Ndịagha Naịjirịa ruru 26 ebutela ọrịa coronavirus

Mkpuchi Na Eme Ozugbo

1. 11 Julaị 2020Gịnị mere eji kwụsị dọkịta 58 ime njem mba Briten?

   Ngalaba na-elekọta njem na Naịjirịa bụ Nigeria Immigration Service (NIS) na Bekee akwụsịla njem dọkịta ruru 58 kwesiri ime gaa mba Briten.

   Ndị dọkịta a kwadoro ịme njem a site na ụgbọelu pụrụịche nke ha haziri n'ọdọụgbọelu Murtala Mohammed dị na Legọs.

   Ọnụ na-ekwuchitere NIS bụ Sunday James kwuru na mmadụ iri ise na isii n'ime ndị ahụ na-akwado njem enweghi akwụkwọ ikike nke Bekee kpọrọ 'Visa'.

   James kọwara na "ndị a mee njem a n'ejighi visa, a ga-achụghachi ha nke mere na ha ga-alachachite Naịjirịa"

   BBC kpọtụrụ onyeisi otu NMA bụ nke na-achịkọta ndị dọkịta niile na Naijirịa ka ha tinye ọnụ n'okwu a.

   Onyeisi ha bụ Innocent Ujah kwuru na o nweghi ihe ọ ma maka njem a ma kwukwa na ọ bụghị otu ha ka ọ dịrị ịnye ndị dọkịta ikike ịme njem.

   O kwukwara na ọ dị mkpa ka mmadụ niile kpachara anya ịme njem ọkachasị ugbua ọrịa covid-19 na-akpa mkpa mkpa.

2. 11 Julaị 2020Agbamakwụkwọ nwa m adaghị iwu Coronavirus - Abubakar Malami

   Ọkaikpe kachasị na Naịjirịa ekwuola na agbamakwụkwọ nwa ya nwoke adaghị iwu ehibere iji gbochi mfesa ọrịa covid-19.

   O kwuru nke a n'ihi ihe onyonyo na-efegharị gosiri ebe onye echere bụ nwa ya nwoke na-efe ego n'ihe yiri agbamakwụkwọ.

   N'akwụkwọ ozi o wepụtara, o kwuru na agbamakwụkwọ ahụ mere n'ụtụtụ ụbọchị satọde na Kano steeti.

   N'ụzọ nkọwa "aka anyị adịghị na mme mme ọbụla mere tupu agbamakwụkwọ ahụ maọbụ mgbe o gafechara".

   O jikwa ohere ahụ gọrọ isi onwe ya n'akụkọ na-efegharị na ọ zụọrọ nwa ya nwoke ahụ ụlọ obibi ruru naịra nde narị atọ n'Abuja.

3. 11 Julaị 2020Lee akụkọ ihe ndị dị mkpa mere n'ehihie taa

4. 11 Julaị 2020Gọọmentị emechiela ụlọọgwụ adigboroja na-eme nnyocha covid-19

   Gọọmentị Legọs steeti emechiela ụlọọgwụ ebe a na-ekwu na a na-eme nnyocha maka ọịa Coronavirus.

   Cheta na gọọmentị adọbuola aka na ntị na ha ga-emechi ụlọọgwụ ọbụla na-eme nnyocha coronavirus n'ebughị ụzo nata ikike n'aka gọọmentị.

   Ha dọrọ ndị mmadụ aka na ntị ka ha ghara ị na-aga ụlọgwụ adigboroja maka na ha nwere ike ime ha nnyocha abụghị ndị ọma ya.

5. 11 Julaị 2020Ụmụakwụkwọ na Briten agaghị ile ụle GCSE n'afọ a maka coronavirus, mana ụfọdụ ndị omeiwu sị na onwere ndi ọgaghị a gara ọfụma

   A na-akpa nkata na mba Briten maka etu a ga-eme ụmụakwụkwọ kwesiri ịgụcha sekọndịrị n'afọ 2020.

   Ka ọ kwụ ugbua, mkpebi bu na ha agaghi ede ụle ngwụcha ha nke a kpọrọ GCSE.

   Mkpebi a na-ekwu na ọ bụ ndị nkuzi ga-ekwu akara ole ụmụakwụkwọ ha ga-enwete site n'ihe dị ha n'uche na nwata akwụkwọ ọbula nwereike inwete.

   Ha ga-enye ndị na-ahazị ule olileanya ha banyere ụmụakwụkwọ ha n'otu n'otu. Ndị ule a ga-ejizi ya gbakọọ ihe a ga-edere ụmụakwụkwọ n'asambodo.

   Mana, ụfọdụ ndị omeiwu na Briten na-agbarụ ihu maka atụmatụ a.

   Ha sị na nke a nwereike ọ gaghị adabara ụfọdụ ụmụakwkwọ, okachasi ndi isi ojii, ndị si n'ezinaụlọ dara ụbịam na ndị agbụru ọzọ abụghị ndi ọcha.

   Ndị omeiwu a bụ ndị so na otu a kpọrọ "House of Commons Education Committee"

   Ha na-ekwu na ndị ọha na-eleda anya agaghị erite ogo ruru ha maka nlelị anya ndi nkuzi ha.

   Gụọ akụkọ banyere ihe a n'uju ebe a.

6. 11 Julaị 2020Ụgbọelu Airpeace ga-ebulata ụmụ Naịjirịa tọrọ na Thailand na Malaysia

   Ụmụ Naịjirịa tọrọ atọ na mba Taịland nakwa Maleshia ga-alọta n'ụbọchị Satọde dịka ụgbọelu Air Peace malitere ibulata ha.

   Ngalaba gọọmentị na-ahụ maka ụmụ Naịjirịa nọ na mba ofesi bụ 'Nigerians in Diaspora Commission' kwupụtara nke a n'akara Twitter ha n'ụtụtụ Satọde.

   Ndị NIDCOM kwuru na ndị ahụ na-abata emeela nnyocha maka ọrịa coronavirus mana ha ebughi ya.

   Mana mgbe ha lọtara, ha ga-ewepụkwa onwe ha iche ruo abalị iri na anọ dịka iwu si kwuo.

   Ụgbọelu ha ga-ebu ụzọ tụọ ụkwụ n'ọdọụgbọelu Nnamdi Azikiwe dị n'Abụja tupu ọ kwụsị na Legọs.

   Kamgbe e mechiri mba dị iche iche n'ihi ọrịa coronavirus, gọọmentị Naịjirịa ebulatala ọtụtụ ndị tọrọ atọ na mba dị iche iche.

7. 11 Julaị 2020Mmadụ 575 ọhụrụ ebutela coronavirus na Naịjirịa

   Ngalaba na-ahụ maka mgbochi ọrịa Bekee kpọrọ Nigerian Centre for Disease Control (NCDC) ekwuola na mmadụ 575 ọhụrụ esorola na ndị ahụrụ ọrịa coronavirus n'ahụ ha na Naịjirịa.

   Nke butere ndị bu ọrịa na mba ahụ 31,323.

   Legọs ka bụ isi injin ọrịa dịka mmadụ 224 so na ndị butere ọrịa ọhụrụ na steeti ahụ.

   Mmadụ 709 anwụọla site ọrịa ebe mmadụ 12,795 agbakeela ma laa be ha.

8. 11 Julaị 2020Unu asaala chi ụmụ ụwa?

   Anyi amalitela njem nke ụtụtụ taa nke ga-ewetela unu akụkọ si ụwa niile n'asụsụ Igbo.

   Nnọọ nu!

9. 10 Julaị 2020Ka chi fo nu!

   Anyị abịala na njedebe akụkọ nke taa.

   Gbanụ mbọ soro anyị echi.

10. 10 Julaị 2020Buhari ebinyela aka na bojeti a rụgharịrị ọhụrụ maka afọ a

    Onyeisiala Muhammadu Buhari eebinyela na bojeti a rụgharịrị.

    E buliri bọjeti site na nijeri dọla iri abụọ na ise e meburu ya gaa iri abụọ na asaa.

    Goomenti kwuru na ha chọrọ itinyekwu ego na ịkwado ọrụugbo nakwa ahụike.

    Ihe bojeti a e buliri pụtara, dịka Mịnịsta na-ahụ maka ego bụ Zainab Ahmed si kọwaa bụ na gọọmenti etiti ga-agbazite ego n'ụlọ nakwa n'ofesi iji nweta ego a ga-eji mee ihe ndị dị na bọjet ahụ.

    Cheta na mkpamkpa coronavirus kparala kụdara ọnụ ahịa mmanụ agbịdị bụ ihe Naijiria ji akpata ego kpụrụ afọ n'ala n'ahịa mbaụwa .

11. 10 Julaị 2020Coronavirus ga-eji afọ isi dọghachi agụmakwụkwọ azụ- Unesco, Ụlọomeiwu Nta

    Otu Unesco etiela mkpu na ọrịa coronavirus nwere ike iji afọ isii weghachi aka elekere azụ dịka o si gbasa agụmakwụkwọ n'ụwa.

    Audrey Azoulay, onyeisi otu Unesco kwuru nke a n'ozi ngalaba otu United Nations na-akwado sayensị na agụmakwụkwọ wepụtara ụbọchị Fraide.

    Azoulay sị na dịka ọrịa Covid-19 na-akpa ike n'ụwa, na ego enyeamaka a na-enye maka ịkwado agụmakwụkwọ ga-agbada dịka mba ọbụla na-etinye ego n'ọgụ coronavirus.

    Unesco kwuru na ego a na-enye maka ịkwado agụmakwụkwọ nke gbalitere elu karịchaa n'afọ 2018 rute ijeri dọla15.6 nwere ike iji ijeri dọla abụo gbatuo n'ihi ọtanisi coronavirus butere.

    Nke a na-eme dịka ụlọomeiwu nta katọrọ nkagbu mịnịstrị na-ahụ maka agụmakwụkwọ kagburu ule waec si na ọ ga-ekposa usoro agụmakwụkwo na Naijiria.

    Onyeisi kọmiti na-ahụmaka agụmakwụkwọ n'Ụlọomeiwu Nta bụ Ọkammụta Julius Ihonvbere kwuru na gọọmenti etiti a kpọghị oku ndị ya bụ okwu metụtara ka ha kpaa ya akpa.

    O kwuru na ntuziaka ahụ ga-ekposa ọnọdụ agụmakwụkwọ na Naijiria, ma mee ka ndị nne na nna na-enyo gọọmenti enyo.

12. 10 Julaị 2020Mmadụ 13,674 ebutela coronavirus n'ime otu ụbọchị na Saụt Afrịka

    Ebe akụkọ a si

    • • Onye dere ya, Pumza Fihlani
      • Ndị mere akụkọ a, BBC News, Johannesburg

    Mba Saụt Afrịka enwetela ọnụ ọgụgụ ndị butere ọrịa coronavirus kachasị n'otu ụbọchị kamgbe ya bụ ọrịa bidoro.

    Mịnịsta ahụike mba ahụ kwuru na mmadụ puku iri na atọ, narị isii na iri asaa na anọ ọzọ butere ya bụ ọrịa.

    Ọ bụ n'obodo Guateng ka ya bụ ọrịa kacha akpa ike nke mere na ọkara n'ime ndị butere ya ọhụrụ si n'obodo a.

    Dịka o dị ugbua, mmadụ puku atọ na narị asaa na iri abụọ anwụola na mba Saụt Afrịka maka ọrịa a mana a na-atụ anya na ọnụ ọgụgụ a ga-arị elu.

    Ndị okammụta na-ekwu na ndị sitere na ya bụ ọrịa gbaake na Saụt Afrịka bụ ihe dịka 47%.

    Onyeisioche gọọmentị mba Saụt Afrịka hiwere maka iluso ọrịa coronavirus ọgụ bụ Salim Abdool Karim kwuru ka ndị mba Saụt Afrịka mụta etu ha na nje a ga-esi ebi ma rịọ kwa ka ha tinye ụchụ n'ime ihe nchekwa niile gọọmentị kwuru.

    Mba Saụt Afrịka anọrọla na mmachi ọnwa atọ ugbua, kama ụfọdụ ụlọọru na-arụpụta ihe emepeela iji hụ na akụnụba obodo akụghị afọ n'ala.

13. 10 Julaị 2020Gọọmentị Naịjirịa ekwuola na ha arụpụtala akụrụngwa nyocha coronavirus

    Gọọmentị Naịjịrịa ekwuola na ha arụpụtala akụrụngwa nke ha eji enyocha maka ọrịa Coronavirus.

    Ọ bụ Mịnịsta na-ahụ Sayensi na Teknụzụ bụ Ogbonnaya Onu gwara ndị ntaakụko nke a n’ụbọchị Tụụzde were sị na nke a ga-eme ka nyocha ọrịa a pụta ọsịsọ.

14. 10 Julaị 2020Akụko ga-amasị gị ịkọ ụbọchị taa niile

15. 10 Julaị 2020Ndị nkuzi mba Amerịka ekwuola na ụlọakwụkwọ ekwesịbeghi imepe ugbua

    Dịka Onyeisiala mba Amerịka bụ Donald Trump na-ekwu ka ụlọakwụkwọ mepee mgbe na-adịghị anya, ndị nkuzi mba ahụ ekwuola na ọ kwesịbeghi.

    Ndị nkuzi a na-ekwu na ọ ga-ara ahụ ichekwa ụmụakwụkwọ nakwa ndị nkuzi.

    Ka ọ dị ugbua, ọrịa coronavirus ka na-arị elu na mba ahụ, ọkachasị na steeti ndị gụnyere Texas na Florida.

    Ụfọdụ ndị nkuzi nọkwa na steeti Tennesee, Colorado, California nakwa North Carolina, kwuru na ụlọakwụkwọ anọbeghi n'ọnọdụ a ga-eji asị ụmụakwụkwọ lọghachịte.

16. 10 Julaị 2020'Gọọmentị hapụ anyị ka anyị lee ule Waec' - Nwata Akwụkwọ Naịjirịa

    Ụmụakwụkwọ, ndị nkuzi ha na nne na nna ha ekwuola uche ha maka mmachị amachịrị ụloakwụkwọ ụfọdụ iso lee ule WAEC.

    Nke a na-eme dịka mịnịsta na-ahụ maka agụmakwụkwọ bụ Mallam Adamu Adamu kwuru na enweghị nwata akwụkwọ nke SS3 na ụlọakwụkwọ akpọrọ "Unity Schools" ga-ele ule nke "West African Examination Council" (Waec) nke afọ 2020.

    Adamu gakwara n'ihu gwakwa ndị ngalaba ule Waec ka ha hapụ maka ule Waec nke afọ a. Ụfọdụ ụmụakwụkwọ ekwuputala uche obi ha, ọkachasị ndị chọrọ ile ule Waec.

17. 10 Julaị 2020Akụkọ ga-amasị gị ịkọ taa niile

18. 10 Julaị 2020Ọnụọgụgụ ndị na-aga awa ahụ ha maka ịchọ mma arịala elu n'oge coronavirus a

    Ka coronavirus na-arị na mkpamkpa ọ na-akpa, ka ndị na-aga awa ahụ ha maka ịchọ mma na-arị elu.

    Nke a ka ndị dọkịta ịwa ahụ a kpọrọ "cosmetic surgeons" na Bekee na-akọwa.

    Ụfọdụ ụlọọgwụ ebe a na-awa ahụ dị na mpaghara ụwa dị iche iche kwuru na ọtụtụ mmadụ abịala waa ahụ n'aka ha n'oge mkpamkpa ọrịa coronavirus a, dịka ha kwuru na ha ga-eji mkpuchi imi ha zoo ahụ ha wara maọbụ jiri na ha si n'ụlọ arụ ọrụ, na-anata ọgwụgwo nakwa na-agbake.

    Ụlọọgwụ ndị a dị na mba gụnyere Amerịka, Japan, Saụt Koriya nakwa Ọstrelia, kwuru na ọtutụ ndị mmadụ na-abịa agba ọgwụ n'ọnụ ha na ihu ha, na-awa imi ha nakwa ihe ndị ọzọ.

    Aaron Hernandez gbara ọgwụ n'ihu ya gwara BBC na "Agara m mee ya oge a gbachiri obodo, n'ihi na o nyere m ohere ịgbake n'oge nke aka m.

    "Ịgba ọgwụ n'ọnụ m abụghị ihe ụmụnwoke na-emekarị, nke bụ na ọ ga-agba ụfọdụ ndị gharịị. Ya mere o ji kara m mma ịnọ n'ụlọ agbake ọfụma nakwa ka ndị mmadụ ghara ịma ihe m mere ahụ m mgbe m ga-ebidokwa ọrụ ọzọ."

    Rod J Rohrich bụ dọkịta na-awa ahụ n'obodo Texas na mba Amerịka gwara BBC na ọtụtụ mmadụ abịakwutela ya.

    Ọ sị "Ọtụtụ mmadụ karịrị etu m na-ahụbu abịakwutela m. Ọ bụrụ na anyị chọrọ anyị ga na-awa ndị mmadụ ahụ ụbọchị isii n'ime otu izu. Ọ bụ ihe ịtụ n'anya.

19. 10 Julaị 2020A hụrụ coronavirus n'ahụ ihe karịrị mmadụ 65,000 n'otu ụbọchị n'Amerịka

    Ihe karịrị mmadụ 65,000 ọhụrụ achọpụtala na ha bu coronavirus n'Amerịka.

    Nchọpụta a bụ ihe kachasị n'ime otu ụbọchị kemgbe ọrịa a malitere ịkpa ike na mba ahụ, dịka mahadum Johns Hopkins jiri gbakọọ.

    Enweburu ihe karịrị nde atọ na puku nari abụọ bu ọrịa a na Amerịka kemgbe ọrịa a malitere ifesa - bụ nke kacha n'ụwa dum.

    Ọnụọgụgụ ndị ọrịa a na-egbu na arịkwa elu, ruo mmadụ 900 n'ime abalị abụọ gara aga.

    Mana, onyeisiala Amerịka bụ Donald Trump sị na ọ bụ nnyocha ha na-emesi ike mere e ji ahụ ọtụtụ ndị ọhụrụ a bu ọrịa a.

20. 10 Julaị 2020Mmadu 30,748 ebutela coronavirus na Naịjirịa

    Ngalaba na-ahụ maka ọrịa na-efe efe bụ Nigeria Centre for Disease Control (NCDC) wepụtara ọnụọgụgụ mmadụ ole buterela ọrịa coronavirus na Naịjirịa, nke gosiri na mmadụ 30,748 ebutela ya bụ ọrịa kemgbe ọnwa Febrụwarị ọ batara.

    Ọnụọgụgụ a gosikwara na mmadụ 157 ọhụrụ butekwuru ya bụ ọrịa na Legọs, ebe 59 butere ya n'Edo steeti.

    N'ọwụwa-anyanwụ, mmadụ 14 butere ya na Delta steeti, asatọ n'Enugwu, atọ n'imo nakwa otu onye n'Abịa.

    Ka ọ dị ugbua, mmadụ 1337 ebutela ya bụ ọrịa na Delta steeti, 503 n'Ebonyi, 439 n'Enugwu, 401 n'Abịa, 359 n'Imo steeti nakwa 93 n'Anambara steeti.