BBC News, Ìgbò
Wụga n’ọdịnaya

You’re viewing a text-only version of this website that uses less data. View the main version of the website including all images and videos.

Take me to the main website

Samia Suluhu Hassan emeriela ntuliaka Onyeisiala mba Tanzania

Nchịkọta akụkọ niile si na mbaụwa niile

Mkpuchi Na Eme Ozugbo

Uzoamaka Ewuzie, Ikechukwu Kalu, Michael Ngene, Chinonso Ugorji, Michael Ilediagu, Adline Okere, Marvelous Obomanu

  1. Gọọmenti Enugwu akụtuola ụlọ ebe ndị ntọri ji eme ọnọdụ na Nkanu

    Gọọmenti Enugwu akụtuola otu ụlọ n’obodo Umueze Awkunanaw dị n’okpuru ọchịchị Nkanu West dị n’Enugwu Steeti ebe a chọpụtara na ndị a na-enyo enyo na ha bụ ndị ntọri mmadụ ji eme ebe ha na edobe ndị ha tọọrọ.

    Ha kwaturu ụlọ ahụ ụnyiahụ bụ Tuzde 21 Ọktoba dịka ndị nchekwa gara n’ime obodo ahụ were zọpụta onye eji eji n’ime ụlọ ahụ.

    Dịka ozi gọọmenti wepụtara siri kọwaa, onyeisi ndị ntọrị ahụ bụ onye omekome Igwenagu Ogbodo bụ onye ya ndị otu ya ji ya bụ ụlọ mere isi oche.

    Onyeisioche okpuru ọchịchị Nkanu West bụ Maazị John Ogbodo gwara ndị nta akụkọ na onye ntọri Igwenagu na ndị otu ya tọọrọ otu onye, dobe ya n’ụlọ ahụ ma na akpọzị ezinụlọ onye ahụ ka ha bute nde kwụrụ nde naịra maọbụ ha egbuo ya.

    “Igwenagu Ogbodo na ndị otu ya gbara ọsọ, mana ụfọdụ n’ime ha bu mgbọ egbe n’ahụ. Nwoke ha ji eji enwerela onwe ya,” ka ha kwuru.

    Ha gara n’ihu mezuo iwu gọọmenti Enugwu Steeti wepụtara site na ịkwatu ụlọ ahụ kpamkpam.

    Onyeisioche ahụ dọrọ aka na nti na onye ọbụla kwesiri ima ihe eji ụlọ ya eme, n’ihi na achọpụta na ndị ntọri maọbụ ndị ohi ji ụlọ ọbụla eme arụ, gọọmenti ga-akụtuya n’eleghi anya n’azụ.

  2. Ihe karịrị mmadụ 40 anwụọla n’ihe mberede ụgbọala na Uganda

    Ndị uweojii Uganda ekwuola na mmadụ iri anọ na isii anwụọla ka ọtụtụ ụgbọala kpọkara n'okporoụzọ awara awara dị na mba ahụ.

    Ha degharịrị ọnụ ọgụgụ ndị nwụrụ site na mmadụ iri isii na atọ dịka ha na-ekwu na ha gụnyere ndị ahụ na-amaghị ihe na-eme bụ ndị na-anata ọgwụgwọ ugbua.

    Ihe mberede a mere mgbe ụgbọala abụọ na-aga n'akụkụ dị iche iche "zutere ihu na ihu" ka ha na-agbalị ịfefe ụgbọala abụọ ndị ọzọ - otu ụgbọala gwongworo na ụgbọala - n'okporoụzọ Kampala-Gulu mgbe o jiri nkeji iri na ise gafee elekere iri na abụọ n’oge mpaghara, dịka ndị uweojii Uganda siri kwuo.

    E kwuru na otu n'ime ụgbọala ndị ahụ tụgharịrị na mbọ iji zere ihe mberede, mana nke a kpatara "nkụkọ isi" nke butere ụgbọala ndị ọzọ ịkpọka.

  3. Ụlọikpe achụọla ndị isioche okpuru ọchịchị n’Ebonyi steeti

    Ụlọikpe Ukwu dị n’isi obodo Ebonyi steeti bụ Abakaliki nọọrọ n’ụbọchị Tuzde 21 Ọktoba, 2025 chụọ ndị isioche okpuru ọchịchị steeti ahụ niile.

    Ndị isioche okpuru ọchịchị na ndị omeiwu ha ụlọikpe chụrụ bụ ndị a họpụtara site na ntuliaka a haziri n’ọnwa Julaị, afọ gara aga.

    Ụlọikpe ahụ nke Ọkaikpe H.I.O. Oshomah nọ n’isi ya kpebiri na ntuliaka e ji họpụta ndị isioche okpuru ọchịchị ahụ na ndị omeiwu ha agbasoghị iwu ntuliaka.

    Ọ bụ nke a mere ụlọikpe ji kagbuo ntuliaka e ji họpụta ha n’ọkwa, ma gwa ụlọọrụ na-ahazi ntuliaka n’Ebonyi steeti bụ Ebonyi State Independent National Electoral Commission (EBSIEC) na gọọmenti steeti ahụ ka ha ghara ịhazi ntụliaka okpuru ọchịchị ọzọ, ma ọ bụrụ na ha agaghị erube isi n’ụkpụrụ iwu.

  4. Ọtụtụ mmadụ anwụọla n’ihi ntiwa ụgbọala mmanụ na Niger Steeti

    Ọtụtụ mmadụ anwụọla n'ihe mberede ụgbọala mmanụ tiwara na steeti Niger dị na mpaghara etiti Naịjirịa ka ụgbọala ahụ siri n'okporoụzọ kpọkasịa wee wụfuo mmanụ ụgbọala o bu.

    Akụkọ kwuru na ndị obodo ahụ gbagara ikuru mmanụ ụgbọala n'ụgbọala mmanụ ahụ kpuru nke tiwara na mberede, tupu nnukwu ọkụ nke ripịara ndị mmadụ ahụ were malite.

    Ihe dịka mmadụ iri atọ ka a kọrọ na ha nwụrụ, ebe opekatampe mmadụ iri anọ ndị ọzọ merụrụ ahụ n'ogo dị iche iche.

    E kwukwara na ọkụ ahụ siri ike gbara ọtụtụ ndị ihe ahụ mere n’amaghịzi ndị ha bụ, mana a kpọgakwara ndị merụrụ ahụ n’ụlọọgwụ dị nso maka ọgwụgwọ.

    Cheta na ntiwa nke ụgbọala bu mmanụ ụgbọala bụ ihe na-awụ akpata oyi n'ahụ na-emekarịrị mgbe niiile na Naịjirịa, n'agbanyeghị ịdọ aka na ntị ugboro ugboro banyere ihe ize ndụ dị n'ikuru mmanụ wụfuru awụfu.

  5. Trump ekwuola na ya achọghị 'nzukọ enweghị isi' ka eyigharịrị mkparịtaụka ya na Putin

    Donald Trump ekwuola na ya achọghị "nzukọ enweghị isi" ka akwụsịchara atụmatụ ya na ogbo ya bụ Vladimir Putin inwe mkparịtaụka ihu na ihu maka agha Yukren.

    Onyeisiala mba Amerịka gosipụtara na isi okwu bụ ọjụjụ Moscow jụrụ ịkwụsị ọgụ dị n'etiti ya na mba Yukren ugbua, na nkwupụta nke obi ọchịchị mba Amerịka bụ White House wepụtara n’ụbọchị Tuzde 21 Ọktoba 2025.

    Na mbụ, onye ọrụ na White House kwuru na enweghị "atụmatụ" maka nzukọ Trump na Putin "n'ọdịnihu dị nso", ka Trump kwuchara na Tọzde na ha abụọ ga-enwe mkparịtaụka na Budapest n'ime izu abụọ.

    Ka ọ dị ugbua, isi ọdịiche dị n'etiti atụmatụ mba Amerịka na Rọshịa maka udo bịara pụta ihe n'izu a, na-egosi na ọ kwụsịrị ohere inwe nnọkọ.

    Cheta na Trump na Putin zutere ikpeazụ na Alaska n'Ọgọst, n'oge nzukọ a haziri ngwa ngwa nke na-arụpụtaghị mpụtara ọ bụla.

    Mkpebi nke White House iyigharịrị nzukọ Trump-Putin nke abụọ nwereike ịbụ maka mbọ iji zere ọnọdụ ọzọ yiri nke a.

  6. Ndị be anyị, ụnụ asaala chị?

    Nnọọ n'ọgbakọ BBC News Igbo taa bụ Wenezde 22 Ọktoba 2025.

    Ka ụbọchị ta mịtara anyị niile mkpụrụ ọma.

    Biko, gaa n’ihu sonyere anyị dịka anyị na-ewetere gị akụkọ ihe na-eme na Naịjirịa nakwa ụwa niile.

    Sonyekwara anyị n'akara soshal midịa anyị dị iche iche nke gụnyere WhatsApp Chanelụ, Facebook na Instagram maka akụkọ ndị ọzọ dị n'ụdị onyonyoo na foto.

    Daalụ!

  7. Tinubu ahọpụtala Doro dịka mịnịsta

    Onyeisiala Bola Tinubu ahọpụtala Bernard Mohammed Doro dịka Mịnịsta dịka o zigara ndị Ụlọomeiwu Ukwu aha ya ka ha nyocha ya ma binye aka na nhọpụta ya.

    Ozi nke ọnụ na-ekwuru Onyeisiala bụ Bayo Onanuga binyere aka ma wepụta ụbọchị Tuzde,gbara ama sị, "Onyeisiala Bola Tinubu ezigarala Ụloomeiwu Ukwu akwụkwọ ozi ibinyeaka na nhọpụta Dr Bernard Doro si Platu Steeti dịka Minista ala Naijiria."

    A na-atụ anya na Doro ga-anọchị anya Ọkammụta Nentawe Goshwe Yilwatda bụbụ Mịnista na ahụ maka ọrụ ebere na mbeleta ụbịa bụ onye a họpụtara dịka Onyeisioche otu APC.

    Onye bụdị Dkta Bernard Doro?

    Onye Kwali dị n'Okpuru Ọchịchị Bassa dị na Platu Steeti, a mụrụ Dkta Doro n'abalị 23 nke ọnwa Jenụwarị afọ 1969., in Kwall, Bassa LG

    Ọ gụrụ maka ọgwụ (Pharmacy na mahadum ma gụkwaa maka iwu(Law).

    Ọ rụọla ọrụ n'ebe dị iche iche gụnyere na Naijiria nakwa mba Briten.

  8. Ọ bụghị eziokwu na Soludo na-akwado ịnwuchi ndị ndu ụka-Gọọmentị Anambara

    Gọọmentị Anambara steeti ekwuola na akụkọ na-efegharị nke kwuru na aka na-achị steeti ahụ chọrọ ịnwuchi ndị bishọpụ na ndị ụkọchukwu ma o merie agba nke abụọ ya na ntuliaka bụ akụkọ ụgha.

    N'ozi nke Kọmishọna mgbasaozi steeti ahụ bụ Law Mefor binyere aka ma wepụta, ụbọchị Tuzde, o kwuru na akụkọ ahụ bụ aka ọrụ ndị patị anọghị n' ọchịchị bụ ndị ọ sịrị chọrọ iji akụkọ ụgha bute tigbuo-zogbuo na steeti ahụ.

    Ozi ahụ sịrị, “ Anya Gọọmentị Anambara steeti eruola akụkọ na-ekwu na Gọvanọ Soludo chọrọ ịkwụchị bishopụ na ndị ụkọchukwu Katọlik ma ọbanye ma o mmerie na ntuliaka.

    “Anyị na-ekwu hooha n'akụkọ ahụ bụ okpotokpo asị enweghị ihe o kwudoro n'elu ya,"

    " Ọ bụ ọmụmatụ ụdị akụkọ ụgha ana-akpọ isi bute ọgbaghara.”

    Akụkọ na-efegharị na soshal midia n'ebo ebubo na Soludo chụsara ọtụtụ ndị ndu na pati ya bụ Apga nakwa steeti ahụ gụnyere ndị diba na ndị omenala.

  9. Ndị uweojii enyeela iwu ka a chọpụta ihe gburu nwata nwoke gbara afọ 17 n'Anambra

    Kọmishọna ndị uweojii Anambra Steeti bụ Ikoye Orutugu enyeela iwu ka a chọpụta ihe gburu nwa okoroọbia gbara afọ iri na asaa aha ya bụ Chikamso Ejiofor.

    N’ozi ọnụ na-ekwuru ndị uweojii steeti ahụ bụ Tochukwu Ikenga wepụtara, kọwara na ọ bụ n’ụbọchị 5 Ọktoba ka otu nwaanyi lọtara n’ụlọ ya were hụ ozu nwata nwoke ahụ n’ụlọ ya.

    O kwuru na nwaanyị ahụ wetere mkpesa n’ụlọọrụ ndị uweojii dị n’Awka tupu ndị uweojii bịa buru nwata nwoke ahụ gaa ụlọọgwụ, ebe dọkịta nọrọ kwuo n’ọ nwụọla.

    Nchọpụta ndị uweojii gosiri na ozu ahụ bụ nke Chikamso Ejiofor, nwa na-agba bọyi.

    “Nne ma nna nwata ahụ, binyere aka n’akwụkwọ gwa anyi hapụ ime nnyocha ọbụla banyere ihe gburu nwa ahụ mana kọmishọna kwechiri si na anyị ga a chọpụtarịrị ihe gburu nwa okoroọbịa ahụ,” ka ọ kọwara.

    Kọmishọna Orutigu kwuru na n’agbanyeghi ihe nne na nna ya kwuru, e kwesịrị ịmata ka nwata nwoke ahụ siri nwụọ.

  10. A tụọla Sarkozy bụbụ onyeisiala Fransi mkpọrọ maka nrụrụaka

    Nicolas Sarkozy abụụla onyeisisala mbụ mba Francị a tụrụ mkpọrọ dịka ọ na-amalite mkpọrọ afọ ise a tụrụ ya maka ịnabata ego sitere n'aka Muammar Gaddafi nke Libiya lara mụọ iji kwado achụmtavootu ya.

    Sarkozy, chịrị Fransị bido n'afọ 2007 rue afọ 2012, agbagharịala akwukwọ iji gbagha mkpọrọ a tụrụ ya.

    Ọ ga-anọ na mkpọrọ 'La Santé' bụ ebe ọ ga-anọ nanị ya.

    Ihe karịị mmadụ 100 pụtara n'ihu be ya na-ekele ya dịka ọ hapụrụ ụlọ ya, jide nwunye ya bụ Carla Bruni-Sarkozy aka ha na-agaje.

    Sarkozy kwesiri na-agọ na aka ya dị ọcha dika o kwupụtara n'ọbaozi X dịka a kwọ ya aga mkpọrọ sị, "Enweghị m obi ịrụka na eziokwu ga-aputa ihe. Mana ọ ga-abụ ihe ntiri obi ihe ọ ga-eri."

  11. Sanae Takaichi abụrụla nwaanyị mbụ nwetara ọkwa praịm minista na Japan

    Onyeisi otu Liberal Democratic Party (LDP) bụ Sanae Takaichi eturula ugo na ntuliaka dịka nwaanyị mbụ nwetara ọkwa praịm minista na Japan.

    A maara nwaanyị ahụ dị afọ iri isii na anọ dịka onye aka ike "Iron Lady" nke Japan - ọ bụkwa onye nwere mmasị n’ọrụ nwaanyị mbụ bụrụ praịm minista na UK Margaret Thatcher.

    Akụkọ kwuru na nke a bụ mbọ ya nke atọ ịbụ onye ndu Japan. Ọ bụkwa praịm minista nke anọ mba Japan na-enwe n'ime afọ ise site na pati ya bụ LDP.

    O so na ndị siri ike na pati LDP ma bụrụkwa onye nke onye bụbu praịm minista Shinzo Abe nwụrụ anwụ nyere ọzụzụ.

    Onyeisiala mba Amerịka bụ Donald Trump kelere ya ma kọwaa ya dịka "onye a na-akwanyere ugwu nke nwere nnukwu amamihe"

    Ugbu a ahọpụtara ya, ihe ịma aka Takaichi gụnyere idozi akụ na ụba anaghị eme nke ọma, ịgafe mmekọrịta mba Amerịka na Japan siri ike na ijikọ otu ndị ọchịchị kewara ekewa.

  12. Ụtụtụ ọma, ndị be anyị

    Nnọọ n'ọgbakọ BBC News Igbo taa bụ Tuzde 21 Ọktoba 2025.

    Anyị na-asị ka ọ dịrị onye ukwu mma ma dịrị onye nta mma.

    Biko, gaa n’ihu sonyere anyị dịka anyị na-ewetere gị akụkọ ihe na-eme na Naịjirịa nakwa ụwa niile.

    Sonyekwara anyị n'akara soshal midịa anyị dị iche iche nke gụnyere WhatsApp Chanelụ, Facebook na Instagram maka akụkọ ndị ọzọ dị n'ụdị onyonyoo na foto.

    Udo dịrị gị!

  13. Nnyocha Nwaeze Andrew ka na-aga n'ihu na-agbanyeghị jụrụ echichi ya

    Na-agbanyeghị na Nwaeze Andrew nke Alaeze Briten ajụla echichi ya dịka nwaeze, a kwụsịbeghị inyocha ihe jikọrọ ya na nwoke a ma maka ịmetọ ụmụ mmadụ bụ Jeffrey Epstein.

    Ndị dị be eze nso kwuru na ha na-atụ anya ' ụbọchị ahụ ụfụ n'okwu ahụ na-akpọtụ.

    A gaghị akpọkwa ya 'Nwaeze" nke ọ na-ejide ọkwa ' Duke of York' mana ụfọdụ na-akpọ oku ka a napụ ya ọkwa ndị a n'ụzọ were anya.

    Rachael Maskell, onye bụ onye omeiwu na-anọchite York kwuru na ọtụtụ ndị ọ na-achite achọghịzị mmekọrịta ezinaụlọ Eze , na ha chọrọ ka gọọmentị gbanwee iwu ahụ.

    Ndị uweojii mba ahụ na-enyocha ebubo na nwaeze ahụ gwara onye ọrụ gọọmentị ka o nwetara ya ozi banyere Virgina.. bu nwaanyị na-ebo ebubo na Nwaeze Andrew dinara ya n'ike.

  14. Trump ekwuola na nkwụsị ịkwa mgbọ ka dị na Gaza dịka Izrel na Hamas boro onwe ha ebubo imebi nkwekọrịta

    Onyeisiala mba Amerịka bụ Donald Trump na-ekwu na nkwụsị ịkwa mgbọ ka dị na Gaza, awa ole na ole ndịagha Izrel kwuchara na ha wakporo ndị Hamas.

    Ndị IDF kwuru na ọ ga-amaliteghachi imezu nkwụsị ọgụ ahụ, ka Izrel na Hamas boro onwe ha ebubo imebi nkwekọrịta ahụ.

    Cheta na mwakpo malitere na ndịda Gaza na Sọnde ka ndịagha Izrel kwuru na "ndị na-eyi ọha egwu gbara ogbunigwe na egbe" n'ebe ndịagha ya nọ na Rafah, ma gbuo ndịagha abụọ.

    Mana Hamas kwuru na ọ 'maghị' maka ọgụ ọ bụla na mpaghara dị n'okpuru ọchịchị Izrel.

    Ka ọ na-erule mgbede, Izrel kwuru na ya wakporo ndị Hamas n'ofe Gaza dịka ndị ụlọọgwụ kwuru na mmadụ iri anọ na anọ nwụrụ.

    Hamas ekwuola na ọ gbara mbọ na nkwụsị ọgụ ahụ, mana ha boro Izrel ebubo imebi iwu ma dọọ aka na ntị na mwakpo nwereike" ma ọ bụrụ na ọnọdụ ahụ daa kpamkpam."

    A na-atụ anya na onyennọchianya Onyeisiala Trump bụ Steve Witkoff na ọgọ ya nwoke Jared Kushner ga-aga Izrel taa – mana mba Amerịka na-agba mbọ ugbua iji mee ka nkwekọrịta nkwụsị ọgụ a na-aga n'ihu, onye ntaakụkọ BBC Frank Gardner dere.

  15. Igbo ndị ọma, ụnụ abọọla chi!

    Nnọọ n'ọgbakọ BBC News Igbo taa bụ Mọnde 20 Ọktoba 2025.

    Ekpere anyị bụ ka izu ọhụrụ a mịtara anyị niile mkpụrụ ọma.

    Biko, gaa n’ihu sonyere anyị dịka anyị na-ewetere gị akụkọ ihe na-eme na Naịjirịa nakwa ụwa niile.

    Sonyekwara anyị n'akara soshal midịa anyị dị iche iche nke gụnyere WhatsApp Chanelụ, Facebook na Instagram maka akụkọ ndị ọzọ dị n'ụdị onyonyoo na foto.

    Ndewu!

  16. Ndị Ọhafịa emeela emume iri ji ọhụrụ n’Aba

    Ndị Ọhafịa bi n'Aba, Osisiọma, Obingwa, Ugwunagbọ na mpaghara ndị ọzọ emeela emume iri ji ọhụrụ.

    Emume ahụ kpọtụrụ n'ogige Aba Recreation Park dị n'okpuru ọchịchị Aba Saụt n'Abịa steeti n'ụbọchị Satọde 18 Ọktoba 2025.

    Onye ntaakụkọ BBC Igbo chọpụtara na nke afọ a bụ ugboro anọ a na-ahazi emume ahụ, dịka nke ikpeazụ ha mere bụ afọ anọ gara aga.

    Oge mbụ a haziri emume a bụ n'afọ 2014 ma hazie nke abụọ n'afọ 2017. A haziri nke atọ n'afọ 2021 ma hazie nke ugbua bụ nke anọ n'afọ 2025.

    Ụfọdụ obodo ndị sonyere n'emume nke afọ a gụnyere Ọkagwe, Asaga, Abịa, Akanụ, Elu, Okon, Ndị Udumaukwu, Ndị Anku, Nkwebi, Oboro, Amangwu, Ndị Akụ, Ezi Afọ, Anịa, Isiugwu, Ndị Orieke, Ndị Ibe Ọhafịa, Amuke, Amuma Ọhafịa na ndị ọzọ.

    Ọtụtụ otu egwu ọdịnaala, mmọnwụ Ekpe na ndị Dibịa si n'obodo Ọhafịa dị iche iche bịara gosi nke ha ji biri n'emume iri ji ọhụrụ ahụ.

    Osote aka na-achị Abịa steeti bụ Ikechukwu Emetu bụ ọbịa pụrụiche n'emume ahụ, ma bụrụkwa onye wara ji ọhụrụ n'ụzọ ọdịnaala.

    Odeakwụkwọ otu jikọtara ndị eze Ọhafịa bụ Mba Odo Okereke (Eze Ogo Akanu Ọhafịa) nọchitere anya Udumeze Ọhafịa bụ Eze Awa Orji Udonsi (Udumeze nke abụọ n'Ọhafịa) n'emume ahụ.

  17. Ndị Kenya ekwuola na ha dịzi ka ụmụ na-enweghị nne na nna, dịka e liri ozu Odinga

    Puku kwuru puku ụmụafọ Kenya ka na-eru uju onye bụbu Praịm Minista mba ahụ bụ Raila Odinga.

    Ha kwụ n’akụkụ igbe ozu Odinga ghe oghe n’ọgbọ egwuregwu dị n’obodo ya bụ Kisumu, dịka ọtụtụ n’ime ha kwara arịrị sị “anyị bụzi ụmụ na-enweghị nne na nna”.

    “Abịara m ebe a iru uju maka otu nwaafọ mba Afrịka ji eme ọnụ,” ka otu n’ime ndị pụtara iru uju aha ya bụ Dixon Ochieng gwara BBC.

    Ọha mmadụ kirichara ozu nwaamadị ahụ gbara afọ iri asatọ, onye nwuru n’ụlọọgwụ dị na mba Indịa, tupu e buru ya gaa n’ugbo ya maka olili.

    Nwunye Odinga bụ Ida rịọrọ igwe mmadụ ahụ ka ha jiri nwayọ ruo uju iji zere ọgbaaghara, dịka nke tara ihe ruru isi mmadụ ise ma merụọ ọtụtụ mmadụ ahụ oge mbụ ha gbakọrọ iru uju Praịm Minista ahụ n’ọgbọ egwuregwu Kisumu.

  18. Amerịka adọọla aka na ntị na Hamas na-achọ ịwakpo ndị bi na Gaza

    Mba Amerịka ekwuola na ha nwetara “ozi rijuru afọ” na ndị Hamas na-eme atụmatụ ịwakpo ndị nkịtị bi na Gaza.

    Amerịka kwuru na nke a ga-emegide nkwekọrịta nkwụsị ịkwa mgbọ nke mba Izrel na ndị Hamas nwere.

    Mwakpo a haziri ahazi megide ndị Palestaịn ga-abụ nnupuisi “ọjọọ” megide nkwekọrịta nkwụsị ịkwa mgbọ, ma “kụsasịa ọganihu gbara ọkpụrụkpụ e nwetara site na mkparịtaụka”, ka ozi si na ngalaba na-ahụ maka ihe na-eme n’obodo kwuru.

    Ozi ahụ enyeghị nkọwa buru ibu maọbụ kwuo etu nke a pụrụ isi megide nkwekọrịta nkwụsị ịkwa mgbọ nke Amerịka wetara n’etiti Izrel na Hamas.

    Ka o sina dị, ndị Hamas akọwaala ozi ahụ Amerịka wepụtara dịka nke na-abụghị eziokwu.

    Nkwekọrịta nkwụsị ịkwa mgbọ agba nke mbụ ka na-aga n’ihu, dịka a tọhapụrụla ndị niile e ji eji, ma na-ebughachikwa ozu ndị Izrel niile nwụrụ anwụ.

    N’otu aka ahụ, Izrel atọhapụla ndị Palestaịn narị abụọ na iri ise ha ji eji n’ụlọmkpọrọ nakwa mmadụ otu puku, narị asaa na iri na asatọ ndị nke si Gaza.

  19. Ọtụtụ mmadụ apụtala maka ngagharịiwe ‘No Kings’ megide Donald Trump

    Igwe mmadụ esonyela na ngagharịiwe a kpọrọ “No Kings” iji megide atụmatụ onyeisiala Amerịka bụ Donald Trump tinyere n’obodo ndị e nwere na mba ahụ.

    Ụfọdụ obodo ndị atụmatụ ahụ metụtara gụnyere New York, Washington DC, Chicago, Miami na Los Angeles.

    Puku kwuru puku mmadụ zukọtara n’ogige Times Square a ma ama dị na New York City, dịka ha ji ihe ngosi e dere “Ọchịchị onye kwuo uche ya abụghị ọchịchị ọdịnaala” nakwa “Anaghị ahọrọ iwu obodo ahọrọ”.

    Tupu a malite ngagharịiwe ahụ, ndị otu Trump boro ebubo na ndị sonyere na ngagharịiwe ahụ na ndị otu Antifa nwere njikọ, ma katọọ ihe ha kpọrọ “ọgbakọ kpọọ Amerịka asị”.

    Ụfọdụ steeti dị na mba Amerịka ezipụla ndịagha National Guard, mana ndị na-eme ngagharịiwe ahụ ji ụzọ udo eme ya.

  20. Ụtụtụ ọma, Igbo ndị ọma!

    Nnọọ n'ọgbakọ BBC News Igbo taa bụ Sọnde 19 Ọktoba 2025.

    Ka Chukwu zaa ekpere anyị niile n’ụbọchị taa.

    Biko, gaa n’ihu sonyere anyị dịka anyị na-ewetere gị akụkọ ihe na-eme na Naịjirịa nakwa ụwa niile.

    Sonyekwara anyị n'akara soshal midịa anyị dị iche iche nke gụnyere WhatsApp Chanelụ, Facebook na Instagram maka akụkọ ndị ọzọ dị n'ụdị onyonyoo na foto.

    Ya gazie!