Chaịna na Indịa ekwenyela inwe mmekọ

Mkpuchi Na Eme Ozugbo

Uzoamaka Ewuzie, Ikechukwu Kalu, Michael Ngene, Chinonso Ugorji, Michael Ilediagu, Adline Okere, Marvelous Obomanu

1. 4 Ọgọọst 2025WAEC ewepụtala mpụtara ule nke afọ 2025

   

   Ebe foto si, WAEC/X

   Ụlọọrụ West African Examinations Council, WAEC, ewepụtala mpụtara ule nke afọ 2025.

   WAEC mere ka amata nke a n’ozi ha wepụtara n’ụbọchị Monde, Ọgọst 4, 2025 n’akara X soshal midia ha.

   N’okwu ha “anyị na-agwa ụmụakwụkwọ niile mere ule WASSCE n’afọ 2025 ka ha mara na mpụtara ule ha mere apụtara”.

   WAEC jiri ohere ahụ kwuo na-enweghị mgbe ha kagburu mpụtara ule nke afọ 2025 niile dịka akụkọ si kwuo.

   Ụmụakwụkwọ 1,969,313 bụ ihe mere ule ahụ e mere bido n’ọnwa Epril ruo Juun 2025 n’ụlọakwụkọ sekọndịrị ruru 23,554 na Naịjirịa.

   E mekwara ule ahụ na mba Benin Republik, Côte d’Ivoire na Equatorial Guinea bụ mba ha n amba Naịjirịa nwere out usoro agụmaakwụkwọ.

2. 4 Ọgọọst 2025Ụlọọrụ NiMet na-atụanya egbe eluigwe, mmiri ozuzo ma dọọ aka na ntị banyere idemmiri na ụfọdụ steeti

   

   Ebe foto si, Getty Images

   Ụlọọrụ na-ahụ maka ihu igwe bụ the Nigerian Meteorological Agency (NiMet) ekwuola na-aga enwe egbe eluigwe na mmiri ozuzo na gburugburu Naịjirịa malite na Mọnde ruo Wenezde, ma dọọ aka na ntị na e nwereike inwe idemmiri na mpaghara ụfọdụ.

   Nleba anya ihu igwe nke ụlọọrụ NiMet wepụtara n’ụbọchị Sọnde 3 Ọgọst 2025 n’Abuja kwuru na a tụrụ anya na-aga e nwee egbe eluigwe na Mọnde n’oke mmiri ozuzo na mpaghara Adamawa, Taraba, Sokoto, Kebbi, Zamfara, Jigawa, Kano na Katsina steeti na mpaghara ugwu.

   O kwukwara na a na-atụanya inwekwa egbe eluigwe na obere mmiri ozuzo n’oge mgbede na mpaghara niile.

   Ụlọọrụ ahụ kwuru na e nwekwara ike ịhụ idemmiri n’akụkụ Adamawa, Taraba na Bauchi steeti n’ụbọchị atọ ndị ahụ.

   ‎Dịka ụlọọrụ ahụ siri kwuo, a na-atụ anya mmiri ozuzo n'akụkụ Abịa, Imo, Ebonyi, Anambra, Osun, Ogun, Oyo, Ondo, Ekiti, Edo, Delta, Bayelsa, Rivas, Legọs, Cross River na Akwa Ibom steeti n'ụbọchị ahụ.

3. 4 Ọgọọst 2025Ọtụtụ ndị na-akwaga mba ọzọ anwụọla n'ụgbọmmiri kpuru na Yemen

   

   Ebe foto si, Getty Images

   Opekatampe mmadụ iri isii na asatọ anwụọla dịka ụgbọmmiri bu mmadụ otu narị na iri ise na asaa kpuru n'ụsọ oke osimiri Yemen n’ihi ihu igwe adịghị mma.

   Ụgbọmmiri a kpuru na mpaghara Abyan dị na ndịda Yemen na Sọnde, onyeisi ụlọọrụ International Organisation for Migration (IOM) na Yemen gwara BBC.

   O kwuru na a napụtara mmadụ iri na abụọ, mana a mabeghị ọtụtụ mmadụ ndị ihe mberede ahụ metụtara.

   E kwenyere na ọtụtụ n'ime ndị ihe mberede a metụtara bụ ndị ụmụafọ Etiopia, ka ụlọọrụ IOM kwuru.

   Cheta na Yemen bụ nnukwu ụzọ nke ndị na-akwaga mba ọzọ na mpaghara Afrịka na-esi aga na mba dị na mpaghara Gulf ịchọ ọrụ.

   Ụlọọrụ IOM na-ekwu na ọtụtụ narị anwụọla ma ọ bụ na-efu site n'ụgbọmmiri kpuru n'ọnwa ndị na-adịbeghị anya.

4. 4 Ọgọọst 2025Ndị isi ọdịda anyanwụ ụwa katọla ihe onyonyo nke ndị Izrel eji eji na Gaza tara oke ahụ

   

   Ebe foto si, Reuters

   Ndị isi ọdịda anyanwụ ụwa katọla ihe onyonyo vidiyo na-egosi ndị Izrel eji eji tara oke ahụ n’ihi erijughị afọ nke ndị jidere ha setere na Gaza.

   Nke a kpalitere ndị ụlọọrụ Red Cross ịkpọ oku maka ịtọhapụ ndị niile fọdụrụ eji eji n’ihi agha Gaza.

   N’aka nke ọzọ, ndị isi Izrel na-ebo Hamas ebubo na ha na-agụ ndị eji eji agụụ.

   Onye odeakwụkwọ mba ofesi nke UK bụ David Lammy kwuru na "onyonyo nke ndị eji eji na-efegharị maka mgbasa ozi na-arịa mmadụ ọrịa" ma kwuo na a ga-ahapụrịrị ha "na-enweghị ọnọdụ" ọ bụla.

   Oku a na-abịa mgbe otu Palestine Islamic Jihad bipụtara vidiyo Rom Braslavski, onye dị gịrịgịrị ma na-akwa akwa na Tọzde, ebe ndị Hamas wepụtara ihe onyonyo nke Evyatar David tara ahụ na Satọde.

   Ndịagha Hamas gọnahụrụ sị na ha amaghị ụma na-agụ ndị mkpọrọ agụụ, na-ekwu na ndị eji eji na-eri ihe ndịagha ha na ndị mmadụ na-eri dịka nsogbu agụụ dị na Gaza.

5. 4 Ọgọọst 2025Ụtụtụ ọma, ndị be anyị

   Nnọọ n'ọgbakọ BBC News Igbo taa bụ Mọnde 4 Ọgọst 2025.

   Anyị ga na-ewetere unu akụkọ ihe na-eme na Naịjirịa nakwa ụwa niile.

   Biko sonyekwara anyị na Facebook, Instagram nakwa WhatsApp Channelụ anyị.

   Ka izu ọhụrụ a mara anyị niile mma.

   Daalụ!

6. 3 Ọgọọst 2025Yukren atụola ogbunigwe na mpaghara Sochi na Rọshịa

   

   Ebe foto si, Mayor Andrei Proshunin

   Ọkụ agbaala n'ogige nchekwa mmanụ ụgbọala nọ n'akụkụ oshimiri ojii na mpaghara Sochi dịka Yukren tụrụ ogbunigwe na Rọshịa n’abalị Satọde,Ọgọst 2, 2025.

   Aka na-achị Krasnodar bụ Veniamin Kondratyev kọwara na ogbunigwe ahụ Yukren tụrụ nke metụtere ọdọ ụgbọelu n’akụkụ ebe a na-eme asompi Olimpil nke afọ 2014 metụtara tanki mmanụ ụgbọala mana ndị gbatagbata menyụrụ ya.

   Nke a na-abịa dịka Yukren na Rọshịa wakporo onwe ha ma tụọ ibe ha ogbunigwe nke gburu ma merụọ ọtụtụ ndi mmadụ ahụ n'ụbọchị ahụ.

   

   Ebe foto si, Kherson regional military administration

7. 3 Ọgọọst 2025M ga-emezu nkwa m kwere ịchị naanị afọ anọ ma m bụrụ Onyeisiala Naịjirịa – Peter Obi

   

   Ebe foto si, Peter Obi / Facebook

   Peter Obi jibu otu ndọrọndọrọ ọchịchị Lebọ Patị zọọ ọkwa onyeisiala Naịjirịa n'afọ 2023 ekweela nkwa na ya ga-emezu nkwa ya kwere ịchị naanị afọ anọ ma ọ bụrụ na a kwado ya ịbụ Onyeisiala Naịjirịa n’afọ 2027.

   Peter Obi mere ka a mata nke a site n’akara X soshal mịdịa ya taa bụ Sọnde, Ọgọst 3, 2025.

   Obi nyere nkọwa ahụ ma jiri onye bụbu Onyeisiala mba Amerịka bụ Abraham Lincoln nakwa Nelson Mandela nke mba Saụt Afrịka ma-atụ dịka ndị chịrị naanị afọ anọ maọbụ otu mgbe n’ọkwa.

   

   Ebe foto si, Peter Obi / Facebook

   Obi bụ onye kọwara mbọ niile ndị ọchịchị ahụ gbara n’imezi mba ha n’afọ anọ maọbụ otu mgbe n’ọkwa mere ya ji ekwe nkwa na ya ga-achị naanị otu mgbe (afọ anọ) ma ọ bụrụ na e tinye ya n’ọkwa dịka Onyeisiala Naịjirịa n’afọ 2027.

   Obi katọrọ ndị kwuru na ya agaghị achị naanị afọ anọ ma kwuo na kemgbe ya bidoro ndọrọndọrọ ọchịchị na ya na-emezu nkwa ya kwere.

8. 3 Ọgọọst 2025Mịnịsta mba Izrel na-ahụ maka nchekwa agaala kpee ekpere ebe okpukpere chi ndi alakụba dị na Jerusalem

   

   Ebe foto si, Itamar Ben-Gvir / X

   Mịnịsta mba Izrel na-ahụ maka nchekwa obodo bụ Itamar Ben-Gvir gara kpe ekpere ebe okpukpere chi ndi alakụba al_Aqsa nọ na Jerusalem.

   Foto na onyonyoo na-efesasị n’egosi ebe ọ na-edu ekpere ndi Juu n’ime ụlọ ekpere a na-akpọ Temple Mount na mpaghara ọwụwaanyanwụ Jerusalem.

   Ikpe ekpere n’ebe ahụ mebiri nkekọrịta e mere ogologo oge nke na-enye ndị Juu ohere ịga n’ebe ahụ ma ghara ikpe ekpere.

   Ụlọọrụ Praịm minista mba Izrel wepụtara nkwupụta sị na-enweghị mgbanwe n'amụma Izrell nke nyere naanị ndị Alakụba ohere ime ofufe n'ebe ahụ.

   Ọ sị na agwa Itamar Ben-Gvir kpara mebiri nkwekọrịta e mere n'ogologo oge garaaga nke na-enye ndị Juu ohere ịga n’ebe ahụ ma ghara ikpe ekpere.

   Hamas kpọrọ ya "mmegide na mkpagbu mba Izrel na-eme ha nakwa ndị Palestine niile".

   N'aka nde ọzọ, onye na-ekwuchitere Onyeisiala mba Palestine bụ Mahmoud Abbas kwuru na nleta ahụ "gafere nkwekọrịta niile ha na Izrel nwere".

9. 3 Ọgọọst 2025Ụlọọrụ NDLEA ejidela onye ji ugogbe ụgbọala bụbata ọgwụike n’ọdọ ụgbọelu na Legọs

   

   Ebe foto si, NDLEA/Facebook

   Ụlọọrụ na-ebu agha emegide ọgwụike na Naịjirịa bụ National Drug Law Enforcement Agency (NDLEA) jidere ọtụtụ ndị mmadụ n’abalị garaaga maka mpụ dị icheiche.

   NDLEA mere ka amata nke a n’akwụkwọ mgbasaozi Femi Babafemi bụ onye na-arụ ọrụ na ngaraba mgbasaozi ha depụtara n’ụbọchị Sonde, Ọgụst 3, 2025.

   Babafemi kwuru na n’ime ndị NDLEA jidere gunyere onye ji ugogbe na-adị n’akụkụ ụgbọala chọrọ ịbupụ ọgwụike ndị bekee kpọrọ “cocaine”.

   Ọ sị na a chọrọ isi n’ọdụ ụgbọelu Murtala Muhammed International Airport (MMIA) Ikeja Legos bụga ọgwụike ahụ e tinyere n’ugogbe ụgbọala na Lebreville, Gabọn.

   Ndị e jidere banyere ọgwụike ahụ gunyere Ihekweme Osinachi Benedict bụ onye nyeere aka ka e jide Uzochukwu Godspower Chukwurah.

   N’Ogun steeti ka NDLEA kwurkwara na ha jidere nwaanyị a na-akpọ Yahaya Aminat Seyi maka ọkwụike “opiod” nakwa nwaanyị ọzọ bụ Oladeji Saka dị afọ iri ise na anọ maka nke ha kpọrọ ‘skunk’ na mpaghara Ibadan n’Oyo steeti.

   Na ndekọ ọhụrụ NDLEA wepụtara, ha jidere ọtụtụ ndị mmadụ maka mpụ gbasara ibu ọgwụike na steeti dị icheiche gunyere Benue, Edo, Bayelsa, Delta, Osun na Borno.

10. 3 Ọgọọst 2025Ọtụtụ iri puku mmadụ pụtara maka ngagharịiwe ịkwado ndị Palestine na Sydney

    

    Ebe foto si, Dean Lewins/EPA

    Ngagharịiwe ịkwado ndị Palestine n'ofe akwa mmiri Sydney Harbor na-aga n'ihu dịka ụlọikpe kasị elu nyere ikike ya naanị otu ụbọchị tupu mgbe ahụ, n'ihe ndị nhazi ya kpọrọ mkpebi "n’akụkọ ihe mere eme".

    Ọtụtụ iri puku mmadụ pụtara maka nghagharị ahụ nke ha kwuru na ọ bụ n’ihi ndụ mmadụ “March for Humanity” n’ụbọchị Sọnde abalị atọ nke ọnwa Ọgọst n'agbanyeghị oke mmiri ozuzo – dịka ọtụtụ ndị bu akwụkwọ na-ezigara ndị ndọrọ ndọrọ ọchịchị ozi ka ha kwụsị agha ahụ.

    A hụrụ onye nchoputa WikiLeaks Julian Assange n'etiti ndị ngagharịiwe ahụ, yana ndị ọzọ ama ama gụnyere onye omeiwu Ed Husic na onye bụbu aka na-achị New South Wales Bob Carr.

    Cheta na e mechiri akwa mmiri Sydney Harbor maka nwee ọgbakọ ọha na eze n’afọ 2023, mgbe ihe dị ka mmadụ puku iri ise mere ngagharị n'okporoụzọ mara mma maka World Pride.

11. 3 Ọgọọst 2025Ndịagha Izrel gburu onye ọrụ na mwakpo nke isi ụlọọrụ anyị na Gaza - Otu enyemaka

    

    Ebe foto si, Palestine Red Crescent Society

    Ndị otu Palestine Red Crescent Society (PRCS) na-ebo ndịagha Izrel ebubo na ha wakporo isi ụlọọrụ ya na Gaza, gbuo otu onye ọrụ ma merụọ mmadụ atọ ọzọ ahụ.

    Otu na-ahụ maka ọdịmma ndị mmadụ kwuru na mwakpo a "kpalitere ọkụ n'ụlọ ahụ" n'isi ụtụtụ Sọnde.

    Na nkọwa mwakpo abalị a wakporo ụlọọrụ ahụ dị na ndịda obodo Khan Younis dị ka ihe "ama ụma", otu Red Crescent kwuru na ndịagha Izrel mara isi ụlọọrụ ya nke ọma "ma bụrụkwa ebe nke e jiri akara uhie na-echebe nke ọma".

    Na nzaghachi, ndịagha nchekwa Izrel (IDF) kwuru na ọ maghị maka ogbunigwe ma ọ bụ mwakpo si n’ikuku ọ bụla, mgbe BBC jụrụ ya maka ebubo a.

12. 3 Ọgọọst 2025Hamas jụrụ ịtọhapụ ngwa ọgụ ruo mgbe e guzobere steeti Palestine

    

    Ebe foto si, EPA-EFE/REX/Shutterstock

    Ndị Hamas ekwuola na ha agaghị ekwenye na ịtọhapụ ngwa ọgụ ha ọ gwụla na e guzobere steeti nwere onwe na Palestine, na nzaghachị otu n’ime ọkpụrụkpụ ihe mba Izrel kwuru na mkparịtaụka nke nkwụsị agha na Gaza.

    Ndị otu nnupụisi nke Palestine kwuru na ya na azaghachi okwu onye nnọchiteanya Onyeisiala mba Amerịka Donald Trump na mpaghara Middle East bụ Steve Witkoff kwuru na Hamas kwupụtara mmasị ikwenye na ịtọhapụ ngwa ọgụ.

    Cheta na Izrel hụtara ịtọhapụ ngwa ọgụ nke Hamas dịka otu n'ime ọnọdụ dị mkpa maka nkwekọrịta ọ bụla iji kwụsị esemokwu ahụ.

    Ọzọkwa, mkparịtaụka na-apụtaghị ihe n'etiti Izrel na Hamas iji nweta nkwụsị ọgụ na ntọhapụ nke ndị eji eji kwụsịrị n'izu gara aga.

13. 3 Ọgọọst 2025Yukren kụriri akụrụngwa ọdọ mmanụ dịka Rọshịa wakporo ụlọ ndị dị nso n'oke Osimiri Ojii

    

    Ebe foto si, DSNS Ukraine

    Nnukwu ọdọ mmanụ na-agba ọkụ n’akụkụ oke Osimiri Ojii nke Sochi, nke ndị ọchịchị Rọshịa na-ebo ndị ọchịchị mba Yukren ebubo na ọ bụ ha jiri duronu wakpoo akụrụngwa ahụ.

    Akụkọ kwuru na ọdụ ụgbọelu dị nso na Sochi akwụsịla ụgbọelu ndị njem ọrụ n’ihi ọkụ ahụ.

    Gọvanọ mpaghara Krasnodar bụ Veniamin Kondratyev kwuru n’akara Telegram na irighiri ihe nke ụgbọelu duronu dakwasịrị otu ọdọ mmanụ ọkụ, mana ndị ọrụ mgbanyụ ọkụ mmadụ otu narị na iri abụọ na asaa nọ na-agba mbọ ịgbayụ ọkụ ahụ.

    Ka ọ dị ugbu a, ogbunigwe nke Rọshịa ebibiela ụlọ na akụrụngwa ndị nkịtị n’obodo ndịda Yukren dị na Mykolaiv, ndị ọrụ obodo kwuru.

    Ihe ruru ndị nkịtị mmadụ asaa merụrụ ahụ n'obodo ahụ nke ndịagha Rọshịa wakporo ugboro ugboro.

14. 3 Ọgọọst 2025Igbo ndị ọma, ụtụtụ ọma nu

    Nnọọ n'ọgbakọ BBC News Igbo taa bụ Sọnde 3 Ọgọst 2025.

    Anyị ga na-ewetere unu akụkọ ihe na-eme na Naịjirịa nakwa ụwa niile.

    Biko sonyere anyị na Facebook, Instagram nakwa WhatsApp Channelụ anyị.

    Ka Chineke zaa ekpere anyị niile n’izu a.

    Ụbọchị ụka ọma nu!

15. 2 Ọgọọst 2025Mba Malị akpụpụla onye bụbu Praịm Mịnịsta ha n’ụlọịkpe maka ihe o dere na soshal midia

    

    Ebe foto si, Getty Images

    Onye bụbu Praịm Mịnịsta mba Malị bụ Mousaa Mara abanyela na nsogbu dịka gọọment ndị nchekwa kpụpụrụ ya n'ụlọikpe maka nkwupụta o dere na soshal midia ya.

    Mousaa gara n'ụlọmkpọro ịhụ ndị a tụrụ nga maka na ha chọrọ ịkwatu ọchịchị ndịagha, ma depụta n'akara X ya na ọ kwụụ ndị a n'azụ.

    Nke a mere ụlọọrụ na-ahụ maka mpu n'intanetị ji jide ya ma gbaa ya ajụjụọnụ gbasara ihe ndị o kwuru mana ọ kọwara na ọ na-aga ụlọmkpọrọ ileta ndị e jidere iji kwalite mmụọ na olileanya ha.

    Onye na-eme nnyocha ikpe ya boro ya ebubo nke imebi ntụkwasịobi nke steeti nakwa imegide ikike ziri ezi na ịkpalite ọgbaghara n'etiti ọha.

    A ga-ekpe ya ikpe n'ụbọchị iri abụọ na itoolu Sepụtemba, 2025.

16. 2 Ọgọọst 2025Trump ekwuola na ọ dịla njikere adịghị ama ama o nwere ihe Rọshịa chọrọ ime

    

    Ebe foto si, Getty Images

    Onyeisiala mba Amerịka bụ Donald Trump enyela iwu ka e buga ụgbọmmiri na-ebu ngwagha nuklịa abụọ n'akụkụ mba Rọshịa n'ihi okwu mkpasu iwe onye bụbu Onyeisiala Rọshịa bụ Dmitry Medvedev depụtara na soshal midia.

    Medvedev yiri Amerịka egwu n'akara sọshal midia ya iji zaghachị nkwupụta ikpeazu Trump nyere Roshịa ka ha kwenye kwụsị ịwakpo mba Yukren tupu ụbọchị 8 Ọgọst, 2025 eruo maọbụ chere mmachi siri ike.

    Onye bụbu Onyeisiala mba Rọshịa n'afọ 2008 ruo 2012 bụ Medvedev boro Trump ebubo n'akara soshal midia X ya, na nkwupụta ahụ Trump mere bụ ihe iyi egwu nakwa ihe ga-ebute agha n'etiti mba abụọ a dịka ọ dọrọ Trump aka na ntị.

    Trump na nzaghachị ihe Medvedev kwuru, kpọrọ ya "onye bụbu onyeisiala dara ada ka chere na ọ ka bụkwa onyeisiala"

    Onyeisiala mba Amerịka dọrọ ya aka na nti ka ọ mara ka o si ekwu okwu maka ọ na-abanye n’okeala dị ize ndụ.

17. 2 Ọgọọst 2025NLC ajụla ịnabata iwu ga-egbochi ndị ọrụ ịgba abụbụọrụ na Naịjirịa

    

    Ebe foto si, NLC

    Otu jikọtara ndị ọrụ na Naịjirịa bụ Nigeria Labour Congress (NLC) akatọọla iwu mmekọrịta gọọmenti na ndị ọrụ a kpọrọ National Industrial Relations Policy (NIRP) nke gọọmenti kwadoro.

    Gọọmenti kwuru na iwu a ga-achịkwa etu otu jikọtara ndị ọrụ ga-esi na-agba abụbụọrụ. Ha kwupụtara ya na ngwụcha ọgbakọ obiọchịchị e mere n’ụbọchị Tọzde site n’ọnụ Mịnịsta mgbasaozi bụ Muhammed Idris.

    O kwuru na iwu a ga-achịkọta usoro otu jikọtara ndị ọrụ dị iche iche ga na-esi eme ihe ma mee ka e nwee ezi mmekọrịta n’etiti gọọmenti na ndị ọrụ bekee.

    

    Mana NLC kwuru na ihe iwu ọhụrụ a chọrọ ime bụ ka o gbochie otu jikọtara ndị ọrụ ịgba abụbụọrụ dịka a na-akatọ gọọmenti ma ọ bụrụ ndị ọrụ gbaa abụbụọrụ.

    N’akwụkwọ ozi onyeisi NLC bụ Joe Ajaero tinyere aka na ya, ha kwuru na ọ tụrụ ha n’anya etu gọọmenti si họpụta okwu banyere abụbụọrụ ha na-agba n’ime ihe niile dị n’atụmatụ iwu ‘National Industrial Relations Policy’, maka na ọ na-awa ha isi.

    “Nke a ekpugheela ebumnobi ndị anyị họpụtara ịchị anyị n’ebe ndị ha na-achị nọọ, nke gụnyere ndị ọrụ bekee.

    Ha kwuru na mgbe a na-achọ ịhazi iwu ahụ, na gọọmentị tinyere ihe ndị dị aṅaa nke ga-eme ka ịgba abụbụọrụ bụrụ ihe megidere iwu na Naịjirịa. Ha kwuru na ndị ọrụ jụrụ maka na nke ahụ megidere iwu Naịjirịa ngalaba afọ 1999.

    “Ọ bụ ikike dịịrị onye ọrụ ịkwụsị ọrụ ya, ha agaghị ewepunwu ya n’iwu.”

18. 2 Ọgọọst 2025Onyeisiala Trump achụọla onyeisi ọrụ ndekọ data akụnaụba dịka tarifụ na-ebute ọdịda azụmahịa

    

    Ebe foto si, Getty Images

    Onyeisiala Donald Trump na-achị Amerịka achụọla Erika McEntarfer bụ onyeisi ụlọọrụ Bureau of Labour Statistics (BLS) nke bụ otu ụlọọrụ dị mkpa na-ahụ maka akụnaụba n’Amerịka.

    Nke a na-abịa dịka tarifu ọhụrụ Onyeisiala Trump manyere wetara ọdịda azụmahịa.

    Onyeisiala Trump ewepụtaghị ihe akaebe ọbụla n’ebubo o boro na McEntarfer mere nrụrụaka n’ọnụọgụgụ ọrụ iji mee ka ahụta ya na pati Republikans n’ụzọ ọjọ.

    Azụmahịa Amerịka dara dịka obi ọchịchị White House manyere tarifu ndị ahụ nke ọtụtụ mmadụ katọrọ.

    Onye omeiwu bụ Chuck Schumer kwuru na Trump abụghị ezigbo onye ndu.

19. 2 Ọgọọst 2025Unu abọọla chi Igbo ndị ọma?

    Anyị ji obi aṅụrị anabata gị n'ọgbakọ BBC Igbo taa bụ Satọde ahịa Orie abalị abụọ nke ọnwa Ọgọst, 2025.

    Ọ bụ akụkọ niile gbara ọkpụrụkpụ si Naịjirịa, Afrịka nakwa mbaụwa niile ka anyị bịara iwetara gị taa.

    Sonyere anyị n'akara sohal midia anyị nakwa Whatsapp chaneelụ anyị maka akụkọ foto na nke onyonyo.

    Nnọọ..

20. 1 Ọgọọst 2025Ụlọọrụ INEC ga-ebido idebanye aha maka ịtụ vootu na Naịjirịa n'Ọgọst

    

    Ebe foto si, Getty Images

    Ụlọọru na-ahụ ntuliaka na Naịjiria Independent National Electoral Commission (INEC) ekwuola na ha ga-amalite idebanye aha ndị mmadụ maka ịtụ vootu na Naịjirịa gbaa gburu gburu n'ụbọchị iri na asatọ nke ọnwa Ọgọst, 2025.

    Na nkwupụta ụlọọrụ INEC wepụtara n'akara soshal midia X ha n’ụbọchị mbụ nke ọnwa Ọgọst, 2025, ha kwuru na ndebanye aha ndị mmadụ n'ịntanetị maka ntuliaka ga-emeghe n'ụbọchị 18 Ọgọst.

    INEC kọwara na e mechaa nke ịntanetị, na a ga-ebido nke ndebanye aha n'ihu n'ihu ga-ebido n'ụbọchị 25 Ọgọst, 2025 n'isiobodo steeti nille nọ na Naịjiria malite n'ụbọchị Mọnde rụọ Satọde.