د طالبانو مالیې وزارت له ۲۰۰۵ لوړ ماډل موټرونو ته د قانوني واردېدو اجازه ورکړه
د عکس سرچینه، afghanistanmof
افغانستان کې د طالبانو حکومت دغه هېواد ته له قانوني لارو له ۲۰۰۵ کال د لوړ ماډل موټرونو د واردېدو اجازه وکړه.
د طالبانو مالیې وزارت ویلي، دا پرېکړه د دوی اقتصادي کمېسیون تایید او کابینې منظور کړې ده.
تر دې مخکې افغانستان ته یوازې د وروستیو لسو کلونو ماډل موټرونو د وارېدو اجازه وه.
دا پرېکړه په ۲۰۱۲ کال کې د افغانستان د وخت حکومت لخوا د دې لپاره شوې وه چې د هوا د ککړتیا او د ترافیکي پېښو مخه ونیول شي.
په لومړي ځل چې کله افغانستان ته د واردېدونکو موټرونو لپاره د کال او ماډل شرط کېښودل شو، نو ځینو سوداګرو او د موټرونو کاروباریانو ورسره له دې کبله مخالفت کړی و، چې ګوندې دوی وار له مخکې دا ډول زرګونه موټرونه بهر پېرلي او افغانستان ته د وارېدیدو په حال کې دي.
د زړو موټرونو د تېلو مصرف او د روغتیا ته د زیان اړونکي دود تولید عمومآ ډېر وي او همدا راز د پرزو د زړښت له کبله خوندي هم نه ګڼل کېږي.
د طالبانو د مالیې وزارت نن دوشنبه په خپل ټویټر لیکلي "له دې وروسته هېوادوال کولای شي چې له ۲۰۰۵ ماډل څخه نیولې بیا تر وروستي (۲۰۰۵ ـ ۲۰۲۳) ماډل موټرو پورې چې د افغانستان د ترافیکو له سیسټم سره مطابقت ولري، په قانوني ډول هېواد ته وارد کړي."
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای, 1
دوی دا هم لیکلي چې له ۲۰۰۵ کال کښته ماډل موټرونو ته په هېڅ ډول د واردېدو اجازه نه ورکول کېږي.
د افغانستان د متشبثینو عالي بورډ مرستیال عبدالصمد هوتک د طالبانو مالیې وزارت د دې پرېکړې په اړه بيبيسي ته وویل، چې د ټیټ ماډل موټرونو واردول سوداګرو او د موټرونو کاروباریانو ته ګټه لري، په دوبۍ او نورو ځایونو کې ارزانه موندل کېږي، خو د هوا د ککړتیا، د موټرو خوندیتوب او د ترافیکي پېښو مخنیوي ته هم باید پام وشي.
د یادونې ده چې د طالبانو مالیې وزارت همدا څو ورځې وړاندې افغانستان ته له غیر قانوني لارو یا په کانتینرونو کې واردو شویو بې اسناده (یو کیلي) موټرونو ته هم د اسنادو ورکولو پروسه وغځوله.
د دغه وزارت لخوا د روانې اپریل میاشت پر پنځمه په دې اړه خپره شوې خبرپاڼه کې راغلي چې "د ګمرکونو لوی ریاست په وړاندیز او د کابینې په تایید د افغانستان لاس بېاسنادو (یوکیلی) موټرو د ثبت او محصول پروسه د شته کړنلارې له مخې د روان ۱۴۰۲ کال تر پایه تمدید شوه."
په دې خبرپاڼه کې دا هم ویل شوي چې ګوندې "د یوکیلي موټرو د ثبت او محصول په شته کړنلاره کې د خلکو اقتصادي حالت په پام کې نیول شوی او پر داسې لارو چارو فکر شوی چې د بېاسنادو موټرو مالکین وکولی شي خپلو موټرو ته اسناد واخلي."
د طالبانو مالیې وزارت په دې لړ کې بې اسناده یا یوکیلي موټرونو ته مالیه کې د کال او ماډل له مخې تخفیف هم اعلان کړی.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای, 2
د یادونې ده چې واک ته د طالبانو له راګرځېدو راهیسې که له یوې خوا افغانستان د موټرونو کاروبار سوړ او بیې یې رالوېدلي، نو له بلې خوا په ښارونو کې د بې اسناده او بې پلېټه موټرونو د ډېریدو خبرونه ورکړ شوي.
د طالبانو امنیتي ادارو او ترافیکو هم ویلي چې دا ډول موټرونه د جنايي پېښو، د عامه نظم اخلال او د ترافيکي بېنظميو لامل ګرځېدلي دي.
د طالبانو حکومت کې د ترافیکو لوی ریاست ویلي و چې یوکیلي موټرونو ته درې کلن اسناد ورکول کېږي.
د طالبانو حکومت د دې لپاره یو کمېسیون هم جوړ کړی، چې ښارونو کې د بې اسناده موټرونو د ګرځېدو مخه ونیسي او د اسنادو اخیستلو لپاره یې ګمرکونو ته معروفي کړي.
د جمهوریت په ورستیو کلونو کې هم د افغانستان لاس بې اسناده او یوکیلي موټرونو ته د اسنادو ورکولو پروسه پیل او حکومت له دې درکه سلګونه میلیونه افغانۍ عاید ترلاسه کړی و.
