ကိုဗစ်ကူးစက်မှုကြောင့် အာဆီယံ ဘောလုံး U23 ပြိုင်ပွဲက မြန်မာနုတ်ထွက်

တိုက်ရိုက် ထုတ်လွှင့်ချက်

1. ၂၉ ဇန်နဝါရီ ၂၀၂၂အာဆီယံ အထူးသံ မြန်မာလာဖို့ ပြင်ဆင်နေပြီလို့ပြော

   ကမ္ဘောဒီးယား နိုင်ငံခြားရေးဝန်ကြီး၊ အာဆီယံအထူးကိုယ်စားလှယ် ပရာ့ခ်ဆိုခွန်းက သူ့ရဲ့ ပထမဆုံး မြန်မာခရီးစဥ်အတွက် ပြင်ဆင်နေပြီလို့ ကမ္ဘောဒီးယား နိုင်ငံခြားရေးဝန်ကြီးဌာနက ထုတ်ပြန်ချက်မှာ ဖော်ပြထားပါတယ်။

   မြန်မာနိုင်ငံကိုလူသားချင်းစာနာမှုအကူအညီတွေပေးပို့ရေးအတွက်အာဆီယံနိုင်ငံခြားရေးဝန်ကြီးတွေနောက်လမှာ တွေ့ဆုံကြမယ်လို့လည်း အာဆီယံ အလှည့်ကျ ဥက္ကဋ္ဌ ကမ္ဘောဒီးယားနိုင်ငံက စနေနေ့မှာ ပြောပါတယ်။

   ကမ္ဘောဒီးယား နိုင်ငံခြားရေးဝန်ကြီးရဲ့ အဓိက ဦးစားပေး လုပ်ငန်းတွေထဲမှာ မြန်မာ့အရေး အာဆီယံ ဘုံသဘောတူညီချက် ငါးရပ် အကောင်အထည်ဖော်ဖို့နဲ့ လာမယ့် အာဆီယံ နိုင်ငံခြားရေး ဝန်ကြီးတွေ တွေ့ဆုံပွဲမှာ ဆွေးနွေးဖို့တို့ ဖြစ်တယ်လို့ ဆိုပါတယ်။

   ဒါ့အပြင် နိုင်ငံခြားရေးဝန်ကြီးတွေ အစည်းအဝေးကို ဖေဖော်ဝါရီ ၁၆ ရက်နဲ့ ၁၇ ရက်မှာ ကျင်းပဖို့ စီစဥ်ထားတယ်လို့ ဆိုပါတယ်။

   ဒီလထဲမှာ ကျင်းပဖို့ ရှိတဲ့ အာဆီယံ နိုင်ငံခြားရေး ဝန်ကြီးတွေရဲ့ အစည်းအဝေးကိုတော့ ရွှေ့ဆိုင်းခဲ့ရပြီး ဒါဟာ ဝန်ကြီးတချို့ တက်ရောက်ဖို့ အခက်အခဲတွေ ရှိနေခဲ့တာကြောင့် ဖြစ်တယ်ဆိုပြီး ထုတ်ပြောထားပါတယ်။

   ကမ္ဘောဒီးယား နိုင်ငံဟာ မြန်မာအာဏာသိမ်း စစ်ကောင်စီကို အာဆီယံအဖွဲ့ဝင် နိုင်ငံတချို့နဲ့ နိုင်ငံတကာအသိုင်းအဝိုင်းက ဖိအားပေးဆက်ဆံနေတဲ့ကြားက ဝန်ကြီးချုပ် ဟွန်ဆန်ကိုယ်တိုင် ဇန်နဝါရီလ အစောပိုင်းက လာရောက်ခဲ့တဲ့ သံတမန်ဆက်ဆံရေးကို တည်ဆောက်ထားခဲ့ပါတယ်။

   

   ဓာတ်ပုံ ရင်းမြစ်, MOFA- Cambodia

2. ၂၉ ဇန်နဝါရီ ၂၀၂၂မြန်မာမှာ အိုမီခရွန် ပြည်တွင်းကူးစက်မှု စတင်ပြီ, ကလေးတမူးမှာ ကူးစက်ခံရသူ ၇၀ ကျော်တွေ့ရှိ

   မြန်မာနိုင်ငံမှာ ကိုဗစ်မျိုးကွဲသစ် အိုမီခရွန်ရောဂါပိုး ပြည်တွင်းကူးစက်မှုစနေပြီလို့ မနေ့ဇန်နဝါရီ (၂၈)ရက်မှာ စစ်ကောင်စီရဲ့ကျန်းမာရေးဝန်ကြီးဌာန ထုတ်ပြန်ချက်အရသိရပါတယ်။

   စစ်ကိုင်းတိုင်းထဲက ကလေး၊ တမူးမြို့နယ်တွေမှာ အိုမီခရွန်ရောဂါပိုး တွေ့ရှိထားတာဖြစ်ပြီး ကလေးမြို့နယ်မှာတော့ လူထောင်နဲ့ချီစစ်ရှောင်နေတာတွေရှိတာကြောင့် အစုလိုက် ရောဂါပိုးကူးစက်မှုရှိမှာကို စိုးရိမ်နေကြပါတယ်။ မနေ့ ဇန်နဝါရီ ၂၈ ရက် တရက်တည်းမှာတင် ကိုဗစ်အိုမီခရွန်ကူးစက်ခံရသူ (၇၂)ဦးတွေ့ရှိခဲ့ပါတယ်။ အဲ့ဒီထဲမှာ စစ်ကိုင်းတိုင်း တမူးမြို့ထဲက (၄၈)ဦးနဲ့ ကလေးမြို့က အယောက် (၂၀)။ အဲ့ဒီဒေသတွေကနေ ရောက်ရှိလာပြီး တဆင့် ကူးစက်ခံရသူ (၃)ဦး၊ ကိုဗစ်သံသယလူနာတွေထဲက (၁)ဦးတို့မှာ အိုမီခရွန်တွေ့ရှိခဲ့တာပါ။

   ပြည်တွင်းအိုမီခရွန်ကူးစက်ခံရသူ တွေကို ဘယ်လိုကုသပေးနေတယ်၊ ကူးစက်မြန်ကိုဗစ်ရောဂါပိုးသစ်ဖြစ်တာကြောင့် ထပ်မံပြန့်ပွားတာ မရှိအောင် ဘယ်လိုထိန်းချုပ်နေတယ်ဆိုတာနဲ့ပတ်သက်ပြီး စစ်ကောင်စီကျန်းမာရေးဌာနဘက်က တိတိကျကျ ထုတ်ပြန်တာမရှိသလို၊ ဘီဘီစီဘက်က မေးမြန်းဖို့ကြိုးစားရာမှာလည်း ဇန်နဝါရီ ၂၉ ရက်ညနေပိုင်းထိ ဆက်သွယ်လို့မရသေးပါဘူး။

   ကျန်းမာရေးဝန်ကြီးဌာနရဲ့ တာဝန်ရှိသူတစ်ဦးဖြစ်တဲ့ဒေါက်တာခင်ခင်ကြီးကတော့ သူ့ရဲ့လူမှုကွန်ရက်စာမျက်နှာမှာ "ကိုဗစ်ဗီဇပြောင်းပိုး အိုမီခရွန်ပြည်တွင်းကူးစက်မှုစတင်ပြီဖြစ်လို့ကိုဗစ်စည်းကမ်းတွေကိုအထူးလိုက်နာဖို့လိုအပ်တယ်' လို့ရေးသားထားပါတယ်။

   

   ဓာတ်ပုံ ရင်းမြစ်, CJ

3. ၂၉ ဇန်နဝါရီ ၂၀၂၂ကယားပြည်နယ်ကို ဘယ်သူတွေအုပ်ချုပ်နေသလဲ

4. ၂၉ ဇန်နဝါရီ ၂၀၂၂KNU တပ်မဟာ ၆ ဒူးပလာခရိုင် ဥက္ကဋ္ဌ ပဒိုစောရွှေမောင်း တာဝန်ကနေ နုတ်ထွက်, သူ့နေရာမှာ တပ်မဟာမှူး ဗိုလ်မှူးချုပ်ဆာမိ တာဝန်ယူ

   ကရင်အမျိုးသားအစည်းအရုံး ကေအဲန်ယူ ဒူးပလာခရိုင် ဥက္ကဋ္ဌ ပဒိုစောရွှေမောင်းဟာ ဇန်နဝါရီ ၂၇ ရက်က ကျင်းပတဲ့ ခရိုင်အရေးပေါ်အစည်းအဝေးမှာ သူ့နုတ်ထွက်စာကို တင်ပြခဲ့တာဖြစ်ပြီး သူ့နေရာမှာ ကေအဲန်ယူရဲ့ ဖွဲ့စည်းပုံအရ တပ်မဟာ ၆ ရဲ့ တပ်မဟာမှူး ဗိုလ်မှူးချုပ် ဆာမိက ကျန်ရှိတဲ့ သက်တမ်း ၂ နှစ်ကို ဆက်လက်တာဝန်ယူမယ်လို့ ကေအဲန်ယူဗဟိုက နိုင်ငံခြားရေးတာဝန်ခံ ပဒိုစောတောနီးက ဘီဘီစီကိုပြောပါတယ်။

   "ဇန်နဝါရီ ၂၇ ရက်မှာ ခရိုင်ကွန်ဂရက်အရေးပေါ်အစည်းအဝေးခေါ်တယ်လို့သိရတယ်။ အဲဒီမှာ သူက အနားယူဖို့နုတ်ထွက်စာတင်ပြတယ်လို့ သိရတယ်။ ခရိုင်ကွန်ဂရက်ကလည်း ဒါကို သဘောတူခွင့်ပြုလိုက်တာပေါ့။ ဘာကြောင့် အနားယူတယ်ဆိုတာတော့ အတိအကျတော့ မသိဘူး။ ဖြစ်နေတဲ့ အကြောင်းတရားတွေနဲ့ ဆက်စပ်မှုလည်း ရှိနိုင်တာပေါ့။ ကျွန်တော်တို့ ကေအဲန်ယူမှာက ကွန်ဂရက်သက်တမ်းက လေးနှစ်တစ်ကြိမ်ပေါ့။ သူက အခု ကျန်ရှိတဲ့ သက်တမ်း ၂ နှစ်ကိုအနားယူဖို့တင်ပြလာတာပေါ့။ ဒါကြောင့် ဖွဲ့စည်းပုံအရ တပ်မဟာ ၆ ရဲ့ တပ်မဟာမှူးတွေက ခရိုင်ဒုဥက္ကဋ္ဌ ဖြစ်တဲ့အခါကျတော့ ဥက္ကဋ္ဌ အနားယူတော့ သူက ကျန်ရှိသက်တမ်း ၂ နှစ်ကို ဆက်လက်တာဝန်ထမ်းဆောင်ရမှာပေါ့" လို့ ပဒိုစောတောနီးက ရှင်းပြပါတယ်။

   ပဒိုစောရွှေမောင်းဟာ ကော့ကရိတ် မြို့နယ်အတွင်း ဒေသကာကွယ်ရေးတပ် PDF တွေနဲ့ အမျိုးသားညီညွတ်ရေးအစိုးရ NUG အဖွဲ့ဝင်တွေကို လက်ခံမထားဖို့ ဆိုပြီး သူ့လက်မှတ်နဲ့ ပြီးခဲ့တဲ့နှစ်သြဂုတ် ၂၄ ရက် ရက်စွဲနဲ့ ညွှန်ကြားစာထွက်ပေါ်ခဲ့ပါတယ်။ ဒါ့အပြင် နိုင်ငံရေးပြဿနာကို နိုင်ငံရေးနည်းဖြင့် ဖြေရှင်းရမည် ဆိုသည့် KNU ကွန်ဂရက်က ချမှတ်ထားတဲ့ ဆုံးဖြတ်ချက်မပြောင်းသေးကြောင်းနဲ့ စစ်ရေးနည်းလမ်းကိုတက်နိုင်သမျှ ရှောင်ကြဖို့ကိုလည်း သူက အဲဒီစာထဲမှာတိုက်တွန်းခဲ့ပါတယ်။

   ဒီဇင်ဘာလလယ်ကစလို့ လေးကေ့ကော်ဒေသတွင်း စစ်ကောင်စီတပ်တွေဝင်ရောက်စီးနင်းလို့တိုက်ပွဲတွေဖြစ်လာတဲ့နောက်ပိုင်းမှာလည်း စစ်ရေးနည်းနဲ့ ဖြေရှင်းတဲ့အပေါ် သူ့သဘောထားမှတ်ချက်တွေကိုလည်း ထုတ်ပြန်ခဲ့တာရှိခဲ့ပါတယ်။

   အာဏာသိမ်းပြီးနောက်သူ့ရဲ့စစ်ရေးနဲ့ ဒေသအရေးထုတ်ပြန်ချက်တွေက အောက်ခြေမှာ ဖြစ်ပွားနေတဲ့ စစ်ရေးတင်းမာမှုအခြေအနေတွေနဲ့ ကွဲလွဲချက်တွေရှိတဲ့အပေါ် ဝေဖန်မှုတွေလည်းထွက်ပေါ်ခဲ့ပါတယ်။ ခုလို သူ နုတ်ထွက်ဖို့ဆုံးဖြတ်တာက ဒီလိုအခြေအနေတွေနဲ့ သက်ဆိုင်လားဆိုတာကို ပဒိုစောတောနီးက ခုလိုတုံ့ပြန်ပါတယ်။

   "ဒါကတော့ သေချာတော့ပြောလို့တော့မရဘူး။ ဒါပေမဲ့ အဲဒီလိုတွေ သူ ထုတ်ပြန်ပြောဆိုတာတွေက လေးကေ့ကော်ကိစ်္စမှမဟုတ်ပါဘူး။ အာဏာသိမ်းပြီးတဲ့နောက် မေလလောက်တည်းက ဖြစ်လာတာပါ။ ဒါကိုတော့ ထူးထူးခြားခြား ပြောစရာတော့မရှိဘူး။ ဗဟိုကော်မတီရဲ့ မူဝါဒအရလည်း ဆိုင်ရာ ပုဂ္ဂိုလ်ရေးသဘောထားတွေကို ထုတ်ဖော်ပြောကြားခွင့်ရှိပါတယ်။ ဒါပေမဲ့ အဲဒီလိုပြောကြားမှုတွေဟာ ရိုက်ခတ်မှုတွေရှိတာတော့ အမှန်ပါပဲ။" လို့ ပဒိုစောတောနီးက ဘီဘီစီကိုပြောပါတယ်။

   လက်ရှိမှာတော့ စစ်ကောင်စီတပ်တွေဟာ လေးကေ့ကော်ကနေတစ်ဆင့် ကော့ကရိတ်ဘက်နေ ဘုရားသုံးဆူ ကြာအင်းဆိပ်ကြီးဒေသအထိ စစ်ကြောင်းထိုးဝင်ရောက်မှုတွေရှိနေပြီး အဲဒီမှာ မြို့အဝင်အထွက်တွေ၊ ယာဉ်တွေကို အစစ်အဆေးတွေတင်းကျပ်နေတာကြောင့် စစ်ရေးတင်းမာလာပြီး တိုက့်ွဲတွေဖြစ်လာမှာကို ဒေသခံတွေက စိုးရိမ်နေကြပါတယ်။

   

   ဓာတ်ပုံ ရင်းမြစ်, KIC

5. ၂၈ ဇန်နဝါရီ ၂၀၂၂နိုင်ငံရေးပါတီအချို့က ပါတီလုပ်ငန်းတွေ ပြင်ဆင်လုပ်ဆောင်နေ

   မြန်မာနိုင်ငံအနှံ့ စစ်ကောင်စီကို ဆန္ဒပြမှုတွေနဲ့ လက်နက်စွဲကိုင် တိုက်ခိုက်မှုတွေ ရှိနေချိန်မှာပဲ နိုင်ငံရေးပါတီတချို့က ပါတီလုပ်ငန်းစဥ်တွေကို ပြင်ဆင်လုပ်ဆောင်နေကြပါတယ်။

   ၂၀၂၀ ရွေးကောက်ပွဲမှာ ဒုတိယနေရာအများဆုံး ရရှိထားတဲ့ ပြည်ထောင်စုကြံ့ခိုင်ရေးနဲ့ ဖွံ့ဖြိုးရေးပါတီကဆိုရင် ပါတီတွင်း တိုင်းအဆင့်ခေါင်းဆောင်တွေကို ပြန်လည်ရွေးကောက်တင်မြှောက်တာမျိုးတွေကို ဒီရက်ပိုင်းမှာ လုပ်ဆောင်နေပါတယ်။

   ဒီကနေ့အထိ ရန်ကုန်၊ ကရင်ပြည်နယ်နဲ့ မန္တလေးတိုင်းအတွင်းက ဗဟိုကော်မတီဝင်၊ ခေါင်းဆောင်တွေကို ရွေးချယ် တင်မြှောက်တာတွေကိုပြုလုပ်ပြီး ကျန်တဲ့တိုင်းနဲ့ပြည်နယ်တွေကိုလည်း ဆက်တိုက်လုပ်ဆောင်ဖို့ ရှိနေတယ်လို့ အဲဒီ ပါတီကနေသိရပါတယ်။

   ဒီလုပ်ဆောင်မှုတွေဟာ ပါတီရဲ့ ဖွဲ့စည်းပုံ စည်းမျဥ်းတွေအရ လုပ်ဆောင်တာဖြစ်တယ်လို့ ပါတီပြောခွင့်ရသူ ဒေါက်တာနန္ဒလှမြင့်က ပြောပါတယ်။

   ဒါဟာ စစ်တပ်က ကျင်းပပေးမယ်လို့ ပြောထားတဲ့ ရွေးကောက်ပွဲအတွက် ပြင်ဆင်တာဖြစ်တယ်လို့ ပြောဆိုကြတာတွေလည်း ရှိပါတယ်။

   ပြီးခဲ့တဲ့ရွေးကောက်ပွဲရဲ့ မဲ ၈၀ ရာခိုင်နှုန်းကျော် အပြတ်အသတ် အနိုင်ရထားတဲ့ အမျိုးသားဒီမိုကရေစီအဖွဲ့ချုပ်က ခေါင်းဆောင်တွေ၊ ပါတီဝင်တွေကိုတော့ မဲမသမာမှုလုပ်တယ်ဆိုတဲ့ စွပ်စွဲချက်နဲ့ စစ်ကောင်စီက ဖမ်းဆီးတာမျိုးတွေ၊ ပုဒ်မမျိုးစုံနဲ့ တရားစွဲဆိုထားတာ၊ နေရာဒေသမရွေးက ပါတီအပေါ်ထောက်ခံကြသူတွေအပေါ် ဖိနှိပ်တာတွေကို ဆက်တိုက်လုပ်နေတာတွေ ရှိနေပါတယ်။

   ရွေးကောက်ပွဲအတွင်း လူထုထောက်ခံမှု တတိယအများဆုံးရခဲ့တဲ့ ရှမ်းတိုင်းရင်းသားပါတီ SNLDအနေနဲ့ကတော့ ကျင်းပပေးမယ်ဆိုတဲ့ ရွေးကောက်ပွဲက သတ်မှတ်ထားချိန်မှာဖြစ်နိုင် မဖြစ်နိုင်ဆိုတာ မသေချာတာကြောင့် SNLD အနေနဲ့တော့ ရွေးကောက်ပွဲအတွက် ၂၀၂၂ နှစ်ကုန်ပြီးမှသာ အခြေအနေပေါ်မူတည်ပြီး ပြင်ဆင်တာမျိုး ရှိနိုင်မယ်လို့ ပါတီဥက္ကဌ ဦးစိုင်းညွန့်လွင်က ပြောဆိုပါတယ်။

   စစ်ကောင်စီဘက်ကတော့ ရွေးကောက်ပွဲကို ၂၀၂၃ခုနှစ်မှာ ကျင်းပပေးမယ်လို့ ပြောဆိုထားပြီး အရငကျင်းပခဲ့တဲ့ အနိုင်ရ အကုန်ယူစနစ် နဲ့ မဟုတ်ဘဲ အချိုးကျကိုယ်စားပြုစနစ် ပီအာနဲ့ ကျင်းပမယ်လို့လည်း ဗိုလ်ချုပ်ဇော်မင်းထွန်းက ပြောဆိုထားပါတယ်။

   

   ဓာတ်ပုံ ရင်းမြစ်, USDP

6. ၂၈ ဇန်နဝါရီ ၂၀၂၂ပီအာစနစ် ရွေးကောက်ပွဲအတွက် ပြင်ဆင်နေကြပြီလား

7. ၂၈ ဇန်နဝါရီ ၂၀၂၂လွိုင်ကော် စစ်ရှောင်အားလုံး နေရပ်မပြန်နိုင်သေး

   နယ်မြေပြန်တည်ငြိမ်လာလို့ ကရင်နီ (ကယား)ပြည်နယ် လွိုင်ကော်မြို့နဲ့ အနီးတဝိုက် ရွာတွေက စစ်ရှောင်တွေ ရာချီပြီး နေရပ်ပြန်လာပြီလို့ စစ်ကောင်စီဘက်က သတင်းထုတ်ပြန်လာပေမဲ့ စစ်ဆေးဖမ်းဆီးမှုတွေကြောင့် စစ်ရှောင်အားလုံး နေရပ်မပြန်နိုင်သေးဘဲ ဖြစ်နေပါတယ်။

   စစ်ကောင်စီရဲ့ မနေ့က သတင်းထုတ်ပြန်ချက်ထဲမှာတော့ ပြည်သူ ၄၃၉ ဦး နေရပ်ကို အသီးသီးပြန်လာပြီး နေထိုင်နေပြီလို့လည်း ဆိုပါတယ်။

   အခုလို ပြန်လည်ထိန်းချုပ်နိုင်ပြီဆိုတာ တဝက်တော့ မှန်ပေမယ့် စစ်ကောင်စီဘက်က တအိမ်ဝင်တအိမ်ထွက် စစ်ဆေးတာတွေ လူငယ်တွေကို ဖမ်းဆီးတာတွေ ရှိနေတဲ့အတွက် စစ်ဘေးရှောင်တိုင်းတော့ အိမ်မပြန်နိုင်သေးဘူးလို့ ကရင်နီလူ့အခွင့်အရေးအဖွဲ့ရဲ့ ညွန်ကြားရေးမှူး ကိုဗညားက ဆိုပါတယ်။

   လွိုင်ကော်မြို့တွင်း နာနတ်တော ရပ်ကွက် အစွန်နဲ့ ရေယို ကျေးရွာထောင့်က အိမ်သာကျင်းဟောင်းထဲမှာ သတ်ဖြတ်ခံထားရတဲ့ လူငယ် အလောင်း ၆ လောင်းကို ဇန်နဝါရီလ ၂၇ ရက်နေ့က တွေ့ရှိရသလို လွိုင်ကော်မြို့ ထူဒူငံသ ရွာမှာလည်း သေဆုံးနေတဲ့ သားအမိ နှစ်ယောက် ရုပ် အလောင်းကို တွေ့ရှိခဲ့ရတယ်လို့ ကိုဗညားက ဆိုပါတယ်။

   ဒီအခြေအနေတွေကြောင့် နေရပ်မပြန်ရဲသေးတဲ့စစ်ရှောင်တွေကတော့ ကျန်းမာရေး၊ စားသောက်ရေးအတွက် ရှေ့ဆက် စိတ်ပူပန်နေရတဲ့ အနေအထားရှိနေတယ်လို့ စစ်ဘေးရှောင်တဦးက ပြောပါတယ်။

   လူမှုကွန်ရက် စာမျက်နျာတွေပေါ်မှာတော့ ကရင်နီစစ်ဘေးရှောင်ရွာတချို့မှာ ဆန်အစား ပြောင်းကောက်ကို စားသာက်နေရတယ်လို့ ပျံ့နှံ့နေပါတယ်။

   

   ဓာတ်ပုံ ရင်းမြစ်, CJ

8. ၂၈ ဇန်နဝါရီ ၂၀၂၂နိုင်ငံတဝန်း ခရိုင်တွေတိုးချဲ့ဖို့ စစ်ကောင်စီပြင်ဆင်

9. ၂၈ ဇန်နဝါရီ ၂၀၂၂မင်းတပ်မှာ စစ်ဘေးရှောင်တွေ နေအိမ်ပြန်မလာရင် အိမ်တွေချိပ်ပိတ်မယ်လို့ စစ်ကောင်စီကြေညာ

   ဒေသခံအများစု စစ်ဘေးတိမ်းရှောင်နေကြတဲ့ ချင်းပြည်နယ်မင်းတပ်မြို့မှာ ဒေသခံတွေ နေအိမ်ကိုပြန်လာနေထိုင်တာမလုပ်ရင် အိမ်တွေကို ပြည်သူပိုင်သိမ်းယူပြီး ချိပ်ပိတ်မယ်လို့ စစ်ကောင်စီဘက်က လိုက်ကြေညာတာတွေရှိတယ်လို့ဒေသခံတွေကပြောပါတယ်။

   စစ်ဘေးရှောင်နေတဲ့ ဒေသခံတွေနေအိမ်တွေကို ပြန်လာနေထိုင်ဖို့၊ အိမ်တွေကိုသန့်ရှင်းရေးလာလုပ်ဖို့နဲ့ ပြန်မလာရင် အိမ်တွေကို ချိပ်ပိတ်သော့ခတ်မယ်လို့လှည့်လှည်ကြေညာနေတယ်လို့ဒေသခံတွေကပြောပါတယ်။

   အခုလိုစစ်ကောင်စီဘက်က ဒေသခံတွေကို နေအိမ်တွေကိုပြန်လာနေထိုင်ဖို့ဖိအားပေးတဲ့အပြင် လာမယ့် ဖေဖော်ဝါရီ ၁ ရက်နေ့မှာလည်းဆိုင်ပိတ်တဲ့ သူတွေကိုအရေးယူမှုတွေလုပ်မယ်လို့ ထည့်သွင်းကြေညာသွားတယ်လို ပြောပါတယ်။

   မင်းတပ်မြို့မိမြို့ဖတွေ ၊ ဘာသာရေးခေါင်းဆောင်တွေအနေနဲ့တော့ ဒေသခံတွေပြန်လာရင် အန္တာရယ်ကင်းအောင် အကြိုအပို့တွေလုပ်ပေးဖို့နဲ့လမ်းမှာဖမ်းဆီးခံရတာတွေမဖြစ်အောင် ကြိုးစားဆောင်ရွက်ပေးနေတယ်လို့ပြောပါတယ်။

   လက်ရှိမှာတော့ မင်းတပ်မြို့ကဒေသခံအများစုဟာ ကျေးရွာတွေကို စစ်ဘေးတိမ်းရှောင်နေပြီး မင်းတပ်-မတူပီလမ်းတလျှောက်မှာလည်း နှစ်ဖက်တိုက်ပွဲတွေဖြစ်နေတာကြောင့် သွားလာတာတွေမလုပ်ကြဘူးလို့ဒေသခံတွေကပြောပါတယ်။

   မနေ့ဇန်နဝါရီ ၂၇ ရက် ညပိုင်းမှာလည်း မင်းတပ်မြို့မြောက်ဘက်မှာ ပစ်ခတ်သံတွေကြားနေရပြီး ဒေသခံအများစုကတော့ မြို့မှာပြန်လည်နေထိုင်ဖို့စိုးရိမ်စိတ်ပူမှုတွေရှိနေတယ်လို့ဒေသခံတွေ ကပြောပါတယ်။

   

   ဓာတ်ပုံ ရင်းမြစ်, HKL

10. ၂၈ ဇန်နဝါရီ ၂၀၂၂KNU တပ်မဟာ ၆ နယ်မြေ၊ ဘုရားသုံးဆူဒေသအတွင်း စစ်ကောင်စီတပ်တွေ စစ်ကြောင်းထိုးဝင်ရောက်လာ, လက်နက်ကြီးလက်နက်ငယ်တွေနဲ့ ခြိမ်းခြောက်ပစ်ခတ်မှုတွေ လုပ်နေလို့ စစ်ရေးတင်းမာလာမှာ ကိုဒေသခံတွေစိုးရိမ်

    KNU တပ်မဟာ ၆ နယ်မြေ၊ ဘုရားသုံးဆူဒေသအတွင်း စစ်ကောင်စီတပ်တွေ ပြီးခဲ့တဲ့ရက်ပိုင်းကစလို့ မြို့အဝင်အထွက်ဂိတ်တွေမှာ အစစ်အဆေးတွေတင်းကျပ်နေပြီး အဲဒီကတစ်ဆင့် စစ်ရေး တင်းမာမှုတွေ ရှိလာမှာကို ဘုရားသုံးဆူ ဒေသခံတွေစိုးရိမ်နေကြပါတယ်။

    လေးကေ့ကော်ဒေသတိုက်ပွဲတွေကြောင့် ကြာအင်းဆိပ်ကြီး-ဘုရားသုံးဆူဒေသဘက်ကို စစ်ရှောင်လာသူတွေ၊ ခိုလှုံလာသူတွေထဲ ဒေသကာကွယ်ရေးတပ်ဖွဲ့တွေနဲ့ စီဒီအမ်သမားတွေကို အဓိက ထားရှာဖွေမှုတွေ ရှိနေတယ်လို့ ဒေသခံတွေက ယူဆပြီး စစ်ဆေးမှုတွေတင်းကျပ်နေတာဖြစ်နိုင်တယ်လို့ဒေသခံတွေက ပြောပါတယ်။

    ဒါ့အပြင် စစ်ကောင်စီတပ်တွေဟာ ကော့ကရိတ်ဘက်ကနေ ဘုရားသုံးဆူဘက်ကို စစ်ကြောင်း ထိုးဝင်ရောက်လာလို့ တည်ငြိမ်နေတဲ့ ဘုရားသုံးဆူဒေသမှာ တိုက်ပွဲတွေဖြစ်လာမှာကို စိုးရိမ်ကြောင်း ဘုရားသုံးဆူ ခလယ်တံခွန်တိုင်ကျေးရွာဒေသခံတွေက ပြောပါတယ်။

    “တိုက်ပွဲ တွေ က ကော့ကရိတ်တို့ လေးကေကော် တို့ဘက်က နေ အခု ကျွန်တော်တို့ ခလယ်တံခွန်တိုင်၊ ကြာအင်းဆိပ်ကြီး၊ တောင်စွန်း၊ အနန်ကွင်း၊ ဘုရားသုံးဆူ ဘက်အထိ စစ်ကောင်စီ လူတွေ ဆက်တိုးပြီး နေရာယူလာနေပြီ။ PDF တွေ CDM တွေ ခိုလှုံ နေတယ် လို့ သူတို့ယူဆတဲ့ တောင်ကြော တွေ ဘက် လက်နက်ကြီး လက်နက်ငယ် ပစ်ခတ်တာ တွေ အခုတလော လုပ်ကြတယ်။ လက်နက်ကြီး ပစ်စမ်းတာတွေ လုပ်တယ်။ အများ ပြည်သူ သွားလာနေတဲ့ ကြာအင်းဆိပ်ကြီး ၊ ဘုရားသုံးဆူ ၊ ခလယ်တံခွန်တိုင်၊ ကျိုက်ဒုံ လမ်း ပိုင်း တွေ မှာ အစစ်အဆေး နေ့စဉ် လုပ်လာနေတယ်။ အခုဆို ဘုရားသုံးဆူ မြို့ ကိုသွား ရင် မြို့ဝင် မြို့ ထွက် ကို စစ်တပ်က လုံခြုံရေး အင်အားတိုး တင်းကျပ်ထား တာ ကြောင့် ရွာတွေ က ဈေးဝယ် ကား တွေ မသွား ရဲ ကြတော့ ဘူး ၊ တိုက်ပွဲ ဖြစ်လာ မှာ စိုးရိမ်ပြီး တချို့ အိမ် တွေ ဆို အထုတ်အပိုး ပြင်ထား ကြပြီ” လို့ ခလယ်တံခွန်တိုင်ကျေးရွာဒေသခံတစ်ဦးကပြောပါတယ်။

    ခုလို လက်နက်ကြီးလက်နက်ငယ်တွေနဲ့ ပစ်ခတ်မှုတွေလုပ်နေတယ်ဆိုတဲ့အချက်အပါအဝင် ဘုရားသုံးဆူဒေသတွင်း စစ်ကောင်စီတပ်ဖွဲ့တွေဝင်ရောက်လာတာနဲ့ပတ်သက်လို့ စစ်ကောင်စီဘက်ကတော့ တစ်စုံတစ်ရာထုတ်ပြန်ပြောကြားတာမရှိသေးပါဘူး။

    

    ဓာတ်ပုံ ရင်းမြစ်, CJ

11. ၂၈ ဇန်နဝါရီ ၂၀၂၂ရခိုင်ပြည်နယ်က စစ်ဘေးရှောင်စခန်းတွေမှာ သောက်သုံးရေရှားပါးမှုတွေစကြုံနေရ, ပုဏ္ဏားကျွန်း၊စက်မှုဇုန်စစ်ဘေးရှောင်စခန်းမှာလည်း စားနပ်ရိက္ခာနှင့်သောက်သုံးရေလိုအပ်နေ

    ရခိုင်ပြည်နယ်၊ပုဏ္ဏားကျွန်းမြို့နယ်ရှိ စက်မှုဇုန်စစ်ဘေးရှောင်စခန်းမှာ စားနပ်ရိက္ခာနဲ့သောက်သုံးရေးလိုအပ်ချက်တွေရှိနေတယ်လို့စစ်ဘေးရှောင်ပြည်သူတွေကပြောပါတယ်။

    ဒီစစ်ဘေးရှောင်စခန်းဟာဆိုရင် ပြီးခဲ့တဲ့ NLD အရပ်သားအစိုးရ လက်ထက်မှာ တည်ဆောက်ထားခဲ့တာဖြစ်ပြီး ကူညီထောက်ပံ့မှုတွေရခဲ့ပေမယ့် စစ်တပ်အာဏာသိမ်းလိုက်ပြီးနောက်ပိုင်း စစ်ကောင်စီဘက်က ဆန်တမျိုးတည်းသာ ထောက်ပံ့ပေးတာကြောင့် လိုအပ်ချက်တွေရှိနေတာလို့ဒေသခံတွေကပြောပါတယ်။

    လက်ရှိမှာတော့ ဆန်တမျိုးသာအထောက်အပံ့ရပြီး ကမ္ဘာ့စားနပ်ရိက္ခာအဖွဲ့WFP က လူတစ်ဦးကို တစ်လကို ၁၇၀၀၀ ကျပ်စီထောက်ပံ့ပေးပေမယ့် အဆင်မပြေဘဲ လိုအပ်ချက်တွေရှိနေတယ်လို့စစ်ဘေးရှောင်ပြည်သူတွေက ပြောပါတယ်။

    ဒါ့အပြင် စစ်ဘေးရှောင်စခန်းမှာ နေထိုင်သူတွေအနေနဲ့ အခုလို စားနပ်ရိက္ခာလိုအပ်ချက်တွေအပြင် သောက်သုံးရေမသန့်ရှင်းမှုတွေလည်း ကြုံနေရတယ်လို့ဆိုပါတယ်။

    ဒီစခန်းမှာဆိုရင် ပုဏ္ဏားကျွန်းမြို့နယ်၊ ကျောက်ဆိပ်၊ သာစည်၊ ပိန္နဲတော်နဲ့ချင်းပြည်နယ် ပလက်ဝမြို့နယ် ၊နှမဒါကျေးရွာတို့က စစ်ဘေးရှောင် ၇၀၀ နီးပါးနဲ့အိမ်ထောင်စု ၁၉၀ လောက်နေထိုင် ကြပါတယ်။

    ရခိုင်ပြည်နယ်အတွင်းက စစ်ဘေးရှောင်စခန်းတွေဖြစ်တဲ့ ကျောက်တော်၊ မြောက်ဦး၊ ပုဏ္ဏားကျွန်း၊ ရသေ့တောင်၊ ဘူးသီးတောင်မြို့နယ်များမှာရှိတဲ့ စစ်ဘေးရှောင်စခန်းတွေမှာဆိုရင် ရေရှားပါးမှုတွေလည်း စတင်ကြုံနေရတယ်လို့ စစ်ဘေးရှောင်စခန်းအတွင်းနေထိုင်သူတွေကပြောပါတယ်။

    ရခိုင်ပြည်နယ်မှာတော့ ရက္ခိုင့်တပ်တော်(AA) နဲ့ စစ်ကောင်စီတို့ကြားတိုက်ပွဲတွေငြိမ်သက်နေပေမယ့် စစ်ဘေးရှောင်တစ်သိန်းကျော်ကတော့ ယာယီစခန်းတွေမှာခိုလှုံနေရဆဲဖြစ်ပါတယ်။

    

    ဓာတ်ပုံ ရင်းမြစ်, Kaung Mrat Naing / MPA

12. ၂၈ ဇန်နဝါရီ ၂၀၂၂နတ်တလင်းမှာ အသံတိတ်သပိတ်နေ့မှာ ဆိုင်တွေ ဖွင့်ဖို့ ကြေညာနေသူတဦး သေနတ်နဲ့ပစ်ခတ်ခံရ

    ပဲခူးတိုင်းဒေသကြီး၊ အနောက်ဘက်ခြမ်းမှာရှိတဲ့ နတ်တလင်းမြို့နယ် တံခွန်တိုင်ရွာမှာ ဒီကနေ့ဇန်နဝါရီ ၂၈ မနက်ပိုင်းက အသံတိတ်သပိတ်မှာ မပါဝင်ဖို့ လိုက်လံကြေ ညာနေသူတစ်ဦး သေနတ်နဲ့ပစ်ခတ်ခံရတယ်လို့ ဒေသခံတွေကပြောပါတယ်။

    နတ်တလင်း ဒေသခံ PDF အဖွဲ့တခုဖြစ်တဲ့ နတ်စစ်သည် အဖွဲ့ကတော့ စစ်ကောင်စီ အလိုအကျ ဖေဖော်ဝါရီ ၁ ရက်နေ့မှာ ဆိုင်မဖွင့်ဖို့ လော်နဲ့လိုက်အော်နေသူတဦး ကို အဖွဲ့ကပစ်ခတ်ခဲ့ကြောင်းနဲ့ သေဆုံးသွားပြီလို့ ထုတ်ပြန်ထားပါတယ်။

    “ နတ်တလင်းမြို့အစွန်က မြို့အထွက်ရွာမှာဖြစ်တာ၊ ဒီကနေ့မနက် ဆိုင်ကယ်နဲ့လိုက်အော်နေတာ ဖြစ်ဖြစ်ချင်းတော့ မသေဘူး။ ခုတော့သေသွားပြီလားတော့သေချာမသိသေးဘူး” လို့ဒေသခံတဦးက ဘီဘီစီကိုပြောပါတယ်။

    စစ်တပ်ကအာဏာသိမ်းတာ တနှစ်ပြည့်တဲ့ လာမယ့်ဖေဖော်ဝါရီ ၁ရက်နေ့မှာ စစ်အာဏာသိမ်းတာကို အသံတိတ်ငြိမ်သက်ခြင်းနဲ့ဆန္ဒထုတ်ဖော်ဖို့ တော်လှန်ရေးအင်အားစုတွေက နှိုးဆော်ထားပြီး စစ်ကောင်စီဘက်ကလည်း အဲ့ဒီနေ့မှာဆိုင်တွေဖွင့်ထားဖို့ကို မြို့နယ်တော်တော်များများမှာ သတိပေးကြေညာတာတွေ လုပ်နေသလို ဖိအားပေးလက်မှတ်ထိုးခိုင်းတာတွေရှိနေတယ်လို့ ကိုယ်တိုင်ကြုံရသူတွေက ဘီဘီစီကိုဆက်သွယ်ပြောကြားထားပါတယ်။

    

    ဓာတ်ပုံ ရင်းမြစ်, social media

13. ၂၈ ဇန်နဝါရီ ၂၀၂၂အာဏာသိမ်းပြီးတဲ့နောက် ကလေး ၁သိန်းခွဲနီးပါး အိုးအိမ်တွေကိုစွန့်ခွာထွက်ပြေးနေရ

    ပြည်တွင်းမှာ စစ်အာဏာသိမ်းပြီးတဲ့နောက် အကြမ်းဖက်မှုတွေနဲ့စစ်ပွဲတွေကြောင့် ကလေး ၁ သိန်းခွဲလောက်ဟာ နေအိမ်တွေကိုစွန့်ခွာပြီး ထွက်ပြေးနေရတယ်လို့ Save the Children အဖွဲ့က ဒီကနေ့ဇန်နဝါရီ ၂၈ မှာထုတ်ပြန်လာပါတယ်။

    ပြီးခဲ့တဲ့ နှစ်ပတ်အတွင်း ကယားပြည်နယ်စစ်ဘေးရှောင်စခန်းမှာ ဗုံးကြဲခံရတာတွေအပါအဝင် စစ်ကိုင်းတိုင်းထဲမှာလည်း ဗုံးကြဲတိုက်ခိုက်မှုတွေနဲ့စစ်တပ်ရဲ့ ဝင်ရောက်စီးနင်းမှုတွေကြောင့် ကလေးတွေသေဆုံးမှုတွေရှိနေတယ်လို့Save the Children အဖွဲ့ရဲ့ထုတ်ပြန်ချက်မှာဖော်ပြထားပါတယ်။

    ကုလသမဂ္ဂရဲ့ စာရင်းတွေအရ စစ်တပ်က အာဏာသိမ်းပြီးတဲ့နောက် တိုက်ပွဲတွေကြောင့် မြန်မာနိုင်ငံမှာ လူ ၄ သိန်းလောက် အိုးအိမ်စွန့်ခွာထွက်ပြေးနေရပြီး ပြီးခဲ့တဲ့လတွေမှာ အိုးအိမ်စွန့်ခွာထွက်ပြေးရသူအရေအတွက်ဟာ ၂၇ ရာခိုင်နှုန်းလောက် တိုးလာတယ်လို့သိရပါတယ်။

    ဒီထဲမှာ ၃၇ ရာခိုင်နှုန်းကတော့ ကလေးငယ်တွေဖြစ်ပြီး အများစုကဖြစ်သလို တဲထိုးနေရပြီး ငတ်မွတ်မှုနာဖျားမှုတွေကိုရင်ဆိုင်နေရတယ်လို့ဆိုပါတယ်။

    “ ကလေးတွေကစစ်မီးရဲ့ဒဏ်ကိုခံနေရတာကို မြင်ရပြီး ပြီးခဲ့တဲ့နှစ်အတွင်းမြန်မာနိုင်ငံတဝန်း ကလေးတသိန်းခွဲဟာသူငယ်ချင်းတွေ၊ ကျောင်းတွေနဲ့ခွဲခွာပြီး နေရပ်တွေကို စွန့်ခွာထွက်ပြေးနေရပါတယ်" လို့ Save the Children ရဲ့အမှုဆောင်အကြီးအကဲ အင်ဂါအက်ရှင်း ကပြောပါတယ်။

    ကယားပြည်နယ်မှာ ပြီးခဲ့တဲ့ ၂၀၂၁ ဖေဖော်ဝါရီလကနေစပြီး အိုးအိမ်စွန့်ခွာ ပြီးထွက်ပြေးနေရသူ ၉ သောင်းကျော်လောက်ရှိတယ်လို့ ကုလသမဂ္ဂက ခန့်မှန်းထားပြီး ဒေသခံသတင်းတွေအရ ဒီထက်ပိုများနိုင်ပြီး ပြည်နယ်လူဦးရေ ၃ သိန်းထဲက တဝက်ကျော်လောက် ဟာ စစ်ဘေးတိမ်းရှောင်နေရတယ်လို့ ထုတ်ပြန်ချက်မှာဖော်ပြထားပါတယ်။

    ဒါ့အပြင် ကလေးတွေကိုအကြမ်းဖက်တာ၊ တိုက်ခိုက်တာ၊ စွန့်ခွာထွက်ပြေးနေရတာတွေက ကာကွယ်ဖို့ကိုလည်း ကုလသမဂ္ဂလုံခြုံရေးကောင်စီက နည်းလမ်းရှာဖွေဖို့ Save the Children ကတိုက်တွန်းထားပါတယ်။

    

    ဓာတ်ပုံ ရင်းမြစ်, KPK

14. ၂၇ ဇန်နဝါရီ ၂၀၂၂သြစတြေးလျ Woodside ရေနံ ကုမ္ပဏီ မြန်မာနိုင်ငံကထွက်မယ်လို့ ပြော

    သြစတြေးလျနိုင်ငံရဲ့ အကြီးဆုံး ရေနံနဲ့ ဓာတ်ငွေ့ ကုမ္ပဏီကြီးတွေထဲမှာ တစ်ခုအပါအဝင် ဖြစ်တဲ့ Woodside Petroleum ကုမ္ပဏီက မြန်မာနိုင်ငံမှာ လူ့အခွင့်အရေး အခြေအနေတွေ ဆိုးဝါးလာနေတာကြောင့် အဲဒီမှာ လုပ်ကိုင်နေတဲ့ လုပ်ငန်းတွေကို အဆုံးသတ်တော့မယ်လို့ ထုတ်ဖော်ကြေညာလိုက်ပါတယ်။

    ဒေါ်လာ သန်း ၂၀၀ လောက် အရှုံးပေါ်ဖို့ ရှိပေမဲ့ မြန်မာနိုင်ငံထဲက ရေနံတူးဖော်ရေးစီမံကိန်းတွေကို အဆုံးသတ်တော့မယ်လို့ အဲဒီကုမ္ပဏီက ပြောပါတယ်။

    မြန်မာနိုင်ငံထဲကနေ ထွက်ခွာတော့မယ်လို့ Chevron နဲ့Total ကုမ္ပဏီတွေက ထုတ်ဖော်ကြေညာအပြီး သီတင်းတပတ်အကြာမှာပဲWoodside Petroleum ကုမ္ပဏီကလည်း သူတို့လုပ်ငန်းတွေ ရပ်ဆိုင်းတော့မယ်လို့ အခုလို ထုတ်ဖော်ကြေညာလိုက်တာပါ။

    ဒီကြေညာချက်ကို Human Rights Watch လူ့အခွင့်အရေး စောင့်ကြည့်လေ့လာရေးအဖွဲ့က ကြိုဆိုလိုက်ပြီး မြန်မာနိုင်ငံမှာ သဘာဝဓာတ်ငွေ့ စီမံကိန်းတွေကနေ မြန်မာ စစ်ခေါင်းဆောင်တွေအတွက် တစ်နှစ်ကို ဒေါ်လာ တစ်ဘီလျံကျော်လောက် ဝင်ငွေ ရနေကြောင်းနဲ့ ဒီစွမ်းအင်စီမံကိန်းတွေဟာ စစ်တပ်အတွက် နိုင်ငံခြားသုံးငွေ အများဆုံး ထောက်ပံ့ပေးတဲ့ အရင်းအမြစ်ဖြစ်တယ်လို့ ပြောပါတယ်။

    

    ဓာတ်ပုံ ရင်းမြစ်, GW

15. ၂၇ ဇန်နဝါရီ ၂၀၂၂လွိုင်ကော်မြို့ အနီး ရေယို​ကျေးရွာက အိမ်သာကျင်းထဲမှာ ပစ်သတ်ခံရတဲ့ လူငယ်အမျိုးသား (၆)ဦး အလောင်းတွေ့

    ကယားပြည်နယ် လွိုင်ကော်မြို့ နာနတ်တော ရပ်ကွက်အနီး ရေယို ကျေးရွာမှာ ဇန်နဝါရီလ ၂၇ ရက်​နေ့က အိမ်ပိုင်ရှင် စစ်​ရှောင်ရာက​နေ အိမ်ကိုပြန်လာကြည့်ချိန် အိမ်သာကျင်းထဲက လူငယ်အမျိုးသား ၆ ဦးရဲ့ လောင်းတွေ့ခဲ့ရတယ်လို့ လွိုင်ကော်ဒေသခံတစ်ဦးက ပြောပါတယ်။

    အဲ့ဒီ အလောင်းတွေထဲမှာ ၁၈ နှစ်မပြည့်သူတွေအချို့ ပါဝင်ပြီးတော့ သူတို့ဟာဒဏ်ရာတွေနဲ့ သေဆုံးနေတာဖြစ်တယ်လို့ ဒေသခံတွေက ပြောပါတယ်။

    အိမ်သာကျင်းထဲ တွေ့ရှိခဲ့တဲ့အ​လောင်း​တွေကို ပြန်လည်ဆယ်ထုတ်ကာ သယ်ယူသွားပြီဖြစ်ကြောင်းလည်း သိရပါတယ်။

    ပြီးခဲ့တဲ့ ဇန်နဝါရီလ ၂၅ရက်နေ့က စစ်ကောင်စီတပ်​တွေဟာ ကယားပြည်နယ်၊ လွိုင်​ကော်မြို့၊ နာနတ်တောရပ်ကွက်အနီးမှာရှိတဲ့ ရေယို​ကျေးရွာကို စစ်​ကြောင်းထိုးလာပြီး ​ဒေသခံလူငယ် ၆ ဦးကို ဖမ်းဆီးကာ သေနတ်နဲ့ ပစ်သတ်ခဲ့တာဖြစ်နိုင်တယ်လို့လည်း ဒေသခံတစ်ဦးကပြောပါတယ်။

    ဒီသတင်းနဲ့ ပတ်သက်လို့ စစ်ကောင်စီဘက်က သတင်းထုတ်ပြန်တာမရှိသေးပါဘူး။

    ဒီကနေ့ ရေယို ကျေးရွာမှာ တွေ့ရှိခဲ့တဲ့ အလောင်းတွေထဲမှာ ဇန်နဝါရီလ ၂၅ ရက်နေ့က စစ်ကောင်စီက ဖမ်းသွားတဲ့ သူရဲ့ သားရဲ့ အလောင်းပါဝင်တယ်လို့ မိခင်ဖြစ်သူတစ်ဦးက အတည်ပြုကြောင်းလည်း လွိုင်ကော်ဒေသခံက တစ်ဆင့်သိရပါတယ်။

    ရေယို ကျေးရွာဟာ ကယန်းတိုင်းရင်းသားတွေ အများစုနေထိုင်တဲ့ ရွာဖြစ်ပြီး လွိုင်ကော်မြို့ နာနတ်တောရပ်ကွက် အနီးမှာရှိတယ်လို့ လွိုင်ကော်ဒေသခံက ပြောပါတယ်။

    

    ဓာတ်ပုံ ရင်းမြစ်, CJ

16. ၂၇ ဇန်နဝါရီ ၂၀၂၂စစ်ကိုင်းတိုင်း ကလေးမြို့နဲ့ တမူးမြို့တွေ မြို့အဝင်အထွက်ပိတ်ထား

    စစ်ကိုင်းတိုင်း ကလေးမြို့ နဲ့ တမူးမြို့ တို့မှာ ကိုဗစ်ဖြစ်ပွားမှုတွေများလာလို့ မြို့အဝင်အထွက်တွေကို စစ်ကောင်စီက ပိတ်ထားလိုက်တယ်လို့ ဒေသခံတွေက ပြောပါတယ်။

    ဇန်နဝါရီလ ၂၆ ရက်နေ့ က တမူးမြို့က လူ ၄၀ လောက်ထပ်တွေခဲ့ပြီး တမူးစျေးထဲကလည်း ကိုဗစ် ကူးစက်ခံရသူတွေရှိလာလို့ စျေးဆိုင်တွေလည်း ပိတ်ထား ခဲ့ကြပြီး မြို့အဝင်အထွက်ကို ပိတ်လိုက်တာလို့ တမူးဒေသခံတွေထံက တစ်ဆင့်သိရပါတယ်။

    ကလေးမြို့ကတော့ ဇန်နဝါရီလ ၂၆ ရက်နေ့က ကလေးမြို့ကနေ ခရီးသွားမယ့်သူတွေကို စစ်ဆေးရာမှာ ကိုဗစ်ရောဂါပိုး တွေ့ရှိပြီးနောက် ကလေးမြို့ကနေ ရန်ကုန် မန္တလေး မုံရွာ ခရီးသွားမယ့်သူတွေကို ဇန်နဝါရီလ ၂၇ ရက်နေ့မှာ ပိတ်လိုက်တာလည်းဖြစ်ပါတယ်။

    ကလေးမြို့က ခရီးသည်တွေဟာ ဇန်နဝါရီလ ၂၆ ရက်နေ့က ကိုဗစ် ဆေးစစ်ချက်များယူထားပြီးသော်လည်း ခရီးသည်တင်ယာဥ်လိုင်းအားလုံး ဇန်နဝါရီလ ၂၇ ရက်နေ့မှာ ထွက်ခွင့်မရတော့ဘဲ မြို့အထွက်မှာ အပိတ်ခံရတာဖြစ်တယ်လို့ ကလေးမြို့ခံတစ်ဦးက ပြောပါတယ်။

    စစ်ကောင်စီကျန်းမာရေးဝန်ကြီးဌာနက ထုတ်ပြန်တဲ့ စာရင်းတွေအရ ဇန်နဝါရီလ ၂၅ ရက်နေ့က ဓာတ်ခွဲနမူနာတွေကို စစ်ဆေးရာမှာ တော့ တမူးမြို့က ၅၉ ဦးနဲ့ ကလေးမြို့က ၂ ဦးတို့မှာ ကိုဗစ်အတည်ပြု လက္ခဏာတွေ တွေ့ရှိခဲ့တယ်လို့ဖော်ပြပါတယ်။

    

    ဓာတ်ပုံ ရင်းမြစ်, CJ

17. ၂၇ ဇန်နဝါရီ ၂၀၂၂အလင်္ကာပုလဲပန်း တပ်တော်ဦးဆီမျှော်လိုက်ပြန်တော့

18. ၂၇ ဇန်နဝါရီ ၂၀၂၂မုံရွာ လယ်ဇင်ရွာကို စစ်ကောင်စီတပ်တွေ ဝင်စီးပြီးရှာဖွေနေ

    စစ်ကိုင်းတိုင်း မုံရွာမြို့အရှေ့တောင်ဘက်က မုံရွာနဲ့ ၂ မိုင်လောက်ပဲ ဝေးတဲ့ လယ်ဇင်ရွာကို စစ်ကောင်စီတပ်တွေက ဒီကနေ့ ဇန်နဝါရီလ ၂၇ ရက်နေ့ ညနေ ၄ နာရီကျော်က ဝင်ရောက်စီးနင်းပြီး ဖမ်းဆီးတာတွေ မီးရှို့တာတွေ လုပ်နေတယ်လို့ မုံရွာမြို့ခံတွေက ပြောပါတယ်။

    လယ်ဇင်ရွာဘက်က မီးခိုးလုံးတွေတက်လာတာ တွေ့ရကြောင်း နဲ့ ဖမ်းဆီးမှုတွေရှိတယ်လို့ လယ်ဇင်ဒေသခံတွေက ပြောကြောင်းလည်း သူတို့ကပြောပါတယ်။

    စစ်ကောင်စီတပ်တွေဟာ အင်အားအများအပြားနဲ့ လယ်ဇင်ရွာကို ဝင်စီးနေလို့ မုံရွာ စက်မှုဇုန်နဲ့ လယ်ဇင် သက္ကယ်ကျင်း ကျေးရွာတွေဘက်ကို မလာကြဖို့ ဒေသခံတွေက သတိပေးနေပါတယ်။

    ပြီးခဲ့တဲ့ ဇန်နဝါရီလ ၁၇ ရက်နေ့ကလည်း မုံရွာ၊ လယ်ဇင် ကျေးရွာမှာ စစ်ကောင်စီတပ်တွေ ဝင်ရောက် ပိတ်ဆို့ ဖမ်းဆီးလို့ လူ ၄ ဦး သေဆုံးခဲ့ပြီး ဖမ်းဆီးခံရတာတွေရှိသလို၊ ရွာလည်း မီးရှို့ခံခဲ့ရပါတယ်။

    မုံရွာမြို့တော်ခန်းမမှာ အထိုင်ချထားတဲ့ စစ်ကောင်စီတပ်တွေဟာ ဒီကနေ ညနေပိုင်းမှာ ကား ၃ စီးနဲ့ လယ်ဇင်ရွာဘက်ကို ထွက်သွားတာကို တွေ့ရတယ်လို့ မုံရွာမြို့ခံတစ်ဦး ကပြောပါတယ်။

    စစ်ကောင်စီဘက်ကတော့ ဒီသတင်းနဲ့ပတ်သက်လို့ သတင်းထုတ်ပြန်တာမရှိသေးပါဘူး။

    

    ဓာတ်ပုံ ရင်းမြစ်, CJ

19. ၂၇ ဇန်နဝါရီ ၂၀၂၂တရားရင်ဆိုင်နေရတဲ့ စီမံဘဏ္ဍာဝန်ကြီးဟောင်း ဦးစိုးဝင်းကို အာမခံပေး

    နိုင်ငံတော်လျှို့ဝှက်ချက်အက်ဥပဒေ ပုဒ်မ ၃ ၁(ဂ) နဲ့ အတိုင်ပင်ခံပုဂိုလ် ဒေါ်အောင်ဆန်းစုကြည်နဲ့အတူ တရားစွဲဆိုခံထားရပြီး အမှုရင်ဆိုင်နေရတဲ့ စီမံဘဏ္ဍာဝန်ကြီးဟောင်း ဦးစိုးဝင်းကို ကျန်းမာရေးအခြေအနေ အရ ဒီနေ့ ဇန်နဝါရီ ၂၇ ရက်ရုံးချိန်းမှာ အာမခံပေးလိုက်တယ်လို့တရားရုံးနဲ့နီးစပ်တဲ့အသိုင်းအဝိုင်းက သိရပါတယ်။

    ဦးစိုးဝင်းရဲ့ ကျန်းမာရေးအခြေအနေအရ အာမခံပေးဖို့ ရှေ့နေအဖွဲ့က တရားရုံးကိုလျှောက်ထားခဲ့တာဖြစ်ပြီး စစ်ကောင်စီရဲ့အထူးတရားရုံးက ရာဇဝတ်ကျင့်ထုံးပုဒ်မ ၄၉၇ (၁) အရ ဒီနေ့ရုံးချိန်းမှာ အာမခံပေးခဲ့တာဖြစ်ပါတယ်။

    ဦးစိုးဝင်းဟာ အူမကြီးကင်ဆာ ရောဂါကြောင့် ပြီးခဲ့တဲ့ဒီဇင်ဘာလကတည်းကစလို့ ဆေးရုံတက်ရောက်ကုသနေရတာဖြစ်ပြီး ရုံးချိန်းတွေ မတက်ရောက်နိုင်တာ တစ်လကျော်ရှိလာပြီဖြစ်ပါတယ်။

    ဒီနေ့ နိုင်ငံတော်လျှို့ဝှက်ချက်အက်အမှုကို နေပြည်တော်အထူးတရားရုံးမှာ စစ်ဆေးခဲ့ပေမယ့် စစ်ကောင်စီဘက်က တင်သွင်းတဲ့ တရားလိုပြသက်သေမလာရောက်တာကြောင့် ရုံးချိန်းစစ်ဆေးနိုင်ခြင်းမရှိဘဲနောက်တစ်ကြိမ်ရုံးချိန်းကို ဖေဖော်ဝါရီ ၃ ရက်ကို ပြန်လည်ချိန်းဆိုထားပါတယ်။

    ဒီအမှုဟာ ဒေါ်အောင်ဆန်းစုကြည်ရဲ့ စီးပွားရေးအကြံပေး သြစတြေးလျနိုင်ငံသား မစ္စတာရှောင်တာနယ်ရဲ့ Lattop - လပ်တော့ထဲမှာတွေ့ရှိရတဲ့ စာရွက်စာတမ်းတွေပေါ်မူတည်ပြီး စွဲဆိုခံထားရတာဖြစ်ပြီး ရှောင်တာနယ်အပါအဝင် ဒေါ်အောင်ဆန်းစုကြည်၊ စီမံဘဏ္ဍာဝန်ကြီးဟောင်းတွေဖြစ်တဲ့ ဦးစိုးဝင်း၊ ဦးကျော်ဝင်းနဲ့ ဒုဝန်ကြီး ဦးဆက်အောင်တို့ငါးဦး အတူ စွဲဆိုခံထားရတာဖြစ်ပါတယ်။

    အာမခံရရှိသွားပေမယ့်လည်းဦးစိုးဝင်းဟာ စွဲဆိုထားတဲ့ ဒီအမှုကို ဆက်လက်ရင်ဆိုင်ရမှာဖြစ်ပါတယ်။ ဦးစိုးဝင်းဟာအာဏာသိမ်းပြီးတဲ့ နောက်ပိုင်းတည်းက ခုလိုဖမ်းဆီးခံထားရတာဖြစ်ပြီး NLD အစိုးရအဖွဲ့ထဲမှာ အသက် ၈၀ ကျော်အရွယ်ရှိတဲ့ အသက်အကြီးဆုံး ဝန်ကြီးလည်းဖြစ်ပါတယ်။

    

    ဓာတ်ပုံ ရင်းမြစ်, CJ

20. ၂၇ ဇန်နဝါရီ ၂၀၂၂မြန်မာ့အရေးအတွက် လုံခြုံရေးကောင်စီက ဆွေးနွေးမှုတစ်ခု ပြုလုပ်ဖို့ရှိနေ

    ကုလသမဂ္ဂလုံခြုံရေးကောင်စီဟာ မြန်မာ့အရေးဆွေးနွေးဖို့ အာဆီယံအဖွဲ့ကြီးရဲ့ အလှည့်ကျဥက္ကဋ္ဌဖြစ်တဲ့ ကမ္ဘောဒီးယားနိုင်ငံရဲ့ဝန်ကြီးတစ်ဦးကို မနက်ဖြန် ဇန်ဝါရီလ ၂၈ ရက်မှာ တွေ့ဆုံဖို့ရှိနေတယ်လို့ သိရပါတယ်။

    အာဆီယံအလှည့်ကျဥက္ကဋ္ဌ ကမ္ဘောဒီးယားက မြန်မာ့အရေးအတွက်ခန့်အပ်တဲ့အထူးကိုယ်စားလှယ်ဖြစ်သူ ကမ္ဘောဒီးယားနိုင်ငံခြားရေးဝန်ကြီး ပရက်ဆော့ခွန်းဟာ လုံခြုံရေးကောင်စီနဲ့ပြုလုပ်မယ့် တံခါးပိတ်အစည်းအဝေးကို တက်ရောက်မယ်လို့ သတင်းရင်းမြစ်တွေကို ကိုးကားပြီး အေအက်ဖ်ပီသတင်းမှာဖော်ပြပါတယ်။

    အဲဒီအစည်းအဝေးကို မြန်မာနိုင်ငံဆိုင်ရာကုလသမဂ္ဂအထူးကိုယ်စားလှယ် နိုလင်းဟေဇာလည်း တက်ရောက်မယ်လို့ သတင်းကဆိုပါတယ်။

    ကမ္ဘောဒီးယားနိုင်ငံခြားရေးဝန်ကြီးလည်းဖြစ်၊ အာဆီယံအထူးကိုယ်စားလှယ်လည်းဖြစ်တဲ့ ပရက်ဆော့ခွန်းဟာ ကမ္ဘောဒီးယားဝန်ကြီးချုပ်ဟွန်ဆန်ရဲ့ မြန်မာခရီးစဉ်ကို လုံခြုံရေးကောင်စီမှာ ဆွေးနွေးနိုင်ချေရှိတယ်လို့ နားလည်ရပါတယ်။

    မြန်မာ့အရေးအတွက် အာဆီယံအဖွဲ့ဝင်နိုင်ငံတွေကြားမှာ ရပ်တည်မှု ကွဲပြားနေချိန်မှာပဲ ကမ္ဘောဒီးယားဝန်ကြီးချုပ် ဟွန်ဆန်ဟာ စစ်တပ်အာဏာသိမ်းထားတဲ့ မြန်မာနိုင်ငံကို ပြည်ပနိုင်ငံခေါင်းဆောင်တစ်ဦးအနေနဲ့ ဇန်နဝါရီလမှာ ပထမဆုံးသွားရောက်ခဲ့တာကြောင့် အဲဒီခရီးစဉ်ဟာ အငြင်းပွားဖွယ်ဖြစ်ခဲ့ပါတယ်။

    ဝန်ကြီးချုပ်ဟွန်ဆန်ကတော့ မြန်မာစစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်နဲ့တွေ့ဆုံခဲ့တဲ့သူ့ခရီးစဉ်အတွင်း အပစ်ရပ်ရေးပေါ်ဖို့နဲ့ လူသားချင်းစာနာမှုအကူအညီအရေးကိစ္စတွေလို အာဆီယံဘုံသဘောတူညီချက် ၅ ရပ်ထဲ အကျုံးဝင်တဲ့ကိစ္စတွေကို ဆွေးနွေးခဲ့တယ်လို့ ပြောထားပါတယ်။

    တစ်ဖက်မှာလည်း အာဆီယံအထူးကိုယ်စားလှယ်ဖြစ်တဲ့ ကမ္ဘောဒီးယားနိုင်ငံခြားရေးဝန်ကြီး ပရက်ဆော့ခွန်းဟာ လက်ရှိမြန်မာပြည်ဟာ ပြည်တွင်းစစ်ဖြစ်လာနိုင်ဖို့ အကြောင်းအရာတွေ အပြည့်ရှိနေပြီလို့ အခုလအစောပိုင်းတုန်းကပဲ ပြောထားဖူးပါတယ်။

    

    ဓာတ်ပုံ ရင်းမြစ်, AKP