په منځني ختیځ کې له بې ثباتۍ ډک ګهیځ
د منځني ختیځ څانګې مدیر
بیت المقدس
اسرائیل تل ویلي، چې دوی کولای شي یوازې د ایران اتومي پروګرام له منځه یوسي، خو دا خبره هم پټ راز نه دی، چې یوازې امریکا کولای شي، داسې تاسیسات ویجاړ کړي، چې په ځانګړې توګه د ایران فردو اتومي کار ځای غوندې په یوه غره کې دننه ژورو ځایونو کې چمتو شوي وو.
که دغه ځایونه اوس به بشپړه توګه له منځه تللي وي، د اسرائیلي لومړي وزیر بینامن نتنیاهو لپاره یو ښه فرصت دی، چې د جګړې لپاره د خپل مهم هدف بشپړېدلو اعلان وکړي.
خو نن ګهېځ به په منځني ختیځ کې لومړنې اندېښنه دا وي، چې ایا دا د کړکېچ ختمېدو پیلامه ده او که د جګړې د یوه لا خونړي پړاو پیل دی.
تېره اونۍ د ایران مذهبي مشر ګواښ کړی و، چې امریکا په جګړه کې ښکېله شي، ځوابي ګوزار به وویني: ''امریکایانو ته باید معلومه وي، چې د امریکا هر ډول پوځي مداخله به له نه جبرانېدونکې ویجاړۍ سره مله وي.''
پر همدې شنبه په یمن کې د ایران ملاتړ لرونکي حوثي ملېشه ځواک ګواښ وکړ، چې که امریکا په دې جګړه کې ښکېله شي، دوی به پر هغو امریکايي بېړیو بریدونه وکړي، چې له سره سمندره تېرېږي.
