Chaịna na Indịa ekwenyela inwe mmekọ

Mkpuchi Na Eme Ozugbo

Uzoamaka Ewuzie, Ikechukwu Kalu, Michael Ngene, Chinonso Ugorji, Michael Ilediagu, Adline Okere, Marvelous Obomanu

1. 12 Ọgọọst 2025Gọọmenti mba Ghana emechitụla ụlọmgbasaozi redio itoolu

   

   Ebe foto si, NCA/X, Getty Images

   Ụlọọrụ na-elekọta nziritaozi na mba Gana bụ National Communication Authority (NCA) ekwupụtala na ha emechiela ụlọmgbasaozi redio itoolu na mba ahụ.

   Ha bụ ụlọmgbasaozi ọnọdụ ahụ metụtara gụnyere ndị nke na-ewu ewu e kwenyere na ndị nwe ha bụ ndị na-agba gọọmenti ụkwụ.

   E mechiri ha maka ebubo inupuisi n’iwu na-achịkọta mgbasaozi na mba Gana.

   Dịka ụlọọrụ NCA siri kwuo, ndị nwe ụlọmgbasaozi redio ndị ahụ jụrụ ịnabata mgbazi e nyere ha n’ime mkpụrụ ụbọchị iri atọ.

   NCA kwuru na isii n’ime ụlọmgbasaozi itoolu ndị ahụ “jụrụ maọbụ leghara ụbọchi ikpeazụ e nyere ha anya site n’ọjụjụ ha jụrụ ime ihe ndị a gwara ha.”

   Ozi ahụ gbakwunyere na NCA mechiri ụlọmgbasaozi redio atọ nke onyendu otu New Patriotic Party na mpaghara Ashanti nwe maka erubeghị isi n’ụfọdụ iwu, nke gụnyere ịnọ n’ebe a na-enyeghị nkwado agbasa ozi.

   Ọnọdụ a na-abịa dịka NCA kwupụtara n’ọnwa Juun na ha emechila ụlọmgbasaozi iri isii na abụọ maka mmehie dị iche iche, site n’iwu Minista na-ahụ maka nziritaozi na mba ahụ bụ Sam George nyere.

2. 12 Ọgọọst 2025EFCC na-amaja Aminu Tambawal maka na o so n'otu ndị chọrọ ịbanye n'ọchịchị – Atiku Abubakar

   

   Ebe foto si, PIUS UTOMI EKPEI/Getty Images/Atiku Abubakar/Facebook

   Atiku Abubakar ji otu ndọrọndọrọ ọchịchị Peoples democratic Party (PDP) zọọ ọkwa Onyeisiala Naịjirịa n’afọ 2023 akatọọla ulọọrụ Economic and Financial Crime Commission (EFCC).

   Atiku Abubakar bụ onye dere obi ya n’akara soshal mịdịa ya kwuru na EFCC na-amaja onye bụbu Gọvanọ Sokoto steeti bụ Aminu Waziri Tambuwal maka na o sonyere ndị ndọrọndọrọ ọchịchị na-anọghị n'ọchịchị akpa nkata etu ha ga-esi banye n’ọkwa.

   N’okwu ya “ihe anyị na-ahụ taa bụ na e ji ngaraba ụlọọrụ gọọmenti na-ebuso agha emegide mpụ nwere mere ‘ngwa agha ndọrọndọrọ ọchịchị’.

   “Gọọmenti Tinubu na-amaja ndị mmadụ na-anọghị n’ọchịchị ya”.

   Ọ gara n’ihu kwuo na “e jirila aka ike mee ka ndị ndọrọndọrọ ọchịchị na-abanye n’otu Patị nke mere na onye ọbụla banyere na ya, ọ dị ka a gbahaara ya njọ ya”.

   Ọ sị na “e ji EFCC mee ka ndị gọvanọ dị icheiche banye na Patị Onyeisiala” ma bee arịrị na ihe na-eme ugbua abụghị ebumnobi gọọmentị mgbe e guzobere EFCC.

3. 12 Ọgọọst 2025Ukpomuọkụ si n'ọkụ na-agba na mpaghara Pọtụga na-esi ndị mmadụ esi dịka nri - Alexandre Favraios

   

   Ebe foto si, Getty Images

   Otu meyọ na mba Pọtụga bụ Alexandre Favraios gwara ndị Reuters sị na ụkpomụọkụ si n’ọkụ na-agba n’ime ọhịa na mpaghara mba ahụ “na-esi ndị mmadụ esi na ndụ dịka nri”.

   Alexandre kwuru na-ekwesịghị ịhapụ ihe dị etu ahụ ka ọ na-eme na-aga n’ihu dịka ọkụ na-agba n’ime ọhịa na mba Pọtụga banyere abalị iri na mpaghara Vila Real.

   Ọtụtụ mba na Yurop nọ n’ihe iche aka mgba dịka ọkụ na-agba n’ime ọhịa na mba dị icheiche gunyere Spen, Pọtụga, Greez na Tọkịị na-akpa mkpamkpa.

   Na mpaghara mba Spen, mmadụ karịrị 2,000 ka e wepụrụ n’ụlọ ha duga ha ebe ha ga-ezere ndụ.

   Obodo dị n’elu mmiri bụ Zante nke mba Greez bụ ebe ọzọ a zọpụtara ndị mmadụ maka ọkụ na-agba.

4. 12 Ọgọọst 2025EU adọọla aka na ntị banyere igbanwe oke ala mba Yukren

   

   Ebe foto si, Anadolu via Getty Images

   Otu jịkọrọ ọtụtụ mba na Yurop bụ ‘European Union, (EU)’ adọọla aka na ntị banyere ikegharị oke ala mba Yukren dịka mba Amerịka na Rọshịa na-achọ inwe mkparịtaụka udo.

   EU kwuru na ọ ga-abụ ihe na-adịghị mma ma e jiri ike kegharịa oke ala mba Yukren.

   Ha na-ekwu nke a dịka mkparịtaụka n’etiyi mba Amerịka na Rọshịa họrọ naanị abalị abụọ ka e mee ya n’Alaska.

   N’akwụkwọ ozo mba EU ọnụ ọgụgụ ha dị iri abụọ na isii n’ime mba iri abụọ na asaa binyereaka ka ha dọrọ aka na ntị ka "a kwanyere oke ala mba Yukren ugwu ma hara ijiri ike gbanwe ya".

   Ha sị na “ụmụ amaala Yukren nwere ikike dịara mmadụ ikwu ihe ha chọrọ maka onwe ha nakwa ọganịhụ ha”.

   Naanị onye ndu mba Hụngarị bụ Viktor Orban onye na-ebinyeghị aka n’akwụkwọ ọzị ahụ maka na ha na mba Rọshịa dị na mma.

   Cheta na Viktor Orban na mbụ mgba mbọ ịkwụsị enyemụaka ọbụla ga-esi n’EU gaara ndị Yukren.

5. 12 Ọgọọst 2025Zelensky nwereike isonye n'ọgbakọ Trump na Putin ga-enwe n'ụbọchị Fraịde

   

   Ebe foto si, Getty

   Onyeisiala mba Yukren bụ Volodymyr Zelensky nwereike isonye n’ọgbakọ ga-adị n’etiti Onyeisiala mba Amerịka bụ Donald Trump na Vladimir Putin nke mba Rọshịa n’ụbọchị Fraịde 15 Ọgọst, 2025.

   Ọgbakọ a ga-adị n’obodo Alaska nke mba Amerịka bụ ebe ha ga-akpa nkata maka etu a ga-esi kwụsị agha dị n’etiti Rọshịa na Yukren.

   Ihe ndị ọzọ ga-esepụta isi n’okwu ahụ mba ịhapụrụ ibe ya ụfọdụ mpaghara ala ha mana ndị nọ na Yurope achọghị ka e nwere ikike kpara okeala ha.

   Ọgbakọ a bụ nke ọtụtụ ndị ndu mba Yurope ga-achọ iso nay a mana o nweghi otu n’ime ha a kpọrọ oku isonye na ya maọbụ mba a wakporo.

   Onye bụbu onyeisi ụlọọrụ mba Briten na-ahụ maka mba ndị ọzọ bụ Lord Simon McDonald kwuru Rọshịa ga-achọ ke e nye ha ihe a na-atụghị anya na mkparịtaụka ahụ.

   O kwuru na ọ bụ naanị Trump nwereike ikwete n’ihe Putin ga-achọ n’ime kparịtaụka ahụ.

   Onyeisiala Zelensky adọọla aka na ntị na ọ gaghị ekwete ịhapụ ala ha ọbụla maọbụ kwụsị agha ahụ n’okeala ebe Rọshịa nọ ugbua.

   Lord Simon McDonald kwuru na ihe ga-adịrị mba Amerịka mma na mkparịtaụka ahụ bụ ma Zelensky soro na mkparịtaụka ahụ.

   Dịka ọ dị ugbua, Trump akpọbeghi Zelensky oku isonye n'ọgbakọ ahụ, odobeghi anya ma ọ ga-emecha kpọọ ya.

6. 11 Ọgọọst 2025EFCC ejichiela Tambuwal maka ebubo nrụrụakaego ijeri N189

   

   Ebe foto si, EFCC, Aminu Tambuwal/X

   Ụlọọrụ na-ebu agha megide mpụ na nrụrụakaego na Naịjirịa bụ Economic and Financial Crimes Commission (EFCC) ejichiela aka chịburu Sokoto steeti bụ Aminu Tambuwal.

   EFCC kpaara ya aka maka ịgba ya ajụjụ gbasara ego ruru otu ijeri naịra na iri asatọ na itoolu (N189bn) e sitere n’ọbaego ya wepụ.

   Onye ọrụ EFCC na-achọghị ka a kpọọ aha ya mere ka ụlọọrụ mgbasaozi Channels TV mata nke a n’ụbọchị Mọnde 11 Ọgọst, 2025.

   E kwuru na ego ahụ e si n’ọbaego Tambuwal wepụ bụ nke megidere iwu mbupụ ego nke afọ 2022.

   Akụkọ kwuru na Tambuwal ruru n’isi ụlọọrụ EFCC dị n’Abuja mgbe o jiiri ihe dịka ọkara gaa elekere iri na otu nke ụtụtụ, dịka ọ ka nọ ebe ahụ na-aza ajụjụ gbasara ebubo nrụrụaka ego.

   Ka o sina dị, o nwebeghị ihe ọnụ na-ekwuru EFCC bụ Dele Oyewale kwurula gbasara okwu ahụ.

7. 11 Ọgọọst 2025AON amachiela nwaagbọghọ a sị metọrọ ndị ọrụ Ibom Air

   

   Ebe foto si, Screenshot

   Otu jikọtara ụlọọrụ njem ụgbọelu ndị e nwere na Naịjirịa bụ Airline Operators of Nigeria (AON) amachiela Comfort Emmanson ịbanye ụgbọelu maka imetọ ndị ọrụ Ibom Air oge ha si Uyo na-efebata Legọs.

   N’ozi ọnụ na-ekwuru AON bụ Obiora Okonkwo wepụtara n’ụbọchị Mọnde 11 Ọgọst 2025, o kwuru na mmachi a machiri Emmason iji ụlọọrụ ụgbọelu ọbụla so n’otu ahụ eme njem malitere dịwa ire ozugbo.

   O kwukwara na malite ugbua gawa n’ihu, na onye ọbụla gosiri ụdịrị akparamaagwa ahụ ga-anata otu ntaramaahụhụ ahụ.

   Oge ha na-akatọ omume onye njem ahụ, AON kwuru na nke a bụ otu n’ime ajọ omume ndị njem kachasị njọ a na-ahụta n’afọ 2025.

   Cheta na otu ihe onyonyoo fesara na soshal midịa gosiri oge onye njem ahụ mara otu n’ime ndị ọrụ Ibom Air ụra, ọbụnadị ka ndị nchekwa gbara mbọ igbochi ya.

8. 11 Ọgọọst 2025Sịnetọ Miguel Uribe na-achọ ịzọ ọkwa onyeisiala Colombia anwụọla

   

   Ebe foto si, Daniel Garzon Herazo/NurPhoto via Getty Images

   Sịnetọ Miquel Uribe, onye na-achọ ịzọ ọkwa onyeisiala mba Kolombịa anwụọla dịka ọ gachara ọnwa abụọ a gbara ya egbe n’isi.

   Miquel Uribe dị afọ iri atọ na itoolu bụ onye a gbara egbe ugboro atọ, abụọ n’isi nakwa otu n’ụkwụ ebe ọ na achụ nta vootu n'isi obodo Kolombịa bụ Bogota.

   Uribe bụ Sịnetọ kemgbe afọ 2022, ma bụrụ onye na-achọ ka pati ya wepụta ya dịka onye ga-eji aha ha zọọ ọkwa onyeisiala n'afọ 2026.

   Nwunye ya bụ María Claudia Tarazona kwupụtara ọnwu nwoke ahụ na soshal midịa.

   E jidere nwatakịrị a na-enyo enyo na ọ bụ ya gbara egbe ahụ mana o nwebeghị onye ma ihe kpatara ya bụ mwakpo.

9. 11 Ọgọọst 2025A kwụsịtụla onye ọkwọụgbọelu ọrụ oge a hụrụ ebe ọ ṅụchara mmanya ma gbara ọtọ na Cape Verde

   

   Ebe foto si, Getty Images

   Ụlọọrụ njem ụgbọelu EasyJet akwụsịtụla otu n’ime ndị ọkwọụgbọelu ha ọrụ, dịka e kwuru na a hụrụ ebe ọ gba ọtọ ma na-akpagharị n’otu ụlọ oriri oge mmanya na-egbu ya.

   Onye ọkwọụgbọelu ahụ a na-akpọghị aha bụ onye a hụrụ oge ọ gba ọtọ ma na-akpagharị n’ụfọdụ akụkụ nnukwu ụlọ oriri dị na Cape Verde n’ụzọ ụtụtụ ụbọchị 5 Ọgọst 2025.

   Ụlọmgbasaozi The Sun sị na nke ahụ mere oge ya bụ onye ọkwọụgbọelu ṅụtechara mmanya aka n’ụlọ oriri ahụ.

   Nwoke ahụ kwesịrị ibughachi ndị njem n’ọdọụgbọelu Gatwick n’ime ihe karịrị elekere iri atọ na isii, mana a kwụsịrị ya ime njem ahụ oge ụlọorụ njem ụgbọelu ya natara mkpesa gbasara ihe o mere.

   Ọnụ na-ekwuru ụlọọrụ EasyJet gwara BBC na a ga-enyocha onye ọkwọụgbọelu ahụ maka na nchekwa ndị njem na ndị ọrụ ụgbọelu bụ nke o kwesịrị iji kpọrọ ihe dị oke mkpa.

10. 11 Ọgọọst 2025Trump ezigaala ndị nchekwa na Washington DC maka ikpochapụ mpụ

    

    Ebe foto si, Getty Images

    Onyeisiala mba Amerịka bụ Donald Trump ezigaala ndị nchekwa na Washington dịka o kwupụtara ịzọpịa ndị na-eme mpụ na ndị na-enweghị ụlọ n'isi obodo mba ahụ.

    Trump kwuru na ndị na-eme ihe ike na ndị omempụ ewegharala isi obodo ha, mana aka na-achi Washington Muriel Bowser jụrụ ịnabata ihe Trump kwuru na mpụ na-abanwanye ebe ahụ.

    The president also appears to mistakenly say he is "going to Russia on Friday" to meet Vladimir Putin, after last week announcing Alaska as the location for the summit

    Ọ dịkwa ka Onyeisiala amaghị oge o jiri kwupụta na ya "ga-aga mba Rọshịa n'ụbọchị Fraịde" izute Vladmir Putin, dịka o kwuchara n'izuụka gara aga na ọ bụ n'Alaska ka a ga-anọ nwee ọgbakọ ahụ.

11. 11 Ọgọọst 2025E jidela ọtụtụ ndịagha Mali maka ebubo ịkpa nkata nkwatu ọchịchị

    

    Ebe foto si, Getty Images

    A nwụchiela ọtụtụ ndị ọrụ nchekwa na mba Mali maka ebubo ịkpa nkata ịnapụ ndịagha ọchịchị n'ike.

    Akụkọ nke mbụ kwuru na onye agha bụ Abass Dembele, onye bụbu aka na-achị mpaghara Mopti na Nema Sagara, otu n’ime ụmụnwaanyị nọ na isi ọrụ ndịagha Mali so na ndị e jidere.

    Ka o sina dị, onye nọketere Abass Dembele nso kwuru na e jidebeghị ha.

    Nke a na-abịa dịka e nwere ọgbaaghara ndọrọndọrọ ọchịchị site na nnwuchi a nwuchiri ndị bụbu Praịm Mịnịsta bụ Moussa Mara na Choguel Maiga maka ebubo imebi aha mba ahụ nakwa iri ego ọha.

12. 11 Ọgọọst 2025Nwata nwaanyị a mụrụ ọhụrụ anwụọla oge e bichara ya ugwu na Gambịa

    

    Ebe foto si, AFP via Getty Images

    Ọnwụ nwata nwaanyị dị naanị otu ọnwa, bụ onye nwụrụ oge a na-ebi ya ugwu akpaliela iwe na ọnụma na mba Gambịa.

    E buuru ya bụ nwata gaa n’otu ụlọọgwụ dị n’isi obodo mba ahụ bụ Banjiul oge ọ malitere ịgba nnukwu ọbara, mana ndị ọrụ ahụike kwupụtara ya dịka onye nwụrụ anwụ.

    Ọ bụ ndị uweojii mere ka ozi a ruo anyị aka.

    Ka ọ dị, a na-enyocha ozu nwata ahụ iji chọpụta ihe butere ọnwụ ya, mana ọtụtụ mmadụ na-ebo ebubo na ọ bụ n’ihi ibi nwaanyị ugwu a kpọrọ Female Genital Mutilation (FGM) n’asụsụ Bekee.

    “Omenala abụghị ngọpụ, ọdịnaala abụghị ihe mkpuchi, nke a bụ imesi mmadụ ike, hoohaa,” ka otu na-abụghị nke gọọmenti a ma ama bụ Women In Leadership and Liberation (WILL) kwuru n’ozi ha wepụtara.

    Ndị uweojii sị na ha anwụchiela ụmụnwaanyị abụọ a na-enyo enyo na aka ha dị n’ọnwụ nwata ahụ.

13. 11 Ọgọọst 2025Ahaziela mmemme akwamozu maka ndị ntaakụkọ Al Jazeera ise ndịagha Izrel gbagburu na Gaza

    

    Ebe foto si, Getty Images

    A na-ahazi mmemme akwamozu maka ndị ntaakụkọ Al Jazeera ise so n’ime mmadụ asaa e gburu na Gaza oge ndịagha Izrel tụrụ ogbunigwe.

    Nke a bụ dịka ụlọmgbasaozi ahụ siri kwuo.

    Ndịagha Izrel kwuru na ha gbagburu onye ntaakụkọ ahụ dị afọ iri abụọ na asatọ bụ Anas al-Sharif n’ihi ebubo na “e nwere mgbe ọ gara ozi dịka onyeisi ogige ndị oyi ndụ egwu dị na Hamas” mana ihe akaebe ha jiri kwadoo nke a ebughị ibu.

    BBC ghọtara na Sharif rụrụ ọrụ n’ụlọmgbasaozi ndị Hamas dị na Gaza tupu ọgbaaghara dị ugbua amalite.

    N’ụfọdụ ozi ndị ọ gbasara n’akara soshal midịa ya tupu ọ nwụọ, onye ntaakụkọ ahụ katọrọ Hamas.

    E gbukwara onye ntaakụkọ Al Jazeera ọzọ na mmadụ atọ na-ese onyonyoo oge e mere mwakpo ahụ, ebe onye nke isii ọnọdụ ahụ metụtara ka a na-akọwa dịka onye ntaakụkọ nchereoge.

14. 11 Ọgọọst 2025NYSC akọwaala ihe mere ha ji kpachie asambodo nwada Ushie Uguamaye

    

    Ebe foto si, NYSC/Uguamaye/X

    Akụkọ fegharịrị na soshial midia na-ekwu na otu nwagbọghọ bụ Ushie Uguamaye onye nke fecharala ala nna ya site n’ihe a na-akpọ National Youth Service Corp (NYSC) enweteghi akwụkwọ asambodo nke na-egosi na o fere ala nna ya

    Akụkọ a kwuru na Uguamaye efechaala ala nna ya mana ndị ụlọọrụ NYSC ekweghi enye ya asambode ya maka nkatọ o nyere ọchịchị Onyeisiala Tinubu n'oge gara aga.

    Nwada, onye fere ala nna ya na Legọs steeti pụtara otu mgbe n’ihe onyonyo katọọ ọchịchị Onyeisiala Tinubu maka ọnọdụ ojọọ, ntaramahụhụ na agụụ bụ ọ sị na-akwawanye njọ n'obodo.

    Atiku Abubakar ya na Peter Obi ndị zọrọ ọkwa onyeisiala n'afọ 2023 na pati PDP nakwa Labour katọrọ agwa NYSC kpara n'ịkpachi asambode Uguamaye ma kpọọ oku ka e nye ya asambode ahụ ozugbo.

    Mana ụlọọrụ NYSC kwuru na ihe mere ha ji jide asambodo Uguamaye bụ n’ihi na ọ dara iwu NYSC nke bụ na o meghi nnyocha n'igwe kọmputa a kpọrọ 'Biometric clearance' nke ọnwa Eprelụ, 2025 ya mere NYSC ji machie ya ma tinyekwuo ọnwa abụọ n'elu oge ọ ga-efe ala nna ya tupu ha enwee ike inye ya asambodo ahụ.

    Na nkwupụta NYSC nyere ndị ntaakụkọ nke onye na-ahụ maka mgbasaozi ha Caroline Embu wepụtara, NYSC kwuru na ọ bụghị naanị Uguamaye ka ha kpachiri asambodo ya, na e nwere mmadụ ruru otu nari, iri atọ na otu, bụ ndị na-eme nnyocha n'igwe kọmputa nke NYSC na-eme kwa ọnwa.

15. 11 Ọgọọst 2025ASUU adọọla gọọmenti aka na ntị na ha nwereike ịgba abụbụọrụ

    

    Ebe foto si, Getty Images

    Otu jikọtara ndị nkuzi mahadum na Naịjirịa bụ Academic Staff Union of Universities (ASUU) adọọla gọọmenti aka na ntị ka ha leba anya na nsogbu ndị cheere ha aka n’ihu kamgbe iji gbanahụ ọgbaaghara dịka ịgba abụbụọrụ.

    Na nkwupụta Onyeisioche otu a bụ Christopher Piwun mere, o sị na nsogbu ha na-enwe gunyere akwụghị ụgwọ ọdịmma, ego e ji enyere agụmaakwụkwọ aka na-ezughị oke nakwa enweghị nsọpụrụ na-nkwekọrịta ndị ha na gọọment bịanyere aka.

    Nke a na-abịa dịka Mịnịsta na-ahụ maka agụmaakwụkwọ bụ Tunji Alausa kwuru na ASUU agaghị enwe ike ịgba abụbụọrụ maka ha ekwela ime ihe ndị otu ahụ na-achọ mana ASUU na-ekwu si na ọ ka mma a na-ekwu ekwu, a na-eme eme.

16. 11 Ọgọọst 2025Ndị ntaakụkọ Al Jazeera mmadụ ise anwụọla site n'ogbunigwe Izrel tụrụ na Gaza

    

    Ebe foto si, Al Jazeera

    Ndị ntaakụkọ Al Jazeera mmadụ ise gụnyere onye ntaakụkọ a ma ama bụ Anas al-Sharif anwụọla site n’ogbunigwe mba Izrel tụrụ n’akụkụ ụlọọgwụ Al-Shifa dị na Gaza dịka ụlọọrụ ntaakụkọ ahụ si kwuo.

    Al-Shariff na onye ntaakụkọ ọzọ bụ Mohammed Oreuqeh, na onye ose ihe onyonyo bụ Ibrahim Zaher, Mohammed Noufal na Moamen Aliwa nọ n’ime otu ụlọ akwa mgbochi ebe ndị ntaakụkọ dị n’isiama ụlọọgwụ ahụ mgbe ogbunigwe ahụ gbara.

    Mwakpo a “a kpachara anya mee n’ụbọchị Sọnde bụ otu n’ime ụdịrị mwakpo ọjọọ a megide ikike ndị ntaakụkọ”, ka akwụkwọ ozi ha kwuru.

    Ndịagha mba Izrel kwuru na ha maara ama gbaa Anas al-Sharif, ma boo ebubo na “o so n’ime ndịisi otu Hamas”.

    Ha kwukwara na nwamadị a “tụrụ ụmụafọ mba Izrel na ndịagha ha ogbunigwe”.

    Kọmitii na-ahụ nchekwa ndị ntaakụkọ bụ (CPJ) kwuru na mwakpo ndị Izrel mere jọgburu onwe ya, na ha enweghi ike igosi ihe akaebe n’ebubo ha boro al-Sharif.

    Onyeisi ụlọọrụ Al Jazeera bụ Mohamed Moawad gwara BBC na al-Sharif bụ ezigbo onye ntaakụkọ nwere asambodo, bụkwara “naanị olu” na-agwa ụwa ihe na-eme na Gaza.

    Kamgbe ọgụ a malitere, Izrel ekwebeghi ka ndị ntaakụkọ si mbaụwa bata na Gaza n’efu. Ya mere ọtụtụ ụlọọrụ ntaakụkọ na-elekwasị anya n’akụkọ ndị ntaakụkọ nọ n’obodo Gaza dere.

    “A tụrụ ha ogbunigwe n’ime ụlọ akwa mgbochi ha, ha anọghị n’ihu ọrụ ebe a na-alụ ọgụ,” ka Moawad kwuru na mwakpo ahụ Izrel mere.

    N’ọnwa gara aga, ụlọọrụ Al Jazeera na United Nations, tinyere CPJ wepụtara ozi dị iche iche ma kwuo na ndụ al-Sharif nọ n’ihe izendụ ma kpọọ oku maka nchekwa ya.

17. 11 Ọgọọst 2025Ndị ọma e ji eme ọnụ unu asaala chi?

    Obi ọma ka anyị anabata gị n'izuụka ọhụrụ a ma na-asị ka ụwa maara gị mma.

    Biko gbalịa na-anọnyere BBC Igbo n'ọbaozi websaịt, Facebook, Instagram nakwa Whatsapp Chanelụ.

    Maka akụkọ ndị gbapụtara ihe n'ụwa gbaa gburu gburu.

    Daalụ kwa nụ!

18. 10 Ọgọọst 2025Netanyahu ga-eme mgbasaozi tupu UN ezukọọ ileba anya n'atụmatụ ha iweghara Gaza

    

    Ebe foto si, Reuters

    Praịm Mịnịsta mba Izrel bụ Benjamin Netanyahu ga-enwe nzukọ ya na ndị ntaakụkọ dịka ndị mmadụ na-eme ngharịiwe maka atụmatụ ya iweghara obodo Gaza.

    Nke a na-abịa dịka otu mbaụwa nille bụ United Nations akpọọla ndị ngalaba ha na-ahụ maka nchekwa oku ka ha nwe mkparịtaụka maka ya mana mba Amerịka na Panama esoghị ha.

    Atụmatụ Izrel iweghara Gaza na-enwe ezigbo ọdachi dịka mba dị iche iche na-akatọ atụmatụ ahụ mana Izrel ekwuola na-ha enweghị nkụja na-agbanyeghi ọtụtụ ndị mmadụ nwụrụla n’ihi ha erighị ihe na-edozi haa ahụ na Gaza.

19. 10 Ọgọọst 2025NDLEA anwuchiela pastọ maka ebubo ibu ọgwụ ike

    

    Ebe foto si, Nigeria Drug Law Enforcement Agency

    Ụlọọrụ Nigeria Drug Law Enforcement Agency, NDLEA, ekwuola na ha anwuchiela pastọ ụlọụka The Turn of Mercy Church aha ya bụ Adefolusho Olasele maka ebubo na ọ na-ebu ọgwụ ike.

    Ngalaba ụlọọrụ NDLEA Legọs steeti kwuru na ha nwuchiri nwaamdị ahụ bụ onye ha na-achọ kemgbe n’ụbọchị Sọnde 3 Ọgọst, 2025 n’ụlọụka ya dị na Oku Ajah, Legọs steeti.

    Akwụkwọ ozi ọnụ na-ekwuru NDLEA bụ Femi Babafemi wepụtara mere ka o doo any ana ha hapụrụ ụkọchukwu ahụ ka o zichaa oziọma tupu ha nwuchie ya ụbọchị ahụ.

    Babafemi kwuru na nwaamadị gbagara Gana n’ọnwa Juun oge e boro banyere ọgwụ ike a hụrụ n’ụgbọala ya na Juun 4 2025.

    Oge a gbara ya ajụjụ ọnụ, Adefolusho Olasele kwuru na ọ bụ eziokwu na ọ na-esi Naịjirịa ebuga ọgwụ ike na Gana.

20. 10 Ọgọọst 2025Mba Yurop ha na Yukren na-enwe mmekọ ekwuola na Kyiv ga-eso na mkparịtaụka udo ọbụla

    

    Ebe foto si, Getty Images

    Mba Yurop dị iche iche ha na Yukren na-enwe mmekọ akwadola Yukren ma kwusie ike na Kyiv ga-eso na mkparịtaụka udo ọbụla mba Rọshịa na Yukren ga-enwe.

    Ozi mba UK, Jamini, Itli, Poland, Fịnland na otu European Commission wepụtara kwuru na ha kwụrụ mba Yukren n’azụ n’oge a.

    Ozi ha na-abịa dịka Onyeisiala Donald Trump na-achị Amerịka kwuru na ya na onyeisiala Rọshịa bụ Vladimir Putin ga-enwe mkparịtaụka n’Alaska ụbọchị Fraịde iji kwụsị agha dị n’etiti Yukren na Rọshịa.

    Onyeisiala Zelensky mere ka o doo anya na mkparịtaụka ọbụla Yukren na-esonyeghị na ya agahị amịta mkpụrụ ọbụla.

    Cheta na obi ọchịchị White House mba Amerịka kwuru na Onyeisiala Trump chọrọ ka ya na Zelensky na Putin nwee nzukọ.