امریکا سفارت له امریکایانو غوښتي چې کابل هوايي ډګر ته له تلو ډډه وکړي
په داسې حال کې چې زرګونه کسان هڅه کوي، د افغانستان پلازمېنې کابل د حامد کرزي هوايي ډګر له لارې هېواد پرېږدي، په کابل کې د امریکا سفارت په یوه اعلامیه کې له افغانستان مېشتو امریکایانو غوښتي چې د اوس لپاره د کابل حامد کرزي هوايي ډګر ته له ورتلو ډډه وکړي.
د سفارت په اعلامیه کې ویل شوي: ''د کابل هوايي ډګر په دروازو کې د امنیتي خطر له کبله موږ امریکایانو ته مشوره ورکوو چې تر څو پورې شخصاً د امریکا حکومت له استازولۍ لار ښوونه تر لاسه نه کړي، د اوس لپاره دې هوايي ډګر ته له ورتلو ډډه وکړي او د هوايي ډګر له دروازو دې لېرې واوسي.''
له دې مخکې طالبانو وویل، په کابل هوايي ډګر کې د ګډوډۍ مسوولیت د دوی پر غاړه نه دی. د طالبانو یو ویاند وايي، لوېدیځوال ځواکونه باید د خلکو لېږدولو لپاره یو مناسب پلان درلودای.