ویانا کنفرانس کې د دوحې تړون د لغوه کېدو غوښتنه؛ طالبان وايي خلک نور نه تېروځي

افغانستان کې د طالبانو حکومت مخالفو څېرو د اتریش پلازمېنه ویانا کې د خپل دوه ورځني کنفرانس پای کې غوښتنه کړې چې د امریکا او طالبانو ترمنځ دې د دوحې هوکړه لغوه شي.

دوی د دې ناستې اعلامیه کې له ملګرو ملتونو هم غوښتي چې د طالبانو حکومت رسميت پېژندنې لپاره دې له هر ډول بحث ډډه وکړي.

په دې ناسته کې د ملي مقاومت جبهې په نوم د طالبانو د مخالفې ډلې مشر احمد مسعود، د جمهوریت مهال یو شمېر چارواکو او سیاسونو برخه اخیستې وه.

دا په ویانا کې د دې لړۍ دویم کنفرانس دی.

طالبانو بیا دا کنفرانس غندلی او د افغانستان په زیان بللی دی.

د طالبانو حکومت مرکزي ویاند ذبیح الله مجاهد ویلي چې د افغانستان خلک بیا نه تېر وځي.

د ویانا د دغه کنفرانس پای کې په خپره شوې اعلامیې کې راغلي "دا چې د ۲۰۲۰ کال د دوحې هوکړې پایله کې د طالبانو نامشروع واکمني افغانستان کې د ناورین زېږوونکې وضعیت لامل ګرځېدلې" نو دوی د دې هوکړې دوام د افغانستان په خیر نه ګڼي.

په دې اعلامیه کې د طالبانو 'رسمیت پېژندلو لپاره پر کوچنیو ګامونو د بحث' په تړاو د ملګرو ملتونو د سر منشي د مرستیالې امینه محمد څرګندونې هم "غیر مسؤولانه" بلل شوې ده.

د دغه کنفرانس ګډونوالو له ملګرو ملتونو غوښتي، چې د راتلونکې می میاشتې پر لومړۍ او دویمه نېټه دوحه کې د دغه سازمان لخوا په جوړېدونکي کنفرانس کې دې له هر داسې بحث ډډه وکړي، چې د طالبانو واکمنۍ د دوام او د افغانستان اوضاع د لا پېچلي کېدو لامل ګرځي.

احمد مسعود نن د ویانا کنفرانس پای کې وویل "د طالبانو په رسمیت پېژندل به د افغانستان د خلکو، ازادۍ او دیموکراسۍ پر تابوت وروستی مېخ" وي.

هغه افغانستان کې د ښځینه کارکوونکو پر کار د بندیز له کبله د ملګرو ملتونو او طالبانو ترمنځ د راپورته شوي مخالفت په اړه ویلي، چې دوی له دغو ستونزو سره سره په افغانستان د ملګرو ملتونو د ماموریت د دوام غوښتونکي دي او دا چې خلک د ملګرو ملتونو مرستندویه عملیاتو ته اړتیا لري.

"که طالبان ټاکنو ته غاړه کېږي، له وسله وال مقاومت لاس اخلو"

احمد مسعود همدا راز ویلي که طالبان ټاکنو ته غاړه کېږي، د ملي مقاومت جبهه به له وسله والې مبارزې او مقاومت لاس واخلي.

هغه پر دې جبهې د یوې ځانګړې سیمې او خلکو د انحصار خبره هم رد کړه او و یې ویل "موږ د واک لپاره مبارزه نه کوو. ازادۍ لپاره مبارزه کوو. د افغانستان ستونزه د یوه تن، یوې ډلې او قوم په وسیله نه حل کېږي."

احمد مسعود زیاته کړه د دې پوښتنې ځوابېدو لپاره له تاسې غواړم چې د ملي مقاومت جبهې جوړښت وګورئ، د انحصار په نوم څه به پکې ونه وینئ."

دا په داسې حال کې ده چې شاوخوا دوه اونۍ وړاندې د ملي مقاومت جبهې یوې سرچینې چې غوښتل یې نوم یې وانخیستل شي، بي بي سي سره خبرو کې پر دې جبهه د احمد مسعود د کورنۍ د انحصار او فساد یادونه کړې وه.

دې سرچینې ویلي دغو دوو ښکارندو دا جبهه د پاشل کېدو له خطر سره مخ کړې ده.

طالبان: "د افغانستان خلک بیا نه تېر وځي"

د طالبانو حکومت ویاند ذبیح الله مجاهد د ویانا د دې ناستې په اړه ويلي چې د افغانستان په ګټه نه ده.

هغه اریانا نیوز تلویزیون ته ویلي، چې "د افغانستان خلک بیا پر دوی نه تېر وځي. دا څو کسان دي چې د خپلو شخصي ګټو او د خپل مال او شتمنیو د ساتنې په لټه کې دي. دوی سره د افغانستان غم نشته او د افغانستان خلک هم ورته مهم نه دي."

هغه زیاته کړې چې "اسلامي امارت [د طالبانو حکومت] په افغانستان کې د یوه حکومت او نظام په توګه هغه خلک چې د افغانستان خیر نه غواړي او په بد نیت هر ځای کې راغونډ شي، غندي او د دې غوښتنه کوي چې نور دې هېڅ داسې هڅه نه کوي."