وروستی, د اټومي انرژۍ نړیوال اژانس: د نطنز ځمکتل برخه "مستقیمه زیانمنه شوې"
د ملګرو ملتونو د اټومي انرژۍ نړیوال آژانس وایي، د نطنز اټومي بټۍ ځمکلاندې برخه د اسرائیلو د بریدونو له امله "مستقیمه زیانمنه" شوې ده.
دغه اژانس د دوشنبې په ورځ ویلي وو "هېڅ نښه" نه ده موندل شوې چې وښيي ځمکلاندې برخې ته زیان رسېدلی وي او د دوی د ارزونې له مخې، یوازې ځینې د یورانیمو د غني کولو برخې چې د ځمکې پر سر موقعیت لري، له خپلو برېښنایي تأسیساتو سره یوځای زیانمنې شوې دي.
خو نن دغه اژانس پر اېکس (پخواني ټویټر) لیکلي: "د هغو لوړ وضحات لرونکو سپوږمکۍ انځورونو له دوامداره تحلیل وروسته چې د جمعې ورځې له بریدونو وروسته راټول شوي، اژانس داسې نښې موندلې چې د نطنز په ځمکلاندې د یورانیم غني کولو تالارونو کې د مستقیمو بریدونو ښکارندويي کوي."
د انرژۍ اژانس مشر رافایل ګروسي پرون د اژانس د مشرانو په یوه بېړنۍ غونډه کې هم همدا ارزونه بیا تکرار کړه.
اژانس تر اوسه د دې مستقیم زیان د جزئیاتو په اړه نور معلومات نه دي ورکړي.
د نطنز بټۍ شاوخوا ۷۰ د سانتریفیوژو زنځیرونه لري چې د یورانیم د غني کولو لپاره کارول کېږي، یوه برخه یې تر ځمکې لاندې ده.
ایران تل دا رد کړې چې د اټومي وسلو جوړولو هڅه کوي، خو یورانیم یې تر ۶۰ سلنې پورې غني کړي دي، حال دا چې د برجام (اتومي موافقې) له مخې یوازې تر ۳،۴۷ سلنې پورې اجازه شته.
د عکس سرچینه، Reuters
