هند کې د افغانستان په اړه غونډې ته د طالبانو غبرګون
د عکس سرچینه، @BilalKarimi21
- Author, مامون درانی
- دنده, بي بي سي
- د خپرېدو وخت
د هند په کوربه توب د منځنۍ اسیا هېوادونو یوه ورځنۍ غونډه د سه شنبې په ورځ په نوي ډیلي کې جوړه شوه.
په هند کې د سیمې هېوادونو امنیتي او اقتصادي غونډې ته په غبرګون کې د طالبانو حکومت ویلي، دوی له ګاونډیانو سره مثبتو اړیکو ته ژمن دي.
د طالبانو د حکومت یوه مرستیال ویاند بلال کریمي د افغانستان ملي رادیو تلوېزیون ته ویلي، "افغانستان کې ټیکاو رامنځ ته شوی او د افغانستان د سرحدونو او پولو د خوندیتوب ډاډ ورکوو او د ښو روابطو او تعامل غوښتونکي یو".
ښاغلی کریمي زیاتوي، هغه اندېښنې او ناسم مالومات چې مغرضې کړۍ یې بهر ته لېږدوي "دا یوه ناسمه چاره" ده.
په دې غونډه کې د افغانستان امنیتي وضعیت، له دې هېواده د ترهګرۍ خپرېدل، په ټولیزه توګه د سختدریځۍ له ګواښونو سره مبارزه او د منځنۍ اسیا هېوادونو سره د هند د سوداګریزو او اقتصادي اړیکو پراخول د غونډې د اجنډا په سر کې وې.
بله خوا یوه هندي چارواکي د نوم نه ښودلو په شرط رسنیو ته ویلي، په نننۍ غونډه کې به د ایران د چا بهار بندر د اهمیت ترڅنګ دغه بندر د شمال او جنوب نړیوال ټرانسپورټي دهلېز سره د نښلولو په اړه هم خبرې وشي.
د عکس سرچینه، @US4AfghanPeace
د شمال – جنوب ترانسپورتي دهلېز، چې ۷۲۰۰ کیلومتره اوږدوالی لري او ۱۳ هېوادونه سره نښلوي په ۲۰۰۰ کال کې د غړو هېوادونو ترمنځ د ترانسپورتي همکارۍ د هڅولو لپاره رامنځته شوی.
افغانستان او د مرکزي اسيا هېوادونو له هند سره ګډه ځکمنۍ پوله نه لري او له همدې وجې هند په سيمه کې د تجارت د ودې له پاره د چابهار بندر په پراختيا او مديريت کې پانګونه کړې.
دمګړۍ د چابهار بندر یو ترمینل د یوه هندي حکومتي شرکت له خوا اداره کېږي او دا د افغانستان او د منځنۍ اسیا له هېوادونو سره د اړیکو د پراختیا لپاره د هند د پلانونو یوه مهمه برخه ده.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
بله خوا هند غواړي د چابهار بندر د پاکستان له ګوادر بندر سره سیال کړي، چې دغه بندر په پاکستان کې د چین په مالي مرسته جوړېږي.
هند او د منځنۍ اسیا هېوادونو تېره جنورۍ په خپله لومړۍ سرمشریزه کې پرېکړه وکړه چې د افغانستان په اړه د همکارۍ لپاره یوه ګډه کاري ډله جوړه کړي او په بېلابېلو برخو کې له پیوستتون نیولې تر امنیت پورې د همکارۍ لپاره یو بنسټیز چوکاټ جوړ کړي.
ریښتنی استازی او ټول ګډونه حکومت
د هند په کوربه توب د مرکزي اسیا هېوادونو د لومړنۍ غونډې په پرېکړه لیک کې په افغانستان کې د یوې پراخې سيمه یيزې اجماع رامنځته کول او د يوه "ریښتني استازي او ټول ګډونه حکومت" پر جوړولو او د ښځو او ماشومانو په ګډون د لږکیو حقونو ته پر درناوي ټینګار شوی و.
د هندوستان په نوی ډیلي کې د مرکزي اسیا هېوادنو د ملي امنیت د سلاکارانو غونډه پر داسې مهال جوړېږي، چې د افغانستان لپاره د امریکا ځانګړي استازی توماس وېسټ پر خپل ټویټر لیکلي، چې د افغانستان په اړه یې د هند د ملي امنیت شورا له مرستیال سلاکار ویکرم مصري او د هند د بهرنیو چارو وزارت جګپوړي سکرتر "جي پي سنګ" سره خبرې کړې.
تر دې مخکې د امریکا د بهرنیو چارو وزارت اعلان کړی و چې د افغانستان لپاره یې ځانګړی استازی توماس وېسټ د هندوستان، جاپان او متحده عربي اماراتو پر سفر روان شوی دی.
ښاغلي ویسټ همداراز لیکلي، چي د سولې د عالي شورا له پخواني مشر ډاکټر عبدالله سره لیدلي او د افغانانو ترمنځ د ملي سیاسي ډیالوګ د بېړنۍ اړتیا په اړه ورسره غږېدلی.
