ဒေါ်အောင်ဆန်းစုကြည်နဲ့သမ္မတ ဦးဝင်းမြင့်တို့ကို စွဲဆိုထားတဲ့ အဂတိမှုငါးမှု စတင်စစ်ဆေး

တိုက်ရိုက် ထုတ်လွှင့်ချက်

1. ၇ ဇန်နဝါရီ ၂၀၂၂ထိတွေ့တိုက်ပွဲတွေဆက်ဖြစ်နေတဲ့ လွိုင်ကော်-ရှားတောလမ်းတစ်လျှောက် ပိတ်ထားမယ်လို့KNDF ထုတ်ပြန်

   စစ်ကောင်စီနဲ့ဒေသကာကွယ်ရေးတပ်တွေကြားထိတွေ့တိုက်ပွဲတွေဆက်ဖြစ်နေတဲ့ လွိုင်ကော်-ရှားတောလမ်းမတစ်လျှောက်ကို ဒီကနေ့ဇန်နဝါရီ ၇ရက်ကနေ ၁၃ရက်နေ့အထိ ဖြတ်သန်းသွားလာခွင့်ပိတ်ထားမယ်လို့ KNDF- B14 ကထုတ်ပြန်လာပါတယ်။

   ဒီလွိုင်ကော်-ရှားတောလမ်းမတစ်လျှောက်မှာ ပြီးခဲ့တဲ့ ဒီဇင်ဘာ နောက်ဆုံးပတ်ကစလို့ စစ်ကောင်စီဘက်က အင်အားအလုံးအရင်းနဲ့ ထိုးစစ်ဆင်တာတွေလုပ်ခဲ့ပြီး လက်နက်ကြီး၊ လက်နက်ငယ်တွေနဲ့ရမ်းသမ်းပစ်ခတ်တာတွေ ဘူဒိုဇာယာဉ်တွေကို အသုံးပြုပြီးလမ်းရှင်းတာတွေနဲ့ပါလောင်းကျေးရွာထဲတပ်စွဲပြီး နေအိမ်တွေကိုဖောက်ထွင်းမီးရှို့တာတွေလုပ်ခဲ့တယ်လို့KNDF ရဲ့ထုတ်ပြန်ချက်မှာဖော်ပြထားပါတယ်။

   ဒါကြောင့် လွိုင်ကော်-ရှားတောလမ်းမကြီးတစ်လျှောက် ဒန်ဘာ၊ မှန်အလုံပိတ်ကား၊ အိမ်စီးကားတွေနဲ့တခြားယာဉ်တွေသွားလာခြင်းကို တပတ်တာ ပိတ်ထားမှာဖြစ်ပြီး နယ်မြေအခြေအနေပေါ်မူတည်ပြီး လိုအပ်သလို ရက်တိုးမြှင့်သွားမယ်လို့ ထုတ်ပြန်ပြောဆိုထားပါတယ်။

   မနေ့ဇန်နဝါရီ ၆ရက်မှာလည်း လွိုင်ကော်မြို့နယ်၊ ကန်သာယာကျေးရွာအနီးမှာ ရှိတဲ့ စစ်ကောင်စီရဲ့ကင်းစခန်းတစ်ခုကို ကရင်နီတပ်မတော် (KA)၊ KNDF နှင့် PDF ပူးပေါင်းအဖွဲ့မျာမှ ပူးပေါင်းတိုက်ခိုက်ခဲ့ပြီး စစ်ကောင်စီတပ်သား ၁၅ ဦးခန့်သေဆုံးပြီး ဒဏ်ရာရသူတွေလည်းရှိတယ်လို့KNDF ကသတင်းထုတ်ပြန်ထားပါတယ်။

2. ၆ ဇန်နဝါရီ ၂၀၂၂ကမ္ဘောဒီးယားဝန်ကြီးချုပ် မနက်ဖြန်ရောက်လာရင် ဘယ်သူတွေနဲ့တွေ့မလဲ

3. ၆ ဇန်နဝါရီ ၂၀၂၂NCA အပစ်ရပ်စာချုပ် အခြေခံပြီး အကျပ်အတည်းဖြေရှင်းဖို့ လုပ်မယ်လို့ PPST ပြော

   အပစ်ရပ် လက်မှတ်ထိုးထားတဲ့ တိုင်းရင်းသားလက်နက်ကိုင်အဖွဲ့တွေရဲ့ ငြိမ်းချမ်းရေးဦးဆောင်အဖွဲ့ PPST က ၂၀၂၂ ခုနှစ် လုပ်ငန်းစဥ် အဖြစ် လက်ရှိမြန်မာ့အကျပ်အတည်းကို ဖြေရှင်းရာမှာ အပစ်ရပ်စာချုပ် NCA ရဲ့ အနှစ်သာရနဲ့ PPST ရဲ့ နိုင်ငံရေး ဦးတည်ချက် ၇ ရပ်ကို အခြေခံပြီး ဖြေရှင်းဖို့ ကြိုးပမ်းမယ်လို့ ဒီကနေ့ ထုတ်ပြန်ပါတယ်။

   အဲဒီထုတ်ပြန်ချက်ဟာ မနေ့ကနဲ့ ဒီကနေ့ ကျင်းပခဲ့တဲ့ PPST အစည်းအဝေး အရ ဘုံသဘောထားရပ်တည်ချက်တွေကို ကြေညာတာလို့ ဆိုပါတယ်။

   PPST က အဲဒီလို ကြေညာပေမဲ့ အဖွဲ့ထဲမှာ ပါဝင်ပြီး ကရင်ပြည်နယ်မှာ စစ်ကောင်စီ တပ်တွေနဲ့ ကေအန်ယူ တပ်တချို့အကြား တိုက်ခိုက်မှုတွေ ဖြစ်ပွားခဲ့တဲ့ ကေအန်ယူကတော့ စစ်ကောင်စီဘက်က အာဏာသိမ်းလိုက်ခြင်းအားဖြင့် အပစ်ရပ်စာချုပ်ကို ချိုးဖောက်လိုက်ပြီ ဖြစ်တယ်လို့ အခုသီတင်းပတ်တွေအတွင်း ထုတ်ပြောထားပါတယ်။

   ဒါ့အပြင် ရခိုင်ပြည်လွတ်မြောက်ရေးပါတီ ALP က လည်း တခြား ရခိုင် လက်နက်ကိုင်အဖွဲ့တွေနဲ့အတူ လက်နက်ကိုင်လမ်းစဥ်နဲ့ တိုက်ပွဲဝင်မယ့် နိုင်ငံရေးဦးဆောင် အဖွဲ့သစ်ကို ဖွဲ့စည်းလိုက်တယ်လို့ ဒီကနေ့ ထုတ်ပြန်လာပါတယ်။

   အဲဒီလို သဘောထားတွေ ရှိနေချိန်မှာပဲ PPST ကတော့ နိုင်ငံရေးပြဿနာကို နိုင်ငံရေးနည်းနဲ့ ဖြေရှင်းဖို့ အဖွဲ့အားလုံးကို ပန်ကြားတယ်ဆိုပြီး ဒီကနေ့ ထုတ်ပြန်လာတာပါ။

   အဲဒီထုတ်ပြန်ချက်ထဲမှာ ဖရူဆိုနဲ့ လေးကေ့ကော်က စစ်ကောင်စီရဲ့ ကျူးလွန်မှုတွေကို ပြင်းပြင်းထန်ထန် ရှုတ်ချတယ်လို့ဆိုပြီး လက်ရှိ နိုင်ငံရေး အကျပ်အတည်းဖြေရှင်းဖို့ နိုင်ငံတကာရဲ့ စေ့စပ်ဖြေရှင်းမှုတွေကို လက်တွေ့ဆောင်ရွက်နိုင်ရေး PPST အနေနဲ့ ကြိုးပမ်းမယ်လို့လည်း ဆိုပါတယ်။

   စစ်ကောင်စီကတော့ အာဏာစတင်သိမ်းယူပြီးကတည်းက အပစ်ရပ်ကြေညာချက်တွေကို ဆက်တိုက်ထုတ်ပြန်ထားတာ ဖေဖော်ဝါရီလကုန်အထိ အပစ်ရပ်ကြေညာထားပြီးဖြစ်ပြီး ၂၀၂၂ ခုနှစ်ဟာ ငြိမ်းချမ်းရေးအတွက် အရေးကြီးတဲ့နှစ် ဖြစ်တယ်လို့ ပြောထားပါတယ်။ ဒါပေမဲ့ စစ်ကောင်စီတပ်တွေဟာ နိုင်ငံအနှံ့ နေရာအတော်များများ အပစ်ရပ်လက်မှတ်ထိုးထားတဲ့ အဖွဲ့တွေရော အာဏာသိမ်းပြီးနောက် ဖွဲ့စည်းလာကြတဲ့ ကာကွယ်ရေးအဖွဲ့တွေနဲ့ပါ တိုက်ပွဲတွေ ဖြစ်ပွားနေပါတယ်။

4. ၆ ဇန်နဝါရီ ၂၀၂၂မန္တလေး သပိတ်သမားတွေကို ပိုက်စိပ်တိုက်ရှာနေတယ်လို့ဆို

   စစ်အာဏာသိမ်းဆန့်ကျင်ရေး ဆန္ဒပြသပိတ်တွေကို ဒီကနေ့အထိ နေ့စဉ်ပြုလုပ်နေတဲ့ မန္တလေးမြို့မှာ သပိတ်မှာပါဝင်သူတွေကို စစ်ကောင်စီတပ်ဖွဲ့ဝင်တွေက အသွင်ယူဖမ်းဆီးတာတွေ ပြုလုပ်နေပါတယ်။

   အရင်ကဆန္ဒပြလမ်းကြောင်းမှာ ဖမ်းဆီးတာ၊ အင်အားသုံးဖြိုခွဲဖမ်းဆီးတာတွေလုပ်ပေမယ့် အခုနောက်ပိုင်းမှာ ဖမ်းဆီးခံရသူတွေကတဆင့် ဆက်စပ်သူတွေရဲ့ နေအိမ်တွေကို ပိုက်စိပ်တိုက်ရှာဖွေတာတွေ လုပ်နေတယ်လို့ မြို့ခံတချို့က ပြောပါတယ်။

   အာဏာသိမ်း ၁၁လအတွင်း မန္တလေးမြို့အတွင်း ဆန္ဒပြသပိတ်မှာ ပါဝင်ခဲ့သူ ၁၀၀ ကျော် အဖမ်းခံခဲ့ရပါတယ်။

   ဦးရေ ဒါဇင်ကျော်လောက်က ဖမ်းဆီးခံရစဉ်မှာ သေဆုံးခဲ့တယ်လို့ ဒေသခံတချို့က ပြောပါတယ်။ သပိတ်မှာပါဝင်သူတွေ ဖမ်းဆီးခံရစဉ်မှာ သေဆုံးတာတွေနဲ့ပတ်သက်လို့ စစ်ကောင်စီဘက်က သီးသန့် ထုတ်ပြန်တာတွေ မရှိသေးပါဘူး။

   ပြီးခဲ့တဲ့ ဒီဇင်ဘာလကလည်း ရန်ကုန်မြို့မှာ ဓာတ်ပုံသတင်းထောက်နဲ့ သမဂ္ဂအဖွဲ့ဝင် အမျိုးသမီးကို ဆန္ဒပြပွဲအသွား လမ်းမှာ အဖမ်းခံရပြီး လက်ရှိအချိန်ထိ အဆက်သွယ်မရတာတွေ ရှိပါတယ်။

   ထားဝယ်မြို့မှာလည်း အာဏာရှင်ဆန့်ကျင်ရေး သပိတ်ဦးဆောင်သူ ကိုထွန်းဦးကိုလည်း ပုဒ်မ ၅ ခုနဲ့ ထောင်ဒဏ် ၁၉နှစ် ချမှတ်ပြီး နောက်ထပ် ပုဒ်မ ၄ခုအတွက်လည်း ဆက်လက်တရားရင်ဆိုင်နေရပါတယ်။

5. ၆ ဇန်နဝါရီ ၂၀၂၂စစ်ကိုင်းအခြေစိုက် ဇေယျာတိုင်းမ်စ်မီဒီယာ သတင်းထောက်တစ်ဦး ထောင်ဒဏ် ၂ နှစ် ချမှတ်ခံရ

   စစ်ကိုင်းတိုင်းအတွင်းက သတင်းတွေကို ဖော်ပြနေတဲ့ ဇေယျာတိုင်းမ်စ်သတင်းဌာန သတင်းထောက်တစ်ဦးဖြစ်သူ ကိုပြည့်ဖြိုးအောင်ကို ရွှေဘိုထောင်တွင်းတရားရုံးကနေ ဒီနေ့ ဒီဇင်ဘာလ ၆ ရက်မှာ ထောင်ဒဏ် ၂ နှစ် ချမှတ်လိုက်တယ်လို့ သိရပါတယ်။

   ကိုပြည့်ဖြိုးအောင်ကို စစ်ကောင်စီက ၃ နီးပါး ဖမ်းဆီးထိန်းသိမ်းခဲ့အပြီးမှာ မတည်မငြိမ်ဖြစ်စေရန်လှုံ့ဆော်မှု ပုဒ်မ ၅၀၅-က နဲ့ ထောင်ဒဏ် ၂ နှစ်ချမှတ်ခဲ့တာဖြစ်ပါတယ်။

   ကိုပြည့်ဖြိုးအောင်ဟာ မန္တလေးအခြေစိုက် VOM သတင်းဌာနအတွက် သတင်းလိုက်ပေးနေတဲ့ အလွတ်တန်းသတင်းထောက်တစ်ဦးဖြစ်တယ်လို့လည်း သိရပါတယ်။

   လက်ရှိမှာ ဇေယျာတိုင်းမ်စ် မီဒီယာရဲ့ နောက်ထပ် သတင်းသမားတစ်ဦးဖြစ်သူ ကိုဒီမြတ်ငြိမ်းဟာလည်း ဖမ်းဆီးထိန်းသိမ်းခံထားရပြီး မတရားအသင်းဆက်သွယ်မှုပုဒ်မနဲ့ တရားစွဲဆိုခံထားရပါတယ်။

   စစ်တပ်က ဖေဖော်ဝါရီလ ၁ ရက်မှာ အာဏာသိမ်းပြီးနောက်ပိုင်း ဖမ်းဆီးထိန်းသိမ်းခံရတဲ့ သတင်းသမား ၁၁၄ ဦးရှိပေမဲ့ သူတို့ထဲက ၇၀ ဦး ပြန်လွတ်လာပြီပြီး ၄၁ ဦးကတော့ ဖမ်းဆီးထိန်းသိမ်းခံရကာ တရားရင်ဆိုင်နေရပါတယ်။

6. ၆ ဇန်နဝါရီ ၂၀၂၂ကယန်းသာယာလမ်းဆုံတိုက်ပွဲမှာ စစ်ကောင်စီတပ်ဖွဲ့ဝင် ၁၅ ဦးသေဆုံး

   ကယား(ကရင်နီ)ပြည်နယ်၊ လွိုင်ကော်မြို့နယ်ထဲက ကယန်းသာယာလမ်းဆုံမှာ ဒီနေ့ ဇန်နဝါရီလ ၆ ရက်၊ မနက်အစောပိုင်းက ဖြစ်တဲ့ စစ်ကောင်စီတပ်နဲ့တိုက်ပွဲအတွင်း စစ်ကောင်စီဘက်က ၁၅ ဦးသေဆုံးတယ်လို့ ဖယ်ခုံဇုန် ကရင်နီအမျိုးသားများကာကွယ်ရေးတပ်(KNDF)က သတင်းထုတ်ပြန်ပါတယ်။

   စစ်ကောင်စီဘက်က သေဆုံးသူတွေထဲမှာ ဗိုလ်ကြီးအဆင့်ရှိသူ ၂ ဦးလည်းပါဝင်ပြီး လက်နက်ခဲယမ်းတချို့ကိုလည်း ဖမ်းဆီးမိတယ်လို့ ဆိုပါတယ်။

   လွိုင်ကော်မှာရှိတဲ့စစ်ကောင်စီရဲ့အမြောက်တပ်က ကယန်းသာယာလမ်းခွဘက်ကို မနက်ခင်းအစောပိုင်းမှာ လက်နက်ကြီးတွေနဲ့ အဆက်မပြတ်ပစ်ခတ်ခဲ့တာကြောင့် KNDF တပ်ဖွဲ့ဝင်တွေက စစ်ကောင်စီတပ်ဖွဲ့ဝင်တွေကို တိုက်ခိုက်ခဲ့တာလို့ NUG အာဘော် PTV သတင်းမှာဖော်ပြထားပါတယ်။

7. ၆ ဇန်နဝါရီ ၂၀၂၂ရွှေပေါက္ကံဘောလုံးကွင်းထဲက စစ်ကောင်စီတပ်ဖွဲ့ဝင်တွေ ဗုံးသီးနဲ့ပစ်ခတ်တိုက်ခိုက်ခံရ

   ရန်ကုန်မြို့၊ ရွှေပေါက္ကံမြို့နယ်ထဲက တောင်ငူလမ်းမှာရှိတဲ့ စစ်ကောင်စီတပ်ဖွဲ့ဝင်ရှိရာ ဘောလုံးကွင်းထဲကို ဒီနေ့ ဇန်နဝါရီလ ၆ ရက်မှာ ဗုံးသီး ၃ လုံးနဲ့ ပစ်ခတ်တိုက်ခိုက်ခဲ့တယ်ဆိုပြီး မြို့ပြပြောက်ကျားတပ်ဖွဲ့က လူမှုကွန်ယက်ကနေ သတင်းထုတ်ပြန်လာပါတယ်။

   ၄၀ မမ ဗုံးသီးနဲ့ပစ်ခတ်ခံခဲ့တာကြောင့် စစ်ကောင်စီဘက်က ၁၀ ဦးထက်မနည်း ထိခိုက်သေဆုံးနိုင်တယ်လို့လည်း ဆိုပါတယ်။

   ဒီတိုက်ခိုက်မှုဟာ ရန်ကုန်တိုင်း စစ်ဒေသခွဲ ကွပ်ကဲရေးအဖွဲ့ရဲ့ ပျံလွှားအောင် စစ်ဆင်ရေး တစိတ်တစ်ပိုင်းဖြစ်တယ်လို့လည်း ဆိုပါတယ်။

   ပြီးခဲ့တဲ့နှစ် ဒီဇင်ဘာလနှောင်းပိုင်းတုန်းကလည်း ရန်ကုန်မြို့ပြပြောက်ကျားအဖွဲ့ဟာ ဒဂုံဆိပ်ကမ်းမြို့နယ်ရဲစခန်းကို ဗုံးပစ်လောင်ချာသုံးပြီး ပစ်ခတ်တိုက်ခိုက်တာလုပ်ခဲ့ပါတယ်။

8. ၆ ဇန်နဝါရီ ၂၀၂၂ထားဝယ်မြို့က သပိတ်ခေါင်းဆောင်ကို ထောင်ဒဏ် ၁၉ နှစ်ချမှတ်, နောက်ထပ်ပုဒ်မ ၄ခုနဲ့ထပ်ရင်ဆိုင်ရဖို့လည်းရှိနေ

   တနင်္သာရီတိုင်း၊ ထားဝယ်မြို့မှာ စစ်အာဏာရှင်ဆန့်ကျင်ရေးသပိတ်လှုပ်ရှားမှုတွေကို ဦးဆောင်သူတစ်ဦးဖြစ်တဲ့ကိုထွန်းဦးကို ပြီးခဲ့တဲ့ ဒီဇင်ဘာလနောက်ဆုံးပတ်မှာ ထားဝယ်ထောင်တွင်းတရားရုံးက ထောင်ဒဏ် ၁၉ နှစ်ချမှတ်လိုက်တယ်လို့ ထားဝယ်နိုင်ငံရေးအကျဉ်းသားများကွန်ရက်က ဒီကနေ့ ဇန်နဝါရီလ ၆ရက် နေ့မှာ ထုတ်ပြန်လာပါတယ်။

   သပိတ်ခေါင်းဆောင်ကိုထွန်းဦးကို ပြီးခဲ့တဲ့နှစ် ၂၀၂၁ ခုနှစ်၊စက်တင်ဘာ ၂၄ရက်နေ့က စစ်ကောင်စီတပ်တွေက နေအိမ်မှာ ဝင်ရောက်ဖမ်းဆီးခဲ့တာဖြစ်ပြီး ပုဒ်မ ၉ ခုနဲ့တရားစွဲဆိုဖမ်းဆီးထားခဲ့တာဖြစ်တယ်လို့ထားဝယ်နိုင်ကျဉ်းကွန်ရက်က ထုတ်ပြန်ပြောဆိုပါတယ်။

   အခုထောင်ဒဏ် ၁၉ နှစ်ချမှတ်ခံရပြီးတဲ့အခါမှာလည်း လက်ကျန်ပုဒ်မတွေဖြစ်တဲ့ ပုဒ်မ ၅၀၅(ဂ)၊ ၅၀၊၅၄(ည)၊ ၃၀၂/၃၄ စတဲ့ ပုဒ်မတွေအတွက် အမှုဆက်လက်ရင်ဆိုင်ရမှာဖြစ်တယ်လို့ထားဝယ် နိုင်ငံရေး အကျဉ်းသားများကွန်ရက်ရဲ့ထုတ်ပြန်ချက်အရသိရပါတယ်။

   ပြီးခဲ့တဲ့ ဒီဇင်ဘာ ၃၁ ရက်နေ့ထားဝယ် မြို့ပေါ်ကတက်ကြွလှုပ်ရှားသူတွေဖြစ်တဲ့ကိုဝေယံဖြိုးနဲ့ကိုညဏ်ဝင်းကို ထားဝယ်အကျဉ်းထောင် ထောင်တွင်းတရားရုံးမှာ ထောင်ဒဏ် ၁၁ နှစ် အထိ အပြီးသတ်အမိန့်ချမှတ်ခဲ့ပါတယ်။

9. ၆ ဇန်နဝါရီ ၂၀၂၂မတူပီ-ဟားခါးလမ်းမှာ စစ်ကောင်စီတပ်နဲ့ တိုက်ပွဲဖြစ်နေတယ်လို့ CDF မတူပီ ပြော

   ချင်းပြည်နယ်ထဲက မတူပီ-ဟားခါးလမ်းမှာ ဒီနေ့ ဇန်နဝါရီလ ၆ ရက် မနက်ကစလို့ စစ်ကောင်စီတပ်နဲ့တိုက်ပွဲဖြစ်နေတယ်ဆိုပြီး မတူပီ CDF(ချင်းကာကွယ်ရေးတပ်)က လူမှုကွန်ယက်ကနေ သတင်းထုတ်ပြန်လာပါတယ်။

   ဒီနေ့မနက် ၉ နာရီကျော်ကစလို့ မတူပီ-ဟားခါးလမ်း ဘယ်ဖက်ခြမ်းက ကီလှူန်းနဲ့ လုံလှော်ရွာကြားမှာ တိုက်ပွဲ စဖြစ်နေတာလို့လည်း ဆိုပါတယ်။

   စစ်ကောင်စီဘက်က အင်အားအလုံးအရင်းနဲ့ ထိုးစစ်ဆင်လာလို့ အခုလို တိုက်ပွဲဖြစ်နေတာလို့လည်း ပြောပါတယ်။

   မတူပီ- ဟားခါးလမ်းပေါ်မှာ ဇန်နဝါရီလ ၄ ရက်နေ့တုန်းကလည်း ထိုးစစ်ဆင်လာတဲ့ စစ်ကောင်စီတပ်နဲ့ ဖနိုင်နဲ့ ငလိုင်ရွာကြားမှာ တိုက်ပွဲဖြစ်ခဲ့ပြီး အဲဒီနေ့ တိုက်ပွဲတုန်းကတော့ စစ်ကောင်စီဘက်က အရာရှိတစ်ဦးအပါအဝင် ၃ ဦး သေဆုံးခဲ့တယ်လို့ မတူပီ CDF က မနေ့က သတင်းထုတ်ပြန်ထားတာတွေ့ရပါတယ်။

10. ၆ ဇန်နဝါရီ ၂၀၂၂ကမ္ဘောဒီးယားဝန်ကြီးချုပ် ဟွန်ဆန်အနေနဲ့ မြန်မာနိုင်ငံ ခရီးစဉ်ကို ဖျက်သင့်တယ်လို့ AI အဖွဲ့ပြော

    ကမ္ဘောဒီးယားဝန်ကြီးချုပ် ဟွန်ဆန်အနေနဲ့ မြန်မာနိုင်ငံကို သွားရောက်မယ့် သူ့ခရီးစဉ်ကို ဖျက်သိမ်းသင့်ပြီး အနှစ်မပါတဲ့ဟန်ပြလုပ်ရပ်ကို မလုပ်သင့်ဘူးဆိုပြီး နိုင်ငံတကာလွတ်ငြိမ်းချမ်းသာခွင့်အဖွဲ့(AI) ဘက်က ပြောလာပါတယ်။

    ဝန်ကြီးချုပ်ဟွန်ဆန်ဟာ မြန်မာနိုင်ငံကို မနက်ဖြန် ဇန်နဝါရီလ ၇ ရက်နဲ့ ၈ ရက်မှာ ၂ ရက်ကြာ လာရောက်ဖို့ရှိနေတာဖြစ်ပြီး ဟန်ပြသဘောမျိုးလာရောက်တာထက် လူ့အခွင့်အရေးကိစ္စရပ်တွေကို ပိုပြီး ဦးစားပေးသင့်တယ်လို့ AI အဖွဲ့ရဲ့ အာရှရေးရာသုတေသီကပြောလိုက်တာဖြစ်ပါတယ်။

    ''ပြုရိုး ပြုစဉ်မဟုတ်တဲ့ ဝန်ကြီးချုပ် ဟွန်ဆန်ရဲ့အခုလို သံခင်းတမန်ခင်းကြိုးပမ်းမှုက မြန်မာ့အရေးအတွက် အာဆီယံ အဖွဲ့ကြီးတုံ့ပြန်ပုံကို ချိုးဖောက်တာဖြစ်သလို အာဏာသိမ်းစစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်ကိုလည်း အာဆီယံရပ်တည်ချက်နဲ့ပတ်သက်လို့ ထင်ပြတ်တဲ့သတင်းစကားပါးတာမျိုး မဖြစ်အောင် ဦးတည်သွားနိုင်လို့ အကောင်းထက် အဆိုးကိုပဲ ဦးတည်သွားစေနိုင်တယ်'' လို့ AI အဖွဲ့ အာရှရေးရာသုတေသန ဒုတိယညွှန်ကြားရေးမှူးက ပြောပါတယ်။

    ကမ္ဘောဒီးယားနိုင်ငံဟာ ဒီနှစ်မှာ အာဆီယံအလှည့်ကျဥက္ကဋ္ဌ တာဝန်ယူမှာဖြစ်လို့ ပြီးခဲ့တဲ့နှစ် ဧပြီလတုန်းက မြန်မာ့အရေးအတွက် အာဆီယံအဖွဲ့ဝင်နိုင်ငံခေါင်းဆောင်တွေကြား ရရှိထားတဲ့ ဘုံသဘောတူညီချက် ၅ ရပ် အကောင်အထည်ဖော်ရေးကို ကူညီသင့်သလို လူ့အခွင့်အရေးနဲ့ ချိုးဖောက်မှုတွေအတွက် ပိုတာဝန်ယူမှု တာဝန်ခံမှုရှိလာစေရေးအတွက် ပိုအားထုတ်သင့်တယ်လို့ သူက ထောက်ပြပါတယ်။

    ဝန်ကြီးချုပ် ဟွန်ဆန်ရဲ့မြန်မာပြည်ခရီးစဉ်ဟာ မြန်မာပြည်တွင်းမှာ အာဏာသိမ်းမှုဖြစ်ပြီးတဲ့နောက် ပြည်ပ အစိုးရအဖွဲ့ခေါင်းဆောင်တစ်ဦးရဲ့ ပထမဆုံး ခရီးစဉ်ဖြစ်လာမှာဖြစ်တာကြောင့် ဒါဟာ လက်ရှိအာဏာသိမ်းစစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင် ဦးဆောင်တဲ့ စစ်ကောင်စီကို တရားဝင် အသိအမှတ်ပြုရာရောက်တယ်ဆိုပြီး အကဲခတ်တွေက ထောက်ပြနေသလို လူ့အခွင့်အရေးအဖွဲ့တွေကလည်း ကန့် ကွက်နေပါတယ်။

    ကမ္ဘောဒီးယားဝန်ကြီးချုပ်ကတော့ သူ့ခရီးစဉ်အတွက် အပြောမစောကြဖို့ အစောပိုင်းက ပြောထားသလို ကမ္ဘောဒီးယားနိုင်ငံ အာဆီယံအလှည့်ကျ ဥက္ကဋ္ဌဖြစ်လာချိန်မှာ အာဆီယံ ၉ နိုင်ငံမဟုတ်ဘဲ ၁၀ နိုင်ငံအပြည့်ဖြစ်အောင် မြန်မာနိုင်ငံပါ ဆက်ပြီးပါဝင်နေရေး အားထုတ်မယ်လို့ ဆိုပါတယ်။

    အာဆီယံ ဘက်ကတော့ မြန်မာ့အရေး ဘုံသဘောတူညီချက် ၅ ရပ်ကို စစ်ကောင်စီဘက်က အကောင်အထည်ဖော်ရာမှာ တိုးတက်မှုမရှိဘူးဆိုပြီး စစ်ကောင်စီ ဥက္ကဋ္ဌကို ပြီးခဲ့တဲ့နှစ် ဒီဇင်ဘာလအတွင်းမှာ ကျင်းပတဲ့ အာဆီယံနဲ့ဒေသတွင်း ထိပ်သီးအစည်းဝေးပွဲတွေကို မဖိတ်ကြားခဲ့ပါဘူး။

    အဲဒီအစား အာဆီယံက နိုင်ငံရေးအရ မဆက်နွယ်တဲ့ကိုယ်စားလှယ်တစ်ဦးဦးကိုပဲ တက်ရောက်ခွင့်ပေးခဲ့လို့ စစ်ကောင်စီဘက်က ဒါဟာ အာဆီယံပဋိညာဉ်ကို ချိုးဖောက်တာလို့ ထောက်ပြပြောဆိုပြီး ကိုယ်စားလှယ် မလွှတ်ခဲ့ပါဘူး။

    တစ်ဖက်မှာလည်း အဲဒီတုန်းက အာဆီယံအစည်းအဝေးပွဲတွေကို တက်ရောက်နိုင်ရေး ပူးပေါင်းဖို့ အသင့်ပဲလို့ အမျိုးသားညီညွတ်ရေးအစိုးရ (NUG) က အာဆီယံဘက်ကို အကြောင်းကြားခဲ့ပေမဲ့ အာဆီယံဘက်က တုံ့ပြန်ချက် မရခဲ့ဘူးဆိုပြီး NUG ဘက်က ပြောထားဖူးပါတယ်။

11. ၅ ဇန်နဝါရီ ၂၀၂၂ရန်ကုန်အပါအဝင် မြို့ကြီးတချို့က ပေါက်ကွဲမှုအခြေအနေ

12. ၅ ဇန်နဝါရီ ၂၀၂၂ဝန်ကြီးချုပ်ဟွန်ဆန်ရဲ့ နေပြည်တော် ခရီးစဥ် အပေါ် သုံးသပ်ချက်

13. ၅ ဇန်နဝါရီ ၂၀၂၂မြန်မာ့စီးပွားရေးကြီးတခုလုံး သေးငယ်ကျုံ့ဝင်သွားခြင်း

14. ၅ ဇန်နဝါရီ ၂၀၂၂အင်တာနက် ဖြတ်တောက်မှုကြောင့် ဆုံးရှုံးမှု အကြီးဆုံး နိုင်ငံတွေထဲ မြန်မာထိပ်ဆုံးမှာရှိ

    ၂၀၂၁ ခုနှစ်ထဲ မြန်မာ အာဏာသိမ်း စစ်တပ်ဟာ တိုင်းပြည်အနှံ့ ပေါ်ပေါက်နေတဲ့ ဒီမိုကရေစီ အရေး လှုပ်ရှားတောင်းဆိုမှုတွေကို ထိန်းချုပ်လိုတဲ့ အတွက် အင်တာနက် ဖြတ်တောက်တာတွေ လုပ်ခဲ့တာမှာ တိုင်းပြည်အတွက် ဒေါ်လာသန်းပေါင်း ၂.၈ ဘီလျံဖိုး ထိခိုက်နစ်နာခဲ့ရတယ် ဆိုတဲ့ စစ်တမ်း ထွက်လာပါတယ်။

    ၂၀၂၁ ထဲမှာ မြန်မာပြည် အပါအဝင် ကမ္ဘာ့နိုင်ငံပေါင်း ၂၁ နိုင်ငံမှာ အင်တာနက် ပြတ်တောက်ခဲ့တဲ့ အချိန်ပေါင်းဟာ နာရီ သုံးသောင်းကျော် ရှိခဲ့တယ်လို့ ယူကေ အခြေစိုက် ဒစ်ဂျစ်တယ် လုံခြုံရေး ဆိုင်ရာ သုတေသနအဖွဲ့ Top10VPN က ထုတ်ပြန်ပါတယ်။

    အင်တာနက် ပြတ်တောက်မှုကြောင့် ကမ္ဘာလုံးဆိုင်ရာ ဆုံးရှုံးနစ်နာမှု ဒေါ်လာ ၅.၅ ဘီလျံဖိုး ဖြစ်စေခဲ့တဲ့ အဲဒီ ၂၁ နိုင်ငံ စာရင်းထဲမှာ မြန်မာဟာ ထိပ်ဆုံးက ရှိနေတာ ဖြစ်ပြီး၊ ဆုံးရှုံး နစ်နာ ခဲ့သမျှတွေရဲ့ ထက်ဝက်ကျော်ဟာ မြန်မာနိုင်ငံထဲမှာ ပေါ်ပေါက်ခဲ့တာ ဖြစ်ပါတယ်။

    မြန်မာရဲ့ နောက်မှာ နိုင်ဂျီးရီးယား (ဒေါ်လာ ၁.၅ ဘီလျံဖိုး နစ်နာ) နဲ့ အိန္ဒိယ (ဒေါ်လာ ၅၈၃ သန်းဖိုး နစ်နာ) တို့ အသီးသီး ရှိနေပါတယ်။

    ၂၀၂၁ ထဲ ကမ္ဘာလုံးဆိုင်ရာ အင်တာနက်ပြတ်တောက်မှုဟာ ၂၀၂၀ နဲ့ နှိုင်းယှဥ်ရင် ၃၆% မြင့်တက်ခဲ့တယ် လို့လည်း ဆိုပါတယ်။

    မြန်မာ အာဏာသိမ်း စစ်တပ်အပါအဝင် တချို့ အာဏာပိုင်တွေဟာ တိုင်းပြည်တွေ ထဲမှာ သတင်း စီးဆင်းမှုကို ထိန်းချုပ်ဖို့ ရည်ရွယ်ချက်နဲ့ အင်တာနက် ပိတ်ပင် ဖြတ်တောက်တာ၊ မြန်နှုန်းကို တမင် ရည်ရွယ်ချက် ရှိရှိနဲ့ နှေးချ ပစ်လိုက်တာ၊ ဆိုရှယ်မီဒီယာတွေကို ပိတ်ဆို့တာ အစရှိတဲ့ နည်းတွေ သုံးခဲ့တယ်လို့ Top10VPN က ဆိုပါတယ်။ #ဘီဘီစီမြန်မာပိုင်း

15. ၅ ဇန်နဝါရီ ၂၀၂၂လေကြောင်းတိုက်ခိုက်မှုလုပ်မယ့် သတိပေးစာတွေ မန္တလေး- ဗန်းမော်ကားလမ်းတဝိုက် ဖြန့်ဝေနေတယ်လို့ဒေသခံတွေပြော, ဗုံးခိုကျင်းတွေ တူးပြီးသတိနဲ့နေကြဖို့ ဒေသကာကွယ်ရေးတပ်တွေဘက်က ထုတ်ပြန်

    မန္တလေး- ဗန်းမော်ကားလမ်းပေါ်မှာရှိတဲ့ မြတောင်ကျေးရွာအနီးတဝိုက်လမ်းဆုံမှာ လေကြောင်း တိုက်ခိုက်မှုတွေလုပ်မှာဖြစ်ပြီး နေအိမ်၊ ဘုရားနဲ့စာသင်ကျောင်းတွေ ဆေးရုံတွေကို အမှတ်အသားတွေလုပ်ထားဖို့သတိပေးစာပါတဲ့စာရွက်တွေကို စစ်ကောင်စီဘက်က ဒီကနေ့ ဇန်နဝါရီ ၅ ရက် မနက်ပိုင်းကစပြီး ဖြန့်ဝေနေတယ်လို့ဒေသခံတွေကပြောပါတယ်။

    အခုလိုလေကြောင်းတိုက်ခိုက်မှုသတိပေးစာတွေဖြန့်ဝေလာလာတာကြောင့် ဒေသ ကာကွယ်ရေး တပ်တွေ အနေနဲ့ဒေသခံတွေကို ဗုံးခိုကျင်းတွေ တူးထားဖို့နဲ့ လေကြောင်းပစ်ခတ်မှုတွေဖြစ်လာရင် ဆောင်ရန်ရှောင်ရန်တွေကို အသိပေးထား တယ်လို့ဒေသကာကွယ်ရေးတပ်ဘက်က ပြောပါတယ်။

    "မြတောင်လမ်းဆုံတလျှောက်မှာ ဗိုလ်ကြီးကားနဲ့ဖြန့်ကျဲသွားတယ်။ တိုင်တွေမှာကပ်တယ်။ သူတို့လေကြောင်းတိုက်ခိုက်မှုတွေလုပ်ပြီး သတိပေးထားတဲ့နေရာတွေဆိုတာ မြတောင် လမ်းဆုံဆိုတာ မန္တလေး၊ ဗန်းမော်မဟာဗျူဟာလမ်းမကြီး။ အဲဒီနေရာက ရေကြောင်းပဲ သူတို့သုံးလို့ရတယ်။ ကုန်းလမ်းသုံးတဲ့အခါတိုင်း ဒေသကာကွယ်ရေးတပ်တွေက မိုင်းဆွဲထားတာ ၅ ကြိမ်လောက်ရှိနေလို့ အခု သူတို့က အဲဒီနေရာတွေကိုလေကြောင်းပစ်မှတ်ဆိုပြီး ထည့် ထားတာစာရွက်ထဲမှာ " လို့ ထီးချိုင့်ဒေသကာကွယ်ရေးတပ် Eagles- Army- HPDF က ဘီဘီစီကိုပြောပါတယ်။

    အခုလို စာရွက်တွေ ဖြန့်ဝေတယ်ဆိုတဲ့ ဒေသခံတွေပြောကြားချက်နဲ့ ပတ်သက်လို့ စစ်ကောင်စီဘက်ကို ဘီဘီစီက ဆက်သွယ်မေးမြန်းဖို့ကြိုးစားနေပါတယ်။

16. ၅ ဇန်နဝါရီ ၂၀၂၂စစ်ကိုင်းပညာရေးကောလိပ်က ပထမနှစ်ကျောင်းသားနဲ့ အသက်မပြည့်သေးသူတစ်ဦးကို စစ်ကောင်စီ ဖမ်းဆီး

    စစ်ကိုင်းပညာရေးကောလိပ်က ပထမနှစ်ကျောင်းသား တစ်ဦးဖြစ်တဲ့ ကိုမင်းခန့်ဇော် ခေါ် မင်းခန့်နဲ့ အသက် ၁၇ နှစ်အရွယ်မောင်အောင်ပြည့်ဖြိုးကို မနေ့ဇန်နဝါရီ ၄ ရက်နေ့မနက်ပိုင်းက စစ်ကောင်စီတပ်တွေကဖမ်းဆီးခေါ်ဆောင်သွားခဲ့တယ်လို့ပညာရေးကောလိပ်သမဂ္ဂကျောင်းသားများကိုယ်စားပြုကော်မတီက ထုတ်ပြန်လာပါတယ်။

    " မနေ့ကမနက်ခင်း(ဇန်နဝါရီ၄ရက်) တုန်းက တန့်ဆည်-ခင်ဦးကားလမ်းမပေါ်မှာ ဆိုင်ကယ်နဲ့သွားနေတုန်းအဖမ်းခံလိုက်ရတာ၊ သေနတ်နဲ့ပစ်ခတ်ဖမ်းဆီးတယ်လို့သိရတယ်။ ဗီဒီယိုဖိုင်မှာလည်းတွေ့ရတယ်၊ အောင်ပြည့်ဖြိုးက ပေါင်မှာလည်း ပတ်တီးစီးထားတယ်။ စစ်ကိုင်းတိုင်းကလည်းစစ်ပူဒေသဖြစ်နေတယ်။ စစ်ကောင်စီကိုခုခံတော်လှန်နေတဲ့နေရာဖြစ်တဲ့ အတွက်ကျောင်းသားလူငယ်တွေကို စစ်တပ်က PDF လို့စွပ်စွဲပြီး ဖမ်းဆီးနေတာတွေကြောင့် အဖမ်းခံရတယ်လို့ယူဆပါတယ်။ ပညာရေးကောလိပ်ကျောင်းဆရာဖြစ်မယ့် ပထမနှစ်ကျောင်းသား လေးကို အခုလိုနှိပ်စက်နေတာမြင်ရတာတော်တော်စိတ်မကောင်းဘူး။ အသက်မပြည့်သေးတဲ့ လူငယ်တွေကို အခုလိုလုပ်နေတာလည်း ရှုတ်ချပါတယ်" လို့ ပညာရေးကောလိပ်သမဂ္ဂကျောင်းသားများကိုယ်စားပြုကော်မတီကတာဝန်ရှိသူက ဘီဘီစီကိုပြောပါတယ်။

    ဒီလူငယ်နှစ်ဦး ဖမ်းဆီးခံရတဲ့ ဇန်နဝါရီ ၄ ရက်နေ့ညနေပိုင်းမှာတော့ လူငယ်နှစ်ဦး ရိုက်နှက်ခံထားရတဲ့ ဒဏ်ရာတွေနဲ့နောက်လက်ပြန်ကြိုးတုပ်ထားတဲ့ ရုပ်သံဗီဒီယို ဖိုင်တစ်ခုလည်း လူမှုကွန်ရက်ပေါ်ပျံနှံလာ တာကိုတွေ့ရပါတယ်။

    အဲဒီဖိုင်နဲ့ပတ်သက်လို့တော့ ဘီဘီစီက အတည်ပြုနိုင်ဖို့တော့ကြိုးစားနေပါတယ်။ လက်ရှိမှာတော့ ဖမ်းဆီးခံထားရတဲ့ ကိုမင်းခန့်ဇော်နဲ့မောင်အောင်ပြည့်ဖြိုးတို့နဲ့ပတ်သက်ပြီး ဘယ်မှာဖမ်းဆီးထိန်းသိမ်းထားတယ်ဆိုတာကို မိသားစုတွေကသိရတာမရှိသလို ဒဏ်ရာတွေနဲ့ ဖမ်းဆီးခံလူငယ်တွေရဲ့အသက်အန္တရာယ်နဲ့ပတ်သက်ပြီး စိုးရိမ်ပူပန်နေရကြောင်းကိုလည်း ပညာရေးကောလိပ်ကျောင်းသားမဂ္ဂကိုယ်စားပြုကော်မတီက ထုတ်ပြန်ထားပါတယ်။

17. ၅ ဇန်နဝါရီ ၂၀၂၂ကောက်ဘဇားက ရိုဟင်ဂျာဒုက္ခသည်တွေကို ကုသပေးနေတဲ့ကိုဗစ်စင်တာ မီးလောင်

    ဘင်္ဂလားဒေ့ရှ်နိုင်ငံ၊ ကောက်ဘဇားခရိုင်မှာ ရိုဟင်ဂျာဒုက္ခသည်တွေကို ကုသပေးနေတဲ့ ကိုဗစ်ကုသရေးစင်တာဟာ မနေ့ ဇန်နဝါရီလ ၄ ရက်နေ့က မီးလောင်မှုဖြစ်ခဲ့ပါတယ်။

    ရုတ်တရက် လောင်တဲ့မီးကြောင့် လူထိခိုက်မှုမရှိပေမဲ့ စင်တာမှာရှိတဲ့ သံထည်ခုတင်တွေကလွဲပြီး အားလုံးနီးပါး ပြာကျသွားခဲ့တာဖြစ်ပါတယ်။

    အဲဒီကုသရေးစင်တာကို နိုင်ငံတကာရွှေ့ပြောင်းသွားလာသူများအကူအညီပေးရေးအဖွဲ့ (IOM)က စီမံလည်ပတ်နေ တာဖြစ်ပြီး အခုတော့ အားလုံးပုံမှန်အတိုင်းပြန်လည်ပတ်နိုင်အောင် အမြန်ဆုံးလုပ်နေပြီလို့ IOM ဘက်က ပြောထားပါတယ်။

18. ၅ ဇန်နဝါရီ ၂၀၂၂ကေအဲန်ယူ- တပ်မဟာ ၅ နယ်မြေမှာ တစ်နှစ်အတွင်း စစ်ကောင်စီတပ်နဲ့ KNLA ကြား တိုက်ပွဲပေါင်း ၂၇၀၀ နီးပါးဖြစ်ပွား, စစ်ကောင်စီတပ်ဖွဲ့ဝင် ၁၃၆၀ ကျော်နဲ့ KNLA တပ်ဖွဲ့ဝင် ၃၀ ကျော်ကျဆုံး

    ကရင်အမျိုးသားအစည်းအရုံး- ကေအဲန်ယူ တပ်မဟာ ၅ နယ်မြေမှာ ပြီးခဲ့တဲ့ ၂၀၂၁ ခုနှစ်၊ ဇန်နဝါရီလကနေ ဒီဇင်ဘာလအထိ တစ်နှစ်အတွင်း စစ်ကောင်စီတပ်နဲ့ ကရင်အမျိုးသားလွတ်မြောက်ရေးတပ်(KNLA)တို့ကြား တိုက်ပွဲပေါင်း ၂၇၀၀ နီးပါးဖြစ်ခဲ့တယ်လို့ ကေအဲန်ယူ-မူတြော်သတင်းက ဖော်ပြလာပါတယ်။

    စစ်ကောင်စီတပ်တွေနဲ့ KNLA တပ်မဟာ ၅ လက်အောက်က တပ်ရင်း၊တပ်ခွဲတွေ အပြန်အလှန်တိုက်ပွဲတွေအပြင် စစ်ကောင်စီတပ်ဘက်က လူ့အခွင့်အရေး ချိုးဖောက်မှု နှစ်ချုပ်စာရင်းကို တပ်မဟာ ၅ စစ်ရုံးချုပ်က ဒီနေ့ ဇန်နဝါရီလ ၅ ရက်မှာ ထုတ်ပြန်လိုက်တာလို့ ဆိုပါတယ်။

    အဲဒီတိုက်ပွဲတွေကြောင့် စစ်ကောင်စီဘက်က တပ်သား ၁၃၆၀ ကျော်နဲ့ KNLA တပ်ဖွဲ့ဝင် ၃၀ ကျော် ကျဆုံးခဲ့တယ်လို့ သတင်းထုတ်ပြန်ချက်က ဆိုပါတယ်။

    စစ်ကောင်စီဘက် သေဆုံးသူတွေထဲမှာ ဗျူဟာမှူ ၁ ဦး၊ တပ်ရင်းမှူး ၃ ဦး၊ တပ်ခွဲမှူး ၁၄ ဦး၊ ဒုတပ်ခွဲမှူး ၁ ဦး၊ ဗိုလ် ၁ ဦး၊ တပ်ကြပ်ကြီး ၁ ဦးနဲ့ ဒုတပ်ကြပ် ၁ ဦး ပါဝင်ပြီး KNLA ဘက်ကတော့ တပ်ခွဲမှူး ၁ ဦး၊ ဒုတပ်ခွဲမှူး ၁ ဦး၊ ဗိုလ် ၂ ဦး၊ တပ်ကြပ်ကြီး ၂ ဦးနဲ့ တပ်ကြပ် ၃ ဦးပါဝင်တယ်လို့လည်း ဖော်ပြထားပါတယ်။

    အဲဒီတိုက်ပွဲတွေအတွင်း စစ်ကောင်စီဘက်က လက်နက်ကြီးနဲ့ပစ်ခတ်ခဲ့တာတွေကြောင့် အရပ်သား ၁၂ ဦးသေဆုံးပြီး နောက်ထပ် ၄၂ ဦး ဒဏ်ရာရသွားခဲ့တယ်လို့လည်း ဆိုပါတယ်။

19. ၅ ဇန်နဝါရီ ၂၀၂၂ဝက်လက်ညောင်ပင်ကြီးတောရွာမှာ ဒေသခံနှစ်ဦးသေဆုံး, စစ်ကောင်စီတပ်သားတွေ ရွာအတွင်းတပ်စွဲထားလို့ ဘေးလွတ်ရာပြေးနေရဆဲ လို့ ဒေသခံတွေပြော

    စစ်ကိုင်းတိုင်းဒေသကြီး၊ ဝက်လက်မြို့ထဲက ညောင်ပင်ကြီးတော ကျေးရွာကို ပြီးခဲ့တဲ့ ဇန်နဝါရီ ၃ ရက်နေ့လယ်ပိုင်းမှာ စစ်ကောင်စီတပ်တွေ ရဟတ်ယာဉ်နဲ့ ဝင်ရောက်ပစ်ခတ်ပြီးနောက် ဒေသခံရွာသားနှစ်ဦး အလောင်းကို ရွာအနီးက လယ်ကွင်းမှာ တွေ့ရေကြောင်း ဒေသခံတွေကပြောပါတယ်။

    " လာပစ်တာတော့ ဘာတိုက်ပွဲမှမရှိဘဲ လာပစ်တာ၊ ပစ်တော့ အကုန် တကွဲတပြားပြေးရတာပဲ။ မနေ့က ရွာအနားပြန်တော့ ရွာသား နှစ် ယောက်အလောင်းကိုတွေ့ကြတာ။ ရိုက်နှက်ခံထားရတာရော သေနတ်ဒဏ်ရာပါ ( အလောင်းတွေမှာ တွေ့တယ်။ အလောင်းလည်း မြေမချပေးနိုင်ပါဘူး။ ရွာထဲတပ်စွဲထား တုန်းပဲဆိုတော့ ပြန်ပြေးခဲ့ရတယ်" လို့ ညောင်ပင်ကြီးတောရွာဒေသခံတစ်ဦးက ဘီဘီစီကိုပြောပါတယ်။

    ပစ်ခတ်ခံရပြီး သေဆုံးနေတဲ့ ရွာသားနှစ်ဦးဟာ ညောင်ပင်ကြီးတောရွာဒေသခံတွေဖြစ်ပြီး တောင်ယာလုပ်ကိုင်ကြတဲ့ ကိုဇော်မျိုးနောင်နဲ့ ဦးဆန်းနိုင်ဆိုသူတွေဖြစ်တယ်လို့ဒေသခံတွေကပြောပါတယ်။ လက်ရှိမှာတော့ စစ်ကောင်စီတပ်တွေဟာ ညောင်ပင်ကြီးတောရွာအတွင်း အင်အားအများအပြားနဲ့တပ်စွဲထားဆဲဖြစ်ပြီး အနီးအနားက ကျေးရွာတွေကို ဝင်ရောက်ရှာဖွေတာ၊ ဒေသခံတွေကို ဖမ်းဆီးစစ်ဆေးတာတွေလုပ်ဆောင်နေတာကြောင့် ကျေးရွာပေါင်း ၅ ရွာထက်မနည်း ဘေးလွတ်ရာ တိမ်းရှောင်နေရတယ်လို့ ဒေသခံတွေကပြောပါတယ်။

    စစ်ကိုင်းတိုင်းထဲက ကျေးရွာတွေအနီးမှာ လေကြောင်းပစ်ခတ်မှုတွေ လုပ်နေတာနဲ့ပတ်သက်လို့စစ်ကောင်စီဘက်ကသတင်းထုတ်ပြန်တာမရှိပါဘူး။

20. ၅ ဇန်နဝါရီ ၂၀၂၂မြန်မာပြည်ခရီးစဉ်ရလဒ်ကို ကြိုတင်တွက်ဆမှုမလုပ်ဖို့ ကမ္ဘောဒီးယားဝန်ကြီးချုပ်ပြော

    ကမ္ဘောဒီးယားနိုင်ငံ ဝန်ကြီးချုပ် ဟွန်ဆန်က လာမယ့်ရက်ပိုင်းအတွင်း စတင်ဖို့ရှိတဲ့ သူ့ရဲ့မြန်မာပြည်ခရီးစဉ်နဲ့ပတ်သက်ပြီး ရလာဒ်ကို ကြိုတင်တွက်ဆတာတွေမလုပ်ဖို့ ဒီနေ့ ဇန်နဝါရီလ ၅ ရက်မှာ ပြောလာပါတယ်။

    ဇန်နဝါရီလ ၇ ရက်က စတင်ပြီး ၂ ရက်ကြာသွားရောက်မယ့် သူ့ရဲ့မြန်မာပြည်ခရီးစဉ်အတွက် ကြိုတင်သတ်မှတ်ချက်တွေ မထားသလို အဲဒီခရီးစဉ်ဟာ မြန်မာ့အရေး အာဆီယံဘုံသဘောတူညီချက် ၅ ရပ်နဲ့လည်း နီးစပ်မှုရှိတယ်လို့ ဝန်ကြီးချုပ်ကပြောလာပါတယ်။

    ဇန်နဝါရီလ ၇ ရက် မနက်ပိုင်းမှာ ကမ္ဘောဒီယားနိုင်ငံကနေ မြန်မာကို ထွက်ခွါပြီး ဇန်နဝါရီလ ၈ ရက် မွန်းလွဲပိုင်းမှာ ပြန်လာမယ်လို့ သူက ဆိုပါတယ်။

    ဒါပေမဲ့ မြန်မာ့အကျပ်အတည်းနဲ့ပတ်သက်ပြီး ကောင်းမွန်တဲ့ရလဒ်ထွက်လာမယ်ဆိုရင် သူ့ရဲ့အပြန်ခရီးစဉ်ကို ရက်ရွှေ့မယ်လို့လည်း ဝန်ကြီးချုပ်က ပြောထားပါတယ်။

    ကမ္ဘောဒီးယားဝန်ကြီးချုပ်ကို မြန်မာပြည်လာဖို့ အာဏာသိမ်း စစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်က ဖိတ်ကြားခဲ့တာဖြစ်ပါတယ်။