ډونلډ ټرمپ وايي ښايي راتلونکې سې شنبه ونیول شي
د عکس سرچینه، Getty Images
د مریکا مخکینی ولسمشر ډونلډ ټرمپ وايي ښايي راتلونکې سې شنبه د لوڅو فلمونو یوې لوبغاړې 'سټورمي دانیلز' ته د بډو ورکولو قضیه کې ونیول شي.
هغه پر خپلو پلویانو غږ کړی چې که دی احتمالآ نیول کېږي، نو پراخ لاریونونه راوباسي.
ډونلډ ټرمپ دا خبره د خپلې خواله رسنۍ 'تروت سوشیال' پر پاڼه لیکلې.
خو د نوموړي وکیله وايي چې تر اوسه د قانون له نافذونکو سره په دې تړاو اړیکه نه ده شوې او دا چې ښاغلي ټرمپ دا پیغام د رسنیو د رپوټونو پر بنسټ خپور کړی.
په دغو رپوټونو کې راغلي چې د پخواني ولسمشر خلاف د عدلي څار پرېکړه ښايي راتلونکې اوونۍ وشي.
که دا کار کېږي نو دا به د امریکا تاریخ کې لومړی ځل وي چې د یوه پخواني ولسمشر خلاف جرمي دوسیه پرانیستل کېږي.
که ښاغلي ټرمپ رسمآ تورن شي، نو ښکاره ده چې دا به یې د ۲۰۲۴ کال ولسمشریزو ټاکنو ته نوماندي اغېزمنه کړي.
ادعا دا ده چې د ۷۶ کلن ټرمپ یوه وکیل مایکل کوهن د ۲۰۱۶ کال د ولسمشریزو ټاکنو درشل کې د هغه په امر او استازولۍ 'سټورمي دانیلز' ته بډې ورکړې، چې پر نوموړي د جنسي تېري ادعا راپورته نه کړي.
د امریکا فدرال محکمې که څه هم په ۲۰۲۱ کال کې په دې تړاو څېړنې ودرولې، خو ویل کېږي د نیویارک د منهاټن څارنوال په جلا ډول په دې اړه پنځه کاله څېړنې کړې او اوس یې دا قضیه راپورته کړې ده.
خو دغه څارنوال تر اوسه رسمآ د ټرمپ د تورنېدو یا نیول کېدو د احتمال په اړه څه نه دي ویلي.
ښاغليکوهن محکمه کې شاهدي ورکړې چې د ۲۰۱۶ کال تر ټاکنو څو ورځې مخکې یې د ښاغلي ټرمپ په امر سټورمي ته ۱۳۰ زره ډالر ورکړي.
پخپله ښاغلی ټرمپ هم د دغو پیسو ورکړه مني، خو له دې اړیکې او د امریکا له ټاکنیزو قوانینو له سرغړونې انکار کوي.
د عکس سرچینه، Getty Images
د امریکا پخوانی ولسمشر تر دې مخکې هم د بېلابېلو تورنو له کبله له لوړو ژور سره مخ شوی، خو هغه دغه ټول تورونه رد کړي.
د امریکا پخوانی ولسمشر دغه هېواد کې میلیونونه سر سخت پلویان لري او اندېښنه دا ده چې که نوموړی نیول کېږي نو دا به د پراخو لاریونونو او تاوتریخوالي لامل شي.
هغه په ۲۰۲۱ کال کې هم پر خپلو پلویانو د لاریون غږ کړی و، چې پایله کې یې زرګونه کسان د کانګرس پر ودانۍ ور وختل.
په هره توګه امریکایي رسنۍ وايي نیویارک کې د قانون نافذونکي ادارې د ښاغلي ټرمپ د احتمالي تورنېدو وروسته وضعیت کنټرول ته په چمتووالي بوختې دي.
بل خوا د امریکا د استازو جرګې جمهوریپال مشر 'کوین مک کارتي' د منهاټن څارنوال لخوا په دې تړاو څېړنې غندلې دي.
