ကြက်ဆူအိုင်ရေနံမှော်ဘက်မှာ စစ်ကောင်စီတပ်ဖွဲ့ဝင်တွေဝင်ရောက်ပြီးဖမ်းဆီးတာတွေလုပ်, ဒေသခံရေနံမှော်သမားတွေ ထွက်ပြေးတိမ်းရှောင်နေကြရ
မကွေးတိုင်းဒေသကြီး၊ မြိုင်မြို့နယ်အနောက်ဘက်ပိုင်း၊ ပေါက်မြို့နယ်မြောက်ဘက်ပိုင်းက ကြက်ဆူအိုင်ရေနံမှော် ကို စစ်ကောင်စီတပ်ဖွဲ့ဝင်တွေ အင်အားအများအပြားနဲ့ဝင်ရောက်ပြီး ဖမ်းဆီးတာ ၊ ခြိမ်းခြောက်ပြီးငွေကြေးအကျပ်ကိုင်တာတွေလုပ်နေတယ်လို့ အဲဒီမှော်မှာ အလုပ်လုပ်ကိုင်နေသူတွေက ဘီဘီစီကိုပြောပါတယ်။လက်ရှိအချိန်အထိလည်း ရေနံကျင်းတွေကိုမီးရှို့ပြီးပိုင်ရှင်တွေ၊ ကြီးကြပ်သူတွေကို ခြိမ်းခြောက်တာတွေလုပ်သလို အော်ဟစ်ပြောဆိုတာတွေလည်းလုပ်လို့အဲဒီမှော်ထဲမှာ နေထိုင်သူမရှိတော့သလောက်ဖြစ်နေပြီး ထွက်ပြေးနေကြတယ်လို့ ဆိုပါတယ်။
ဒီကနေ့ ဇန်နဝါရီ ၂၃ရက်မနက်အထိလည်းလာရောက်တာတွေရှိတယ်လို့ ဒေသခံတွေကပြောပါတယ်။ ''ဒီကနေ့မနက်လည်းရောက်လာတယ်။တချို့ကျင်းတွေကိုမီးထပ်ရှို့နေတယ်။မရသေးတဲ့ကျင်းတွေကို ငွေထပ်တောင်းတယ်။ဟိုနေ့ကဆိုဟိုဘက်ထန်းတောဘက်ကဖမ်းလာတဲ့ကလေးတွေလည်းပါတယ်။ လက်ပြန်ကြိုးတွေတုပ်လာတာ။ ဘာကြောင့်ပိုက်ဆံတောင်းလည်းဆိုတာ တိတိကျကျဘယ်သူမှ မပြောနိုင်ပေမယ့် ကျွန်တော်တို့မှော်ကလူကြီးက ၇၅သိန်း ပေးလိုက်ရတယ်။ အဲဒီကနေစပြီး ငွေတောင်းတာကိုထပ်လုပ်တာပဲ'' လို့ မျက်မြင်ကြုံရသူကပြောပါတယ်။
ဇန်နဝါရီ ၂၁ရက်လောက်ကစပြီး ကြက်ဆူအိုင်ရေနံမှော်ကို ဝင်ရောက်ပြီး မှော်ပိုင်ရှင်တွေ၊ ကြီးကြပ်သူတွေကို ငွေတောင်းတာတွေလုပ်သလို၊ လုပ်ငန်းလုပ်ကိုင်တဲ့ ဒေသခံတချို့ကို ဒေသကာကွယ်ရေးတပ်ဖွဲ့ဝင်တွေဆိုတဲ့ယူဆချက်နဲ့ ဖမ်းဆီးတာနဲ့ သူတို့ရဲ့ ပစ္စည်းတွေကို သယ်ခိုင်းတာတွေကိုလုပ်တယ်လို့ မျက်မြင်ကြုံခဲ့ရသူကပြောပြပါတယ်။ '' ဆီခပ်နေတဲ့ ကလေးတွေ လူငယ်တွေကို အကုန်ဖမ်းတယ်။ ဒရုန်းနဲ့လည်းသူတို့ လမ်းကြောင်းတွေကြည့်တယ်။သူတို့ ကမှော်ထဲကို PDF လူငယ်တွေရှိတယ်လို့ ဆိုပြီးဝင်လာရှာတာလို့ပြောတယ်။မီးရှို့တာလည်းလုပ်တယ်။မီးရှို့မခံချင်ရင် ပိုက်ဆံပေးရတဲ့သဘောဖြစ်နေတယ်။ကျွန်တော်တို့ကပြေးဖို့လုပ်ပေမယ့်မမှီလိုက်လို့ ရေနံပိုက်ချတာဆက်လုပ်နေရတယ်။ ကျွန်တော်တို့ဘက်ကိုရောက်မလာပေမယ့် နောက်ကျတော့ကျွန်တော်ရော ကျွန်တော်တို့သူဌေးရောပြေးရတာပဲ'' လို့ မျက်မြင်ကြုံရသူကပြောပါတယ်။
ဒီအခြေအနေနဲ့ပတ်သက်ပြီး ဘီဘီစီအနေနဲ့ စစ်ကောင်စီဘက်ကိုဆက်သွယ်မေးမြန်းဖို့ကြိုးစားနေပါတယ်။
ဓာတ်ပုံ ရင်းမြစ်, CJ
