Tha Robert Pownell - AKA Fear a' Ghuga - a' faireachdainn gu bheil an iomairt aigesan gus casg a chur air sealg a' ghuga air soirbheachadh gu mòr.

‘S ann gus aire a chur air a' chleachdadh agus gus sgaraidhean is mì-rùn air eileanaich a sheachnadh a sheas e ann an Dùn Èideann, seach anns na h-Eileanan, thuirt Mgr Pownall.

A dh’aindeoin na gheibh e de bhòtaichean, tha e den bheachd gu bheil e air na h-amasan aige a choileanadh.

Alasdair MacLeòid
Ag aithris à cunntadh nam bhòtaichean air a' Ghàidhealtachd

Riochdaire 'son Anndra Baxter air a ràdh gum biodh e na iongnadh mura deadh ath-chunntadh iarraidh airson sgìre an Eilein Sgitheanaich, Loch Abair, is Bhàideanach agus coltas cho faisg air gnothaichean.

Seo ged nach eil an cunntadh foirmeil air tòiseachadh fhathast!

Thuirt Iain Swinney, gu bheil e follaiseach gur e an SNP am partaidh as motha a bhios sa phàrlamaid.

Bha e a' bruidhinn an dèidh dha seat Siorrachd Pheairt a Tuath a bhuannachadh.

Tha Alasdair Allan a' fàgail Holyrood às dèidh dha a bhith a' riochdachadh nan Eilean Siar bho 2007.

A' bruidhinn ri Derek MacAoidh air An Taghadh air BBC Radio nan Gàidheal, thuirt e gur e briseadh-dùil mòr a th' ann.

Thuirt e nach eil e airson leisgeulan a dhèanamh ach gun robh e follaiseach tron iomairt gun robh mòran san sgìre feargach mu shuidheachadh nan aiseagan.

"Bha daoine a' bruidhinn mu dheidhinn sin aig na dorsan is tha mi cinnteach gun robh e am measg chuspairean a bha daoine a' smaoineachadh mu dheidhinn nuair a bha iad a' bhòtadh."

Buille do sheann cheannard nan Tòraidhean an Alba, Jackson Carlaw, agus e a' call a-mach gu an SNP ann an sgìre na Coille an Ear.

Dòmhnall MacLaomainn
Ag aithris à Steòrnabhagh

"Bha mi a' bruidhinn ri Alasdair Allan sa mhadain is cha robh guth gur ann mar seo a dheadh cùisean. Bha am Partaidh Làbarach ag ràdh rinn tron mhadainn gun robh e faisg is feumaidh mi aideachadh nach robh mi buileach gan creidsinn.

"An uairsin san uair mu dheireadh thòisich an t-àite seo ag atharrachadh, bha daoine a' fàs tòrr nas nearbhasaiche - bha faireachdainn ann gun robh seo uabhasach faisg.

"Bha beachd ann gur dòcha gun robh bruidhinn air na bhòtaichean a chunntadh a-rithist - cha do thachair sin."

Bha e glè fhaisg eadar Dòmhnall MacFhionghain dha na Làbaraich a bhuannaich agus Alasdair Allan dhan SNP san dàrna àite - dìreach 154 bhòtaichean eadar iad.

Alasdair MacLeòid
Ag aithris à cunntadh nam bhòtaichean air a' Ghàidhealtachd

Aig a' chunnt ann an Inbhir Nis, 's ann a tha gu leòr de dhaoine air a bhith a' coimhead le farmad air mar a tha cùisean a' gluasad air adhart ann an sgìrean eile; gun fhios againn an-seo fhathast cuin a gheibh sinn fios air fiù na thionndaidh a-mach airson bhòt a chur, gun luaidh air cò a tha a’ dol a dh’fhaighinn a-steach.

Tha beachd ann mar-thà, ge-tà, gur ann sìos chun an SNP agus Lib Deamaich a bhios gnothaichean ann an gach tè dha na sgìrean-bhòtaidh air an cunntadh an-seo: siud sgìre Inbhir Nis is Inbhir Narainn; An t-Eilean Sgitheanach, Loch Abar, is Bàideanach; agus Gallaibh, Cataibh, agus Ros.

Tha a h-uile coltas ann gu bheil aire nam partaidhean eile air tionndadh gu bhòtaichean liosta na Gàidhealtachd is nan Eilean; le Uainich na h-Alba, is Reform an dòchas gum faigh iad dithis bhall an urra a-steach tron liosta.

Tha am Partaidh Làbarach an dùil gum faigh iad aon bhall a-steach air an liosta, mar a thachair ann an 2021, ach bidh sin an urra ri toradh a’ bhòt sna h-Eileanan an Iar. Tha cuideachd am Partaidh Tòraidheach an dòchas gum faigh iad aonan a-steach tron liosta, an dèidh dhaibh ceathrar bhall fhaighinn a-steach air an dòigh seo san taghadh fa dheireadh.

Chaidh bus na smàl taobh a-muigh an ionaid chunntaidh ann an Gleann Rathais.

Chaidh dà charbad smàlaidh a chur chun na làraich.

Chan eil fhios aig an ìre so dè dh'adhbhraich an teine, a thòisich mu 2:00f.

A rèir aithrisean lean an dà charbad smàlaidh am bus a-steach gu taobh a-muigh an ionaid chunntaidh agus dhèilig iad ris an teine san spot.

Bha e faisg! Ach tha Dòmhnall MacFhionghain air na h-Eileanan an Iar a bhuannachadh airson nan Làbarach 'son a' chiad uair bho 2007.

Tha na Làbaraich air na h-Eileanan an Iar a thoirt bhon SNP.