Ndịagha Naịjirịa agọọla na ha enweghi atụmatụ iweghara ọchịchị n'ike
Ndịagha Naịjirịa ekwuola na ọ bụghị eziokwu na o nwere ndị otu ha chọrọ iwere ọchịchị n’ike.
Nke a na-abịa dịka kepu kepu na-ekwu na a nwuchiri ndịagha mmadụ iri na isii maka ebubo na-akpa nkata ịkpachi ọchịchị n’ike.
Ọtụtụ ụlọọrụ ntaakụkọ kwuru na ọ bụ n’ihi nke a mere na e meghi ngagharị ngosi ndịagha iji cheta afọ iri isii na ise Naịjirịa nweere onwe ya site n’aka mba Briten. Akụkọ kwuru na a nwuchiri ndịagha mmadụ iri na isii maka na ha chọrọ igbu Onyeisiala na ndị ọzọ ọkwa ha dị elu na Naịjirịa ma nara ọchịchị n’ike.
Mana ozi ọnụ na-ekwuru ndịagha bụ Ọchịagha Tukur Gusau wepụtara kwuru na nke ahụ bụ asị ọcha. “Akụkọ ahụ bụ asị ọcha bụ nke ndị wepụtara chọrọ itinye ọgbaghara n’obodo nakwa n’etiti ndị mmadụ,” ka ozi ahụ kwuru.
Ọ gara n’ihu kwuo na ihe mere e jiri kagbuo ngagharị ngosi ndịagha na ncheta ụbọchị mnwereonwe ahụ bụ ka Onyeisiala nwee ohere izute ndị mmadụ n’ofesi nakwa ka ndịagha nwee ike ilekwasị anya n’agha ha na-ebu megide iyi ndụ egwu.
Ọchịagha Gasau kwuru na nnyocha a na-eme maka ndịagha mmadụ iri na isii ahụ a nwụchiri bụ ihe dị n’usoro ha ji arụ ọrụ iji hụụ na nrubeisi na agwa dị mma dị n’etiti ndịagha. “E hiwe ndị ga-eme nnyocha banyere nke a, ihe ọbụla ha chọrọ a ga-eme ka ọ pụta ihe.”
Ọ gara n’ihu kwuo na ndịagha Naịjirịa nwere ntụkwasị obi n’ebe ọchịchị onye kwuo uche ya nọ na o nweghi atụmatụ iwere ọchịchị n’ike.
Kamgbe Naịjirịa nweere onwe ya n’afọ 1960 enweela ọtụtụ nnapụ ọchịchị n’ike nke ndịagha malite n’agba afọ 1966 ruo 1999 mgbe ọchịchị onye kwuo uche lọghachịrị rute ugbua.