې دا مهال د فدرالي تحقیقاتي له ادارې (FBI) سره په همغږۍ کار کوي، چې د هغې خوشې کېدل ژر تر ژره یقیني شي.

   هغه وویل چې د عراق امنیتي ځواکونو یو داسې کس نیولی چې ګومان کېږي د عراق حزب‌الله له ډلې سره تړاو لري او د تښتونې په پېښه کې لاس لري.

   جانسن ټینګار وکړ چې عراق لا هم د سفر د څلورم پړاو تر ټولو لوړې کچې خبرداري په لېست کې شامل دی او یو ځل بیا یې پر امریکایانو غږ وکړ چې عراق ته سفر ونه کړي او هغو کسانو ته یې چې هلته دي، د وتلو سپارښتنه وکړه.

   د یادونې وړ ده چې یوه امریکايي خبریاله تر دې مخکې په بغداد کې ورکه شوې وه. وروسته د عراق د کورنیو چارو وزارت اعلان وکړ چې له امنیتي تعقیب وروسته یې د پېښې په تړاو یو کس نیولی، خو د هغې د خوشې کولو او د نورو ښکېلو کسانو د نیولو هڅې لا هم روانې دي.

2. ۱۲ وری ۱۴۰۵ - ۱ اپریل ۲۰۲۶وروستی, ټرمپ له ناټو د امریکا د وتلو موضوع په جدي ډول څېړي

   

   د عکس سرچینه، Getty Images

   د امریکا ولسمشر ډونلډ ټرمپ د برېتانیا له "ټیلیګراف" ورځپاڼې سره په مرکه کې ویلي چې هغه له ناټو پوځي تړونه د متحده ایالاتو د وتلو موضوع "په جدي ډول" ارزوي.

   ورځپاڼې لیکلي چې ټرمپ ناټو "کاغذي پړانګ" بللی او ادعا یې کړې چې بریتانیا سمندري ځواک (بحري بېړۍ) نه لري.

   کله چې ترې وپوښتل شول ایا د منځني ختیځ له شخړې وروسته به د ناټو په تړاو د امریکا غړیتوب ته له سره کتنه وکړي، ټرمپ وویل: "بېشکه، زه وایم دا تر بیا کتنې هم هاخوا خبره ده…"

   هغه زیاته کړه: "زه هېڅکله پر ناټو قانع شوی نه وم. زه تل پوهېدم چې دا یو کاغذي پړانګ دی او پوتین هم پر دې خبره ښه پوهېږي. "

   ټرمپ د بریتانیا د جنګي سمندري ځواک وضعیت ته په اشاره وویل: "تاسو خو ان سمندري ځواک هم نه لرئ. تاسو زاړه شوي یاست او ستاسو د الوتکو لېږدوونکې بېړۍ نورې د کار وړ نه دي."

3. ۱۲ وری ۱۴۰۵ - ۱ اپریل ۲۰۲۶وروستی, سټارمر: د ټرمپ د فشار سربېره، بریتانیا به له ایران سره جګړه کې ګډون ونه کړي

   

   د عکس سرچینه، Getty Images

   د بریتانیا لومړي وزیر کې‌یر سټارمر د نن ورځې په خبري غونډه کې، د هغې پوښتنې په ځواب کې چې د ډونلډ ټرمپ د ګواښ په اړه شوې وه- چې امریکا به نور د بریتانیا ملاتړ ونه کړي- وویل پر ده سخت فشار شته چې د ایران پر ضد جګړه کې د ګډون په اړه خپل دریځ بدل کړي، خو ټینګار یې وکړ چې خپل دریځ به بدل نه کړي.

   هغه وویل چې د بریتانیا د لومړي وزیر په توګه به پرېکړې د ملي ګټو پر بنسټ کوي.

   د بریتانیا لومړي وزیر د دې پوښتنې په ځواب کې چې ایا له ډونلډ ټرمپ سره د اړیکو د خرابېدو له امله اروپا ته نژدې کېږي، وویل چې د اروپا او امریکا تر منځ د یو انتخاب نیت نه لري.

   هغه زیاته کړه: "زموږ په ګټه ده چې هم له امریکا او هم له اروپا سره ټینګې اړیکې ولرو."

   ډونلډ ټرمپ "ټیلیګراف" ورځپاڼې ته ویلي چې له ناټو د امریکا د وتلو موضوع په جدي ډول تعقیبوي.

   هغه تر دېمخکې هم پر ناټواو بریتانیا څو ځلهنیوکه کړې، ځکه چېله ایران سره جګړهکې یې ګډون نهدی کړی.

4. ۱۲ وری ۱۴۰۵ - ۱ اپریل ۲۰۲۶وروستی, اصفهان کې لوې چاودنې او د اټومي مرکز اغېزمنېدل

   په ویډیو کې ښودل کېږي چې د ایران اصفهان ښار کې لویې چاودنې شوې او اورونه بل شوي. اصفهان د اټومي مرکز، مهمې هوايي اډې او نورو پوځي ځایونو کور دی.

   ایراني رسنیو د سه شنبې په ورځ (۳۱ مارچ) راپور ورکړ چې لومړنۍ څېړنې ښيي بریدونه پر ځینو "پوځي مرکزونو" شوي دي، خو دقیق ځایونه نه دي ښودل شوي.

5. ۱۲ وری ۱۴۰۵ - ۱ اپریل ۲۰۲۶وروستی, پر یوي قطري تېل وړونکې کښتۍ د ایران د توغندي برید شوی

   د قطر د دفاع وزارت ویلي چې د قطر د دولتي انرژۍ شرکت یوه کرایه شوې تېل وړونکې کښتۍ د چهارشنبې په ورځ د ایران کروز توغندی لګېدلی دی.

   نن پر قطر د کروز درې توغندي ویشتل شوي، چې دوه یې شنډ کړل شوي او درېیم یې پر اکوا-۱ کښتۍ لګېدلی دی.

   دې برید کې هېڅ انساني زیان نه دی اوښتی.

   د بریتانیا د سمندري سوداګرۍ شرکت او قطرانرژي ویلي چې کښتۍ ۱۷ سمندري میله (۳۱ کیلومتره) شمال ته د راس‌لفان د اوبو کرښې پورته زیانمنه شوې، خو د چاپېریال زیان راپور نه دی ورکړل شوی.

   په راس‌لفان کې د نړۍ تر ټولو لوی ګازي بریښنايي فابریکه ده، چې د ایران د بریدونو له امله یې فعالیت ودرول شو.

6. ۱۲ وری ۱۴۰۵ - ۱ اپریل ۲۰۲۶وروستی, د ټرمپ له څرګندونو وروسته د تېلو بیې راټیټې شوې, ديربيل جورډن – اقتصادي خبریال

   

   د عکس سرچینه، Getty Images

   د چهارشنبې په ورځ د تېلو بیې تر ۳ سلنې ډېرې راټیټې شوې او په هر بیرل کې له ۱۰۰ ډالرو لږ څه لوړې شوې.

   دا کموالی د امریکا د ولسمشر ډونالډ ټرمپ له هغو څرګندونو وروسته راغی چې تېره شپه یې له سپینې ماڼۍ وکړې او ویې ویل چې هېواد به یې "ډېر ژر" ایران پرېږدي او ښايي پوځي عملیات په دوو یا درېیو اونیو کې پای ته ورسېږي.

   خو سره له دې، د برنټ خام تېلو بیې لا هم د فبرورۍ له ۲۸مې نېټې سره پرتله ۳۹ سلنه لوړې دي، هغه ورځ چې جګړه پیل شوه او ایران په عملي ډول د هرمز تنګی وتاړه.

7. ۱۲ وری ۱۴۰۵ - ۱ اپریل ۲۰۲۶وروستی, ټرمپ ته د ایران د پارلمان یوه غړي پیغام: "هرمز تنګي به حتماً بېرته پرانستل شي، خو ستا لپاره نه", غنچه حبیبي‌آزاد - بي‌بي‌سي فارسي

   د ایران د پارلمان د ملي امنیت د کمېټې مشر ابراهیم عزیزي پر ایکس (پخوانی ټویټر) ډونلډ ټرمپ ته پیغام استولی او ویلي یې دي چې: "د هرمز تنګی به حتماً بېرته پرانستل شي، خو ستا لپاره نه؛ دا به یوازې هغو کسانو ته پرانستل شي چې د ایران نويو قوانینو ته ژمن وي."

   عزیزی وویل چې "د ۴۷ کلونو مېلمه‌پالنه د تل لپاره پای ته ورسېده"، چې دا د ۱۹۷۹م کال د ایران له انقلاب وروسته دورې ته اشاره ده.

   هغه زیاته کړه: "ټرمپ بالاخره خپل د 'نظام بدلون' خوب پوره کړ، خو دا ځل د سیمې په سمندري نظام کې!"

   د فارس نیمه رسمي خبري آژانس د دوشنبې په ورځ راپور ورکړ چې د ایران د ملي امنیت کمېټې له هرمز تنګي د تېرېدونکو کښتیو پر سر د فیس لګولو پلان منظور کړی دی.

8. ۱۲ وری ۱۴۰۵ - ۱ اپریل ۲۰۲۶کارپوهان: د ایران جګړه د امریکا لپاره د ورځې دوه ميليارده ډالره لګښت لري

   

   د عکس سرچینه، FACEBOOK

   د نړیوالو شخړو له امله د رامنځته شوي اقتصادي زیان څارونکو بي بي سي ته ویلي چې د ایران جګړه امریکا ته هره ورځ شاوخوا دوه میلیارده ډالر لګښت لري.

   د براون پوهنتون د جګړې د لګښتونو د پروژې مشره سټیفني سیول وايي، د وسلو، پوځي لګښتونو، د امریکا شتمنيو ته زيان او نورو لګښتونو له کبله جګړې لا دمخه امریکایانو ته په لسګونو میلیارده ډالر زیان رسولی دی.

   سیول وايي،جګړه د عامه پورونو اندازه په ورځني ډول په لویه کچه لوړوي.

   د امریکا د رسنیو په وینا، پنټاګون د مارچ په لومړیو کې کانګرېس ته ويلي چې د جګړې لومړیو شپږو ورځو کې ۱۱.۳میلیاردهډالر لګښت راغلی دی. سیول باور لري چې اصلي لګښت ښايي خورا لوړ وي.

   د هارورډ پوهنتون د دفاعي بودیجې کارپوهه لېنډا بلیمز وايي،جګړه ښايي له وړاندې په ورځ کې شاوخوا دوه میلیارد ډالر لګښت ولري.

   د اغلې سيول په وینا د جګړې د لګښتونو بار تل په عامو امریکايي وګړو باندې راځي. جګړې دمخه د تیلو بیې لوړې کړې دي.د نفلاسیون، د سوداګرۍ ناڅرګندتیا او د بیمې لوړو لګښتونو په څېر به اوږدمهاله اغېزې هم ولري.

   د سیول په وینا، سپینې ماڼۍ لا دمخه ویلي چې دوی به د ایران د جګړې لپاره له کانګرېسه د ۲۰۰میلیارد ډالرو غوښتنه وکړي.

9. ۱۲ وری ۱۴۰۵ - ۱ اپریل ۲۰۲۶له ایران سره د جګړې په اړه د ټرمپ د څرګندونو لنډیز

   د امریکا ولسمشر ډونلډ ټرمپ په سپینه ماڼۍ کې اعلان وکړ چې په ایران کې د امریکا پوځي عملیات ډېر ژر پایته ورسېږي.

   د نوموړي د خبرو ځينې اصلي ټکي په لاندې ډول دي:

   • ډونلډ ټرمپ وویل چې امریکا به "ډېر ژر" له ایرانه ووځي او پوځي عمليات ښايي په "دوو یا دریو اونیو" کې پایته ورسېږي.
   • نوموړي ادعا وکړه هغه اهداف چې د اسرائیلو په مرسته تیره میاشت له هوایي بریدونو وړاندې ټاکل شوي وو، ترلاسه شوي دي. اصلي هدف د اټومي وسلو ترلاسه کولو لپاره د ایران وړتیا کمول وو او امریکا اوس د دې "کار د بشپړولو په حال کې ده".
   • ټرمپ همدا ډول ادعا وکړه چې امریکا اوس د ایران پر اسمان کنټرول لري او د رژیم بدلون هم د ډېرو لوړ پوړو سیاسي او پوځي مشرانو له وژل کېدو وروسته ترلاسه شوی دی. هغه د تهران نوي مشران د پخوانیو پرتله "لږ بنسټپال" او "ډېر منطقي" وبلل.
   • ټرمپ زیاته کړه، ایراني مشران د جګړې د پایته رسولو لپاره له امریکا سره "د هوکړې غوښتنه کوي"، هغه ادعا چې ایران مخکې رد کړې ده. نوموړي دا هم وویل چې جګړه له دوه اړخیزې موافقې پرته هم پایته رسېدلی شي.
   • ولسمشر ټرمپ د تېلو د بیو د لوړېدو او د جګړې د اغېزو په اړه وویل، د امریکا د پوځي عملیاتو له بشپړېدو وروسته به بیې بېرته راټیټې شي.

10. ۱۲ وری ۱۴۰۵ - ۱ اپریل ۲۰۲۶شاوخوا ۱۰۰۰ بریتانوي پوځيان خلیج ته استول شوي

    د بریتانیا د دفاع وزیر جان هېلي، چې خلیج ته یې سفر کړی وايي شاوخوا ۱۰۰۰ بریتانوي پوځيان اوسمهال په سیمه کې ځای پر ځای شوي، چې په دې کې په قبرص کې مېشت شوي ځواکونه هم شامل دي.

    نوموړي په ​​سیمه کې د متحدینو د ملاتړ لپاره د هوايي دفاع سیسټمونو د پیاوړتیا اعلان هم وکړ.

    ښاغلي هېلي وویل، ایران په سیمه کې خپل بریدونه "پراخوي" او وړاندوینه یې وکړه چې جګړه به "څو اوونۍ" دوام وکړي.

    نوموړي وویل، د خلیج هېوادونو د هرمز تنګي د پرانیستلو پر ارزښت ټینګار کړی دی.

    هغه زیاته کړې چې متحدین د لېږد لپاره په بېلابېلو انتخابونو غور کوي او په دې تړاو به د امریکا په ګډون نړيوال همکارۍ ته اړتيا وي.

    جان هېلي د ډونلډ ټرمپ له خوا پر بریتانیا او اروپایي هېوادونو د وروستيو نيوکو له تبصرې ډډه وکړه خو ټینګار یې وکړ چې د امریکا او بریتانیا ترمنځ پوځي او امنیتي همکاري دوام لري.

11. ۱۱ وری ۱۴۰۵ - ۳۱ مارچ ۲۰۲۶ټرمپ وايي له ایران سره جګړه کېدای شي په شاوخوا دوو اونیو کې پایته ورسېږي

    

    د عکس سرچینه، Getty Images

    د امریکا ولسمشر ډونلډ ټرمپ په سپينه ماڼۍ کې خبریالانو ته وويل، له ایران سره جګړه کېدی شي په شاوخوا دوو اوونيو کې پايته ورسېږي.

    نوموړي وويل، د هغه موخه هېڅکله په ایران کې د رژيم بدلون نه و بلکې اصلي هدف یې دا و چې ایران ونشي کړی اټومي وسلې ترلاسه کړي چې په وینا یې دا هدف ترلاسه کړل شوی دی.

    له دې وړاندې له اېن بي سي سره په مرکه کې د امریکا ولسمشر ويلي وو، د جګړې له پیله يوه مياشت وروسته امریکا "د ایران پوځ په ستره کچه ویجاړ کړی" او په هېواد کې نوی مشرتابه د هغه په وینا "ډېر منطقي" او د تېر مشرتابه پرتله لږ "افراطي" دی.

12. ۱۱ وری ۱۴۰۵ - ۳۱ مارچ ۲۰۲۶د بیروت په بن حسن کې د توغندي لګېدو شېبه

    له نژدې یوې مياشتې راهيسې اسرائیل د لبنان په جنوب کې د حزب الله ډلې پر موخو بریدونو کوي چې د لبنان د رسمي خبري اژانس په وینا تر دې مهاله نژدې ۱۲۷۰ تنه په کې وژل شوي او ۳۷۵۰ نور ټپيان دي.

    په دې ويډيو کې د لبنان پلازمېنې بيروت په بن حس سيمه کې پر يوې ودانۍ د توغندي لګېدو شېبه ليدل کېږي.

13. ۱۱ وری ۱۴۰۵ - ۳۱ مارچ ۲۰۲۶د کاناډا لومړي وزير پر لبنان د اسرائیلو برید "غیرقانوني" بللي دي

    

    د عکس سرچینه، Getty Images

    د کاناډا لومړي وزير مارک کارني پر لبنان د اسرائیلو برید "غير قانوني" بللی او دا یې د دغه هېواد له "ځمکنۍ بشپړتيا" سرغړونه ياده کړې ده.

    نوموړي زياته کړې، "له عملي اړخه د لبنان حکومت پر حزب الله بنديز لګولی او د اسرائیلو پر وړاندې د هغوی د ترهګريزو فعاليتونو پر وړاندې د اقداماتو لپاره کار کوي."

    ښاغلي کارني زياته کړې، "دا د دې یرغل لپاره یوه ادعا شوې توجيه ده او موږ یې غندو".

    دا څرګندونې په داسې حال کې شوې چې د اسرائیلو د دفاع وزیر اسرائیل کاټز ويلي، هېواد به یې د حزب الله سره د اوسني جګړې له پایته رسېدو وروسته هم د جنوبي لبنان په ځینو برخو کې امنیتي کنټرول وساتي.

    اسرائیلي چارواکي وايي، ځمکني ځواکونه لبنان ته ننوتي دي ترڅو د حزب الله له بریدونو د اسرائیلو شمالي برخې ساتنه وکړي.

    اسرائیل کاټز مخکې ویلي وو دوی دا برید ځکه پیل کړی چې د لبنان حکومت "هېڅ اقدام نه دی کړی."

14. ۱۱ وری ۱۴۰۵ - ۳۱ مارچ ۲۰۲۶وروستی, په لبنان کې د اسرائیلو د بریدونو له امله د مړو شمېر ۱۲۶۸ ته ورسېد

    د لبنان پلازمېنه کې نن سې شنبې هم د اسرائیلو هوايي بریدونه روان وو.

    د لبنان د رسمي خبري اژانس په وینا، د مارچ مياشتې له دويمې نېټې راهيسې د مړو شمېر ۱۲۶۸ تنو ته رسېدلی، او ۳۷۵۰ نور ټپیان شوي دي.

    د اسرائیلو پوځ د جګړې له پیل راهیسې په دوامداره توګه په بیروت او سویلي لبنان بریدونه کړي، او وايي د ایران د متحدې حزب الله ډلې سره تړلي اهداف په نښه کوي.

    

    د عکس سرچینه، Reuters

    

    د عکس سرچینه، Reuters

    

    د عکس سرچینه، Reuters

15. ۱۱ وری ۱۴۰۵ - ۳۱ مارچ ۲۰۲۶روسیه: امریکا اصل کې د ایران دنفتو اوغازو کنترول ترلاسه کول غواړي

    د روسیې د بهرنېو چارو وزیر ویلي دي د امریکا اصلي هدف د ایران پر نفتو او غازو کنترول ترلاسه کول دي.

    سرگئی لاوروف نړیوالو چارو په اړه د روسیې دشورا غونډې ته وویل" مونږ ګورو چې امریکا او اسراییل ددې هڅه کوی چې دایران او ګاونډیانو د اړیکو مخ کې خنډ شي، ان کوشش کوی د خلیج هېوادونه د ایران پرضد وهڅوي".

    د بهرنېو چارو وزیر وویل مسکو د سیاسي او دېپلومایتکه لارې د روانې شخړې هواري کې مرسته وکړي.

16. ۱۱ وری ۱۴۰۵ - ۳۱ مارچ ۲۰۲۶برېتانیا منځنی ختیځ ته شا اوخوا ۱۰۰۰ پوځیان استولي

    

    د برېتانیا د دفاع وزیر وايي منځني ختیځ کې شا او خوا ۱۰۰۰ برېتانوي پوځیان ځاي په ځاي شوې دي.

    دې کې هغه پوځیان هم شامل دي چې قبرص کې دېره دي.

    جان هیلي چې د منځني ختیځ په سفر دی دغه راز وویل سیمه کې د متحدینو د ملاتړ لپاره اضافي دافع هوا هم استول شوې ده.

    ده وویل ایران سیمه کې خپل بریدونه "پراخوي" او د ده په نظر جګړه به څو اونۍ دوام کوي.

    د ولسمشر ټرمپ لخوا پر برېتانیا شوو نیوکو باندې ده له څه ویلو ډډه وکړه، خو وې ویل امریکا او برېتانیا اوس هم په پوځي او امنیتي ډګر کې یوځای کار کوي.

17. ۱۱ وری ۱۴۰۵ - ۳۱ مارچ ۲۰۲۶اسراییلو تېرو ۲۴ کې تهران کې ۲۳۰ هدفونه په نښه کړي

    اسراییل وايی تېرو ۲۴ ساعتو کې یې د ایران پلازمېنې تهران کې پر ۲۳۰ ځایونو بریدونه کړي دي. اسراییلی چارواکي وايی بریدونو کې دافع هوا، د بلاستیکي توغندیو دستګاوې او د وسلو د جوړولو فابریکې په نښه شوې دي.

18. ۱۱ وری ۱۴۰۵ - ۳۱ مارچ ۲۰۲۶لبنان کې جګړې له امله د وژل شوو شمېر ۱۲۶۸ ته لوړ شوی

    

    د عکس سرچینه، Reuters

    د لبنان دولتي خبري اژانس وايي د مارچ له دویمې نېټې جګړې کې د وژل شوو کسانو شمېر ۱۲۶۸ ته لوړ شوی دی.

    دې اژانس د روغتیا وزارت له خلې ویلي دي چې دې موده کې ۳۷۵۰ کسان ژوبل شوی هم دی .

    اسراییلو په پلازمېنې بیروت او جنوبي لبنان کې خپلو بریدونو ته دوام ورکړی دی او وايي هلته یې د حزب الله ډلې اړونده هدفونه په نښه کړې دي. خو د قربانیانو لوی شمېر ملکیان ښودل شوي چې مېرمنې او کوچنیان هم په کې دي.

    پر لبنان د ځمکنی برید نه راپدیخوا اسراییلو هلته د خپلو نهو پوځیانو وژل کېدل تایید کړی دي

19. ۱۱ وری ۱۴۰۵ - ۳۱ مارچ ۲۰۲۶وروستی, امریکا وايي تېره یوه میاشت کې یې ایران کې ۱۱۰۰۰ هدفونه په نښه کړي

    

    د عکس سرچینه، Getty Images

    د امریکا د ګډو ځواکونو لوی درستیز، ډان کین، خبرې ناستې ته پر ایران د خپل بریدونو وروستي معلومات خپاره کړل. هغه په خپل نوي راپور کې وویل چې د سمندري ځواکونو لخوا له ۱۵۰ ډېرې کښتۍ په بریالیتوب سره له منځه وړل شوې دي.

    هغه زیاته کړه، په تېرو ۳۰ ورځو کې له ۱۱،۰۰۰ ډېرې موخې ویشتل شوې دي.

20. ۱۱ وری ۱۴۰۵ - ۳۱ مارچ ۲۰۲۶د امریکا دفاع وزیر: په سرتېرو کې انګېزه، پر ماموریت تمرکز او د کار پای ته رسولو یو ډول "بېړه او جديت" ویني

    

    د عکس سرچینه، Getty Images

    د امریکا دفاع وزیر پیت هېګسیټ د خبري ناستې پر مهال وویل چې تېره اونۍ یې له هغو ځواکونو سره لیدلي چې په دې نظامي عملیاتو کې برخه لري، خو د امنیتي دلایلو له امله یې د ځای نوم ونه ښود.

    هغه وویل: "دا سفر یو ویاړ و،" او زیاته یې کړه چې ده هلته "د امریکا تر ټولو غوره ځانګړنې" په خپلو سترګو ولیدې.

    هغه د پوځ د یوې ښځینه غړې سره د لیدنې یادونه وکړه او ویې ویل، کله چې یې له هغې وپوښتل د دندې د ترسره کولو لپاره څه ته اړتیا لرې؟ نو هغې ورته وخندل او ویې ویل: "نورو بمونو ته".

    هغه په دوام کې وویل، د هغو ځواکونو روحیه چې ده ورسره خبرې کړي، د عراق او افغانستان د جګړو برعکس وه، ځکه هلته سرتیري نه پوهېدل چې "عملیات به کله پای ته ورسیږي".

    هیګسټ وایي چې په دې عملیاتو کې، دی په سرتېرو کې انګېزه، پر ماموریت تمرکز او د کار د پای ته رسولو لپاره یو ډول "بیړه او جديت" ویني.