Ашыгын таң калтырам деп ажал тапты

Америкалык жигит Танзанияга эс алууга барып, сүйлөшүп жүргөн кызына баш кошууга сунуш кылам деп чөгүп өлдү.

Стивен Веббер менен Кенеша Антуан Пемба аралындагы беш жылдыз мейманканада турушкан. Интернетке тараган видеодо, Стивен суу алдында жайгашкан кабинанын терезесине сүзүп келип, Кенешага "баш кошолу" деген жазууну көрсөтүп, шакек алып чыккан.

Кенеша кийин "Фейсбук" баракчасына Стивен суудан тирүү чыкпай калганын жазды.

The Manta Resort мейманканасы бул маалыматты Би-Би-Сиге ырастап, "Веббер өз алдынча, эч жабдыгы жок суу алдына сүзүп, кырсыкка учурады" деп билдирди.

"Тилекке каршы бейшемби күнү, 19-сентябрда Веббер мырза кырсыктан каза тапты",-деп жазылат мейманкана тараткан билдирүүдө.

Стивен менен Кенеша суу алдындагы бөлмөгө төрт күн түнөмөк. Күнүнө 1,700 доллар турган кабина он метр тереңдикте, жээктен 250 метр аралыкта жайгашкан.

Стивен эс алуунун үчүнчү күнүндө сууга секирип, Кенешаны кабинанын терезесин карап тур деп суранган.

Терезеге сүзүп келип, Стивен "Суу алдында болгон сүйүүмдү айтып бүтүүгө демимди кармай албайм. Бирок күн өткөн сайын, сени катурак сүйөм!" деген кагазга жазган катын көрсөткөн экен.

Андан соң Стивен чөнтөгүнөн шакек алып чыгып, баш кошуу сунушун билдирген.

Мейманкананын жетекчилиги, суу алдындагы кырсыкты угуп, кабинага жетип келишкен экен. Бирок жардам берүүгө өтө кеч болуп калган.

Кенеша "Фейсбук" баракчасына Стивенге "жообун айтууга жетишпей" калганын, "миллион жолу ооба" деп айтарын жазды.

"Биз турмуштагы жаңы баскычты чогуу баштай албай калдык. Жашоомдогу эң бактылуу күнүм үрөй учурган окуя менен аяктады. Тагдыр ошол экен. Соңку күндөрдөгү чогуу өткөргөн көз ирмемдерди эстеп, көңүлүмдү жубатып жатам",-деп жазды Кенеша.