Tha an sgioba radio againn deiseil ach tha BBC Radio nan Gàidheal a' leantainn - eil sibh 'son Dùrachd a chur gu cuideigin a rinn adhartas an-diugh?

Thuirt Jackie Baillie, Leas-cheannard nan Làbarach ann an Alba, gu bheil buil na bhot air feadh na dùthcha air a bhith na bhriseadh-dùil.

Tha i a' cumail a-mach gum bu chòir don cheannard Anas Sarwar fuireach na dhreuchd.

Alasdair MacLeòid
Ag aithris à cunntadh nam bhòtaichean air a' Ghàidhealtachd

Tha dùil ann gum faigh sinn toraidhean nam bhòt bho na sgìrean Gàidhealach anns an òrdugh a leanas:

1. Gallaibh, Cataibh is Ros
2. Inbhir Nis is Inbhir Narann
3. An t-Eilean Sgitheanach, Loch Abar is Bàideanach.

Thathar an dùil is an dòchas nach bi gairm na ciad tè fad às tuilleadh, ach chan eil càil a dh'fhios cuin a thig cùisean gu ceann a-nochd leis nach deach bhòtaichean airson liosta na Gàidhealtachd is nan Eilean a chunntadh fhathast.

Le bruidhinn ann air cho faisg is a dh'fhaodadh bhòt sgìre an Eilein Sgitheanaich, Loch Abar is Bhàideanaich a bhith eadar na Lib Deamaich agus an SNP, tha bruidhinn ann bho mhuinntir an dà phàrtaidh sin gum faodadh gun deadh iarraidh an cunntadh a-rithist.

Ma thèid sin iarraidh, tha e an urra ri oifigear an taghaidh co-dhùnadh a dhèanamh an e iarrtas reusanta a th' ann.

Tha Jackie Baillie a' tilleadh gu Holyrood ma-thà, mar a tha John Swinney.

Tha sin dìreach a' fàgail Fearghas Ewing - an aon tagraiche eile aig an taghadh seo a tha air a bhith na bhall bho 1999.

Tha Mgr Ewing a' seasamh ann an Inbhir Nis is Inbhir Narann, agus a rèir na chuala Alasdair MacLeòid nas tràithe air an fheasgar, bha coltas car dubhach air.

Tha sinn fhathast a' feitheamh toradh na bhòt sin - agus toraidhean eile na Gàidhealtachd.

Tha Leas-cheannard nan Làbarach ann an Alba Jackie Baillie air an seat aice a chumail.

Bhuannaich i le mòr-chuid 1786 air thoiseach air tagraiche an SNP Sophie Traynor.

Tha i air a bhith na ball an seo fad 27 bliadhna agus tha i a-nise gu bhith ann airson còig eile.

Nise tha An Taghadh air BBC Radio nan Gàidheal a' tighinn gu ceann aig 6f.

Sàr sgioba is sàr obair aig an stiùir bho Derek MacAoidh!

Ach na gabh dragh - bidh sinne a' leantainn an seo agus aig 7f bidh An Taghadh air BBC ALBA a' tòiseachadh.

Gheibh sibh sin aig mullach na duilleige aig an àm

Bha Robert Pownell ag innse do dh'Ailean Peutan nas tràithe gun do shoirbhich leis an iomairt aige ann am Meadhan Dhùn Èideann an aghaidh sealg a' ghuga ann an Nis.

Tha fios gur e aire seach bhòtaichean a bha san amharc aig Mgr Pownell - fhuair e 41 de na 35,241 bhòtaichean san roinn.

Bidh e an urra ris an ath phàrlamaid co-dhùnadh an tèid athchuinge an aghaidh na seilge dad nas fhaide.

Nas tràithe air an là bhuannaich Hannah Mary Goodlad Sealtainn dhan SNP - a' chiad uair nach b' e Lib Deamach a chuir an sgìre gu Holyrood.

Tha 68 de na 73 roinnean a-nise air an gairm. Tha trì às na còig nach eil againn air a' Ghàidhealtachd.

Chan eil dad againn air an liosta fhathast ach leis an SNP air a bhith cho làidir anns na roinnean, bidh dùil ri adhartas dha na pàrtaidhean eile nuair a thig na toraidhean sin.

Tha ceannard nan Làbarach anns a' Chuimrigh, Eluned Morgan, ag ràdh gu bheil i a' fàgail a dreuchd mar cheannard, 's i air a seat a chall san taghadh.

Bha Ms Morgan na Prìomh Mhinistear air a' Chuimrigh, ach tha dùil aig a' phartaidh nach bi aca san t-Senedd ùr ach mu dheichnear bhall.

Thuirt i gu bheil ise a' gabhail uallaich airson na thachair, agus gu bheil muinntir na Cuimrigh "air Làbaraich na Cuimrigh a dhiùltadh".

Thuirt i gur e "urram mo bheatha" a bh' ann dhi a bhith na Prìomh Mhinistear, agus i air a' chiad bhoireannach a bha os cionn Riaghaltas na Cuimrigh.

'S i a' chiad cheannard air riaghaltas san Rìoghachd Aonaichte a th' air a seat a chall 's iad ann an oifis.

Màiri McAllan a' buannachadh seat Dail Chluaidh le 13,006 bhòt.

Ged a chùm an SNP greim air Earra-Ghàidheal, bha am bhòt aca sìos - mar a bha bhòt nan Tòraidhean - is le gluasad a dh'ionnsaigh Reform is nan Lib Deamach.

Tha Jenni Minto air Earra-Ghàidheal is Bòd a chumail airson an SNP.

Chan ann le aran a-mhàin a bhios luchd-cunntaidh nam bhòtaichean beò, ach ‘s iongantach mura dèan piotsa a’ chùis glè mhath. Beagan bìdh dha na truaghain a th' air a bhith aig Ionad Spòrs Inbhir Nis fad an là!

Andreas Wolff
Ag aithris à Earra-Ghàidheal

Chaidh 55.6% de na tha clàraichte a’ bhòtadh an turas seo, sìos bho 67.8% ann an 2021.

Chaidh aig Uainich na h-Alba air an dàrna roinn-pàrlamaid a bhuannachadh - an turas seo ann an Glaschu. B' e seo an seat a bh' aig an t-seann Phrìomh Mhinistear Nicola Sturgeon.

An naidheachd as ùire bho Alasdair ann an Inbhir Nis.

Thermal incident ann am Fìobha ma-thà is cò chanadh nach bi an dearbh rud a' bualadh air Alasdair MacLeòid bochd ma thèid dàil mhòr air bhòtaichean na Gàidhealtachd.

Iain MacDiarmaid
Ag aithris à Fìobha

Tha fios air tighinn bho Stagecoach mun bhus a chaidh na smàl taobh a-muigh ionad-chuntaidh Ghleann Rathais.

Dhearbh iad gu robh "thermal incident" ann an-diugh. Chaidh an dràibhear agus an luchd-siubhal a thoirt far a' bhus gu sàbhailte.

Tha e ro thràth dearbhadh dè dh'abharraich an teine, thuirt iad, ach thèid rannsachadh slàn a dhèanamh.