မြောက်ဦးမြို့နယ်တောင်ပိုင်းက ဂျင်ချေကျေးရွာမှာနေထိုင်တဲ့ ခမီအမျိုးသမီး ၂ဦးသေဆုံးတာဟာ ကိုဗစ်ကာကွယ်ဆေးကြောင့် သေဆုံးတယ်လို့ပြောဖို့ ရာခိုင်နှုန်းနည်းတယ်လို့ ပြည်နယ်ကျန်းမာရေးကတုံ့ပြန်လိုက်ပါတယ်။
သေဆုံးသူ ခမီအမျိုးသမီး ၂ဦးဟာ ကိုဗစ်ကာကွယ်ဆေး ဆိုင်နိုဖန်းထိုးပြီး နောက်တစ်ရက်မှာရှေ့ဆင့်နောက်ဆင့် သေဆုံးသွားခဲ့တာလို့ဒေသခံတွေကပြောပါတယ်။သူတို့ ၂ဦးဟာ ပြီးခဲ့တဲ့ ဒီဇင်ဘာ ၃၁ ရက်နေ့မနက်ပိုင်းမှာ မြောက်ဦးမြို့နယ်၊ နတ်ချောင်းကျေးလက်ကျန်းမာရေးဌာနခွဲကနေပြီးတော့ ဆေးထိုးခဲ့တာဖြစ်ပါတယ်။
’’ဇန်နဝါရီ ၁ ရက်နေ့ညနေပိုင်း ၄ နာရီလောက်မှာ အသက် ၄၀ ကျော်အရွယ် ဒေါ်စံပယ်ခိုင် သေဆုံးသွားခဲ့တယ်။နောက် ဇန်နဝါရီ ၂ရက် မနက် ၅နာရီလောက်မှာ တူမဖြစ်သူ မချစ်စုမေလည်းဆုံးတာပါ။ သူတို့နှစ်ယောက်လုံးကာကွယ်ဆေးထိုးခဲ့ကြတယ်ပြောပါတယ်’’ လို့ ကျေးရွာအုပ်ချုပ်ရေးမှူး ဦးအောင်အောင်က ပြောပါတယ်။
ရခိုင်ပြည်နယ်ပြည်သူ့ကျန်းမာရေးဌာနမှူးလည်းဖြစ်၊ ပြည်နယ်ကုသရေးမှူးလည်းဖြစ်တဲ့ ဒေါက်တာကြည်လွင်ကတော့ ကာကွယ်ဆေးတစ်လုံးကို နှစ်ယောက်စီထိုးတာဖြစ်လို့ ဒေါ်စံပယ်ခိုင်၊ မချစ်စုမေတို့နဲ့ ဆေးခွဲဝေထိုးခဲ့သူတွေက ကျန်းမာရေးကောင်းမွန်နေလို့ကာကွယ်ဆေးကြောင့် သေဆုံးတယ်လို့ ပြောဖို့ရာမှာ ရာခိုင်နှုန်းအလွန်နည်းတယ်လို့တုံ့ပြန်ပါတယ်။
’’ကာကွယ်ဆေးကြောင့်ဖြစ်သလားဆိုတာကို ကျွန်တော်တို့စစ်ပါတယ်။ စစ်တဲ့အခါကျတော့ ကာကွယ်ဆေးတစ်လုံးကို နှစ်ယောက်စီထိုးရပါတယ်။ သူတို့ နှစ်ယောက်မှာ ဒေါ်စံပယ်ခိုင်က ၁၀ နာရီခွဲလောက်မှာ ထိုးတယ်။နောက်တစ်ယောက် မချစ်စုမေက ၁၁ နာရီခွဲလောက်မှာထိုးပါတယ်။ မှတ်တမ်းတွေလည်း ဆရာမတွေမှာရှိပါတယ်။ သူတို့နဲ့အတူထိုးတဲ့သူတွေဘာမှမဖြစ်တဲ့အခါကျတော့ သေဆုံးတဲ့သူတွေဟာ ကာကွယ်ဆေးကြောင့်သေဆုံးတယ်ဆိုတာ ရာခိုင်နှုန်းအလွန်နည်းတယ်လို့ သုံးသပ်ရပါတယ်’’ လို့ ဒေါက်တာကြည်လွင်ကပြောပါတယ်။
ကိုဗစ်ကာကွယ်ဆေးထိုးတဲ့အခါမှာ ဆေးထိုးမယ့်သူတွေကို ကျန်းမာရေးစစ်ဆေးချက် တွေပြုလုပ်ပေးရမှာဖြစ်ပေမယ့် ကျန်းမာရေးဝန်ထမ်းမလုံလောက်မှုတွေကြောင့် သူနာပြုဆရာမတစ်ဦးနဲ့ လုပ်အားပေးတချို့သာ သွားရောက်နိုင်တာကြောင့် လိုအပ်တဲ့စစ်ဆေးမှုတွေကို လုပ်မပေးနိုင်ခဲ့ဘူးလို့ ဒေါက်တာကြည်လွင်က ပြောပါတယ်။
အဲဒီအမျိုးသမီးနှစ်ဦးသေဆုံးမှုနဲ့ပတ်သက်လို့ ဒုတိယပြည်နယ်ကျန်းမာရေးဌာနမှူးနဲ့အဖွဲ့က ဂျင်ချေကျေးရွာကို သွားရောက်စစ်ဆေးမှုတွေ ပြုလုပ်ခဲ့ကြပေမယ့် သေဆုံးသူတွေရဲ့ရုပ်အလောင်းတွေကို ခမီရိုးရာထုံးတမ်းအရ သဂြိုဟ်ဖို့ပြင်ဆင်ထားရှိပြီး မိသားစုတွေနဲ့ ကျေးရွာသားတွေဘက်က ရင်ခွဲစစ်ဆေးဖို့အတွက် ခွင့်မပြုတာကြောင့် သေဆုံးရခြင်းအကြောင်းရင်းကို မသိရှိရဘူးလို့ ဒေါက်တာကြည်လွင်က ပြောဆိုပါတယ်။
အခုထိုးပေးခဲ့တဲ့ကာကွယ်ဆေးတွေဟာ ဒီဇင်ဘာ ၂၈ ရက်နေ့မှာ တပ်မတော်လေယာဉ်နဲ့ စစ်တွေမြို့ကိုရောက်ရှိလာခဲ့တဲ့ဆေးတွေဖြစ်ပြီး မြောက်ဦးမြို့နယ်က ဆေးတစ်ကြိမ်မှမထိုးရသေးတဲ့ ဝေးလံခေါင်ဖျားကျေးရွာတွေကို စတင်ထိုးပေးနေတာဖြစ်ပါတယ်။
ဒီဇင်ဘာ ၃၁ ရက်နေ့က လူဦးရေ ၆၀၀ ခန့်ကိုကာကွယ်ဆေးတွေထိုးပေးခဲ့ပြီး ဂျင်ချေကျေးရွာက ၁၀၈ ဦးကိုထိုးနှံပေးခဲ့ပြီး နောက်တစ်နေ့မှာ အခုလိုဖြစ်စဉ်တစ်ခု ပေါ်ပေါက်ခဲ့တာဖြစ်တယ်လို့ ပြည်နယ်ကျန်းမာရေးဌာနက ပြောဆိုပါတယ်။