جرمني او امریکا د افغان سولې پر راتلونکو ګامونو غږېدلي
د عکس سرچینه، @US4AfghanPeace
د افغان سولې لپاره د امریکا ځانګړي استازي د روان بهیر په تړاو د جرمني د بهرنیو چارو له وزیر سره کتلي دي. زلمي خلیلزاد ویلي، له هیکو ماس سره دې کتنه کې یې د افغانستان د سولې لپاره د جرمني د هڅو مننه کړې او پر راتلونکو ګامونو ورسره غږېدلی دی.
جرمني تېره میاشت په دوحه کې له قطر سره په ګډه د افغانانو د خپلمنځي ناستې کوربه توب کړی و.
بل خوا د ملا عبد الغني برادر په مشرۍ د طالبانو یوه پلاوي د ازبکستان د سمرقند له والي سره کتلي، چې ازبکستاني چارواکو پکې د افغانانو د بلې خپلمنځي غونډې د کوربه توب وړاندیز کړی او طالبانو یې هرکلی کړی دی.
د افغان سولې لپاره د امریکا د بهرنیو چارو وزارت ځانګړي استازي زلمي خلیلزاد پر خپله ټویټر پاڼه د افغانانو خپلمنځي سولې خبرو لپاره د جرمني د ژمنتیا هرکلی کړی، ښاغلی خلیلزاد زیاتوي د افغانانو خپلمنځي خبرې د افغان سولې د بهیر یوه اساسي برخه ده.
د امریکا استازي ویلي د جرمني د بهرنیو چارو له وزیر هایکو ماس سره د افغان سولې په برخه کې د وروستي شویو پرمختګ په اړه معلومات شریک کړي دي.
د نوموړي په خبره کې په دې کتنه د سولې په برخه کې پر راتلونکو ګامونو هم خبرې وشوې. مخکې ویل شوي چې د امریکا او طالبانو ترمنځ هوکړه ډېره نژدې ده او راتلونکی پړاو د افغانانو خپلمنځي خبرې دي. په دې خبرو کې به د افغان دولت، مدنې ټولنې او سیاسي ګوندونو استازي برخه ولري.
د افغانانو د خپلمنځي خبرو لپاره د کوربه په توګه د دوه هېوادونو نومونه یادیږي، یو یې ناروې او بل یې ازبکستان. شونې ده چې د افغانانو خپلمنځي ناستو راتلونکې غونډه له دغو دوه هېوادونو په یوه کې وشي.
لومړۍ غونډه تېره میاشت په قطر کې وه چې د افغان دولت استازو هم په کې برخه لرله، دغه غونډه د جرمني او قطر په ګډو هڅو جوړه شوې وه.
په قطر کې د طالبانو د دفتر مشر ملا عبد الغني برادر ازبکستان کې ددغه هېواد د بهرنیو چارو له وزیر عبد العزیز کاملوف سره خبرو کې د دې هرکلی کړی چې د افغانانو خپلمنځي غونډه په تاریخي ښار سمرقند کې وشي. ملابرادر او نور طالب چارواکي پرون دغه ښار ته ورغلي وو.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
بل لورته په قطر کې د امریکا او طالبانو د تخنیکي ټیمونو ترمنځ خبرو پرون هم دوام درلود. د نورو جمعو ورځو بر خلاف پرون دا خبرې ونه ځنډول شوې او روانې وې.
په قطر کې په روانو خبرو کې د پرمختګ او د افغانانو ترمنځ د بلې غونډې تا بیا نیولو ترڅنګ له افغانستانه د امریکايي ځواکونو د ایستلو د پیل خبرې هم تودې شوي دي.
راپورونو کې ویل شوي چې ښايي امریکا د راتلونکي ۲۰۲۰ کال تر ټاکنو وړاندې خپل سرتېري وباسي خو غواړي د ترهګرۍ په برخه کې د شته ګواښونو له امله چې لامل یې تر ډېره القاعده او "اسلامي دولت" داعش ډلې بلل کېږي امریکا په افغانستان کې استخباراتي حضور ولري.
