پاکستاني طالبانو لکي مروت کې شپږ پولیس وژلي
د عکس سرچینه، Getty Images
د خیبر پښتونخوا لکي مروت کې د پولیسو پر یوې ګزمې برید شوی چې لږترلږه شپږ پولیس پکې وژل شوي دي.
د چارواکو په وینا، پولیس په عادي ګزمه روان وو چې په وسلو سمبالو کسانو ډزې پرې وکړې او په ګاډي کې سپاره شپږ پولیس پکې ووژل شول.
پېښه د چارشنبې په ورځ سهار شوې ده.
د لکي مروت د پولیسو ویاند ویلي، په ګاډي کې سپاره کسان د شهاب خېلو سیمه کې په ګزمه راوتلي وو.
دی وايي، بریدګر تر برید وروسته ونو کې پټ شوي او پولیسو ته یې کمین نیولی و، کله چې هلته د پولیسو ګاډی ور رسېږي، دوی پرې راوځي او ډزې پرې کوي.
په وژل شویو کې د پولیسو یو مشر علم دین هم دی.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
له پېښې وروسته پولیسو سیمه کلابنده کړې او د بریدګرو د موندلو لټون یې پیل کړی.
د برید مسؤولیت د پاکستاني طالبانو تحریک منلی دی.
په ورته وخت کې د خیبر پښتونخوا پولیسو په یوه بیان کې ویلي، دا ډول بریدونه د پولیسو هوډ نه شي کمزوری کولی او د "وروستي ترهګر تر وژل کېدو پورې به جګړه روانه وي".
د پاکستان لومړي وزیر شهباز شریف پر ټویټر د لکي مروت پېښې په غبرګون کې لیکلي چې "تېروتنه به نه وو، ترهګري د پاکسان له لویو ستونزو یوه ده".
دی واييو په لکي مروت کې پر پولیسو برید ترهګریز برید غندي.
