Samia Suluhu Hassan emeriela ntuliaka Onyeisiala mba Tanzania

Mkpuchi Na Eme Ozugbo

Uzoamaka Ewuzie, Ikechukwu Kalu, Michael Ngene, Chinonso Ugorji, Michael Ilediagu, Adline Okere, Marvelous Obomanu

1. 1 Ọktọba 2025Gọọmenti mba Amerịka apịachiela dịka ụlọomeiwu sịnetị jụrụ ịnabata atụmatụ ego nke ikpeazụ

   Gọọmenti mba Amerịka apịachiela ọrụ dịka ụlọomeiwu Sịnetị jụrụ ịnabata atụmatụ ego nke ikpeazụ ya.

   E kwuru na mmechi a, nke mbụ kemgbe afọ 2018, nwereike ịkwụsịtụ ụfọdụ ọrụ gọọmenti Amerịka nwa oge mana ọ bụghị ha niile.

   Cheta na Onyeisiala mba Amerịka bụ Donald Trump na-eyi egwu ịchụ ọtụtụ ndị ọrụ gọọmenti “nke enweghị ike ịgbagha” ma ọ bụrụ na mmechi ahụ gaa n'ihu.

   Ka ọ dị ugbua, ndị ọrụ dị mkpa ga-aga n'ihu na-arụ ọrụ - ụfọdụ na-akwụghị ụgwọ - mana ndị ọrụ gọọmentị ndị ọzọ nọ n’ezumike akwụghị ụgwọ ugbua.

   Ọzọ, ụfọdụ ngalaba dịka Ngalaba Nchekwa ‘Homeland Security’, kwuru na ọtụtụ ndị ọrụ ha ga na-abịa ọrụ. Mana ọtụtụ ndị ọzọ kwuru na iwu abụghị na ndị ọrụ ha ga na-abịa ọrụ.

   N’okwu ya, onye omeiwu nke pati Republican bụ John Thune na-ekwu na a gaghị ejide pati ahụ, ebe onyeisioche pati Democrat n’ụlọomeiwu Sinetị Chuck Schumer kwuru na ndị Republican "na-ekwu okwu ụgha"

2. 1 Ọktọba 2025Mmadụ 69 anwụọla n’ala ọmajijiji mere na mba Filipins

   Ihe ruru mmadụ 69 anwụọla n’ala ọmajijiji mere na mpaghara Cebu mba Filipins.

   Akụkọ kwuru na ndị ọchịchị mpaghara ahụ etinyela ọnọdụ gbatagbata maka ala ọmajijiji ahụ mere n’abalị Tuzde 30 Septemba, 2025.

   Otu onye obodo kwuru na oge ihe ahụ mere “ọ dị ya ka ụwa akwụsịrị ịtụgharị”.

   Foto na ihe onyonyo gosiri ọtụtụ ihe ala ọmajijiji ahụ mebiri nke gụnyere okporoụzọ na ọtụtụ ụlọ ndị mmadụ.

   Ndị ọrụ gbatagbata n’agba mbọ achọ ndị na-efu efu dịka ndị ọchịchị na-eweta enyemaka dị iche iche.

   Mba Filipins bụ otu mba e ji ala ọmajijiji mara.

   Osote onyeisiala bụ Sara Duterte ezigala ozi iti aka n’obi nye ezinaụlọ ala ọmajijiji a metụtara ma kwuo na gọọmenti na-agba mbọ ịzọpụta ndị tọrọ n’ukpuru ala ma nye ndị obodo ahụ ezi nkwado zuruoke.

   Ka ọ dị ugbua, ndịagha mba Filipins ezigala ndịagha dị iche iche gụnyere ndịagha ụgbọelu iji nyere aka na mbọ a na-agba ịzọpụta ndị ala ọmajijiji a metụtara.

   Ha bu ọtụtụ akụrụngwa na ihe enyemaka n’ụgbọala nakwa n’ụgbọelu aga ebe ahụ.

3. 1 Ọktọba 2025Ndị uweojii anwuchiela mmadụ atọ maka ịgba nwataakwụkwọ EBSU egbe

   Ndị uweojii anwuchiela opekatampe mmadụ atọ n’ihi mwakpo e mere ụmụakwụkwọ oge ha na-ahazi ntuliaka na mahadum Ebonyi steeti bụ EBSU.

   Akụkọ kwuru na e jiri egbe wakpoo otu na-achịkọta ụmụakwụkwọ na mahadum ahụ bụ Student Union Government (SUG) n’asụsụ Bekee, oge ha na-ahazi ntuliaka.

   Ọnụ na-ekwuru ndị uweojii Ebonyi steeti bụ Joshua Ukandu wepụtara ozi ma kọwaa, na ndị ahụ a nwuchiri bụ ndị a na-enyo enyo na aka ha dị na mwakpo ahụ.

   Ukandu kwuru na ebumnobi e ji mee mwakpo ahụ bụ iji gbochie mkpọpụta mpụtara ntuliaka ndị SUG.

   Ọdachi ahụ mere oge ndị a na-enyo enyo gbapụrụ mgbọ egbe iji chụsaa ọtụtụ ụmụakwụkwọ gbakọrọ oge a na-akpọpụta mpụtara ntuliaka ndị SUG.

   Mgbọ egbe ahụ tụtara otu nwataakwụkwọ, bụ onye e bugara ozugbo n’ụlọọgwụ Alex Ekwueme Federal University Teaching Hospital dị n’Abakaliki maka nlekọta.

   Ozi ahụ Ụkandu wepụtara kwuru na ọsọ enyemaka ndị uweojii gbatara n’oge mere ka a nwuchie ndị a na-enyo enyo ma napụtakwa ha egbe ntụ ha jiri mee arụ ahụ.

4. 1 Ọktọba 2025Ụtụtụ ọma Igbo bụ Igbo

   Anyị ji obi aṅụrị anabata gị n'ọgbakọ BBC News Igbo taa dịka anyị banyere ọnwa Ọktoba.

   Ọfọ anyị na-agọrọ gị bụ ka ihuọma kpọọ gị n'ime ọnwa ọhụrụ a.

   Gaa n'ihu sonyere anyị n'akara soshal midia anyị dị iche iche WhatsApp Chanelụ, Facebook na Instagram.

   Ndewo.