اسرائیل د بیت المقدس سپیڅلي ځایونه بېرته پرانیزي, جویل ګونتر-بیت المقدس
د اسرائیلو پولیس وايي، د بیت المقدس مقدس ځایونه به د منځني ختیځ په شخړه کې د لنډمهاله اوربند له موافقې وروسته د لیدونکو او عبادت کونکو لپاره بیا پرانیستل شي.
د الاقصی جومات، لوېدیځ دیوال او د سپیڅلي قبر کلیسا په ګډون، دغه ځایونه د اسلام، یهودیت او عیسویت لپاره د نړۍ له ډېرو سپېڅلو ځایونو دي.
له ایران سره د امریکا او اسرائیلو لخوا شپږ اونۍ وړاندې د پیل شوې جګړې له امله یوازې محدود شمېر مذهبي مشرانو ته اجازه ورکول کېده، د ایسټر او پاسوور ځینو ورځو کې هم د ولس پر مخ دا ځایونه تړل شوي وو.
د بیت المقدس زوړ ښار چې معمولاً یې په لارو، کوڅو کې د ځايي اوسېدونکو، کاروباریانو، سیلانیانو او عبادت کوونکو خورا ګڼه ګوڼه وي، تر ډېره له ګڼې، ګوڼې تش و او ډېری کاروباریانو خپل پلورنځایونه هیڅ نه پرانیستل.
اسرائیلي پولیسو اعلان کړی، چې سپیڅلي ځایونه به د پنجشنبې له سهار وروسته بیا پرانستل شي، د امنیت ډاډمن کولو لپاره سلګونه اضافي افسران ځای پر ځای شوي او له خلکو غوښتل شوي چې د ګڼې ګوڼې په صورت کې صبر وکړي.