ဝမ်ပေါင်စီမံကိန်းအနီး ကျေးရွာ ၆ ရွာကဒေသခံတွေ ထွက်ပြေးနေရ

တိုက်ရိုက် ထုတ်လွှင့်ချက်

1. ၁၉ ဇွန် ၂၀၂၂ဒေါ်အောင်ဆန်းစုကြည် - တစ်ကျော့ပြန် နေအိမ်အကျယ်ချုပ်ကာလ ဖြတ်သန်းမှု

   

   ဓာတ်ပုံ ရင်းမြစ်, Getty Images

   လက်ရှိမှာ ဖမ်းဆီးထိန်းသိမ်းခံထားရပြီး ထောင်ဒဏ်တွေ ချမှတ်ခံထားရတဲ့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ဟာ သူ့ကို ဘယ်နေရာမှာ ချုပ်ထားတယ်ဆိုတာ ကိုယ်တိုင်တောင် မသိပါဘူး။

   သူစွပ်စွဲရင်ဆိုင်ရတဲ့ အမှုတွေအတွက် နေပြည်တော် အထူးတရားရုံးမှာ ရုံးထုတ်လာရင် ၁၈ မိနစ်လောက် ကားမောင်းရတဲ့နေရာ၊ သင်္ကြန်တုန်းက အိမ်နားတဝိုက်မှာ သီချင်းသံ လူသံတွေနဲ့ စည်ကားနေတဲ့ နေရာတစ်ခုမှာ ရောက်နေတယ်လို့ပဲ သိထားတာဖြစ်ပါတယ်။

   အကျဥ်းကျ အချုပ်ကျခံနေရတဲ့ ဒေါ်အောင်ဆန်းစုကြည်နဲ့အတူ ဘယ်သူတွေရှိနေလဲ။

   သူနေ့စဥ် ဘယ်လိုဖြတ်သန်းနေလဲ ဆိုတာကို အနီးစပ်ဆုံးသိနိုင်သူတွေနဲ့ ဘီဘီစီက မေးမြန်းပြီး အထူးဆောင်းပါးအဖြစ်တင်ဆက်တဲ့ စစ်ကောင်စီလက်အောက် ဒေါ်အောင်ဆန်းစုကြည်ရဲ့အကျဥ်းကျနေ့ရက်များ ကို ဖတ်ရှုနိုင်ပါပြီ။

2. ၁၉ ဇွန် ၂၀၂၂သေဒဏ်စီရင်မိန့်ပေးဖို့ စစ်ကောင်စီရဲ့ ကြေညာချက်ကိုကန့်ကွက်ကြောင်း အပါအဝင် အချက် ၅ ချက်ကို အင်းစိန်ထောင်တွင်းထိန်းသိမ်းခံနိုင်ငံရေးအင်အားစုတွေကတောင်းဆို

   

   ဓာတ်ပုံ ရင်းမြစ်, CJ

   ဦးဂျင်မီ၊ ဦးဖြိုးဇေယျာသော်တို့အပါအဝင် ၄ ဦးကို ဥပဒေနဲ့ အညီ ခုခံကာကွယ်ခွင့်မပေးဘဲ စစ်ခုံရုံးက အကျဉ်းနည်းနဲ့ စစ်ဆေးကာ သေဒဏ်စီရင်မိန့်ပေးဖို့စစ်ကောင်စီကကြေညာခဲ့တဲ့အပေါ်ကန့်ကွက်ကြောင်း အပါအဝင် ထောင်တွင်းနိုင်ငံရေးအင်အားစုတွေရင်ဆိုင်နေရတဲ့ ဖိနှိပ်ခံရမှုတွေကိုရပ်တန့်ပေးဖို့ အင်းစိန်ထောင်တွင်းထိန်းသိမ်းခံနိုင်ငံရေးအင်အားစုတွေကတောင်းဆိုလိုက်ပါတယ်။

   စစ်ကောင်စီအနေနဲ့ ဦးဂျင်မီ၊ ဦးဖြိုးဇေယျာသော်တို့အပါအဝင် ၄ ဦးရဲ့ မူလသေဒဏ်ကို ပြည်ထောင်စု တရားလွှတ်တော်ချုပ် စုံညီခုံရုံးက ရာဇဝတ် ပြင်ဆင်မှုအဖြစ် ပြန်လည်လက်ခံ ကြားနာပေးဖို့ ပါဝင်ပါတယ်။

   တောင်းဆိုချက် ၅ ချက်ထဲ ထောင်တွင်းမှာ လုံလောက်တဲ့ ကျန်းမာရေးဆိုင်ရာ စောင့်ရှောက်မှု မပေးတာ၊ သင့်လျော်တဲ့ဆေးတွေနဲ့ကုသပေးခြင်းမရှိတာ၊ မိသားစုဝင်တွေပေးပို့တဲ့ဆေးဝါးထုတ်မပေးဘဲ သိမ်းယူထားတာကိုရပ်တန့်ဖို့၊ ထောင်တွင်း ရိက္ခာ အစာအသောက်တွေမှာ အလွန်ညံ့ဖျင်းတဲ့အတွက် စံနှုန်းတွေနဲ့အညီ ကျွေးမွေးဖို့၊ ရေသန့်စက်ရုံ ရှိပေမဲ့ သောက်ရေ၊ သုံးရေကိုအရည်အသွေး ညံ့ဖျင်းတဲ့ သောက်ရေသုံးရေတွေပေးသုံးတာတွေနဲ့ တချို့အိပ်ဆောင်တွေကို ရေဖြတ်တောက်တာတွေကိုရပ်တန့်ပြီးလိုအပ်တာတွေဆောင်ရွက်ပေးဖို့ ပါဝင်တာတွေ့ရပါတယ်။

   အကျဉ်းထောင်ပြင်ပရှိ နိုင်ငံရေး အင်အားစုတွေဖြစ်တဲ့ CRPH၊ NUG အစိုးရ၊ တိုင်းရင်းသားလက်နက်ကိုင် EAOs တွေ၊ ပြည်သူ့ကာကွယ်ရေးတပ်ဖွဲ့ PDF တို့ကလည်း နိုင်ငံရေး အကျဉ်းသားတွေ အပေါ် ညှဥ်းပန်းနှိပ်စက်တာတွေကို ရပ်တန့်စေဖို့ နိုင်ငံရေး ရည်ရွယ်ချက်ရှိရှိ ဥပဒေမဲ့ ဆောင်ရွက်တာတွေကို ပြည်တွင်း၊ ပြည်ပ ဥပဒေတွေနဲ့အညီ တရားစွဲဖို့တောင်းဆိုတယ်ဆိုပြီးဖော်ပြထားပါတယ်။

   ထောင်အာဏာပိုင်တွေဘက်ကတော့ ဒီထုတ်ပြန်ချက်နဲ့ပတ်သက်ပြီးတစုံတရာတုံ့ပြန်တာမရှိသေးပါဘူး။

3. ၁၈ ဇွန် ၂၀၂၂သပိတ်မှောက်သူတွေရှိနေဆဲ တက္ကသိုလ်ဝင်တန်းနဲ့ စနစ်ဟောင်းရဲ့ နောက်ဆုံးစာမေးပွဲ

4. ၁၈ ဇွန် ၂၀၂၂မြန်မာသံအမတ်ကြီး ထိုင်းဘုရင်ထံ သံအမတ်ခန့်အပ်လွှာ သွားရောက်ပေးအပ်

   ထိုင်းနိုင်ငံဆိုင်ရာ မြန်မာသံအမတ်ကြီး ဦးချစ်ဆွေ သံအမတ်ခန့်အပ်လွှာကို မနေ့က ထိုင်းနိုင်ငံ ဘန်ကောက်မြို့မှာ ထိုင်းဘုရင် မဟာဗာဂျီရာလောင်ကွန်းထံကို ပေးအပ်ခဲ့တယ်လို့ စစ်ကောင်စီက သတင်း ထုတ်ပြန်လာပါတယ်။

   မြန်မာနိုင်ငံမှာ တာဝန်ပြီးဆုံးလို့ ပြန်ထွက်ခွာဖို့ မတ်လတုန်းက စစ်ကောင်စီ ဥက္ကဋ္ဌနဲ့ လာရောက်တွေ့ဆုံခဲ့တဲ့ ထိုင်းသံအမတ်ကြီး မစ္စ ဆူဖတ်ထရာ ဆရီမိုင်းသရီဖိတပ် ကတော့ ထိုင်းနိုင်ငံဆိုင်ရာ ကုလသမဂ္ဂ အမြဲတမ်းကိုယ်စားလှယ် အဖြစ် ဂျနီဗာကို ပြောင်းရွှေ့သွားတာကို တွေ့ရပါတယ်။

   စစ်ကောင်စီကို နိုင်ငံတကာက သံတမန်ရေး လျှော့ချတဲ့အနေနဲ့ သံအမတ်ကြီးအဆင့်ဆက်ဆံရေးလျှော့ချတာတွေ၊ စစ်ကောင်စီက သံအမတ်ကြီးအဆင့် ခန့်အပ်တာတွေ မလုပ်နိုင်တဲ့ နိုင်ငံတွေ ရှိနေချိန်မှာ စစ်ကောင်စီက အခုလို ထိုင်းနိုင်ငံကို သံအမတ်ကြီး အဆင့်ခန့်အပ်ခဲ့တာ ဖြစ်ပါတယ်။

   

   ဓာတ်ပုံ ရင်းမြစ်, Statement

5. ၁၈ ဇွန် ၂၀၂၂ဇွန်လအတွင်း ရခိုင်မှာ မိုင်းကြောင့် အရပ်သားအနည်းဆုံးနှစ်ဦးသေဆုံး, တိုက်ပွဲတွေမရှိခဲ့တဲ့တစ်နှစ်ကျော်အတွင်း မိုင်းပေါက်ကွဲမှု အကြိမ် ၄၀ ကျော်ထိ ရှိနေ

   ရက္ခိုင့်တပ်တော် အေအေနဲ့ စစ်ကောင်စီတပ်တို့အကြား တိုက်ပွဲတွေရပ်စဲနေတဲ့ တစ်နှစ်ကျော်ကာလအတွင်း မြေမြှုပ်မိုင်းနဲ့ စစ်ကျန်လက်နက်ခဲယမ်းပေါက်ကွဲမှု အကြိမ်ရေ ၄၀ ကျော်ထိရှိနေပြီလို့ ရခိုင်တိုင်းရင်းသားမျိုးနွယ်များ အစည်းအရုံး REC က ပြောပါတယ်။

   အဲဒီဖြစ်စဥ်တွေကြောင့် ထိခိုက်ဒဏ်ရာရရှိခဲ့တဲ့ ဖြစ်စဥ်က အကြိမ် ၂၀ ကျော်ရှိခဲ့ကာ ထိခိုက်ဒဏ်ရာရရှိသူတွေအများစုဟာ စစ်ဘေးရှောင်တွေနဲ့ တောတောင်ကိုမှီခိုနေကြရတဲ့ ဒေသခံတွေဖြစ်ကြတယ်လို့ REC က ဦးဇော်ဇော်ထွန်းက ပြောပါတယ်။ပြီးခဲ့တဲ့ဇွန် ၁၇ ရက်နေ့မနက်ပိုင်းကလည်း ရသေ့တောင်မြို့နယ် မယူကမ်းဒေသ အောင်ဗလကျေးရွာအုပ်စု သာစည်ကုန်းကျေးရွာအနီး လယ်လုပ်နေတဲ့ ဇနီးမောင်နှံနှစ်ဦးတို့မှာ သူတို့ရဲ့လယ်ကွင်းအတွင်း မြေမြှုပ်မိုင်းပေါက်ကွဲပြီးနှစ်ဦးလုံး မျက်လုံးနဲ့ ကိုယ်ခန္ဓာအစိတ်အပိုင်းတချို့တို့မှာ ထိခိုက်ဒဏ်ရာရရှိခဲ့ကြပါတယ်။

   ဒါ့အပြင် ဇွန် ၁၄ ရက်နေ့ကလည်း မြေပုံမြို့နယ် စညှင်းစစ်ရှောင်စခန်းက စစ်ဘေးရှောင်နှစ်ဦးတို့ဟာ ကျေးရွာအနီးတောထဲမှာ မျှစ်သွားရှာကြစဉ် မြေမြှုပ်မိုင်းပေါက်ကွဲမှုကြောင့် တစ်ဦးသေဆုံးပြီး တစ်ဦးမှာ ဒဏ်ရာအပြင်းအထန်ရရှိခဲ့ပါတယ်။

   အဲဒီနောက် မင်းပြား၊ အမ်းနဲ့ ကျောက်တော်မြို့နယ်တွေမှာလည်း အခုလအတွင်း မိုင်းပေါက်ကွဲမှုတွေဖြစ်ပွားခဲ့ကြပြီး အရပ်သားထိခိုက်သေဆုံးမှုတွေရှိခဲ့ပါတယ်။အခုလို မိုင်းပေါက်ကွဲမှုတွေမကြာခဏဖြစ်ပွာနေပြီး လူတွေထိခိုက်သေဆုံးနေရတာဟာ စစ်ပွဲဖြစ်ပွားခဲ့တဲ့ဒေသတွေ ကျေးရွာသားတွေဟာ ယခင်စစ်ပွဲဖြစ်ပွားနေတဲ့အချိန်တွေမှာ သူတို့ရဲ့လယ်ယာမြေတွေကို စွန့်လွှတ်ထားခဲ့ကြပေမဲ့ အခုအခါမှာတော့ စားဝတ်နေရေးအတွက် အဲဒီလယ်ယာမြေတွေကို ပြန်လည်လုပ်ကိုင်လာကြပြီး လယ်ကွင်းတွေထဲ မိုင်းပေါက်ကွဲမှုတွေကို ကြုံနေကြရတာဖြစ်တယ်လို့ ဦးဇော်ဇော်ထွန်းက ပြောပါတယ်။

   တိုက်ပွဲဖြစ်ပွားခဲ့တဲ့အချိန်တွေမှာ ထောင်ထားခဲ့တဲ့မိုင်းတွေကို စစ်ရေးအတွက် အသုံးချဖို့ရည်ရွယ်ချက်နဲ့ တာဝန်ရှိတဲ့အဖွဲ့အစည်းတွေက ရှင်းလင်းမှုတွေမလုပ်ပေးပေမယ့် ဒေသခံအရပ်သားတွေရဲ့ အသက်တွေကို ရှေးရှုပြီးတော့ ရှင်းလင်းပေးသင့်တယ်လို့ ထောက်ပြပြောဆိုတာတွေလည်းရှိပါတယ်။

   

   ဓာတ်ပုံ ရင်းမြစ်, CJ

6. ၁၈ ဇွန် ၂၀၂၂ရေကြောင်းနေ ပစ်ခတ်တာကြောင့် လက်ကောက်ကျရွာနဲ့ ထုံးဘိုရွာက အရပ်သားနှစ်ဦး သေဆုံး

   ဧရာဝတီမြစ်ကြောင်းဘေးမှာရှိတဲ့ စစ်ကိုင်းတိုင်း ရွှေဘိုခရိုင်ထဲက ကုလားမကျေးရွာထဲကို ရေကြောင်းကနေ တက်လာတဲ့ စစ်ကောင်စီတပ်တွေက လက်နက်ကြီးနဲ့ ပစ်ခတ်တာကြောင့် အရပ်သား ၂ ဦး သေဆုံးသွားတယ်လို့ ‌ဒေသခံတွေက ပြောကြပါတယ်။

   လက်ကောက်ကျကျေးရွာသား တစ်ဦးနဲ့ ထုံးဘိုရွာက ကျေးရွာသား နှစ်ဦးတို့ဟာ ကုလားမရွာနားက ကုလားမတောင်ပေါ်မှာ ကင်းစောင့်နေတုန်း သူတို့နားကို လက်နက်ကြီးကျည်ကျတာကြောင့် နှစ်ဦးသေဆုံးပြီး တစ်ဦးဒဏ်ရာရတယ်လို့ ပြောပါတယ်။

   “ တစ်ယောက်က ခါးနဲ့ ခေါင်းကို မှန်တယ်။ ကျွန်တော်တို့ အလောင်းသွားရှာချိန်မှာတော့ ခန္ဓာကိုယ်မှာ အဝတ်စားမရှိတော့ဘူး။ ဘောင်းဘီပဲကျန်တော့တယ်။ သူ့ဘေးနားကျတာဆိုတော့ လွင့်ထွက်သွားတာ။ နောက်တစ်ယောက်က နားထင်ထဲကို ၂ လက်မလောက်ဝင်သွားပြီး ဆေးခန်းရောက်မှ ဆုံးသွားတာ။ တစ်ယောက်ကကျတော့ ညာဘက် လက်ကောက်ဝတ် သုံးပုံ နှစ်ပုံပြတ်သွားတာ၊ အရေပြားနဲ့ အသားပဲကျန်တယ်။ အရိုးပါ ပြတ်သွားတာ “ လို့ အလောင်းတွေကို သွားရောက်ကောက်ယူတဲ့ နတ်တောင်နဂါး ပြည်သူ့ကာကွယ်ရေးအဖွဲ့ခေါင်းဆောင်က ပြောပါတယ်။

   ကုလားမရွာနဲ့ လက်ကောက်ကျရွာက ကျောက်မြောင်းမြို့နယ်ထဲမှာရှိပြီး ထုံးဘိုကျေးရွာကတော့ ဝက်လက်မြို့နယ်မှာရှိပါတယ်။ တိုက်ပွဲဖြစ်တာမဟုတ်ဘဲ စစ်ကောင်စီတပ်တွေ ပစ်ခတ်ခံရတဲ့ကုလားမကျေးရွာနဲ့ လက်ကောက်ကျ ကျေးရွာတွေဟာ ပြီးခဲ့တဲ့ မေလတုန်းက ရွာလုံးကျွတ်နီးပါး မီးရှို့ခံထားရတဲ့ ကျေးရွာတွေပါ။

   နေအိမ်တွေ မီးရှို့ခံရပြီးနောက်ပိုင်း ရွာထဲမှာ တဲထိုးနေကြတာပါ။ စစ်ကောင်စီတပ်တွေက ကုလားမရွာထဲက တဲတွေကို မီးထပ်ရှို့သွားပြီး နွား အကောင် ၂၀ ကျော်ကိုလည်း စက်လှေနဲ့သယ်သွားတယ်လို့ ဒေသခံတွေက ပြောပါတယ်။

   စစ်ကောင်စီတပ်တွေဟာ မိုင်းဆွဲတိုက်ခိုက်ခံရမှာ စိုးရိမ်တာကြောင့် ကုန်းလမ်းကို မသုံးဘဲ ရေလမ်းကနေ အသုံးပြုနေကြတယ်လို့လည်း ပြောပါတယ်။

   ဖြစ်စဥ်နဲ့ပတ်သက်လို့ စစ်ကောင်စီဘက်ကို ဘီဘီစီက ဆက်သွယ်မေးမြန်းဖို့ ကြိုးစားနေပါတယ်။

   

   ဓာတ်ပုံ ရင်းမြစ်, CJ

7. ၁၈ ဇွန် ၂၀၂၂ဒေါ်အောင်ဆန်းစုကြည်မွေးနေ့ကို လုံးခင်းသပိတ်စစ်ကြောင်းက ကျင်းပမယ်

   နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ရဲ့ ဇွန် ၁၉ ရက်မှာ ကျရောက်မယ့် အသက် ၇၇ နှစ်ပြည့်မွေးနေ့ကို ဖားကန့်မြို့နယ် လုံးခင်းသပိတ်စစ်ကြောင်းဦးဆောင်သူတွေက ကျင်းပသွားမယ်လို့ ပြောပါတယ်။

   ဒေါ်အောင်ဆန်းကြည် မွေးနေ့အထိမ်းအမှတ်အနေနဲ့ ကိတ်မုန့်ခွဲတာအပြင် ပူဖေါင်း ၇၇ လုံးကို လွှင့်တင်မယ်လို့ ပြောပါတယ်။

   “မနက်ဖြန်အမေစုမွေးနေ့မှာ ကျွန်တော်ပြင်ဆင်ထားတာလေးက သပိတ်စစ်ကြောင်းနဲ့ချီတက်မယ်။ သူရဲ့မွေးနေ့မှာဦးညွတ်အလေးပြုမယ်။ မိုးပျံပူဖေါင်း ၇၇ ခု၊ ပူဖေါင်းအောက်မှာ ဗီနိုင်းချိတ်မယ်၊ ကျွန်တော်တို့ တက်ရောက်လာတဲ့လူတစ်ဦးချင်းစီရဲ့ ဆုတောင်းစာတန်းတွေပေါ့နော်။ လူတစ်ယောက်ကို အေဖိုးစာရွက်နဲ့ကိုယ်ရင်ဘတ်ထဲကရှိတဲ့ ဆုတောင်းသံတွေကို ရေးကြမယ်ပေါ့” လို့ ဖားကန့်မြို့ နယ် လုံးခင်း အုပ်စု သပိတ်စစ်ကြောင်းသပိတ်ဦးဆောင်သူကပြောပါတယ်။”

   ဒီသပိတ်စစ်ကြောင်းမှာ ကဗျာရွတ်တာတွေ ၊ ဟောပြောတာတွေလည်း ထည့်သွင်းပြုလုပ်မယ်လို့ ဆိုပါတယ်။

   ဖားကန့်မြို့နယ်မှာတော့ သပိတ်စစ်ကြောင်း ၃ ကြောင်းခန့်ရှိပြီး လုံးခင်း အုပ်စု အနေနဲ့ကတော့ အခုနောက်ပိုင်း သပိတ်ထွက်ဖို့ကို တစ်ပတ်မှာ နှစ်ရက်သတ်မှတ်ထားတယ်လို့ဆိုပါတယ်။

   

   ဓာတ်ပုံ ရင်းမြစ်, ပုံ Michael Sladnick

8. ၁၈ ဇွန် ၂၀၂၂မြစ်ဆုံမှာ ပစ်ခတ်သံတွေ ဒီမနက်ကြားရ၊, ထိခိုက်မှုအတိအကျမသိရသေးပေမဲ့ ကယ်ဆယ်ကားတချို့ မြစ်ဆုံဘက်ထွက်ခွာတာတွေရှိ

   ကချင်ပြည်နယ်၊ မြစ်ဆုံမှာဇွန်လ ၁၈ ရက်ဒီနေ့ မနက် ၅ နာရီ ကျော်လောက်မှာ လက်နက်ကြီးလက်နက်ငယ်သံတွေကြားရတယ်လို့ ဒေသခံတွေကပြောပါတယ်။

   ဆွမ်ပရာဘွမ်ကနေ ခြေလျင်ဆင်းလာတဲ့ စစ်ကောင်စီတပ်သားတွေပစ်ခတ်တဲ့လက်နက်ကြီးသံတွေ ဖြစ်ပြီး တိုက်ပွဲဖြစ်ပွားတာရှိမရှိကိုတော့အတိအကျပြောနိုင်ဖို့ခက်တယ်လို့ ဒေသခံ တချို့ကပြောပါတယ်။ “မြစ်ကြီးနားနဲ့မြစ်ဆုံကြား မြစ်ဆုံ ရွာအဝင် ကုန်းအဆင်းနားလေမှာ ဒီမနက် ၅ နာရီနဲ့၆ နာရီကြားမှာဆွမ်ပရာဘွမ်-ပူတာအိုဘက်ကနေ လမ်းလျှောက်ဆင်းလာတဲ့ ခြေလျင်ဆင်းလာတဲ့ အဖွဲ့တွေတိုက်တယ်လို့တော့သိရတယ်။ ထိခိုက်တာတွေ ဘာတွေတော့ မသိရဘူး “ လို့ ဒေသခံတစ်ယောက်ကပြောပါတယ်။

   ဆွမ်ပရာဘွမ် ဘက်ကနေ ခြေလျင်ဆင်းလာတဲ့ စစ်ကောင်စီတပ်တွေက လမ်းမှာ လုံခြုံရေးအရ စစ်တပ်ဖြတ်သန်းရာတစ်လျှောက်လမ်းမှာ အကာအကွယ်ယူတဲ့အနေနဲ့ သတိပေးပစ်ခတ်တာလည်း ဖြစ်နိုင်တယ်လို့ ဒေသခံတချို့က ပြောပါတယ်။

   ဒါပေမဲ့ ပစ်ခတ်သံတွေကြားပြီးနောက် အဲဒီအနီးတ၀ိုက် ဖြတ်သန်းသွားလာတဲ့သူတချို့ကို စစ်ဆေးမေးမြန်းတာတွေ ပြုလုပ်ပြီး ထိခိုက်ဒဏ်ရာရရှိတာတွေကိုတော့ အတိအကျ မသိရပေးမဲ့ လူမှုကယ်ဆယ်ရေးအသင်းကား တွေ မြစ်ဆုံဘက်တက်သွားတာတွေတွေ့ရတယ်လို့ ဒေသခံတွေကပြောပါတယ်။ လက်ရှိမှာ မြစ်ဆုံစီမံကိန်းကြောင့် မူလနေရပ်ကနေ ဖယ်ပေးရပြီး ရွှေ့ပြောင်းနေထိုင်လာသူတွေရှိနေတဲ့ အောင်မြင်သာ ရွာအပါအ၀င် လုံဂါဇွပ် ၊ ကျိန်ခရန် စတဲ့ ရွာတွေရဲ့ အောက်ဘက်မှာတော့ စစ်ကောင်စီတပ်သားတွေရှိနေပြီး မြစ်ကြီးနားဘက်ကိုတော့ တစ်ဖွဲ့ပြီးတစ်ဖွဲ့ဆင်းလာတာတွေရှိတယ်လို့ဒေသခံတွေထံက သိရပါတယ်။

   

   ဓာတ်ပုံ ရင်းမြစ်, CJ

9. ၁၈ ဇွန် ၂၀၂၂ရေစကြိုမြို့နယ်က ကျေးရွာတွေကို စစ်ကောင်စီ စစ်ကြောင်းထိုး၀င်ရောက်

   မကွေးတိုင်း ရေစကြိုအနောက်ပိုင်းနဲ့ ရေလယ်ကျွန်းဘက်က တောင်ကုန်းရွာ၊ သံပြာချောင်း၊ မြေမလှရွာတွေကို ဒီကနေ့ ဇွန် ၁၈ ရက်မှာ စစ်ကောင်စီတပ်တွေက သေနတ်နဲ့ပစ်ဖောက်၀င်ရောက်ပြီး ဒေသခံတွေကိုဖမ်းဆီးတာတွေလုပ်နေတယ်လို့ရွာခံတွေကပြောလာပါတယ်။

   ရွာတွေထဲက နေအိမ်တွေကိုလည်း ဝင်ရောက်မွှေနှောက်နေတယ်လို့ ပြောပါတယ်။

   ရေလယ်ကျွန်း နဲ့ အနောက်ဘက်က မိဖုရားရွာကို မနေ့က ဇွန် ၁၇ ရက်မှာ ဝင်ရောက်စီးနင်းခဲ့တဲ့ စစ်ကောင်စီတပ်နဲ့ပျူစောထီအဖွဲ့အင်အား ၁၀၀ ကျော်ဟာ ဒီကနေ့မှာတော့ နီးစပ်တဲ့ရွာတွေကို လက်နက်ကြီးနဲ့ပစ်တာ ၊ သေနတ်ပစ်ဖောက်တာတွေလုပ်ပြီး ဝင်ရောက်လာတာလို့ဆိုပါတယ်။

   " ပြေးနေရတာရေလယ်ကျွန်းအကုန်လုံးပဲ။ ဘယ်သူမှမနေရဲဘူး။ အခုကပစ္စည်းတွေယူနေတယ်။ မီးတော့မရှို့ဘူး။ ဘယ်အချိန်ရှို့မလဲစိုးရိမ်နေကြတာပေါ့၊ ဒီရွာဝင်ရင်ဟိုရွာပြေးနဲ့ အကုန်ဒုက္ခရောက်နေတာ" လို့ရေစကြိုမြို့နယ်ထဲက ဒေသခံတစ်ယောက်ကပြောပါတယ်။

   ဒီကနေ့မနက်ပိုင်းကလည်း ရေစကြိုရဲစခန်းနားမှာလက်နက်ကြီးပစ်သံတွေ အဆက်မပြတ်ကြားခဲ့ရသလို ရေစကြိုမြို့တောင်ဘက်မှာလည်း ပေါက်ကွဲသံတွေကြားခဲ့ရတယ်လို့ ဒေသခံတွေဆီကနေ သိရပါတယ်။

   သုတေနအဖွဲ့တစ်ခုဖြစ်တဲ့ ISP Myanmar က ထုတ်ပြန်ချက်အရ မြန်မာနိုင်ငံအတွင်း လက်နက်ကိုင် ပဋိပက္ခကြား မီးရှို့ဖျက်ဆီးခံရတဲ့ နေအိမ်တွေထဲမှာ မကွေးတိုင်းက ၄၈၂၂ လုံးနဲ့ ဒုတိယအများဆုံးဖြစ်ပြီး ပြည်တွင်းစစ်ပြေးဒုက္ခသည်တွေထဲမှာ မကွေးတိုင်းက လူဦးရေ ၁ သိန်း ၂ သောင်းကျော်ရှိတယ်လို့ သိရပါတယ်။

   

   ဓာတ်ပုံ ရင်းမြစ်, CJ

10. ၁၈ ဇွန် ၂၀၂၂၂၀၂၃ တက္ကသိုလ်ဝင်တန်းစာမေးပွဲက စနစ်ဟောင်းအတွက် နောက်ဆုံးစာမေးပွဲဖြစ်

    ၂၀၂၂ ခုနှစ်မှာ စစ်ဆေးခဲ့တဲ့ တက္ကသိုလ်ဝင် စာမေးပွဲမှာ ကျရှုံးသူတွေနဲ့ အကြောင်းအမျိုးမျိုးကြောင့် စာမေးပွဲမဖြေတဲ့ ကျောင်းသားတွေအတွက် ၂၀၂၃ ခုနှစ်မှာ နောက်ဆုံးတစ်ကြိမ် တက္ကသိုလ်ဝင်စာမေးပွဲ ကျင်းပမှာဖြစ်တယ်လို့ မြန်မာနိုင်ငံ စာစစ်ဦးစီးဌာနက ဇွန် ၁၈ ရက် ဒီနေ့မှာ သတင်းထုတ်ပြန်ပါတယ်။

    “နောက်ဆုံးစာမေးပွဲဆိုတာက ၂၀၂၂-၂၃ ပညာသင်နှစ်မှာ စနစ်ဟောင်း Grade 11 အတွက် နောက်ဆုံးစာမေးပွဲဖြေခွင့်ရှိတာပါ။ အခု ၂၀၂၃-၂၄ ပညာသင်နှစ်မှာ KG+12 အထိ သင်ရိုးသစ်တွေနဲ့ သင်ကြားသွားမှာဖြစ်တယ် “ လို့ ပညာရေးဝန်ကြီးဌာနနဲ့ နီးစပ်သူတစ်ယောက်က ပြောပါတယ်။

    လက်ရှိ သင်ကြားနေတဲ့ စနစ်က Grade 5, Grade 8, Grade 11 သင်ရိုးဖြစ်တယ်လို့လည်း ပြောပါတယ်။

    စစ်တပ်က အာဏာသိမ်းပြီးနောက်ပိုင်း တက္ကသိုလ်ဝင်တန်းစာမေးပွဲ အောင်စာရင်းကို ဇွန် ၁၇ ရက်က ပထမဆုံး ထုတ်ပြန်ခဲ့တာပါ။ ၂၀၂၁-၂၂ ပညာသင်နှစ်အတွက် တစ်နိုင်ငံလုံးအတိုင်းတာနဲ့ ဝင်ရောက်ဖြေဆိုသူ ၄၆ ဒသမ ၈၈ ရာခိုင်နုန်း ၊ ဦးရေအရ ၂ သိန်း ၈ သောင်းကျော် ဖြေဆိုတဲ့အထဲမှာ ၁ သိန်း ၃ သောင်းကျော်၊ ရာခိုင်နုန်းအရ ၄၆ ရာခိုင်နှုန်းေကျာ် အောင်မြင်တယ်လို့ ပညာရေးဝန်ကြီးဌာနက ထုတ်ပြန်ပါတယ်။

    

    ဓာတ်ပုံ ရင်းမြစ်, ရွှေအင်းသား ခင်မောင်ဝင်း

11. ၁၈ ဇွန် ၂၀၂၂စစ်ဘေးဒုက္ခသည် နှစ်သန်းခွဲကျော်ရှိလာပြီလို့ ISP Myanmar ထုတ်ပြန်

    မြန်မာနိုင်ငံမှာ စစ်တပ်က အာဏာသိမ်းတဲ့ ၂၀၂၁ ဖေဖော်ဝါရီ ကနေ ၂၀၂၂ ခုနှစ် မေ ၃၁ ရက်အထိ ပြည်တွင်း စစ်ပြေးဒုက္ခသည် ၁ သိန်း ၈ သောင်းကျော်၊ အာဏာမသိမ်းခင် ဖြစ်ပွားတဲ့ လက်နက်ကိုင်ပဋိပက္ခကြောင့် ထွက်ပြေးရတဲ့ ဒုက္ခသည် ၄ သိန်း ၉ သောင်းကျော်၊ နယ်စပ်ဖြတ်ကျော် ထွက်ပြေးရတဲ့ ဒုက္ခသည်ပေါင်းက ၁ သန်း ၉ ထောင်ကျော်၊ စုစု‌ပေါင်း စစ်ပြေးဒုက္ခသည် ၂ သန်းခွဲကျော်ရှိပြီလို့ ဇွန် ၁၅ ရက်က ထုတ်ပြန်ထားပါတယ်။

    စစ်အာဏာသိမ်းပြီးနောက်ပိုင်း လစဉ်တိုးလာတဲ့ ပြည်တွင်းစစ်ပြေးဒုက္ခသည်အရေအတွက်ဟာ ၂၀၂၂ ခုနှစ် ဇန်နဝါရီကနေ မေလအထိ ငါးလတာ ကာလအတွင်းမှာပဲ ၅ သိန်း ၂ သောင်းကျော်ထက်မနည်း တိုးလာခဲ့တဲ့အကြောင်း၊ အဲ့ဒီထဲမှာ အများဆုံးကတော့ စစ်ကိုင်းတိုင်းဖြစ်ပြီး ဦးရေ ၃ သိန်း ၄ သောင်းကျော်၊ ဒုတိယအများဆုံးကတော့ ကယားပြည်နယ်ဖြစ်ပြီး ၁ သိန်း ၅ သောင်းကျော်၊ ကရင်၊ မကွေး၊ ပဲခူး၊ ရှမ်း၊ ချင်း၊ တနင်္သာရီ၊ မွန်၊ ကချင်၊ မန္တလေးနဲ့ ဧရာဝတီ စတဲ့ တိုင်းနဲ့ပြည်နယ်တွေက ဒုက္ခသည်အရေအတွက်က ၅ သိန်း ၈ သောင်းကျော်ဖြစ်တယ်လို့ ထုတ်ပြန်ပါတယ်။

    “ မိုးတွင်းဆိုတော့ စစ်ဘေးရှောင်တွေ ပိုခက်ခဲတယ်။ ပြေးရတာတွေကလည်း လယ်ကွင်းတွေကနေ ဖြတ်ပြေးရတာဆိုတော့ ရွှံ့တွေ၊ ဗွက်တွေနဲ့ ၊ နေရတာလည်း မလုံခြုံကြတော့ ပိုဒုက္ခရောက်ကြရတယ်လို့“ ဒီပဲယင်းမြို့နယ်က ဒုက္ခသည်တွေကို ကူညီပေးနေသူတစ်ယောက်က လက်ရှိ ဒုက္ခသည်တွေရဲ့ အခြေအနေတွေကို ပြောပြပါတယ်။

    အဲ့ဒီစစ်ဘေးရှောင်တွေထဲက လူဦးရေဘယ်လောက်က နေရပ်ပြန်လို့ရသလဲ၊ ထွက်ပြေးနေရဆဲဦးရေက ဘယ်လောက်ရှိလဲဆိုတာကိုတော့ အတိအကျ အတည်မပြုနိုင်သေးဘူးလို့ ISP Myanmar က ပြောပါတယ်။

    ISP Myanmar ဟာ နိုင်ငံရေး၊ စီးပွားရေး၊ စစ်ရေးတွေကို သုတေသနပြုလုပ်ပြီး ထုတ်ပြန်ပေးနေတဲ့အဖွဲ့လည်းဖြစ်ပါတယ်။

    

    ဓာတ်ပုံ ရင်းမြစ်, စစ်ဘေးရှောင်ကူညီရေးအဖွဲ့- ကလေးဒေသ Facebook Page

12. ၁၇ ဇွန် ၂၀၂၂'ကျွန်မ အိမ်ပြန်လို့ မရဘူး၊ ထိုင်းမှာလည်း စျေးတွေက တအားကြီးနေပြီ'

13. ၁၇ ဇွန် ၂၀၂၂မပေါက်ကွဲသေးဘဲ ကျန်နေတဲ့ လက်နက်တွေ ကိုင်တွယ်မိလို့ သေဆုံးရသူတွေ ရှိလာ

14. ၁၇ ဇွန် ၂၀၂၂ဒေါက်တာဇော်မြင့်မောင်ကို အဂတိအမှု ၅မှုအတွက် စစ်ကောင်စီကထောင်ဒဏ် ၂၁ ထပ်ချ, စုစုပေါင်းထောင်ဒဏ် ၂၇ နှစ် ချမှတ်ခံထားရ

    မန္တလေးတိုင်းဝန်ကြီးချုပ်ဟောင်း ဒေါက်တာဇော်မြင့်မောင်ကို စွဲဆိုထားတဲ့ ပုဒ်မတွေထဲကအဂတိအမှု ၅ မှုအတွက် စစ်ကောင်စီက ထောင်ဒဏ် ၂၁ နှစ်ထပ်မံချမှတ်လိုက်တယ်လို့တရားရုံးအသိုင်းအဝိုင်းကပြောပါတယ်။

    ဒေါက်တာဇော်မြင့်မောင်ကို စွဲဆိုထားတဲ့ အမှုတွေထဲကဆေးဝါးကုသမှုနဲ့ဆိုင်တဲ့ အဂတိအမှု ၃ ခုအတွက် တစ်မှုကို ထောင်ဒဏ် ၅ နှစ်၊ ပြင်ဦးလွင်နဲ့ မြင်းခြံတို့မှာ ပါတီရုံးမြေနေရာနဲ့ပတ်သက်တဲ့ အဂတိအမှုနှစ်မှုအတွက် ထောင်ဒဏ် ၃ နှစ်စီချမှတ်ခဲ့တာကြောင့်ဒီကနေ့မှာ စုစုပေါင်း ထောင်ဒဏ် ၂၁ နှစ် ချမှတ်လိုက်တာပါ။

    အဲ့ဒီထဲကအဂတိအမှုတွေအားလုံးအတွက် အယူခံဆက်တက်ဖို့ရှိနေတယ်လို့ တရားရုံးနဲ့နီးစပ်သူတွေကပြောပါတယ်။ဒေါက်တာဇော်မြင့်မောင်ဟာ ရွေးကောက်ပွဲနဲ့ဆိုင်တဲ့ အမှု ၂ ခုအတွက် ထောင်ဒဏ်တစ်နှစ်စီချမှတ်ခံထားရပြီး ပြီးခဲ့တဲ့ ဒီဇင်ဘာလထဲမှာ ပုဒ်မ ၅၀၅(ခ) အပါအဝင် အမှု ၃ ခုနဲ့ ထောင်ဒဏ် ၄ နှစ်ချမှတ်ခံထားရတာကြောင့် စွဲဆိုထားတဲ့ အမှုပေါင်း ၁၀ မှုအတွက် ထောင်ဒဏ်အားလုံးပေါင်း၂၇ နှစ်ချမှတ်ခံထားရပြီးဖြစ်ပါတယ်။

    

    ဓာတ်ပုံ ရင်းမြစ်, မျိုးဇော်သိန်း

15. ၁၇ ဇွန် ၂၀၂၂စစ်ကောင်စီရဲ့ တက္ကသိုလ်ဝင်တန်းစာမေးပွဲအောင်စာရင်းထုတ်ပြန်မှု NUG ဘာပြောလဲ

    ဒီကနေ့ ဇွန်လ ၁၇ ရက်နေ့မှာ ထွက်ရှိလာတဲ့ စစ်ကောင်စီကပြုလုပ်တဲ့ ၂၀၂၁-၂၀၂၂ စာမေးပွဲအောင်စာရင်းဟာ တရားမဝင်ဘူးလို့ အမျိုးသားညီညွတ်ရေးအစိုးရ NUG ရဲ့ ပညာရေး ဝန်ကြီးဌာနက ဒီနေ့မှာပဲထုတ်ပြန်လာပါတယ်။ စစ်ကောင်စီက ပညာရေးကို အသုံးချပြီး အတန်းတင်ပေးတာတွေ၊ သင်ယူပြီးမြောက်ကြောင်းလက်မှတ်ထုတ်ပေးတာတွေနဲ့ တက္ကသိုလ်ဝင်တန်းစာမေးပွဲ အောင်မြင်ကြောင်းထုတ်ပြန်တာတွေဟာ တရားဝင်မှု မရှိကြောင်း အကြိမ်ကြိမ်အခါခါထုတ်ပြန်ခဲ့ပြီးပြီဖြစ်တယ်လို့ NUG ရဲ့ထုတ်ပြန်ချက်က ဆိုပါတယ်။

    NUG အနေနဲ့ ပြည်သူကိုကိုယ်စားပြုတဲ့ အဖွဲ့အစည်းတွေဖြစ်တဲ့ ဖက်ဒရယ်ယူနစ်စနစ်ကိုယ်စားပြုတဲ့ လူမျိုးဒေသအခြေပြုအဖွဲ့အစည်းတွေကောင်စီတွေရဲ့ပညာရေးအဖွဲ့အစည်းတွေ ကိုယ်ပိုင်အုပ်ချုပ်ခွင့်ရ တက္ကသိုလ်ကောင်စီတွေရဲ့ အသိအမှတ်ပြုမှုကိုသာ တရားဝင်အသိအမှတ်ပြုတယ်လို့ NUG က ထုတ်ပြန်ချက်မှာဖော်ပြထားပါတယ်။

    ဒါ့အပြင် စစ်ကောင်စီကကျင်းပတဲ့ အခု ၂၀၂၁-၂၀၂၂ ပညာသင်နှစ်တက္ကသိုလ်ဝင်တန်းစာမေးပွဲကိုဝင်ရောက်မဖြေဆိုတဲ့ CDM ကျောင်းသား၊ ကျောင်းသူတွေကို အလေးအမြတ် ဂုဏ်ပြုတယ်လို့ NUG က ထုတ်ပြန်ပါတယ်။ အခုနှစ်တက္ကသိုလ်ဝင်တန်းအောင်စာရင်းမှာတော့ အောင်ချက်ရာခိုင်နှုန်းဟာ တစ်ပြည်လုံးအတိုင်းအတာနဲ့ ၄၆ ရာခိုင်နှုန်းကျော်ရှိတယ်လို့ စစ်ကောင်စီကထုတ်ပြန်ထားပါတယ်။

    ပြီးခဲ့တဲ့ နှစ်တွေမှာ တက္ကသိုလ်ဝင်တန်းဖြေဆိုသူ ကိုးသိန်းလောက်ရှိပေမဲ့ ဒီနှစ်မှာတော့ သုံးသိန်းနီးပါးသာရှိတယ်လို့ ပညာရေးအသိုင်းအဝိုင်းက ပြောထားပါတယ်။

    အာဏာသိမ်းမှုဖြစ်ပြီးတဲ့နောက် အာဏာဖီဆန်ရေးအကြမ်းမဖက်လှုပ်ရှားမှုမှာပါဝင်ဖို့၊ နောက် စစ်ကောင်စီနဲ့ မပူးပေါင်းတာကို ပြသဖို့ ပြည်တွင်းမှာ အခြေခံပညာရော၊ အဆင့်မြင့်ပညာကဏ္ဍမှာပါ ကျောင်းမတက်သပိတ် လှုပ်ရှားမှု ပေါ် ပေါက်ခဲ့တာကြောင့် စစ်ကောင်စီဖွင့်တဲ့အခြေခံပညာကျောင်းတွေမှာ ကျောင်းတက်သူဦးရေ နည်းပါးခဲ့တာဖြစ်ပါတယ်။

    

    ဓာတ်ပုံ ရင်းမြစ်, ဓါတ်ပုံ-AFP

16. ၁၇ ဇွန် ၂၀၂၂မန္တလေးက ကမ္ဘောဇဘဏ်ခွဲတစ်ခု ဓားပြတိုက်ခံရ

    မန္တလေးမြို့ ချမ်းအေးသာစံမြို့နယ်၊ ၂၆ လမ်း၊ ၆၂ လမ်းနဲ့ ၆၃ လမ်းကြား ကမ္ဘောဇဘဏ်ခွဲတစ်ခုဒီနေ့ ဇွန် ၁၇ ရက် မနက် ၁၀ နာရီကျော်ကဓားပြတိုက်ခံရပါတယ်။ ဒါ့အပြင် ကျွတ်ကျွတ်အိတ် အနက်နဲ့အထုပ်တစ်ထုပ်ကိုလည်း ပစ်သွားတာတွေ့ရတယ်လို့ ဒေသခံတွေကပြောပါတယ်။လက်ရှိမှာ စစ်ကောင်စီတပ်ဖွဲ့တွေ အများအပြား ရောက်နေသလို မန္တလေးမြို့ လမ်းတချို့မှာ အသွားအလာယာဉ်တွေကို ပိတ်ဆို့စစ်ဆေးတာတွေပါ ပြုလုပ်နေပါတယ်။"ဖြစ်တဲ့ဘဏ်က အမှတ် ၃ ရဲစခန်းအနီးဝန်းကျင်က ဘဏ်ပဲ။ အခုလမ်းမှာ အစစ်ဆေးကြမ်းတယ်။ ကားနောက်ဖုံးတွေကအစ စစ်နေတာ"လို့ ဒေသခံတဦးကပြောပါတယ်။

    

    ဓာတ်ပုံ ရင်းမြစ်, Social Media

17. ၁၇ ဇွန် ၂၀၂၂လောင်းလုံးမြို့နယ်အတွင်း ပစ်ခတ်မှုကြောင့် ‌ဒေသခံ နှစ်ဦးသေဆုံး, မြို့နယ်တွင်းစစ်တပ်အင်အားတိုးချထားပြီး CDM ဝန်ထမ်းတွေအပါအဝင်ဒေသခံတွေဖမ်းဆီးခံထားရ

    တနင်္သာရီ တိုင်းဒေသကြီး၊ လောင်းလုံးမြို့နယ်၊ ဝေဒီကျေးရွာနဲ့ ဂေါ့အင်းကျေးရွာတွေကို ပြီးခဲ့တဲ့ ဇွန်လ ၁၆ ရက်နဲ့ ဒီကနေ့ ဇွန်လ ၁၇ မနက်ပိုင်းတွေမှာ စစ်ကောင်စီတပ်တွေဆက်တိုက်ဝင်ရောက်ခဲ့ပြီး ဒေသခံတွေကို ဖမ်းဆီး ပစ်ခတ်ခဲ့တာကြောင့် ဒေသခံ ၂ ဦးသေဆုံးခဲ့တယ်လို့ ထားဝယ်ခရိုင်သပိတ်ကော်မတီကထုတ်ပြန်ထားပါတယ်။

    ဇွန်လ ၁၆ ရက်နေ့ညပိုင်းမှာတော့ လောင်းလုံးမြို့နယ်၊ ဝေဒီကျေးရွာထဲကို စစ်ကောင်စီတပ်တွေဝင်ရောက်လာပြီး နေအိမ်တစ်လုံးကို မီးရှို့ဖျက်ဆီးခဲ့သလို နေအိမ်ထဲမှာရှိတဲ့ အသက် ၃၂ နှစ်အရွယ် မနွယ်နီ‌ဌေးကိုဖမ်းဆီးခေါ်ဆောင်သွားပြီးတဲ့နောက် သေနတ်နဲ့ပစ်ခတ်ပြီး လမ်းဘေးတစ်နေရာမှာပစ်ထားခဲ့တာဖြစ်တယ်လို့ ဒေသခံတွေကဆိုပါတယ်။

    အနီးအနားက ရွာသားတွေကူညီပေးတာကြောင့် ဒဏ်ရာတွေနဲ့မနွယ်နီဌေးကို အချိန်မီဆေးရုံပို့နိုင်ခဲ့တယ်လို့ဆိုပါတယ်။ ဒီကနေ့ ဇွန်လ ၁၇ ရက်မနက် ၁ နာရီလောက်မှာတော့ ဂေါ့အင်းကျေးရွာထဲကို ထပ်မံဝင်ရောက်ခဲ့ပြီး ဒေသခံတစ်ဦးဖြစ်တဲ့ မအေမီဖြိုးဝေကို နေအိမ်ရှေ့မှာတင် ပစ်ခတ်ခဲ့ပြီး နေရာမှာတင်သေဆုံးသွားတယ်လို့ ဒေသခံတွေကပြောပါတယ်။

    အခုလိုစစ်ကောင်စီတပ်တွေဝင်ရောက်ပစ်ခတ်ဖမ်းဆီးခဲ့တဲ့ အမျိုးသမီးတွေဟာ အာဏာဖီဆန်ရေးလှုပ်ရှားမှု CDM မှာ ပါဝင်သူတွေလို့လည်း ဒေသခံတချို့ရဲ့ ပြောဆိုချက်တွေရှိနေပါတယ်။

    "သူတို့ကတော့ CDM လုပ်တယ်ဆိုတာထက် လောင်းလုံးမြို့နယ်က စစ်အာဏာရှင်တော်လှန်ရေးမှာ အားကောင်းတဲ့နေရာဆိုတဲ့ နာမည်ထွက်နေတဲ့ လူတွေကို ပျူစောထီးတွေနဲ့ပေါင်းပြီး ဝင်ဖမ်းတာတွေလုပ်နေတာ။ ပုံမှန်ပစ်မှတ်ထားပြီးသားနာမည်ရှိပြီးသားအိမ်တွေကိုလုပ်တာ။ ဂေါ့အင်းရွာက မအေမီဖြိုးကိုပစ်ခတ်တာဆိုရင်တော်တော်လေးရက်ရက်စက်စက်လုပ်သွားတာ။ သူတို့လိုချင်တဲ့ သူကိုနာမည်မေးတော့ အပြင်ထွက်ပြီးမရှိဘူးပြောတဲ့အချိန်မှာ သက်ကြီးရွယ်အိုမိဘတွေရော၊ မအေမီဖြိုးရဲ့ တူမကလေးနှစ်ယောက်ရှေ့မှာတင်ပစ်သတ်သွားတာ။ အနားကလည်းမကူရဲမကပ်ရဲကြဘူး။ အိမ်ရှေ့မှာ စောင်လေးခြုံပြီးအလောင်းကိုထားထားရလို့ သွားကူညီပေးခဲ့ရတယ်" လို့ ထားဝယ်ခရိုင်သပိတ်အဖွဲ့ဝင်တစ်ဦးက ဘီဘီစီကိုပြောပါတယ်။

    

    ဓာတ်ပုံ ရင်းမြစ်, သပိတ်ကော်မတီ (ထားဝယ်ခရိုင်)

    

    ဓာတ်ပုံ ရင်းမြစ်, သပိတ်ကော်မတီ (ထားဝယ်ခရိုင်)

    ဒါ့အပြင် ဒီကနေ့ဇွန်လ ၁၇ ရက်မနက် ၁ နာရီခွဲလောက်မှာလည်း ဂေါ့အင်းကျေးရွာထဲက ကြယ်တောင်အနီးမှာ ဖြတ်သန်းသွားလာတဲ့ လမ်းသားလမ်းလာအမျိုးသား ၂ ဦးကိုလည်း စစ်ကောင်စီကထပ်မံပစ်ခတ်ခဲ့လို့ တစ်ဦးသေဆုံးပြီး တစ်ဦးကိုတော့ အချိန်မီဆေးရုံပို့ နိုင်ခဲ့တယ်လို့ ထားဝယ်ခရိုင်သပိတ်ကော်မတီကထုတ်ပြန်ထားပါတယ်။

    လက်ရှိမှာ စစ်ကောင်စီတပ်တွေဟာ ရက်ပိုင်းအတွင်းမှာပဲ လောင်းလုံးမြို့နယ်အတွင်းမှာ စစ်အင်အားတိုးချဲ့ထားသလို CDM ဝန်ထမ်းအပါအဝင် ပြည်သူ ၇ ဦးကိုဖမ်းဆီးထားတယ်လို့လည်း သပိတ်ကော်မတီကထုတ်ပြန်ထားပါတယ်။ လောင်းလုံးမြို့နယ်အတွင်းက ကျေးရွာနေအိမ်တွေကိုဝင်ရောက်ပြီး ဒေသခံတွေပစ်ခတ်ခံရတဲ့ ဖြစ်စဥ်တွေအပေါ် စစ်ကောင်စီသတင်းထုတ်ပြန်ရေးအဖွဲ့ကိုဘီဘီစီကဆက်သွယ်မေးမြန်းဖို့ကြိုးစားနေပါတယ်။

18. ၁၇ ဇွန် ၂၀၂၂လေယာဥ်၊ ရဟတ်ယာဥ်တွေနဲ့ လက်နက်ကြီးသံတွေကိုအံတုနေကြတဲ့ ကယားပြည်နယ်ထဲကကိုယ်ထူကိုယ်ထစာသင်ကျောင်း

19. ၁၆ ဇွန် ၂၀၂၂စစ်ကောင်စီ အချိုးကျ ပီအာ စနစ် ရွေးကော် အတည်ပြု

20. ၁၆ ဇွန် ၂၀၂၂အချိန် မတိုင်ခင် ကြုံနေရတဲ့ ဖားကန့် ရေကြီးမှု