ကိုဗစ်ကူးစက်မှုကြောင့် အာဆီယံ ဘောလုံး U23 ပြိုင်ပွဲက မြန်မာနုတ်ထွက်

တိုက်ရိုက် ထုတ်လွှင့်ချက်

1. ၁ ဖေဖော်ဝါရီ ၂၀၂၂စစ်အာဏာရှင် ဆန့်ကျင်ရေး လှုပ်ရှားမှု လန်ဒန်မြို့မှာ ကျင်းပ

   မြန်မာနိုင်ငံမှာ စစ်တပ်က အာဏာသိမ်းခဲ့တဲ့ တစ်နှစ်မြောက်တဲ့နေ့မှာ စစ်အာဏာရှင် ဆန့်ကျင်ရေး လှုပ်ရှားမှုကို လန်ဒန်မြို့မှာ ကျင်းပခဲ့ပါတယ်။

   စစ်ကောင်စီကို နိုင်ငံတကာက အသိအမှတ်မပြုဘဲ အမျိုးသားညီညွတ်ရေးအစိုးရ NUG ကို မြန်မာနိုင်ငံရဲ့ တရားဝင် အစိုးရ အဖြစ် အသိအမှတ်ပြုဖို့ နဲ့ မြန်မာနိုင်ငံကို ကမ္ဘာက မေ့မထားဖို့ တောင်းဆိုခဲ့ကြတဲ့ပွဲမှာ ယူကေရောက် မြန်မာနိုင်ငံသားတွေ အပြင် မြန်မာ့အရေး အလေးထား စိတ်ဝင်စားသူတွေ ပါဝင်ခဲ့ကြ ပါတယ်။

   မနက် ၁၁ နာရီက စတင်တဲ့ လန်ဒန်မြို့က ပါလီမန်ရှေ့ စုရုံး ဆန္ဒပြပွဲမှာ ဗြိတိန် နိုင်ငံတဝန်းနေထိုင်ကြတဲ့ မြန်မာတွေ၊ ဗြိတိန်နိုင်ငံ Royal College အသီးသီးက မြန်မာ မဟုတ်တဲ့ ဆရာဝန်ကြီးတွေနဲ့ ဗြိတိသျှပါလီမန်က Lord Crispနဲ့ Lord Alton နဲ့ Baroness Cox စတဲ့ လွှတ်တော် အမတ်တချို့ အပြင် မြန်မာ့အရေး စိတ်ဝင်စားတဲ့ ဗြိတိန် နိုင်ငံသား တွေလည်း ပူးပေါင်းပါဝင်ခဲ့ကြပါတယ်။

   မြန်မာနိုင်ငံမှာ ၁၉၈၈ လူထုအုံကြွမှု အရေးတော်ပုံကာလက မြန်မာပြည်သူတွေ အတွက် ဘီဘီစီကနေ သတင်းတွေ တင်ဆက်ပေးခဲ့တဲ့ ဘီဘီစီသတင်းထောက် ခရစ္စတိုဖာ ဂန်းနက်စ်လည်း ဒီမနက် ပါလီမန်ရှေ့ လူထုစုရုံးမှုမှာ ပါဝင် မိန့်ခွန်း ပြောခဲ့ပါတယ်။

   ပါလီမန်ရှေ့မှာ ဆန္ဒပြပြီးနောက် ဗြိတိန်ဝန်ကြီးချုပ် နေအိမ်ရှိရာ ဒေါင်းနင်းလမ်းနဲ့ ဗြိတိန်နိုင်ငံဆိုင်ရာ မြန်မာသံရုံးရှေ့အထိ မြန်မာ့အရေး ဆန္ဒပြသူတွေ လမ်းလျှောက် ချီတက်ပြီး ကြွေးကြော် ဆန္ဒပြခဲ့ကြပါတယ်။

   

   ဓာတ်ပုံ ရင်းမြစ်, ကိုဇော််လတ်

2. ၁ ဖေဖော်ဝါရီ ၂၀၂၂မြန်မာပြည် ပြည်တွင်းစစ် ဖြစ်နေပြီလို့ ကုလသမဂ္ဂအရာရှိ ‌‌ပြော

3. ၁ ဖေဖော်ဝါရီ ၂၀၂၂မြစ်ကြီးနားက ပရဟိတ လူနာတင်ကား တစ်စီး ထီးချိုင့်မှာ အပစ်ခံရ ၊စေတနာ ဝန်ထမ်းတစ်ဦးသေပြီး တစ်ဦးဒဏ်ရာရ

   ကချင်ပြည်နယ် မြစ်ကြီးနားမြို့က ဧရာဝတီ ကရုဏာလူမှုကူညီရေး ပရဟိတ အသင်းက စေတနာ့ဝန်ထမ်းတစ်ဦး လူနာလိုက်ပို့စဥ် ထီးချိုင့်မြို့နယ်ထဲမှာ မနေ့က ဇန်နဝါရီလ ၃၁ ရက်နေ့ညက ကျည်ထိမှန်သေဆုံးပြီး တစ်ဦးဒဏ်ရာရရှိသွားတယ်လို့ အသင်းရဲ့တာဝန်ရှိသူကပြောပါတယ်။

   ဇန်နဝါရီလ ၃၁ ရက်နေ့ညက မြစ်ကြီးနားမြို့ကနေ မန္တလေးကို လူနာသွားပို့စဉ် ည ၈နာရီကျော်မှာ အသင်းကား ထီးချိုင့်မြို့နယ်ထဲမှာ မီးရှို့ခံရပြီး စေတနာ့ဝန်ထမ်းတွေ သေနတ်ကျဉ်ထိမှန်ခဲ့တာဖြစ်တယ်လို့ ဆိုပါတယ်။

   သေဆုံးသူဟာ အသင်းရဲ့စေတနာ့ဝန်ထမ်း မြစ်ကြီးနားမြို့ အေးစေတီ ရပ်ကွက်က ကိုဆန်းနိုင်ဖြစ်ပြီး ဒဏ်ရာရရှိသူက ကိုအောင်ဖြိုးဦး ဖြစ်တယ်လို့သိရပါတယ်။

   သေနတ်ပစ်ခံရပြီး သေဆုံးသူ ပရဟိတ အသင်းသားဟာ အသက် ၃၀ ကျော်အရွယ်ရှိ လူငယ်တစ်ဦး ဖြစ်ကြောင်း ဘယ်အဖွဲ့အစည်းနဲ့ မှ မပတ်သက်ဘဲ ပစ်ခတ်ခံရတာဖြစ်ကြောင်း ကားပေါ်မှာလည်းလူနာပါကြောင်း ပရဟိတအသင်းတွေကို စစ်ဆေးပြီး မဟုတ်တာတွေ့ရင် အ‌ရေးယူလို့ ရပြီး အရေးပေါ်လူနာကြောင့် အခုလို အသင်းကားက ထွက်လာတာဖြစ်တယ်လို့ ဧရာဝတီ ကရုဏာလူမှုကူညီရေး ဥက္ကဋ္ဌက ပြောပါတယ်။

   

   ဓာတ်ပုံ ရင်းမြစ်, CJ

4. ၁ ဖေဖော်ဝါရီ ၂၀၂၂ဗြိတိန်ဝန်ကြီးချုပ်က မြန်မာပြည်သူတွေနဲ့အတူရပ်တည်တယ်လို့ပြော

   မြန်မာနိုင်ငံမှာ စစ်တပ်က အာဏာသိမ်းယူခဲ့တဲ့ တစ်နှစ်မြောက်နေ့မှာ ဗြိတိန်ဝန်ကြီးချုပ် ဘောရစ် ဂျွန်ဆင်က မြန်မာပြည်သူတွေနဲ့အတူ ဗြိတိန်နိုင်ငံက ရပ်တည်ပါတယ် ဆိုတဲ့ သတင်းစကား ထုတ်ဖော်ပြောလိုက်ပါတယ်။

   စစ်တပ်က မြန်မာနိုင်ငံမှာ ဒီမိုကရေစီကို နင်းချေဖျက်ဆီးခဲ့တယ်၊ စစ်တပ်ရဲ့ ရက်စက်ကြမ်းကြုတ်စွာ အကြမ်းဖက်မှု၊ လူသားတွေ အတိဒုက္ခရောက်ကြရတဲ့ အကျပ်အတည်းတွေ အပြင် နိုင်ငံရေးအတိုက်အခံတွေကို ဖမ်းဆီးမှုတွေကို မြန်မာပြည်သူတွေ ရင်ဆိုင်နေရတယ်လို့ သူကဆိုပါတယ်။

   မြန်မာနိုင်ငံမှာ လွတ်လပ်မှုနဲ့ ဒီမိုကရေစီပြန်လည် ရရှိဖို့လိုတယ်လို့ လည်း ဗြိတိန်ဝန်ကြီးချုပ်က တိုက်တွန်းထားပါတယ်။

   

   ဓာတ်ပုံ ရင်းမြစ်, Screenshots

5. ၁ ဖေဖော်ဝါရီ ၂၀၂၂တာချီလိတ် တပ်ထောက်ခံပွဲမှာ ဗုံးကွဲ၊ ၂ ဦးသေပြီး ၄၀ ခန့် ဒဏ်ရာရ

   ရှမ်းပြည်နယ် အရှေ့ပိုင်း တာချီလိတ်မြို့ ဆန်ဆိုင်း အထက ကျောင်းရှေ့ အကျော်မှာ ဖေဖော်ဝါရီလ ၁ ရက် နေ့လယ် ၁၂ နာရီ ကျော်က ဗုံးပေါက်ကွဲမှု ဖြစ်ပွားလို့ လူ ၂ ဦး သေဆုံးပြီး ၄၀ ခန့် ဒဏ်ရာ ရရှိကြောင်း တာချီလိတ်နဲ့ ရှမ်းပြည်နယ် အခြေစိုက်တဲ့ သတင်းဌာနတွေကရေးပါတယ်။

   ဖေဖော်ဝါရီလ ၁ ရက်နေ့ မနက်ပိုင်းက တာချီလိတ်မြို့ ရှမ်းရိုးမကွင်းမှာ ပြုလုပ်တဲ့ တပ် ထောက်ခံပွဲ ကျင်းပပြီး အပြန် လူအုပ်ထဲမှာ ဗုံးကွဲခြင်း ဖြစ်ကြောင်း၊ အမျိုးသား ၃၂ ဦးနဲ့ အမျိုးသမီး ၆ ဦးခန့် ဒဏ်ရာ ရရှိခဲ့ပြီး အမျိုးသား ၂ ဦး သေဆုံးကြောင်း မျက်မြင် ဒေသခံ ၁ ဦးက ပြောတာကိုကိုးကားပြီးတာချီလိတ် အခြေစိုက် ရွှေတြိဂံဒေသ သတင်းလွှာက ရေးပါတယ်။

   အနားက ဖြတ်သွားတဲ့ ဆိုင်ကယ်က လူအုပ်ထဲကို ဗုံးပစ်ထည့်ခဲ့တာလို့ ပြောကြသလို စစ်ကောင်စီဘက်ကပေါက်ကွဲမှုအပြီး ပစ်ခတ်မှုကြောင့် ထိခိုက်သေဆုံးတာလို့ ပြောကြပါတယ်။

   ဘီဘီစီက ကြည့်ခွင့်ရတဲ့ ဗီဒီယိုဖိုင်မှာတော့ စီတန်းလှည့်လာတဲ့ လူအုပ်ဟာ ပေါက်ကွဲသံကြားပြီးနောက် မီးခိုးလုံးတွေ တက်လာကာ အလံကိုင်ထားသူ အချို့လဲကျသွားတာကို တွေ့ရပါတယ်။

   လူအုပ်ထဲက အလံကိုင်ထားသူ အချို့ကထွက်ပြေးသွားကြပြီးဒဏ်ရာရ သေဆုံးသူများကို လူနာတင်ယာဉ်နဲ့ ဆေးရုံသို့ သယ်ဆောင် သွားတယ်လို့လည်း ဆိုပါတယ်။

   တာချီလိတ်မှာ တပ်ထောက်ခံပွဲဟာ ဒုတိယနေ့ အဖြစ်ကျင်းပပြုလုပ်တာဖြစ်ပြီး ဒဏ်ရာရသူ အများစုဟာ စစ်မှုထမ်းဟောင်းတွေဖြစ်တယ်လို့ သိရပါတယ်။

   

   ဓာတ်ပုံ ရင်းမြစ်, ရွှေတြိဂံဒေသ သတင်းလွှာ

6. ၁ ဖေဖော်ဝါရီ ၂၀၂၂ကွတ်ခိုင်မှာ အသံတိတ်သပိတ်နေ့မှာ ကေအိုင်အေနဲ့စစ်ကောင်စီတပ်တွေ တိုက်ပွဲ ပြင်းထန်, မြို့အရှေ့ခြမ်းစည်းကားတဲ့နေရာတချို့ အသံတိတ်သပိတ်လှုပ်ရှားမှုမှာ ပါဝင်

   စစ်အာဏာသိမ်းတစ်နှစ်ပြည့်တဲ့ ဒီကနေ့ ဖေဖော်ဝါရီ ၁ ရက်နေ့မှာ ရှမ်းပြည်နယ်မြောက်ပိုင်း၊ ကွတ်ခိုင်မြိုမှာ မနက် ၈ နာရီအချိန်ခန့်ကစပြီး စစ်ကောင်စီနဲ့ ကချင်လွတ်မြောက်ရေးတပ် KIAတို့အကြား မြို့ရဲ့အနောက်ဘက်ခြမ်းမှာ တိုက်ပွဲပြင်းထန်စွာဖြစ်ပွားခဲ့ပြီး မြို့အရှေ့ဘက်ခြမ်းမှာတော့ အသံတိတ်သပိတ်မှာ လူထုက ပါဝင်နေကြပါတယ်။

   

   ဓာတ်ပုံ ရင်းမြစ်, CJ

   ဒီကနေ့တိုက်ပွဲဟာ KIA ဘက်က မနက် ၈ နာရီခန့်ကစပြီး ကွတ်ခိုင်မြို့အနောက်ဘက်ခြမ်း မြို့မစစ်ကောင်စီဗျူဟာအနီးနဲ့ စစ်ကောင်စီလက်အောက်ခံ အစိုးရရုံးတွေတည်ရှိရာအနီး စတင်ပစ်ခတ်မှုတွေဖြစ်ပွားခဲ့ပြီး စစ်ကောင်စီဘက်ကြလည်း လက်နက်ကြီးတွေနဲ့ပြန်လည်ပစ်ခတ်ခဲ့လို့ တိုက်ပွဲစတင်ပြင်းထန်ခဲ့ပါတယ်။

   ထိတွေ့တိုက်ပွဲဟာ ၂ နာရီခန့်ကြာမြင့်ပြီး တိုင်းရင်းဆေးဌာနရုံး အဆောက်အဦအနီးကို လက်နက်ကြီးကျည် ကျရောက်ပေါက်ကွဲခဲ့လို့ ပျက်စီးမှုတချို့ရှိခဲ့ပါတယ်။ ဒါ့အပြင် မော်ဟစ်ကျေးရွာထဲကိုလည်း လက်နက်ကြီးကျည်တချို့ ကျရောက်တာကြောင့် ရွာခံအိမ်တချို့ထိခိုက်မှုတွေရှိခဲ့တယ်လို့ ဒေသခံတွေက ဆိုပါတယ်။

   မြို့ရဲ့အနောက်ဘက်ခြမ်းမှာ အဲဒီလိုတိုက်ပွဲဖြစ်ပွားခဲ့ပေမယ့် အသံတိတ်သပိတ်စတင်တဲ့ ဒီနေ့ မနက်၁၀ နာရီဝန်းကျင်မှာတော့ ကွတ်ခိုင်မြို့ရဲ့ အရှေ့ဘက်ခြမ်း မြို့မဈေးနဲ့ လူစည်ကားရာနေရာတွေမှာ စစ်အာဏာသိမ်းတစ်နှစ်ပြည့် အသံတိတ်သပိတ်မှာပါဝင်တဲ့အနေနဲ့ ဆိုင်ခန်းတွေ ပိတ်ထားတာတွေ့ရပါတယ်။

   

   ဓာတ်ပုံ ရင်းမြစ်, CJ

7. ၁ ဖေဖော်ဝါရီ ၂၀၂၂တိတ်ဆိတ်သွားတဲ့ ဖေဖော်ဝါရီ ၁ ရက်

   စစ်အာဏာသိမ်းတာ တစ်နှစ်ပြည့်တဲ့ နှစ်ပတ်လည်နေ့မှာ အသံတိတ်သပိတ်တွေကို ရန်ကုန် မန္တလေး မုံရွာမြစ်ကြီးနား စတဲ့ မြို့ကြီးတွေအပါအဝင် နိုင်ငံအနှံ့မှာ ပြုလုပ်ခဲ့ကြတာ တွေ့ရပါတယ်။

   နေ့စဥ် လူစည်ကားပြီး ကားတွေနဲ့ ပြည့်နေတဲ့ ရန်ကုန်မြို့လယ်မှာ တော့ အသွားအလာမရှိသလောက်ဖြစ်နေပြီး လက်ဖက်ရည်ဆိုင်အချို့ ဖွင့်ထားပေမယ့် လာပြီးစားသောက်တဲ့သူ မရှိတာကို တွေ့ရပါတယ်။

   မန္တလေးစျေးချိုတော်နဲ့ မန်းမြန်မာပလာဇာ အပါအဝင် မန္တလေးမြို့ပေါ်ရှိ စျေးဆိုင်များ ဆိုင်ဖွင့်ထားပေမဲ့လည်း စျေးဝယ်သူ မရှိဘဲ တိတ်ဆိတ်နေတာကို တွေ့ရတယ်လို့ မန္တလေးဒေသခံတွေက ပြောပါတယ်။

   စစ်ကိုင်းတိုင်းထဲက မုံရွာ အပါအဝင်မြို့အတော်များများမှာ အပြင်ထွက်ကြသူမတွေ့ရသလို မြစ်ကြီးနားမြို့မှာလည်း လူသွားလူလာ မရှိသလောက်ဖြစ်နေတယ်လို့ ဒေသခံတွေက ပြောပါတယ်။

   စစ်ကောင်စီက ဆိုင်တွေကို ခြိမ်းခြောက်ပြီးဖွင့်ခိုင်းတာကြောင့် ဆိုင်တွေဖွင့်ကြပေမယ့် အပြင်မထွက်ကြကြောင်း စျေးဝယ်လာသူလည်း မရှိသလောက်နဲတယ်လို့ မုံရွာဒေသခံတစ်ဦးက ဘီဘီစီကို ပြောပါတယ်။

   နေပြည်တော်မှာတော့ တပ်ထောက်ခံပွဲတစ်ခုပြုလုပ်ခဲ့ပြီးတော့ မုံရွာမှာလည်းတပ်ထောက်ခံပွဲလုပ်ဖို့ နေ့လယ်ပိုင်းမှာ လူစုနေတာတွေ့ရတယ်လို့ ဒေသခံတွေက ပြောပါတယ်။

   

   ဓာတ်ပုံ ရင်းမြစ်, CJ

   

   ဓာတ်ပုံ ရင်းမြစ်, CJ

8. ၁ ဖေဖော်ဝါရီ ၂၀၂၂

9. ၁ ဖေဖော်ဝါရီ ၂၀၂၂ပြည်တွင်းစစ်အသွင်ပြောင်းသွားတဲ့ မြန်မာပြည်တွင်းက ပဋိပက္ခများ

10. ၁ ဖေဖော်ဝါရီ ၂၀၂၂ကျောက်ပန်းတောင်းမြို့ လျှပ်စစ်ရုံးရှေ့မှာ အမျိုးသားတစ်ဦး ကိုယ့်ကိုယ်ကိုယ်မီးရှို့မှုဖြစ်ပွား, ဆန္ဒဖော်ထုတ်ရင်း သူ့ကိုယ်သူမီးရှို့ခဲ့တာလို့ဒေသခံတွေပြော

    မန္တလေးတိုင်း၊ ကျောက်ပန်းတောင်းမြို့နယ်၊ ဗိုလ်ချုပ်လမ်းမကြီးပေါ်မှာရှိတဲ့ လျှပ်စစ်ရုံး (EPC)ရှေ့မှာ ဒီကနေ့ ဖေဖော်ဝါရီ ၁ ရက် နေ့လယ် ၁၂နာရီဝန်းကျင်လောက်က အမျိုးသားတဦး သူ့ကိုယ်သူ မီးရှို့မှုဖြစ်ပွားခဲ့ပါတယ်။ မီးရှို့သူဟာ အသက် (၄၀)ဝန်းကျင်ရှိတဲ့ ကိုအောင်အောင်လို့သိရပြီး ပြည်တော်သာ ရပ်ကွက်ဘက်မှာ သံပန်းလုပ်ကိုင်နေသူဖြစ်တယ်လို့ မျက်မြင်တွေ့သူ ဒေသခံတွေကပြောပါတယ်။

    “သူ့ဟာသူလမ်းလျှောက်လာတော့ ဖြတ်သွားမယ်ထင်တာ၊ EPC ရုံးနားက မီတာဆောင်တဲ့နားရောက်မှ ရုတ်တရက်မီးခြစ်နဲ့ ရှို့လိုက်တာ၊ အဲ့ရုံးထဲကလည်းဝိုင်းအော်တာပေါ့။ ၃မိနစ် ၄မိနစ်အတွင်း ကျွန်တော်တို့ ရေတွေနဲ့လောင်း၊ သဲတွေနဲ့လောင်းဝိုင်းငြှိမ်းကြတယ်။ အဲ့ပလက်ဖောင်းထောင့်လေးမှာ ခဲလေးနဲ့ဖိပြီး လေးကြောင်းမျဉ်းစာရွက်နဲ့ ရေးထားတာပြည်သူများမီးအမြဲရဖို့ဆုတောင်းပါတယ်ဆိုပြီးလေ။ အဲ့စာရွက်က ခဏချင်းဖျောက်လိုက်ကြတယ်။ဒါတောင်အင်တာနက်ပေါ်ချက်ချင်းပြန့်သွားလို့ အခုတောင် စစ်တပ်က လာရှာနေတယ်စာရွက်ကို ”လို့ မျက်မြင်တွေ့သူက ဘီဘီစီကိုပြောပါတယ်။

    မီးလောင်ကျွမ်းနေတဲ့ အဲဒီအမျိုးသားကို ကျောက်ပန်းတောင်းပြည်သူ့ဆေးရုံကိုပေးပို့ခဲ့ပြီး ညောင်ဦးခရိုင်ဆေးရုံကို လွှဲပြောင်းပေးလို့သွားရောက်ပို့ဆောင်နေတယ်လို့ ပရဟိတ ကူညီပေးခဲ့သူတွေကနေ သိရပါတယ်။

    “ကျွန်တော်ရောက်တော့ပလက်ဖောင်းပေါ်မှာ သူကကွေးကွေးလေး ဘယ်သူကမှလည်းသူ့ကိုမ မရဲဘူး။ ရဲတွေလည်း အနားမှာရှိနေတယ်။ ကျွန်တော်က အဲ့ဒါနဲ့ ပက်လက်လှန်လိုက်တော့ ဖူးဆိုပြီး လေမှုတ်သံလေးနဲ့ ညည်းသံသဲ့သဲ့ထွက်လာတယ်။ သူအသက်မသေ သေးဘူးပေါ့။ ဆံပင်တွေကိုင်တော့လည်း မီးကျွမ်းပြီး ဂျွတ်ဂျွတ်မြည်တယ် ထိမိတာနဲ့၊ အဝတ်တွေကလည်း လောင်နေပြီ။ ကျောက်ပန်းတောင်းဆေးရုံရောက်ချိန် ကတော့ သူ့မိသားစုဝင်တွေရောက်လာကြပြီ၊ အောင်အောင်ရေဆိုပြီး ငိုနေကြတာ ပေါ့၊ ကျွန်တော်က အများကြီးတော့မမေးဖြစ်ဘူး၊ သူက အရက်တွေ ဘာတွေသောက်တတ်လားမေးတော့ မသောက်တတ်ဘူးလို့ ဖြေတယ်”လို့ ကိုယ်တိုင်ကူညီပေးခဲ့ရတဲ့ သုဂတိရှင်ပရဟိတအသင်းက ကိုမြတ်ကိုက အခုလိုပြောတာပါ။

    အဲ့ဒီဖြစ်စဉ်ပြီးတဲ့နောက် မိနစ်အနည်းငယ်အကြာမှာ အဲ့ဒီEPC ရုံးရှေ့ကနေ စစ်တပ်ထောက်ခံပွဲလုပ်သူ အယောက် (၅၀)လောက်ဖြတ်သွားကာကြွေးကြော်သံတွေ အော်သွားကြတယ်လို့ ဆိုပါတယ်။ အဲ့ဒီနောက် နေ့လယ် (၁)နာရီလောက်မှာလည်း ကျောက်ပန်းတောင်းမြို့ပတ်လမ်းမှာ ဗုံးပေါက်ကွဲမှုရှိခဲ့တယ်လို့ ဒေသခံတွေကပြောပါတယ်။

    

    ဓာတ်ပုံ ရင်းမြစ်, CJ

11. ၁ ဖေဖော်ဝါရီ ၂၀၂၂အငြိမ်းစား ဒု- ဗိုလ်ချုပ်ကြီးနှစ်ယောက် ရန်ကုန်နဲ့ကယား ဝန်ကြီးချုပ်ဖြစ်လာ

    အာဏာသိမ်းတာ တစ်နှစ်ပြည့်မြောက်ချိန်မှာပဲ စီးပွားရေးအရအရေးပါတဲ့ ရန်ကုန်တိုင်းနဲ့ စစ်ရေးအရအရေးပါတဲ့ ကယားပြည်နယ် ဝန်ကြီးချုပ်နေရာတွေကို အငြိမ်းစားစစ်ဗိုလ်ချုပ်တွေနဲ့ စစ်ကောင်စီက ပြောင်းလဲခန့်အပ်လိုက်ပါတယ်။ အငြိမ်းစား ဒုတိယဗိုလ်ချုပ်ကြီး စိုးသိန်းက ရန်ကုန်တိုင်းဝန်ကြီးချုပ် ဖြစ်လာပြီး သူက တပ်မတော်စစ်ဆေးရေးနဲ့ စာရင်းစစ်ချုပ်ဟောင်း ဖြစ်ပါတယ်။ တပ်က အငြိမ်းစားယူပြီး ၂၀၁၅ ရွေးကောက်ပွဲကို သပိတ်ကျင်း(၁)မဲဆန္ဒနယ်ကနေ ဝင်ပြိုင်တာ ရှုံးနိမ့်ခဲ့သူပါ။ အဲ့ဒီနောက် စီးပွားရေးဦးပိုင်မှာ ဒုဥက္ကဋ္ဌတာဝန်ယူခဲ့ရာကနေ ခုတော့ ရန်ကုန်တိုင်းဝန်ကြီးချုပ် ဖြစ်လာတာပါ။သူဟာ စစ်တက္ကသိုလ် အပတ်စဉ် ၂၄ ဆင်းဖြစ်ပြီး အရင်က ပုသိမ်အခြေစိုက် အနောက်တောင်တိုင်းစစ်ဌာနချုပ်တိုင်းမှူး တာဝန်လည်း ထမ်းဆောင်ဖူးပါတယ်။

    လက်ရှိ တပ်မတော်လေ့ကျင့်ရေးအရာရှိချုပ် ဒုတိယဗိုလ်ချုပ်ကြီး ဇော်မျိုးတင် ဟာ ကယားပြည်နယ် ဝန်ကြီးချုပ်ဖြစ်လာပါတယ်။ သူဟာ ဗိုလ်ချုပ်မှူးကြီးမင်းအောင်လှိုင်ရဲ့ အထူးယုံကြည်စိတ်ချသူ တစ်ဦးဖြစ်ပြီး အာဏာသိမ်းတဲ့ကာလက နေပြည်တော်တိုင်းမှူးဖြစ်ခဲ့ပါတယ်။ စစ်တက္ကသိုလ် အပတ်စဉ် ၃၂ ဆင်း ဖြစ်တဲ့ ဦးဇော်မျိုးတင်ဟာ ၂၀၁၆ ခုနှစ်က ကယားပြည်နယ် ရဲ့ လုံခြုံရေးနဲ့ နယ်စပ်ရေးရာဝန်ကြီးအဖြစ် တာဝန်ထမ်းဆောင်ခဲ့သူတစ်ဦးလည်း ဖြစ်ပါတယ်။

    

    ဓာတ်ပုံ ရင်းမြစ်, MOI ( ၂၀၁၅ ပုံဟောင်း)

    

    ဓာတ်ပုံ ရင်းမြစ်, CNICDS ( ပုံဟောင်း)

12. ၁ ဖေဖော်ဝါရီ ၂၀၂၂ကရင်ပြည်နယ်ဒေသတချို့မှာ တပ်ထောက်ခံပွဲလုပ်နေချိန် အသံတိတ်သပိတ် လှုပ်ရှားမှုကြောင့် မြို့တွင်းတိတ်ဆိတ်နေ

    ကရင်ပြည်နယ် အတွင်းရှိ မြို့နယ် ၇ ခုအနက် ကော့ကရိတ် ၊ မြဝတီ၊ ဘားအံမြို့တို့မှာ အာဏာသိမ်းစစ်တပ်ထောက်ခံသူတွေက စစ်ချီသီချင်းတွေ ဖွင့်ပြီး ပရိတ်တရားဖွင့်လှစ်ကာ မြို့ပေါ်လှည့်လည်တာတွေ ပြုလုပ်နေပေမယ့် မြို့ခံ ပြည်သူတွေအနေနဲ့ ဖေဖော်ဝါရီ ၁ ရက်နေ့ စစ်အာဏာသိမ်းမှု ဆန့်ကျင်တဲ့တစ်နှစ်ပြည့်အသံတိတ်ကြောင့် ငြိမ်သက်နေကြပါတယ်။

    "မနက်ကတည်းက ဘားအံ (ဇွဲကပင်တောင်ခြေက ရွာတချို့နဲ့ စစ်မှုထမ်းဟောင်းတွေက ဘားအံ အထက ၁ ကျောင်းကွင်းမှာ စုပြီး လူတစ်ရာလောက် စစ်ချီသီချင်းဖွင့်ပြီး မြို့ထဲလှည့်နေတယ်။ ရွာသားတွေက ပရိတ်ခွေဖွင့်ပြီး မြို့ပတ်နေတယ်။ မြို့နေပြည်သူက တော့ အေးဆေးပဲ။ ပုံမှန်ပဲ။ အိမ်ထဲ နေတယ် ၊ ဆိုင်မဖွင့်ရင်ဖမ်းမယ်ဆိုတာကြောင့် ဆိုင်ဖွင့်ထားတယ်။ လမ်းသွားလမ်းလာ သိပ်မရှိဘူး၊ ပေါက်ကွဲ တာ ပစ်ခတ်တာ တွေ ရှိလာမှာ စိုးရိမ် တယ်" လို့ ဘားအံမြို့ခံ တစ်ဦးကပြောပါတယ်။

    

    ဓာတ်ပုံ ရင်းမြစ်, CJ

    အလားတူ မြဝတီမြို့ မှာ လည်း အာဏာသိမ်းစစ်တပ်ထောက်ခံတဲ့ အစီအစဉ်အား မဘသ အင်အားစုတွေဦးဆောင်ပြီး ကျေးရွာသားအချို့ ၊ စစ်မှုထမ်းဟောင်းနဲ့ မိသားစုဝင်တွေ လူတစ်ရာခန့် စုဝေးကာ မြို့ပေါ် လှည့် လည် နေကြပါတယ်။

    ဒါပေမဲ့ စစ်ကောင်စီက ဖိအားပေး ဆိုင်ဖွင့် ခိုင်းတဲ့ကြားကပဲ ဒေသခံတချို့ဟာ ဟန်မပျက် ဈေးဆိုင်အချို ဖွင့်လှစ်ထားပေမယ့် အများစု မှာ အသံတိတ် သပိတ်မှာ ပါဝင်လှုပ်ရှားမှုအားကောင်းနေတယ်လို့မြဝတီ အသံတိတ်သပိတ် ဦးဆောင်လှုပ်ရှားသူတစ်ဦးက ဆိုပါတယ်။

    "မြဝတီ မှာ မဘသ နဲ့ စစ်မှုထမ်းဟောင်းက ရွာသားတွေ ခေါ်ပြီး မြို့ပေါ် သီချင်းဖွင့် စစ်ကောင်စီထောက်ခံကြောင်း ပြသနေတာပေါ့။ လူတစ်ရာလောက်ပါပဲ။ မြို့ခံ ကတော့ သိပ်အပြင်မထွက်ကြဘူး။ ကော့ကရိတ် ဘက်လည်း အဲဒီလိုပဲ။ သူတို့လူ အနည်းအကျဉ်း နဲ့ မြို့ပတ် အင်အားပြပေါ့ ။ ပြည်သူက ဘယ်သူမှ မပါဝင်ပါဘူး။ ကြာအင်းဆိပ်ကြီး၊ ဘုရားသုံးဆူ၊ လှိုင်းဘွဲ၊ ဖာပွန် ဘက်ဆို ဘယ်သူမှ အပြင် မထွက်ကြဘူး၊ စစ်ရေး တင်းမာ နေတာ လည်း ပါတာပေါ့" လို့ မြဝတီ အသံတိတ်သပိတ် ဦးဆောင် လှုပ်ရှားနေသူက ပြောပါတယ်။

    

    ဓာတ်ပုံ ရင်းမြစ်, CJ

13. ၁ ဖေဖော်ဝါရီ ၂၀၂၂အသံတိတ်သပိတ်နေ့မှာ လှိုင်သာယာမှာ ကိုဗစ်ကာကွယ်ဆေးလာထိုးခိုင်း, ဆေးမထိုးတဲ့လူတွေ ဧည့်စာရင်းတိုင်ခွင့်မပေးဘူးလို့ အုပ်ချုပ်ရေးမှူးတွေပြော

    ရန်ကုန်၊ လှိုင်သာယာမြို့နယ်၊ သမကုန်းရပ်ကွက်ထဲမှာ ဒီကနေ့ဖေဖော်ဝါရီ ၁ရက်နေ့မှာ စစ်ကောင်စီလက်အောက်က အုပ်ချုပ်ရေးဝန်ထမ်းတွေက ဒေသခံတွေကို ကိုဗစ်ကာကွယ်ဆေးထိုးဖို့ ဖိအားပေးပြောဆိုနေတာလို့ဒေသခံတွေက ဘီဘီစီကိုဆက်သွယ်ပြောပြလာပါတယ်။

    ဒီကနေ့ဖေဖော်ဝါရီ ၁ရက်နေ့စစ်အာဏာသိမ်းတာ တနှစ်ပြည့်တဲ့နေ့မှာ ပြည်သူတွေအသံတိတ်ငြိမ်သက်ခြင်းနဲ့စစ်အာဏာသိမ်းတာကို လက်မခံကြောင်း ဆန္ဒထုတ်ဖော်ဖို့တော်လှန်ရေးအင်အားစုတွေ နှိုးဆော်နေချိန်မှာ အခုလိုဒေသခံပြည်သူတွေ အိမ်အပြင်ထွက်လာအော် ဖိအားပေးတာဖြစ်တယ်လို့လည်း ဒေသခံတွေကပြောပါတယ်။

    “ ဒီနေ့အသံတိတ်သပိတ်မှာပါမယ်ဆိုပြီး မနေ့ကတည်းက ဈေးဝယ်ထားတာ၊ အကုန်လုံးဘယ်သူ့မေးမေးအဲ့ဒီအတိုင်းပဲ၊ ဒါပေမယ့် ဆေးလာမထိုးရင် ဧည့်စာရင်းမပေးဘူးဆိုတော့အကုန်သွားထိုးရတာပေါ့။ ဧည့်စာရင်း လာစစ်တဲ့အချိန် မတိုင်ထားရင် အဲ့နေ့ကဆေးထွက်မထိုးတာပေါ်မှာလေ။ သူတို့ကအဲ့ဒီလို မတရားလုပ်တော့ အပြင်ထွက်ရတယ်။လူလည်းတော်တော်များနေတယ်လို့” ဒေသခံတစ်ဦးက ဘီဘီစီကိုပြောပါတယ်။

    အာဏာသိမ်းတနှစ်ပြည့်နေ့မှာ အသံတိတ်သပိတ်လုပ်ဖို့တော်လှန်ရေးအင်အားစုတွေ နှိုးဆော်နေချိန်မှာပဲ စစ်ကောင်စီဘက်က အသံတိတ်သပိတ်မှာပါဝင်ရင် ထောင်ဒဏ်ချမှတ်မယ့် ဥပဒေတွေနဲ့ထုတ်ပြန်လာတဲ့အပြင် အသံတိတ်သပိတ်မှာ ဆိုင်ပိတ်ဖို့ပြောဆိုတဲ့ဆိုင်ရှင်တွေကို ဖမ်းဆီးတာ၊ နေအိမ်ဆိုင်ခန်းတွေကို ချိပ်ပိတ်တာတွေကို ဆက်တိုက်လုပ်တာတွေရှိခဲ့ပါတယ်။

    ဒီကနေ့ဖေဖော်ဝါရီ ၁ရက်မှာ တော့ နိုင်ငံတဝန်းမှာရှိတဲ့ မြို့ကြီးတွေမှာ ရှိတဲ့ ဈေးဆိုင်ခန်းအများစု ပိတ်ထားတာကိုတွေ့ရပြီး မြို့ကြီးတွေရဲ့လမ်းမတွေမှာလည်း လူသွားလူလာရှင်းလင်းနေတယ်လို့ဒေသခံတွေကပြောပါတယ်။

    

    ဓာတ်ပုံ ရင်းမြစ်, CJ

14. ၁ ဖေဖော်ဝါရီ ၂၀၂၂ရွေးကောက်ပွဲ ကတိ နဲ့ ပတ်သက်လို့ စစ်ခေါင်းဆောင် ဘာပြောလဲ

    ဒီကနေ့ အာဏာသိမ်းနှစ်ပတ်လည်နေ့မှာ စစ်ကောင်စီ ဥက္ကဋ္ဌ ဗိုလ်ချုပ်မှူးကြီး မင်းအောင်လှိုင် က မိန့်ခွန်းထွက်ပြောပြီး အရေးပေါ်ကာလ ပြဋ္ဌာန်းချက်တွေ ပြီးရင် ရွေးကောက်ပွဲပြန်လုပ်ပေးသွားမယ်ဆိုတဲ့ ကတိကို အကောင်အထည်ဖော်နိုင်အောင် အတတ်နိုင်ဆုံးကြိုးစားဆောင်ရွက်နေပါတယ်လို့ ထည့်ပြောပါတယ်။

    ရွေးကောက်ပွဲဆိုတာ တည်ငြိမ်လုံခြုံတဲ့အခြေအနေရှိမှ လွတ်လပ်စွာ မဲပေးနိုင်မှာဖြစ်တယ်လို့သူကပြောလိုက်ပြီး အစိုးရရဲ့ တည်ငြိမ်အေးချမ်းရေး ဆောင်ရွက်ချက်တွေကို ပြည်သူတွေက ပူးပေါင်း ဆောင်ရွက်ကြဖို့ လည်း သူကတိုက်တွန်းပါတယ်။

    စစ်ကောင်စီ ဥက္ကဋ္ဌ ရဲ့ မိန့်ခွန်းဟာ ရွေးကောက်ပွဲကတိတည်ဖို့ကြိုးစားနေတယ်ပြောရင်း တည်ငြိမ်မှုမရှိရင် ရွေးကောက်ပွဲဖြစ်လာမှာမဟုတ်ဘူးဆိုတဲ့ သတင်းစကားကိုပါ ပါးတာလို့ နိုင်ငံရေး အကဲခတ်တွေက သုံးသပ်ပါတယ်။

    အရေးပေါ်ကာလကို အမျိုးသားကာကွယ်ရေးနဲ့လုံခြုံရေးကောင်စီ ရဲ့သဘောတူညီချက်နဲ့ ၆ လ တိုးမြှင့်ကြောင်း စစ်ကောင်စီက ကြေညာထားပြီး လာမယ့် သြဂုတ်လ မှာ ကုန်ဆုံးမှာပါ။ ဖွဲ့စည်းပုံအခြေခံဥပဒေအရ နောက်ထပ် ၆ လ တစ်ကြိမ်ပဲ သက်တမ်းတိုးခွင့်ရှိတော့မှာဖြစ်လို့ ၂၀၂၃ ခုနှစ် ဇန်နဝါရီ ၃၁ မှာ အရေးပေါ်ကာလ သက်တမ်း ကုန်ဆုံးမှာ ဖြစ်ပါတယ်။

    ဒါကြောင့် အရေးပေါ်ကာလပြီးရင် ရွေးကောက်ပွဲပြန်ကျင်းပပေးမယ်ဆိုတဲ့ ကတိ ကို အကောင်အထည်ဖော်ဖို့ အချိန်က တစ်နှစ်ကျော်သာ ရှိတော့မှာဖြစ်ပါတယ်။

    စစ်ကောင်စီ ဥက္ကဋ္ဌ ဟာ ၂၀၂၃ သြဂုတ်လ မှာ ရွေးကောက်ပွဲကျင်းပပေးမယ်လို့ ကတိပြုဖူးပြီး ရွေးကောက်ပွဲကို အချိုးကျကိုယ်စားပြုစနစ်နဲ့ ကျင်းပပေးမယ်လို့ ပြောထားပါတယ်။ လက်ရှိ နိုင်ငံရေးအခြေအနေအတိုင်းသာ ဆက်သွားရင် ရွေးကောက်ပွဲဖြစ်လာဖို့ အခြေအနေမရှိဘူးလို့လည်း သုံးသပ်မှုတွေလည်း ရှိနေတာပါ။

    

    ဓာတ်ပုံ ရင်းမြစ်, cincds

15. ၁ ဖေဖော်ဝါရီ ၂၀၂၂စစ်တပ်အာဏာသိမ်းတနှစ်ပြည့်တဲ့နေ့မှာ အနက်ရောင်ပရိုဖိုင်ပြောင်းတဲ့ကမ်ပိန်းလုပ်

    မြန်မာပြည်တွင်းမှာရှိတဲ့ နိုင်ငံတကာသံရုံးတချို့လည်း အဲဒီကမ်ပိန်းမှာပါဝင်လာပြည်တွင်းမှာ စစ်တပ်ကအာဏာသိမ်းတာ တနှစ်ပြည့်တဲ့ ဒီကနေ့ ၂၀၂၂ ခုနှစ်၊ ဖေဖော်ဝါရီ ၁ရက်နေ့မှာတော့ မြန်မာနိုင်ငံကလူမှုကွန်ရက်သုံးစွဲသူတွေက သူတို့ရဲ့လူမှုကွန်ရက်စာမျက်နှာမှာအနက်ရောင်ပရိုဖိုင်ကိုပြောင်းလဲပြီး ဝမ်းနည်းကြောင်းဖော်ပြကြပါတယ်။

    ဒီထဲမှာ မြန်မာနိုင်ငံအခြေစိုက်နိုင်ငံတကာသံရုံးတွေဖြစ်တဲ့ ဆွစ်ဇာလန်သံရုံး၊ အမေရိကန်သံရုံး၊ ဥရောပသံရုံးနဲ့ဒိန်းမတ်သံရုံးတွေကလည်း သူတို့ရဲ့လူမူကွန်ရက် ဖေ့ဘွတ်ခ်စာမျက်နှာတွေမှာ ဒီကနေ့ မနက်ပိုင်းမှာအနက်ရောင်ပရိုဖိုင်တွေပြောင်းလဲခဲ့ပါတယ်။

    ပြီးခဲ့တဲ့ ၂၀၂၁ ခုနှစ် ဖေဖော်ဝါရီ ၁ရက် ရက် စစ်တပ်ကအာဏာသိမ်းတာကိုစစ်တပ်က ကြေညာလိုက်တဲ့အချိန်မှာလည်း အခုလို အနက်ရောင်ပရိုဖိုင်ပြောင်းလဲတဲ့ကမ်ပိန်းကိုလုပ်ခဲ့ကြပါတယ်။

    ဒီနောက်ပိုင်းမှာလည်း စစ်အာဏာသိမ်းတာကိုဆန့်ကျင်တဲ့ မြေပြင်လှုပ်ရှားမှုတွေနဲ့အတူဒစ်ဂျစ်တယ်ကမ်ပိန်းတွေ၊ ဆိုရှယ်မီဒီယာပေါ်ကနေ အာဏာသိမ်းတာကိုလက်မခံတဲ့လှုပ်ရှားမှုတွေဆက်တိုက်လုပ်ခဲ့ပြီး ပြည်သူအများစုပါဝင်ခဲ့ကြပါတယ်။

    

    ဓာတ်ပုံ ရင်းမြစ်, Embassy of Denmark in Myanmar

16. ၁ ဖေဖော်ဝါရီ ၂၀၂၂စစ်တပ် နောက်ပြန်လှည့်ရမယ်လို့ မြန်မာအာဏာသိမ်းတစ်နှစ်ပြည့်မှာ အမေရိကန် သမ္မတဂျိုးဘိုင်ဒင်ပြော

    မြန်မာပြည်သူတွေရဲ့ ကြိုးစားအားထုတ်မှုကို မမေ့ထားဘဲ ဆက်လက်ထောက်ခံအားပေးသွားမယ်လို့ဆိုမြန်မာနိုင်ငံအတွင်းမှာ စစ်တပ်ကအာဏာသိမ်းပြီးတဲ့နောက် ကလေးငယ်တွေအပါအဝင်အရပ်သားပြည်သူတွေအပေါ် မရေမတွက်နိုင်တဲ့ ရက်စက်မှုတွေလုပ်ခဲ့ပြီး အကြမ်းဖက်မှုတွေ ကျူးလွန်ခဲ့တာကြောင့် အရပ်သားပြည်သူ ၁၅၀၀ ကျော် သေဆုံးခဲ့တယ်လို့ စစ်အာဏာသိမ်းတာတနှစ်ပြည့်တဲ့ ဒီကနေ့၂၀၂၂ ဖေဖော်ဝါရီ ၁ရက်နေ့မှာ အမေရိကန်သမ္မတ ဂျိုးဘိုင်ဒင်က ထုတ်ပြန်ပြောဆိုလာပါတယ်။

    ဒါ့အပြင် လူထောင်ပေါင်းများစွာကိုဖမ်းဆီးထောင်ချထားသလို မတရားတဲ့ ပြစ်ဒဏ်တွေနဲ့ပြစ်ဒဏ်ချမှတ်တာခံရတာတွေကိုလည်း ထုတ်ပြန်ပြောဆိုထားပြီးမြန်မာပြည်တွင်း ပဋိပက္ခဟာလည်း ဆိုးသထက်ဆိုးလာတယ်လို့ ဆိုပါတယ်။

    ဒီကာလမှာ မြန်မာနိုင်ငံတဝန်း သန်းနဲ့ချီတဲ့ ပြည်သူတွေဟာ အသက်ကယ်ဆယ်ရေးအကူအညီတွေအကြီးအကျယ်လိုအပ်နေပြီး မြန်မာစစ်တပ်ဟာ လူသားချင်းစာနာတဲ့အကူအညီတွေကိုပိတ်ပင်ပြီး ဝန်ထမ်းတွေကို တိုက်ခိုက်နေတဲ့လုပ်ရပ်တွေဟာလက်မခံနိုင်တဲ့လုပ်ရပ်တွေဖြစ်တဲ့အတွက် ရှုတ်ချတယ်လို့ထုတ်ပြန်ပါတယ်။

    အမေရိကန်အစိုးရအနေနဲ့ အာဏာသိမ်းခြင်းနဲ့အရပ်သားပြည်သူတွေတိုက်ခိုက်ခံရတာတွေအတွက် တာဝန်ယူမှု၊ တာဝန်ခံမှုရှိစေရေးအတွက် အာဆီယံဒေသအတွင်း အပါအဝင် မိတ်ဖက်၊ မဟာမိတ်တွေနဲ့ အနီးကပ်ဆောက်ရွက်လျက်ရှိတယ်လို့ ဂျိုးဘိုင်ဒင် ကပြောပါတယ်။

    မြန်မာစစ်တပ်အနေနဲ့လက်ရှိလျှောက်နေတဲ့လမ်းကို နောက်ပြန်လှည့်ရမှာဖြစ်ပြီး ဒေါ်အောင်ဆန်းစုကြည်အပါအဝင် သမ္မတဦးဝင်းမြင့်နဲ့ တခြားဒီမိုကရေစီနည်းကျ ရွေးကောက်တင်မြှောက်ထားတဲ့ခေါင်းဆောင်တွေ၊ သတင်းထောက်တွေ၊ အရပ်ဖက်အဖွဲ့အစည်းခေါင်းဆောင်တွေနဲ့တက်ကြွလှုပ်ရှားသူတွေအပါအဝင် တရားမဝင်ဖမ်းဆီးထားတဲ့ သူအားလုံးကို ပြန်လွှတ်ပေးရမယ်လို့ထုတ်ပြန်တောင်းဆိုထားပါတယ်။

    မြန်မာပြည်သူတွေရဲ့ ဒီမိုကရေစီနည်းကျထုတ်ဖော်ပြောဆိုတဲ့အသံတွေကိုဆက်လက်ပိတ်ပင်တားဆီးနေမှာပါက စစ်တပ်နဲ့တပ်ထောက်ခံသူတွေကို အမေရိကန်အနေနဲ့ဒဏ်ခတ်အရေးယူမှုတွေကို ဆက်လက်သွားမယ်လို့ဆိုပါတယ်။

    စစ်အာဏာသိမ်းမှုတနှစ်ပြည့်အထိ မြန်မာပြည်သူပြည်သားတွေရဲ့ ကြိုးပမ်းအားထုတ်မှုတွေကိုမမေ့လျော့ကြောင်းနဲ့ဒီမိုကရေစီနဲ့တရားဥပဒေစိုးမိုးရေးကို မဆုတ်မနစ်ကြိုးစားအားထုတ်နေတဲ့အပေါ်ဆက်လက်ထောက်ခံအားပေးသွားမယ်လို့အမေရိကန် သမ္မတ ဂျိုးဘိုင်ဒင်ကထုတ်ပြန်ပြောဆိုထားပါတယ်။

    

    ဓာတ်ပုံ ရင်းမြစ်, US Embassy

17. ၁ ဖေဖော်ဝါရီ ၂၀၂၂မြစ်ကြီးနားမှာ သေနတ်ပစ်ခတ်ခံရလို့ ကလေးငယ်တစ်ဦးသေဆုံး

    ကချင်ပြည်နယ် ၊ မြစ်ကြီးနားမြို့ လယ်ကုန်းရပ်ကွက် ၊ ရဲတပ်ရင်း ၃၀ မှာ ဒီကနေ့ ဖေဖော်ဝါရီ ၁ ရက် မနက်ပိုင်းက ပေါက်ကွဲမှုနဲ့အတူ ပစ်ခတ်မှုတွေဖြစ်ခဲ့ပြီးနောက် တပ်ရင်းဘေးအိမ်က ကလေးတစ်ဦးကိုသေနတ်ကျည်ထိမှန် သေဆုံးခဲ့တယ်လို့ အဲဒီအနီးနေထိုင်သူတွေကပြောပါတယ်။

    ’’ကလေးက ၈နှစ်သားယောက်ကျားလေးပါ ။ ကလေးရဲ့ရင်ဝကို သေနတ်မှန်တာပါ။ ရဲတပ်ရင်းနဲ့သူတို့အိမ်က ဝင်းထရံဘဲခြားထားတာ။ကလေးကဆုံးသွားပါပြီ။ မနက် ၅နာရီနဲ့ ၆နာရီလောက်မှာဖြစ်သွားတာပါ ’’ လို့ဖြစ်စဉ်နားကိုရောက်သွားသူကပြောပါတယ်။

    ပေါက်ကွဲသံဖြစ်ပြီးနောက် မှာ သေနတ်ပစ်ခတ်မှုတွေ ဖြစ်ခဲ့တာလို့ပြောပါတယ်။ လက်ရှိမှာတော့ စစ်ကောင်စီတပ်ဖွဲ့ဝင်တွေနဲ့ရဲတပ်ဖွဲ့ဝင်တွေက အဲဒီအိမ်ကိုရောက်ရှိနေပြီး စစ်ဆေးတာတွေလုပ်နေတယ်လို့ အဲဒီအနီးနေထိုင်သူတွေကပြောပါတယ်။

    

    ဓာတ်ပုံ ရင်းမြစ်, CJ

18. ၃၁ ဇန်နဝါရီ ၂၀၂၂နိုင်ငံခြားကပြန်လာသူ ၂၇ ဦးမှာ အိုမီခရွန်ထပ်မံတွေ့

    နိုင်ငံခြားကပြန်လာသူ ၂၇ ဦးမှာ ကိုရိုနာဗိုင်းရပ်စ် ဗီဇပြောင်းမျိုးကွဲ အိုမီခရွန် ထပ်မံတွေ့ရှိတယ်လို့ စစ်ကောင်စီ ကျန်းမာရေးဝန်ကြီးဌာနက သတင်းထုတ်ပြန်ပါတယ်။

    ဒီထုတ်ပြန်ချက်အရ ဇန်နဝါရီလ ၃၁ ရက်နေ့ အထိ မြန်မာနိုင်ငံမှာ အိုမီခရွန်တွေ့သူ စုစုပေါင်း ၃၁၀ ဦးရှိလာပြီ ဖြစ်ပါတယ်။

    ဒီကနေ့ အိုမီခရွန်တွေ့သူတွေဟာ ကယ်ဆယ်ရေးလေယာဉ်တွေနဲ့ ပြန်လာသူ မြန်မာ ၂၃ ဦး နဲ့ နိုင်ငံခြားသား ၄ ဦး တို့ဖြစ်တယ်လို့ ထုတ်ပြန်ချက်က ဆိုပါတယ်။

    ကယ်ဆယ်ရေးလေယာဉ်တွေနဲ့ ပြန်လာသူတွေကို စစ်ဆေးရာမှာ မြန်မာနိုင်ငံကို ရောက်လာကြတဲ့ စင်ကာပူနိုင်ငံမှ ၁၄ ဦး၊ မလေးရှား နိုင်ငံမှ ၅ ဦး၊ ထိုင်းနိုင်ငံမှ ၄ ဦး၊ ကိုရီးယားနိုင်ငံမှ ၃ ဦး နဲ့ အိန္ဒိယနိုင်ငံမှ ၁ ဦး တို့ဖြစ်တယ်လို့ ဆိုပါတယ်။

    မြန်မာနိုင်ငံမှာ ကိုဗစ်မျိုးကွဲသစ် အိုမီခရွန်ရောဂါပိုး ပြည်တွင်းကူးစက်မှု စနေပြီလို့ ဇန်နဝါရီ ၂၈ ရက် စစ်ကောင်စီကျန်းမာရေးဝန်ကြီးဌာန ထုတ်ပြန်ခဲ့ပါတယ်။

    စစ်ကိုင်းတိုင်းထဲက ကလေးနဲ့ တမူးမြို့နယ်တွေမှာ အိုမီခရွန်ရောဂါပိုး တွေ့ရှိထားတာဖြစ်ပြီး ကလေးမြို့နယ်မှာတော့ လူထောင်နဲ့ချီ စစ်ရှောင်နေတာတွေရှိတာကြောင့် အစုလိုက် ရောဂါပိုးကူးစက်မှုရှိမှာကို စိုးရိမ်နေကြပါတယ်။

    စစ်ကိုင်းတိုင်းထဲမှာရှိပြီး အိန္ဒိယနယ်စပ်နဲ့ အနီးမှာရှိတဲ့ ဒီမြို့တွေကို ဇန်နဝါရီ ၂၈ ရက်နေ့က စပြီး တိုင်းစစ်ကောင်စီက မြို့ အဝင်အထွက်တွေ ပိတ်ထားခဲ့ပါတယ်။

    

    ဓာတ်ပုံ ရင်းမြစ်, MPA

19. ၃၁ ဇန်နဝါရီ ၂၀၂၂စစ်ကောင်စီက အရေးပေါ်အခြေအနေကာလ နောက်ထပ် ၆ လ သက်တမ်းတိုး

20. ၃၁ ဇန်နဝါရီ ၂၀၂၂TNLA ၊ KIA နဲ့ ကိုးကန့်တပ်ဖွဲ့တပ်တွေလှုပ်ရှားရာ ကျေးရွာထဲ စစ်ကောင်စီတပ်တွေ ဝင်ရောက်, တိုက်ပွဲပြန်ဖြစ်မှာကိုဒေသခံတွေစိုးရိမ်

    ရှမ်းပြည်နယ်မြောက်ပိုင်း၊ ကွတ်ခိုင်မြို့နယ် အရှေ့မြောက်ပိုင်းမှာ ရှိတဲ့ ကာလိုင် ကျေးရွာထဲကို ဇန်နဝါရီ ၃၀ ရက် ညနေပိုင်း ၃ နာရီလောက်မှာ စစ်ကောင်စီတပ်အင်အား ၂၀၀ခန့် ဝင်ရောက်လာတယ်လို့ဒေသခံတွေက ပြောပါတယ်။

    အဲဒီကျေးရွာဟာ တအာန်းအဖွဲ့TNLA၊ ကချင်လွတ်မြောက်ရေးတပ် KIA နဲ့ ကိုးကန့်တပ်ဖွဲ့MNDAA တို့ လှုပ်ရှားသွားလာရာနယ်မြေတစ်ခုဖြစ်ပါတယ်။

    စစ်ကောင်စီတပ်တွေ ရွာထဲဝင်ရောက်လာချိန် ကုန်းချမ်းရွာလမ်းမကနေ ကာလိုင်ရွာထဲကို ဝင်ရောက်မယ့် ဒေသခံတွေကိုလည်း ဖြတ်သန်းခွင့်မပေးဘဲ လမ်းအသုံးပြုခွင့်ပိတ်ပင်ခဲ့တယ်လို့ ဒေသခံတွေက ပြောပါတယ်။

    အဲဒီနောက် စစ်ကောင်စီတပ်တွေဟာ ရွာထဲမှာရှိတဲ့ စစ်တပ်လက်အောက်ခံ ပြည်သူ့စစ်စခန်းဟောင်း၂ ခုကို ဓာတ်ပုံရိုက်ယူပြီးနောက် ရွာထဲကနေ ပြန်လည်ထွက်ခွာသွားတယ်လို့ ဒေသခံတွေကပြောပါတယ်။

    ရွာအတွင်းမှာရှိတဲ့ စစ်ကောင်စီတပ်စခန်း ၂ ခုဟာ စစ်ကောင်စီလက်အောက်ခံ ကောင်းခါးပြည်သူ့စစ်စခန်းနဲ့ ကွတ်ခိုင်ပြည်သူ့စစ်ခန်းတွေဖြစ်ပြီး စစ်တပ်ကအာဏာသိမ်းပြီးနောက် ၂၀၂၁ ခုနှစ် ဇူလိုင်လထဲမှာ စွန့်ခွာသွားခဲ့တဲ့စခန်းဟောင်းတွေလည်း ဖြစ်ပါတယ်။

    ကာလိုင်ကျေးရွာအနီးမှာတော့ စစ်ဘေးရှောင်စခန်း ၂ ခုရှိပြီး စစ်ရှောင်တွေဟာ တိုက်ပွဲဖြစ်လာမှာကို စိုးရိမ်နေကြသလို တိုက်ပွဲတွေဖြစ်လာရင် လက်နက်ကြီးတွေနဲ့ ထိမှန်မှာကို ပိုပြီးစိုးရိမ်တယ်လို့ စစ်ရှောင်စခန်းမှာ နေထိုင်သူတစ်ဦးက ပြောပါတယ်။

    

    ဓာတ်ပုံ ရင်းမြစ်, CJ