SNP: 58. LÀB: 17. REF: 17. UAN: 15. TÒR: 12. LD: 10.
'S iad an SNP am partaidh as motha ann an taghadh na h-Alba le 58 ball
Bha na Làbaraich is Reform san dàrna àite air 17
Tha 15 aig na h-Uainich is dà roinn nam measg
Chrìochnaich na Lib Deamaich le 10 ball is iad air adhartas a dhèanamh aig tuath
Thug Dòmhnall MacFhionghain na h-Eileanan an Iar airson nan Làbarach 'son a' chiad turas bho 2007
Air a' Ghàidhealtachd chum an SNP Inbhir Nis is Inbhir Narann, ach thug na Lib Deamaich Gallaibh, Cataibh is Ros agus An t-Eilean Sgitheanach, Loch Abar is Bàideanach bhuapa
Chùm an SNP Earra-Ghàidheal is Bòd
'S e Liosta na Gàidhealtachd is nan Eilean a' bhòt mu dheireadh a thàinig a-steach aig 01:21m
Thuirt ceannard an SNP, Iain Swinney, gu bheil e an dòchas gum bi "co-obrachadh nas fheàrr ann" le Riaghaltas na Rìoghachd Aonaichte nuair a thilleas e gu Holyrood
Chuir an Ceann-suidhe Trump meal a naidheachd air Mgr Swinney
Thuirt Anas Sarwar gun robh na Làbaraich "air an argamaid airson atharrachadh a chall" is gun robh e goirt
Tha ceannard Reform ann an Alba ag ràdh gu bheil "bunait làidir" aca.
Tùs an deilbh, PABha cunntadh a' dol mar-thà ann an Sasainn tron oidhche agus tha na toraidhean gu ruige seo a' sealltainn gu bheil Reform air adhartas mòr a dhèanamh.
Tha còrr is 350 comhairliche aca gu seo - ged a tha a' mhòr-chuid de thoraidhean ri thighinn fhathast.
Tha Nigel Farage ag ràdh gur e "gluasad dha-rìribh eachdraidheil" a tha seo is gu bheil na Làbaraich air "an sguabadh air falbh".
Nise mar a chì sibh aig mullach na duileige, tha sruth beò againn às an stiùideo ann an Inbhir Nis far a bheil an taghadh air BBC Radio nan Gàidheal a' dol a-mach.
Faodaidh sibh gnothaichean a leantainn an sin fad an là.
Bidh sibh eòlach gu leòr air ainm Mhgr Burr, tha fios, is e mòran bhliadhnaichean na àrd-oifigear air Comhairle nan Eilean Siar.
Ged a sheas e sìos am-bliadhna, 's e Mgr Burr 'son an turas mu dheireadh a bhios a' leughadh a-mach nan toraidhean ann an Steòrnabhagh an-diugh fhathast nuair a tha cunntadh nan Eilean Siar dèante.
Tha e an-còmhnaidh air oidhirp mhòr a dhèanamh na toraidhean a thoirt seachad ann an Gàidhlig, ged nach eil an cànan aige.
'S toil leis dùbhlan, tha e coltach, is e anns na làithean mu dheireadh air a dhol na iar-chathraiche air Stòras Uibhist.
Nise mar as trice bithear a' cunntadh nam bhòtaichean tron oidhche cho luath 's a tha na h-ionadan bhòtaidh air dùnadh aig 10f.
Dh'atharraich sin ann an 2021 nuair a chaidh an cunntadh a dhèanamh thairis air dà là air sgàth nan riaghailtean Covid a bh' ann aig an àm.
Chaidh co-dhùnadh às dèidh sin gur e cunntadh tron là a thachradh am-bliadhna cuideachd.
Carson? Seo Malcolm Burr bho Bhòrd Stiùiridh Taghaidh na h-Alba,
"Tha an cunntadh againn an-còmhnaidh earbsach, ach le a bhith a' cunntadh tron là tha sinn a' gearradh a-mach cuid de na cunnartan a th' ann, a' lùghdachadh chosgaisean, is tha na toraidhean air am foillseachadh nuair a tha barrachd dhaoine a' leantainn chùisean."
Tha muinntir na h-Alba air bhòtadh is tha an cunntadh a-nise air tòiseachadh.
'S e a' cheist mhòr a-nise cò bhios a' riaghladh ann am Pàrlamaid na h-Alba.
Bidh sinn còmhla ribh an seo fad an là leis an fhiosrachadh as ùire mar a thèid na bhòtaichean a chunntadh air a' Ghàidhealtachd agus air feadh na dùthcha.
Tha sgioba de luchd-naidheachd againn thall 's a-bhos gus am fiosrachadh a chumail ribh.
Bidh bho 10:00m cuideachd An Taghadh air BBC Radio nan Gàidheal againn beò dhuibh aig mullach na duilleige.
Fàn còmhla rinn mar a gheibh sinn a-mach cò a tha Alba air taghadh.