خيبر پښتونخوا کې د امنیت خرابېدو ته د اسلام اباد اندېښنې 

د پاکستان د مرکزي حکومت د کورنیو چارو وزیر رانا ثنا الله په خيبر پښتونخوا کې "په دوامداره توګه د امن او نظم خرابېدونکي حالت" په اړه ژوره اندېښنه ښودلې او د پېښور په سر بند کې یې د پولیسو پر مرکز  ترهګریز برید غندلی دی. 

رانا ثناالله ویلي، مرکزي حکومت په خیبر پښتونخوا کې د امنیتي حالت د خرابېدو په اړه اندېښمن دی.  

دی وايي په خیبر پښتونخوا کې ترهګر د پولیسو پر مرکزونو بریدونه کوي، پولیس او افسران په نښه کېږي. 

وسله والو د تېرې جمعې په شپه د خيبر پښتونخوا په مرکز پېښور کې د سر بند د پوليسو پر تاڼې بريد کړی و.  

چارواکو ویلي امنیتي ځواکونو له دغه برید وروسته بریدګر تعقیب کړي او نښته کې ورسره یو افسر او دوه پولیس ووژل شول. 

د امنیتي سرچینو په وینا دغه برید کې لاسي بمونه، سنایپر یا نښه ویشتونکي ټوپکونه او اتوماتې وسلې کارول شوې.  

رانا ثنا الله وايي "له تازه پېښو داسې ښکاري چې ترهګرو د خیبر پښتونخوا د بنو پر یوه مرکز له بریده سبق نه دی اخیستی." 

هغه زیاته کړې "د خيبرپښتونخوا د اعلی وزیر ټول توان د ایالتي اسمبلۍ په ماتولو ورټول دى. د خلکو د ژوند او مال خوندیتوب او په دغې صوبه کې امنیت د خیبر پښتونخوا د اعلی وزیر لومړیتوب نه دی." 

د کورنیو چارو وزیر ویلي  "دا چې د خیبرپښتونخوا پولیس د ترهګرو له بریدونو خوندي نه دي، نو د خلکو د ساتنې حالت به څنګه وي؟" 

 بلخوا د خيبر پښتونخوا اعلی وزیر محمود خان هم  دا پېښه غندلې او ويلي يې دي، "زمونږ پوليسو په زړورتيا سره د ترهګرو مقابله وکړه او بريد يې په شا وتمباوه." 

دی وايي ټول ملت د ترهګرۍ پر وړاندې مبارزې کې د پوليسو ترڅنګ ولاړ دی. 

د چارواکو په وینا وسله والو له څو خواوو د سربند پولیسو پر مرکز  برید کړی و، چې پر شا تمبول شوي دي.