Onyeisiala Senegla ekwuola na ọ gaghị azọ ọkwa ahụ nke ugboro atọ
Ebe foto si, Reuters
Macky Sall ekwupụtala na ọ gaghị azọ ọkwa onyeisiala mba Senegal n’afọ 2023 dịka ọtụtụ siri tụọ anya ya.
O kwuru nke a n’ihe onyonyo gbara na igwe’ TV mba ahụ sị “Ọchịchị m malitere na 2019 bụ nke abụọ na nke ikpeazụ m”.
Kepukepu malitere ịfesa na ọ ga-adọtikwuo ọchịchị ya emeela ka ọgbaghara dapụta na mba ahụ kemgbe 2021 dịka ọtụtụ nwụrụla n’ime ọgbaghara ndị a.
Pati ndị na-anọghị n’ọchịchị malitere ịkpọ oku ka ndị nso nso ha mee ngagharịiwe ma ọ bụrụna onyeisiala Sall kpebia ịzọ ọkwa ahụ ọzọ.
Ọtụtụ ndị ọkaibe n’ihe gbasara iwu kwuru na ọ bụrụ na ọ zọrọ ọkwa nke ahụ ọzọ, ọ kara ịda iwu.
Sall kwuru: “Mkpebi m, nke chere echichi maka ya nke ọma... bụ na m agaghị ọzọ ọkwa ọzọ na ntuliaka na-abịa abịa”.
“Mba Senegal bụ ihe ka m dị elu, e nwere ọtụtụ ndị ọchịchị aka siri ike nwereike ịkwalite ọdịmma mba a.”
E nweela ọtụtụ ngagharịiwe na Senegal maka mkpebi ụlọikpe mere ka a tụọ onyeisi otu nwoke na-achị pati na-anọghị n’ọchịchị bụ Ousmane Sonko nga ruo afọ abụọ.
E mere nke a n’okwu ịda iwu a kpọrọ “corrupting youth”.
Ikpe mara Sanko dị afọ 48 maka ya na nwaada dị afọ 21 inwe ihe dịka mmekọ. E kwuru na aka ya dị ọcha n’okwu ịdịna ahụ n’ike.
Puku kwuru puku ndị ngagharịiwe wụpụtara n’ama n’akụkụ mba ahụ dị iche iche n’okwu a dịka mmadụ 16 nwụrụ.
Sonko kwuru na ọ nweghị ihe ọjọọ ọbụla o mere dịka ndị nso nso ya na-ekwu na ikpe ahụ bụ atụmatụ ndị ndọrọndọrọ ọchịchị iji kụchapụ ya ịzọ ọkwa onyeisiala.
Sall malitere ịchị Senegal kemgbe afọ 2021.
N’afọ 2016, o megharịrị iwu ka ndị na-achị mba ahụ nweeike ịchị naanị agba abụọ, mana ọtụtụ ndị nso nso ya kwuru na ọ nwereike ịdọtị ya bụ oge ruo agba atọ n’ihi ọchịchị nke mbụ ya malitere mgbe iwu ọhụrụ ahụ adịbeghị ire.
