သမ္မတ ဦးဝင်းမြင့် တရားခွင်မှာ ပထမဆုံးသက်သေထွက်ဆို

တိုက်ရိုက် ထုတ်လွှင့်ချက်

1. ၄ အောက်တိုဘာ ၂၀၂၁ရေစကြိုမြို့ကအုပ်ချုပ်ရေးမှူးအချို့ကျန်းမာရေးအကြောင်းပြတစ်ပြိုင်နက်နုတ်ထွက်စာတင်

   မကွေးတိုင်း၊ရေစကြိုမြို့ အမှတ်(၈)ရပ်ကွက်အုပ်ချုပ်ရေးမှူးရဲ့နေအိမ်ဝန်းအတွင်းဗုံးခွဲခံရပြီးတဲ့နောက် ရေစကြိုမြို့မြို့ပေါ်ရပ်ကွက်အုပ်ချုပ်ရေးမှူးတွေဟာ ကျန်းမာရေးအကြောင်းပြ နုတ်ထွက်စာတင်လာကြတယ်လို့ ဒေသခံတွေက ဘီဘီစီကို ပြောပါတယ်။

   '' အောက်တိုဘာလ ၂ ရက် ညနေ ၆ နာရီ ကျော်က ရေစကြို အမှတ်(၈)ရပ်ကွက်အုပ်ချုပ်ရေးမှူးဦးတင်လှိုင်ရဲ့နေအိမ်ဝန်းထဲမှာဗုံးပေါက်တယ်။လူထိခိုက်တာမရှိပေမယ့် တော်တော်စိုးရိမ်သွားကြတယ်။အဲဒီတော့ မနေ့က နဲ့ ဒီနေ့က စပြီး ကျန်းမာရေး အကြောင်းပြပြီးနုတ်ထွက်စာတင်ကြတယ်ပြောတယ် '' လို့ ရေစကြိုမြို့ခံတစ်ဦးကပြောပါတယ်။

   လက်ရှိမှာ နုတ်ထွက်စာတင်တဲ့အုပ်ချုပ်ရေးမှုး (၅) ဦးရှိပြီး ရေစကြိုမြို့ပေါ် ရပ်ကွက်(၇)၊(၂)၊ (၄)၊(၅) နဲ့ (၈) ရပ်ကွက်အုပ်ချုပ်ရေမှူးတွေဖြစ်တယ်လို့သိရပါတယ်။ မကွေးတိုင်းဒေသကြီးရေစကြိုမြို့နယ်အတွင်း ဖေဖော်ဝါရီလ(၁)ရက် စစ်တပ်ကအာဏာသိမ်းပြီးတဲ့နောက်ကနေ ၂၀၂၁ ခုနှစ် အောက်တိုဘာလ (၃)ရက်အထိ ရေစကြိုမြို့ပေါ်အုပ်ချုပ်ရေးမှုးတွေအပါအဝင် ကျေးရွာအုပ်စုအုပ်ချုပ်ရေးမှူးတွေရဲ့ကျန်းမာရေးနဲ့ မိသားစုကိစ္စအကြောင်းပြနုတ်ထွက်မှုဟာ (၂၉)ဦးအထိရှိလာပြီလို့ အုပ်ချုပ်ရေးပိုင်းစာရင်းတွေအရသိရပါတယ်။ People Defense Force Yesagyo ရဲ့ စက်တင်ဘာ ၃၀ရက် နောက်ဆုံးထားပြီး အုပ်ချုပ်ရေးမှူးတွေနှုတ်ထွက်ကြဖို့ ထုတ်ပြန်ပြီးတဲ့နောက် ပေါက်ကွဲမှုတွေဖြစ်ခဲ့ပြီး အခုလို နုတ်ထွက်လာကြတယ်လို့ဆိုပါတယ်။ ရေစကြိုမြို့ပေါ်ရပ်ကွက်(၈)ရပ်ကွက်ရှိပြီးအုပ်ချုပ်ရေးမှူး(၈)ဦးရှိကာ ကျေးရွာအုပ်စု(၈၁)အုပ်စုမှာ အုပ်စုအုပ်ချုပ်ရေးမှူး(၈၁)ဦးရှိတာကြောင့် ရေစကြိုမြို့ပေါ်နဲ့ ကျေးရွာအုပ်စုအုပ်ချုပ်ရေးမှူးစုစုပေါင်း(၈၉)ဦးရှိတယ်လို့ အုပ်ချုပ်ရေးစာရင်းတွေအရသိရပါတယ်။

   

   ဓာတ်ပုံ ရင်းမြစ်, CJ

2. ၄ အောက်တိုဘာ ၂၀၂၁တစ်ရက်တည်းနဲ့ စစ်ကောင်စီရဲ့ပစ်မှတ်နေရာ ၃၀ကျော်ကို တိုက်ခိုက်ခဲ့တယ်လို့ NUG ထုတ်ပြန်လာ

   မိမိကိုယ်ကိုယ်ကိုယ် ခုခံကာကွယ်ပိုင်ခွင့်ရှိတဲ့ပြည်သူတွေအနေနဲ့ပြည်သူ့ခုခံစစ် (Peoples Defensive War) ကို ဆင်နွှဲနေရာ အောက်တိုဘာ ၃ရက် သတင်းအချက်အလက်တွေအရ ရန်သူ့စစ်ရေးပစ်မှတ် ၁၇ နေရာ၊ အုပ်ချုပ်ရေးပစ်မှတ် ၁၀ နေရာ နဲ့ စီးပွားရေးပစ်မှတ် ၁၀ နေရာတို့ကို ခုခံတိုက်ခိုက်နိုင်ခဲ့တယ်လို့ အမျိုးသားညီညွတ်ရေးအစိုးရ NUG က ဒီကနေ့ အောက်တိုဘာ ၄ရက်မှာထုတ်ပြန်လာပါတယ်။ စစ်အာဏာရှင်စနစ် အပြီးတိုင်ချုပ်ငြိမ်းရေးနဲ့ ဖက်ဒရယ်ဒီမိုကရေစီတည်ဆောက်ရေးအတွက် ငြိမ်းချမ်းစွာဆန္ဒပြတဲ့ လူထုသပိတ်တွေကလည်း တိုင်းဒေသကြီးတွေမှာ ဆက်လက်ရှိနေတယ်လို့ ထုတ်ပြန်ချက်မှာဖော်ပြပါတယ်။ NUG အစိုးရလက်အောက်ကာကွယ်ရေးဝန်ကြီးဌာနရဲ့ မနေ့ကထုတ်ပြန်ချက်မှာတော့ စစ်ကိုင်း၊မကွေးတနင်္သာရီဒေသတွေမှာမနေ့က အောက်တိုဘာ ၃ရက် တစ်ရက်ထဲမှာ ဖြစ်ခဲ့တဲ့ စစ်ကောင်စီတပ်နဲ့ ပြည်သူ့ကာကွယ်ရေးတပ်တွေကြားတိုက်ပွဲတွေနဲ့ တိုက်ခိုက်မှုတွေကြောင့် စစ်ကောင်စီဘက် က တပ်ဖွဲ့ဝင် ၁၀၀ ဝန်းကျင်သေဆုံးတယ်လို့ ထုတ်ပြန်ထားပါတယ်။ စစ်ကိုင်းတိုင်း ၊ ပုလဲမြို့နယ်အတွင်း ဖြစ်ပွားတဲ့ စစ်ကောင်စီယာဉ်တန်းကို မိုင်းခွဲတိုက်ခိုက်မှုတွေနဲ့ တိုက်ပွဲတွေကြောင့် စစ်ကောင်စီတပ်ဖွဲ့ဝင် ၈၆ဦး သေဆုံးကာ ပြည်သူ့တော်လှန်ရေးတပ်ဖွဲ့က၁ ဦး ဒဏ်ရာရရှိခဲ့ပြီး စစ်ကောင်စီဘက်က သေဆုံးမှုအများဆုံးဒေသဖြစ်တယ်လို့ ထုတ်ပြန်ချက်မှာဖော်ပြပါတယ်။တနင်္သာရီတိုင်း၊ သရက်ချောင်းမြို့နယ်၊ တောင်ပျောက်တိုက်နယ်၊ ကျွဲခြံရွာအနီးဖြစ်ပွားတဲ့ စစ်ကောင်စီတပ်နဲ့ ဒေါင်းမင်းစစ်ဆင်ရေး ပြောက်ကျားအဖွဲ့တို့ တိုက်ပွဲမှာ စစ်ကောင်စီဘက်မှ ၁၀ ဦးကျော်သေဆုံးကာ ၂၀ ကျော် ဒဏ်ရာရတယ်လို့လည် ထုတ်ပြန်ထားတာပါ။ အမျိုးသားညီညွတ်ရေးအစိုးရရဲ့ စက်တင်ဘာ ၇ရက် ပြည်သူ့ခုခံစစ်စတင်ကြောင်း ကြေညာလိုက်တဲ့နောက် မှာ တိုင်းဒေသကြီးနဲ့ပြည်နယ်အများစုမှာ နှစ်ဖက်တိုက်ပွဲတွေနဲ့ ဖောက်ခွဲမှုတွေတိုးလာနေတယ်လို့ဒေသခံတွေကပြောပါတယ်။

   

   ဓာတ်ပုံ ရင်းမြစ်, Social Media

3. ၄ အောက်တိုဘာ ၂၀၂၁ပြည်တွင်းမှာ ကိုဗစ်ကာကွယ်ဆေးထိုးပြီးသူ ၈ သန်းကျော်ရှိလာပြီလို့ ကျန်းမာရေးပြော

   မြန်မာပြည်တွင်းမှာ ကိုဗစ်ကာကွယ်ဆေးထိုးပြီးသူ ၈ သန်း၊ ၄ သိန်းနီးပါးရှိသွားပြီဆိုပြီး စစ်ကောင်စီလက်အောက်က ကျန်းမာရေးဝန်ကြီးဌာနက ပြောပါတယ်။

   အဲဒီထဲမှာ အကြိမ်ပြည့်ထိုးပြီးသူ ၃ သိန်း၊ ၈ သောင်းကျော်နဲ့ တစ်ကြိမ်ထိုးပြီးသူ ၄ သိန်း၊ ၅ သောင်းကျော်ကို ထည့်သွင်းရေတွက်ထားတာဖြစ်ပါတယ်။

   လက်ရှိမှာပြည်တွင်း ကာကွယ်ဆေးထိုးလုပ်ငန်းတွေမှာ အိန္ဒိယထုတ် Covidshield၊ တရုတ်နိုင်ငံထုတ် Siniofarm နဲ့ Sinovac အမျိုးအစား ကာကွယ်ဆေးတွေကို အဓိက ထိုးနှံပေးနေတာဖြစ်ပါတယ်။

   အောက်တိုဘာလ ၂ ရက်တုန်းကလည်း တရုတ်နိုင်ငံကနေ ဝယ်ယူထားပြီး အကြိမ်ရေ ၄ သန်း ထိုးနှံနိုင်တဲ့ Sinopharm တံဆိပ် ကိုဗစ်ကာကွယ်ဆေးတွေ ပြည်တွင်းကို ရောက်ရှိလာတယ်လို့ စစ်ကောင်စီဘက်က သတင်းထုတ်ပြန်ထားပါတယ်။

   အခုဆို ပြည်တွင်းမှာ ကျန်းမာရေးဝန်ကြီးဌာနက ဝယ်ထားတဲ့ Covidshield ၂ သန်း၊ Sinopharm ၁၄ သန်း၊ Sinovac ၂ သန်း အထိရှိနေပြီး တရုတ်၊ အိန္ဒိယနဲ့ ရုရှားတို့ကနေ လှူထားတဲ့ကာကွယ်ဆေး အကြိမ်ရေ ၅ သန်းကျော်လည်း ရှိနေပြီလို့ စစ်ကောင်စီလက်အောက်က နိုင်ငံပိုင်သတင်းစာတွေမှာဖော်ပြထားပါတယ်။

   

   ဓာတ်ပုံ ရင်းမြစ်, state owned media

4. ၄ အောက်တိုဘာ ၂၀၂၁မန္တလေးမြို့မှာ ကိုဗစ်အတည်ပြုလူနာ စစ်ဆေးတွေ့ရှိမှု လျော့ကျလာ, နှာခေါင်းစည်းမတပ်သူဦးရေလည်းများနေ

   မန္တလေးက နဒီမြန်မာ Test and Care စင်တာမှာ စက်တင်ဘာလနဲ့ အောက်တိုဘာ လဆန်းရက်တွေ က ကိုဗစ်သံသယလူနာတွေကို swab ယူစစ်ဆေးရာ ရောဂါပိုးတွေ့ရှိသူမရှိတဲ့နေ့တွေရှိလာတယ်လို့ သိရပါတယ်။တချို့နေ့တွေမှာ အတည်ပြုလူနာ နှစ်ဦး၊ သုံးဦးသာ တွေ့ရှိရတယ်လို့ စစ်ဆေးတွေ့ရှိ ပိုးတွေ့လူနာတွေကို ဆေးရုံတွေ ပို့ဆောင်ပေးရတဲ့ရင်ဘတ်တူညီနောင်ကယ်ဆယ်ရေးအဖွဲ့ကပြောပါတယ်။ မန္တလေးမြို့မှာ စက်တင်ဘာလနောက်ဆုံးပတ်ကစလို့ မြို့နယ်အလိုက် ကိုဗစ်ကာကွယ် ဆေးထိုးပေးနေတာပါ။ စာရင်းပေးထိုးရတာကြောင့် ကာကွယ်ဆေးမထိုးသူဦးရေက ပိုများတယ်လို့ ဒေသခံတွေရဲ့ပြောပြချက်အရသိရပါတယ်။ကာကွယ်ဆေးထိုးပေးတဲ့နောက်ပိုင်း မန္တလေးမြို့မှာ နှာခေါင်းစည်း တပ်ဆင် အသုံးပြုတာတွေ သိသိသာသာ လျော့နည်းလာတယ်လို့လည်း လူမှုကူညီရေးအသင်းတွေက ပြောပါတယ်။ " ကာကွယ်ဆေးထိုးသူတွေလဲ ရှားပါတယ်။ နှာခေါင်းစည်းမတပ်တာ ဆေးထိုးပြီးမှ မဟုတ်ဘူး။ မထိုးခင်ကလဲ မတပ်ကြပါဘူး။ တတိယလှိုင်းမှာ မသေဘဲ ကျန်ခဲ့သူတွေက မထူးတော့ဘူးဆိုပြီး ရင်ထဲ တွဲထားသလားမသိဘူး"လို့ ပရဟိတ ရှာဖွေကယ်ဆယ်ရေးအဖွဲ့တခုက ဥက္ကဋ္ဌတစ်ဦးကပြောပါတယ်။ အိမ်တိုင်ရာရောက် ကျန်းမာရေးစောင့်ရှောက်မှု ပေးနေတဲ့ မြတ်သဒ္ဓါ လူမူနာမူကူညီရေးအသင်း တာဝန်ရှိသူကတော့ " အခုနောက်ပိုင်း နှာခေါင်းစည်း မတပ်တာ များလာတယ်။ သုံးပုံတစ်ပုံလောက်များလာတာနော်။ ပေါ့ဆတာလား။ ကိုဗစ်ဆေးထိုးပြီးတာကြောင့်လားတော့ မသိဘူး။ နေထိုင်မှု ပုံစံတွေ ပြောင်းလာတယ်"လို့ မြို့တွင်း တွေ့မြင်ရတဲ့ အခြေအနေကို ပြောပြပါတယ်။မန္တလေးတိုင်းအတွင်း ကိုဗစ်ဓာတ်ခွဲအတည်ပြုလူနာဟာ အောက်တိုဘာ ၁ရက် မှာ ၇၆ ဦး ရှိခဲ့ပြီး ပိုးတွေ့လူနာစာရင်းမှာ မန္တလေးမြို့က မပါဝင်ခဲ့ပါဘူး။ အောက်တိုဘာ ၂ရက် မှာ ကိုဗစ်အတည်ပြုလူနာ ၁၂၄ဦး ရှိခဲ့ရာ ပြင်ဦးလွင်မြို့က ပိုးတွေ့လူနာ အများဆုံးဖြစ်ခဲ့တယ်လို့ ကျန်းမာရေးဝန်ကြီးဌာန ထုတ်ပြန်ချက်မှာ ဖော်ပြထားပါတယ်။

   

   ဓာတ်ပုံ ရင်းမြစ်, ရင်ဘတ်တူညီနောင် ကယ်ဆယ်ရေးအဖွဲ့

5. ၃ အောက်တိုဘာ ၂၀၂၁ပို့ကုန်ရငွေတွေကို ရက်ကန့်သတ်တဲ့ အမိန့်ဗဟိုဘဏ်ထုတ်ပြန်

   ပို့ကုန်ရငွေကို မိမိတို့ နိုင်ငံခြားငွေ ဘဏ်စာရင်းထဲမှာ ထည့်သွင်းရရှိပြီးတဲ့ အချိန်ကနေ ရက်(၃၀) သာထားခွင့်ရှိပြုမယ်လို့ ဗဟိုဘဏ်က ဒီကနေ့ သတင်းထုတ်ပြန်ပါတယ်။

   ဒီထုတ်ပြန်ချက်ကို အမိန့်ကို အောက်တိုဘာလ ၃ ရက်နေ့ကစပြီး သက်ရောက်မှုရှိတယ်လို့လည်း ထုတ်ပြန်သွားပါတယ်။

   အခုထုတ်ပြန်ချက်ကြောင့် နိုင်ငံခြားပို့ကုန်ကရမယ့် နိုင်ငံခြားငွေတွေကို လက်ထဲမှာ အရင်လို ကိုင်ထားလို့မရတော့ကြောင်း ပို့ကုန်သွင်းကုန်လုပ်ငန်းရှင်တစ်ဦးက ဘီဘီစီကို ပြောပါတယ်။

   ဒီငွေတွေကို ရက်(၃၀) အတွင်း မိမိကိုယ်တိုင်သုံး (သို့မဟုတ်) သွင်းကုန်လုပ်မယ့် အခြား company account သို့ လွှဲပြောင်း​ရောင်းချနိုင်တယ်လို့ ထုတ်ပြန်ချက်မှာပါရှိပါတယ်။

   ပို့ကုန်ရ‌‌‌ငွေ ရက်(၃၀) ကျော်လွန် ပါက USD account ရှိ လက်ကျန် USD ငွေအားလုံးအားဈေးကွက်ဈေးနှုန်းဖြင့် ဘဏ်ကို မဖြစ်မနေ ရောင်းချပေးရမယ်လို့လည်းထုတ်ပြန်ချက်က ပြောပါတယ်။

   အခုလို ဆောင်ရွှက်တာဟာ ပြည်တွင်းက နိုင်ငံခြား‌ငွေလိုအပ်ချက်ကို ‌ရေတိုနည်းလမ်းနဲ့ဖြေရှင်းတဲ့ သဘောဖြစ်တယ်လို့လည်း ပြည်တွင်းက စီးပွားလုပ်ငန်းရှင် ဒေါက်တာစိုးထွန်းကပြောပါတယ်။

   

   ဓာတ်ပုံ ရင်းမြစ်, MPA

6. ၃ အောက်တိုဘာ ၂၀၂၁ဆီဈေးထပ်တက်လာရင် ရခိုင်ကကုန်စည်ပို့ဆောင်ရေးယာဥ်လိုင်းတွေ ရပ်နားရဖို့ရှိ

7. ၃ အောက်တိုဘာ ၂၀၂၁မန္တလေးမြတောင်ကျောင်းတိုက်အပါအဝင်ဘုန်းကြီးကျောင်းအချို့ ဝင်ရောက်ရှာဖွေခံရ, သံဃာအချို့ရဲ့ ကွန်ပျုတာနဲ့အသုံးအဆောင်အချို့ သိမ်းဆည်းခံရတယ်လို့ဆို

   မန္တလေးသံဃသပိတ်စစ်ကြောင်းက သံဃာ ၅ပါးနဲ့ လူ ၃ယောက် မနေ့ကဖမ်းဆီးခံရပြီး တဲ့နောက် မနေ့ညပိုင်းမှာပဲ သပိတ်မှာပါဝင်တဲ့သံဃာတော်တွေရဲ့ဘုန်းကြီးကျောင်းကို စစ်ကောင်စီတပ်ဖွဲ့ဝင်တွေက ဝင်ရောက်ရှာဖွေခဲ့ပါတယ်။

   တခါ ဒီကနေ့ အောက်တိုဘာ ၃ရက်နေ့လယ်ပိုင်းမှာ လည်း မြတောင်ကျောင်းတိုက်အပါအဝင်၊ချမ်းသာကြီးတိုက်နဲ့ မဟာဝိဇိတာရာမကျောင်းတိုက်တွေမှာ သံဃာအချို့ကို ဝင်ရောက်ရှာဖွေတာတွေ သံဃာတွေရဲ့ ပစ္စည်းတွေကို သိမ်းဆည်းသွားတာရှိတယ်လို့ သံဃသပိတ်စစ်ကြောင်း ဦးဆောင်ဆရာတော်တစ်ပါးက မိန့်ပါတယ်။

   '' ကျောင်း လေးကျောင်းကိုဝင်ရှာတယ်။ဦးပဉ္ဇင်းရဲ့ မြတောင်ကျောင်း က ဦးပဉ္ဇင်းအခန်းမှာ အကုန်ရိုက်ခွဲ ဖျက်ဆီးသွားတယ်။ကွန်ပျူတာလည်းယူသွားတယ်။ဦးပဉ္ဇင်း စာအုပ်ဗီရိုတွေလည်းအကုန်ရိုက်ဖွင့်ပြီးမွှေနှောက်သွားတယ် '' လို့ နေရာတိမ်းရှောင်သီတင်းသုံးနေတဲ့ မန္တလေးသံဃသမဂ္ဂက ဆရာတော်တစ်ပါးကမိန့်ပါတယ်။

   မနေ့က ဖမ်းဆီးခံရမှုတွေရှိပေမယ့် ဒီကနေ့ မှာတော့ ၂၃၇ ရက်မြောက်မန္တလေးသံဃသပိတ်စစ်ကြောင်းကို ထွက်ခဲ့ပြီး ငြိမ်းချမ်းစွာဆန္ဒပြစဉ်ဖမ်းဆီးခံရတဲ့ငယ်ဖြူသံဃာတွေကိုပြန် လွှတ်ပေးဖို့ တောင်းဆိုဆန္ဒပြခဲ့ကြပါတယ်။

   

   ဓာတ်ပုံ ရင်းမြစ်, ပေးပို့

8. ၃ အောက်တိုဘာ ၂၀၂၁ဦးဖြိုးမင်းသိန်းအတွက် အခက်ခဲဆုံး နေ့တစ်နေ့

9. ၃ အောက်တိုဘာ ၂၀၂၁ထားဝယ်ခရိုင် သရက်ချောင်းမြို့နယ်ထဲမှာ တိုက်ပွဲဖြစ်

   ထားဝယ်ခရိုင် သရက်ချောင်းမြို့နယ်ထဲက တောင်ပျောက်တိုက်နယ်မှာ စစ်ကောင်စီတပ်တွေနဲ့ ‌ဒေါင်းမင်းစစ်ဆင်ရေး ပြောက်ကျားအဖွဲ့တို့ တိုက်ပွဲတွေ အပြင်းအထန်ဖြစ်ပွားခဲ့တယ်လို့ ဒေသခံတွေက တစ်ဆင့်သိရပါတယ်၊

   အဲ့ဒီ ကာကွယ်ရေးတပ်ဖွဲ့ဟာ သရက်ချောင်းမြို့နယ် ပြည်သူ ကာကွယ်ရေးတပ်ဖြစ်တယ်လို့လည်း ဒေသခံတွေက ပြောပါတယ်။

   အောက်တိုဘာလ ၃ ရက်နေ့ မနက် ၄ နာရီလောက်မှာ နှစ်ဖက် အပြန်အလှန်တိုက်ပွဲဖြစ်ပွားခဲ့ပြီး အသေအပျောက်ရှိတယ်လို့ သိရပါတယ်။

   ဒီလို ပစ်ခတ်မှုဟာ မနက် (၉)နာရီကျော်အထိ ဖြစ်ပွားခဲ့ပြီး စစ်ကောင်စီဘက်က လက်နက်ကြီးနဲ့အချက်ပေါင်း များစွာပစ်ခတ်ခဲ့တယ်လို့ ဒေသခံတွေကပြောပါတယ်။

   ဒီတောင်ပျောက်တိုက်နယ်အတွင်းအခုလို တိုက်ပွဲ ဖြစ်ပွားတာ (၄)ကြိမ်ရှိပြီဖြစ်ပြီး တိုက်နယ်အတွင်းက ရွာ(၇)ရွာလောက် စစ်ဘေးရှောင်နေကြရပါတယ်။

   အခုဖြစ်ပွားတဲ့ ကျွဲခြံရွာခံတချို့ဟာ စစ်ဘေးရှောင်နေကြပေမယ့် ဒီနေ့မနက်ပစ်ခတ်မှုပြီးတဲ့နောက် ဒေသခံ (၁၀)ဦးထပ်မနည်း ဖမ်းဆီးခံရပါတယ်လို့လည်း ဆိုပါတယ်။

   ‌သရက်ချောင်းမြို့နယ် ပြည်သူ့ကာကွယ်ရေးတပ်ဖွဲ့ဘက်က ဒဏ်ရာရသူတွေရှိပြီး စစ်ကောင်စီဘက်ကတော့ သဲချောင်းကြီးရဲစခန်းဘက်ကို သေဆုံးသွားတဲ့ စစ်ကောင်စီတပ်ဖွဲ့ဝင်တွေကို ပြန်ပြီးသယ်သွားတာကို တွေ့ရကြောင်း ဒေသခံတွေရဲ့ပြောကြားချက်ကို ကိုးကားပြီးလည်း Dawei Watch သတင်းမှာ‌ ဖော်ပြထားပါတယ်။

   စစ်‌ေကာင်စီဘက်ကတော့ သရက်ချောင်းမြို့နယ် တောင်ပျောက်နယ်က တိုက်ပွဲနဲ့ ပတ်သက်ပြီး သတင်းထုတ်ပြန်တာမရှိသေးပါဘူး။

   ပြီးခဲ့တဲ့ စက်တင်ဘာလ ၂၈ ရက်နဲ့ ၃၀ ရက်တွေ အတွင်းကလည်း သရက်ချောင်းမြို့နယ်ထဲမှာ စစ်ကောင်စီဘက်က လိုက်လံရှာဖွေတာတွေ ပစ်ခတ်ဖမ်းဆီးတာတွေလုပ်ခဲ့ပါသေးတယ်။

   

   ဓာတ်ပုံ ရင်းမြစ်, Dawei Watch

10. ၃ အောက်တိုဘာ ၂၀၂၁ပိုမိုပြင်းထန်တဲ့မြို့ပြပြောက်ကျားစစ်ဆင်ရေးလှုပ်ရှားမှုတွေစတင်မယ်လို့ နေပြည်တော် PDF ထုတ်ပြန်လာ

    နေပြည်တော်မှာ အောက်တိုဘာလက စတင်ပြီး ပြည်သူ့ကာကွယ်ရေးတပ်( နေပြည်တော်)နဲ့ အခြားတော်လှန်ရေးအင်အားစုတွေပူးပေါင်းပြီး ပိုမိုပြင်းထန်တဲ့မြို့ပြ စစ်ဆင်ရေး လှုပ်ရှားမှုတွေစတင်မယ်လို့ နေပြည်တော် PDF က ဒီကနေ့ အောက်တိုဘာ ၃ရက်မှာ ထုတ်ပြန်ပါတယ်။

    နေပြည်တော်ရှိပြည်သူတွေအနေနဲ့ အိမ်တွေမှာ တပ်ထားတဲ့ စီစီတီဗီတွေမှာ လမ်းဘက်မျက်နှာမူထားတာတွေကို ပိတ်ထားပေးကြဖို့နဲ့ မြင်ကွင်း ပြောင်းပေးထားကြဖို့ ဆိုပြီးအဲဒီထုတ်ပြန်ချက်မှာတိုက်တွန်းထားပါတယ်။

    စက်တင်ဘာ ၃၀ရက်ကလည်း နေပြည်တော်၊ ပုဗ္ဗသီရိမြို့နယ်မှာရှိတဲ့ ကာကွယ်‌ရေးဝန်ကြီးဌာန၊ ပစ္စည်းဝယ်ယူရေး ညွှန်ကြားရေးမှူးရုံး (ကကဝယ်) အတွင်းမှာ ပေါက်ကွဲမှုဖြစ်ပွားခဲ့ပြီး ဒီပေါက်ကွဲမှုကြောင့် ရုံးအဆောက်အအုံ အစိတ်အပိုင်းတချို့နဲ့ ကားတစ်စီး ပျက်စီးခဲ့ပါတယ်။

    ဒီပေါက်ကွဲမှုဟာ ပြည်သူ့ကာကွယ်ရေးတပ်မတော်(နေပြည်တော်) နဲ့ အမည်မဖော်လိုတဲ့ တော်လှန်ရေးအင်အားစုတစ်ရပ်က ပူးပေါင်းဆောင်ရွက်ခဲ့တာလို့ နေပြည်တော်(PDF) က ထုတ်ပြန်ထားပါတယ်။ ့ဒီပေါက်ကွဲမှုအကြောင်း စစ်ကောင်စီဘက်ဘီဘီစီကမေးမြန်းထားပေ မယ့်လို့ ပြန်လည်ဖြေကြားတာမရှိသေးပါဘူး။

    

    ဓာတ်ပုံ ရင်းမြစ်, Reuters

11. ၃ အောက်တိုဘာ ၂၀၂၁အသက် ၁၂ နှစ်နဲ့အထက်ကျောင်းသားတွေကိုဆိုင်နိုဗက်ကိုဗစ်ကာကွယ်ဆေးထိုးပေးဖို့ပြင်ဆင်နေ

    ရခိုင်ပြည်နယ်အတွင်း အခြေခံပညာစာသင်ကျောင်းတွေ ပြန်လည်ဖွင့်လှစ်ပေးနိုင်ရေးအတွက် အသက် ၁၂ နှစ်နဲ့အထက် ကျောင်းသူ၊ကျောင်းသား တွေကို ကိုဗစ်ကာကွယ်ဆေးထိုးပေးဖို့ အတွက် ပြင်ဆင်နေတယ်လို့ ရခိုင်ပြည်နယ်စီမံအုပ်ချုပ်ရေးကောင်စီ ပြောခွင့်ရ ပြည်နယ် ဥပဒေချုပ် ဦးလှသိန်းက ဘီဘီစီကို ပြောပါတယ်။ ကိုဗစ်တတိယလှိုင်းဖြစ်ပွားမှုမြင့်တက်ခဲ့တဲ့ ဇူလိုင်လအတွင်းကစတင်ပြီး အခြေခံပညာကျောင်းတွေကို ယာယီပိတ်ထားခဲ့တာကနေ အခုလို အသက် ၁၂ နှစ်နဲ့အထက် ကျောင်းသား၊သူကျောင်းသားတွေကို ကာကွယ်ဆေးတွေထိုးပေးပြီး ကျောင်းတွေကို မကြာမီပြန်လည်ဖွင့်လှစ်ပေးမယ်လို့ဆိုပါတယ်။

    “ကျောင်းတွေဖွင့်ဖို့အတွက် ကြိုတင်ပြင်ဆင်တဲ့အနေနဲ့ အသက် ၁၂ အထက် အလယ်တန်းနဲ့ အထက်တန်း အဆင့်တွေကို ဆေးထိုးပေးသွားဖို့အစီစဉ်ရှိတယ်လို့ ပြည်ထောင်စုအစိုးရဘက် က ကျွန်တော်တို့ဆီကို တရားဝင်ညွှန်ကြားချက်တွေရှိပါတယ်။ ဆေးထိုးတဲ့အခါမှာတော့ ကလေးတွေ အတွက်ဆိုင်နိုဗက်ဆေးထိုးမယ်လို့သိရပါတယ်ခင်ဗျား”လို့ ဦးလှသိန်းက ပြောပါတယ်။ ရခိုင်တစ်ပြည်နယ်လုံးက အခြေခံပညာကျောင်းတွေကို ပညာသင်ကြားနေကြတဲ့ ကျောင်းသူကျောင်းသားတွေရဲ့ စာရင်းအတိအကျရရှိနိုင်ဖို့နဲ့ ဆေးထိုးတဲ့အခါမှာ ဘယ်လို ထိုးပေးသွားမယ်ဆိုတာနဲ့ပတ်သက်လို့ ကျန်းမာရေးဌာနအပါအဝင်သက်ဆိုင်ရာဌာန အလိုက်ဆောင်ရွက်နေတယ်လို့ဆိုပါတယ်။ လတ်တလောမှာတော့ ရခိုင်ပြည်နယ်အတွင်း ဘယ်နေ့စတင်ထိုးပေးသွားမယ်ဆိုတာကို သတ်မှတ်ချက်မရှိသေးပေမယ့် ဆေးရောက်တာနဲ့ထိုးပေးသွားမှာဖြစ်သလို အခုလအတွင်း ထိုးပေးနိုင်ဖို့မျှော်လင့်ထားတယ်လို့ ဆိုပါတယ်။ လက်ရှိမှာပြည်ထောင်စုအစိုးရက ကျောင်းတွေကို ပြန်ဖွင့်ပေးဖို့ရက်ကိုသတ်မှတ်ပေးထားတာ မရှိသေးပေမယ့် ကျောင်းသားတွေကို ကာကွယ်ဆေးပထမအကြိမ်ထိုးပြီးလို့ရှိရင် အောက်တိုဘာလကုန်ပိုင်းလောက်မှာ ပြန်လည်ဖွင့်လှစ်နိုင်ခြေရှိနေတယ်လို့ ဦးလှသိန်းက ပြောပါတယ်။ ရခိုင်ပြည်နယ်အတွင်း ကိုဗစ်ကာကွယ်ဆေးထိုးထားပြီးသားလူဦးရေ လေးသိန်းနီးပါးရှိနေပြီဖြစ်ကာ လက်ရှိမှာတော့ အသက် ၅၅ နှစ်အထက်တွေကိုထိုးပေးနေတာပါ။ ဦးတည်အုပ်စု ၁၆ ခုထဲမှာပါဝင်တဲ့ အသက် ၁၈ အထက်အသက်အရွယ်တွေလည်း ထိုးခွင့်ရရှိနေတယ်လို့ သိရပါတယ်။

    

    ဓာတ်ပုံ ရင်းမြစ်, CJ (ပုံဟောင်း)

12. ၃ အောက်တိုဘာ ၂၀၂၁ထှယ်လှော်ရွာထဲ စစ်ကောင်စီက ပစ်ခတ်နေတာ ၃ ရက်ရှိပြီလို့ ဒေသခံတွေပြော

    မကွေးတိုင်း၊ ဂန့်ဂေါမြို့နယ်၊ ဂန့်ဂေါ-ကလေး ကားလမ်ပေါ်က ထှယ်လှော်ရွာမှာ စစ်ကောင်စီတပ်တွေက တပ်စွဲထားပြီး ရွာထဲကို ပစ်ခတ်မှုလုပ်နေတာ ၃ ရက်ရှိသွားပြီဆိုပြီး ထွက်ပြေးတိမ်းရှောင်နေတဲ့ဒေသခံတွေက ပြောပါတယ်။

    ''ဒီနေ့ (အောက်တိုဘာလ ၃ ရက်)နဲ့ဆို ၃ ရက်ရှိသွားပြီ။ ရွာထဲက ဘုန်းကြီးကျောင်းမှာ တပ်စွဲပြီး ရွာထဲကိုပဲ ပြန်ပစ်နေတာ။ တမြန်နေ့(အောက်တိုဘာလ ၁ ရက်)ကတည်းကပဲ။ ဒီနေ့ မနက်ပိုင်းကလည်း ပစ်တယ်။ အိမ်တချို့ မီးလောင်နေတာမြင်ရပေမဲ့ ရွာထဲမှာ သူတို့ရှိနေတော့ ဘယ်လောက် လောင်ကုန်လဲ အတပ်ပြောလို့မရဘူးဖြစ်နေတယ်'' လို့ ဒေသခံတစ်ဦးက ဘီဘီစီကိုပြောပါတယ်။

    ထှယ်လှော်ရွာထဲမှာတပ်စွဲထားတဲ့ စစ်ကောင်စီတပ်ဖွဲ့ဝင်တွေဟာ မနေ့ အောက်တိုဘာလ ၂ ရက်တုန်းကလည်း ရွာထဲကို ပစ်ခတ်မှုတွေလုပ်ခဲ့ပြီး နေအိမ်အချို့ကို မီးရှို့ခဲ့တယ်လို့ ဒေသခံတွေက အစောပိုင်းတုန်းက ဘီဘီစီကို ပြောပါတယ်။

    ''ဒီကနေ ၆ မိုင်လောက်ဝေးတဲ့ ကျွဲဒတ်ရွာမှာ သူတို့တွေ မိုင်းဆွဲ တိုက်ခိုက်ခံရတယ်ဆိုတဲ့ သတင်းထွက်လာအပြီးမှာ ရွာဘက်ကို ရောက်လာကြတာပဲ။ ဒီမှာက အခုဆို ဒေသခံကာကွယ်ရေးတပ်ဖွဲ့တွေနဲ့လည်း ထိတွေ့ပစ်ခတ်မှုမကြားရဘဲ ပစ်ခတ်မှုတွေလုပ်နေတာ။ ရွာကို ဝင်တာကတော့ ၆ လပိုင်းတုန်းက ပထမဆုံးအကြိမ်နဲ့ဆို ပစ်တာခတ်တာ ၄ ကြိမ် အထိရှိပြီ။ ရွာတောင်ဘက်၊ မြောက်ဘက် သွားလာပစ်ခတ်နေတာ''လို့ ထှယ်လှော်ရွာခံတစ်ဦးက ပြောပါတယ်။

    ဂန့်ဂေါမြို့ကနေ ၁၆ မိုင်ဝန်းကျင် အကွာမှာရှိတဲ့ထှယ်လှော်ရွာမှာ ချင်းလူမျိုးအများစုနေထိုင်ပြီး အိမ်ခြေ ၁ ထောင်နီးပါးရှိပေမဲ့ အခုတော့ ရွာခံတွေ အကုန်နီးပါး ဘေးလွတ်ရာ ထွက်ပြေးတိမ်းရှောင်နေရလို့ ဆေးဝါး အခက်အခဲအချို့ရှိနေတယ်လို့လည်း သိရပါတယ်။

    ဒီပစ်ခတ်မှုတွေ၊ နေအိမ်မီးလောင်မှုတွေနဲ့ပတ်သက်ပြီး စစ်ကောင်စီဘက်ကိုဘီဘီစီကမေးမြန်းဖို့ကြိုးစားနေပါတယ်။

    

    ဓာတ်ပုံ ရင်းမြစ်, ဂန့်ဂေါလူငယ်အသံ

13. ၃ အောက်တိုဘာ ၂၀၂၁စစ်ကိုင်းနဲ့မကွေးမှာ စစ်ရှောင် ၇ သောင်းခွဲကျော်အထိရှိလာ

    

    ဓာတ်ပုံ ရင်းမြစ်, CJ

    စစ်ကိုင်းတိုင်းနဲ့ မကွေးတိုင်းထဲက မြို့နယ်အတော်တော်များများမှာ စစ်ကောင်စီနဲ့ပြည်သူ့ကာကွယ်ရေးတပ်ဖွဲ့တိုက်ပွဲတွေကြောင့် စစ်ဘေးရှောင် ၇ သောင်းခွဲကျော်ရှိလာပြီး အဲဒီစစ်ရှောင်တွေရဲ့လူသားချင်းစာနာထောက်ထားမှုဆိုင်ရာအကူအညီရရှိမှု ပျက်ယွင်းနေဆဲလို့ ကုလသမဂ္ဂအဖွဲ့အစည်းတစ်ခုက ပြောပါတယ်။

    ကုလသမဂ္ဂလူသားချင်းစာနာထောက်ထားမှုဆိုင်ရာညှိနှိုင်းရေးရုံး(UNOCHA)က အခုလို ပြောလာတာဖြစ်ပြီး အဲဒီထဲမှာ စက်တင်ဘာလ ၄ ရက်ကနေ ၁၃ ရက်အတွင်း မကွေးတိုင်းတစ်တိုင်းထဲမှာတင် စစ်ရှောင်အရေအတွက် ၁ သောင်း ၂ ထောင်ကျော်ရှိခဲ့တယ်လို့ ဆိုပါတယ်။

    စစ်ကိုင်းတိုင်းထဲမှာဆိုရင် ချောင်းဦးမြို့နယ်ထဲက ပြည်သူ့ကာကွယ်ရေးတပ်ဖွဲ့တွေကို ပစ်မှတ်ထားတဲ့လေကြောင်းတိုက်ခိုက်မှုတွေကို စစ်ကောင်စီဘက်က စက်တင်ဘာလအတွင်း ပြုလုပ်ခဲ့တယ်လို့ သိရှိရပြီး ဒီအခြေအနေကြောင့် အရပ်သား ထိခိုက်သေဆုံးမှုတွေရှိခဲ့တယ်လို့လည်း UNOCHA က ဆိုပါတယ်။

    တိုင်း ၂ တိုင်းထဲကို နေအိမ်တွေ မီးရှို့ခံရတာနဲ့ ပိုင်ဆိုင်မှုတွေ ဖျက်ဆီးခံရတာရှိနေတဲ့အပြင် အကူအညီပေးရေးမိတ်ဖက်အဖွဲ့အစည်းတွေ ဝင်ရောက်ခွင့်မရှိသေးတာကြောင့် အရပ်သားဘယ်လောက်စစ်ရှောင်နေရတယ်၊ အရပ်သားဘယ်ယောက်ထိခိုက်သေဆုံးတယ်ဆိုတာနဲ့ နေအိမ်ဘယ်လောက်ပျက်စီးတယ်ဆိုတဲ့ စာနာမှုအကူအညီလိုအပ်ချက်တိတိကျကျကို စာရင်းပြုစုဖို့ ခက်ခဲနေတယ်လို့ ဆိုပါတယ်။

    လက်ရှိမှာ စစ်ကိုင်းတိုင်းတစ်ခုတည်းမှာတင် မြို့နယ် ၁၈ မြို့နယ်အထိ စစ်ရှောင်အရေအတွက်ရှိနေပြီး အဲဒီထဲမှာ ကနီ၊ မြောင်၊ ဒီပဲယင်း၊ ရွှေဘိုနဲ့ ယင်းမာပင်မြို့နယ်တွေ ပါဝင်တယ်လို့လည်း UNOCHA အစီရင်ခံစာမှာဖော်ပြထားပါတယ်။

14. ၃ အောက်တိုဘာ ၂၀၂၁မြစ်ကြီးနား- တနိုင်းသွား ကားလမ်းတစ်လျှောက် မှာ တိုက်ပွဲတွေကြောင့်အစစ်အဆေးတွေ တင်းကျပ်နေ

    ကချင်ပြည်နယ်၊ မြစ်ကြီးနား-တနိုင်းသွားကားလမ်းတစ်လျှောက်အနီးတဝိုက်ကျေးရွာတွေမှာ တိုက်ပွဲတွေ ဖြစ်နေတာကြောင့် ဒီလမ်းမကြီးကို အသုံးပြုသူခရီးသည်တွေဟာလမ်းတလျှောက်အဝင်အထွက်ဂိတ်တွေမှာ လုံခြုံရေးအရဆိုပြီး အစစ်အဆေးတွေ ပိုတင်းကျပ်တာကို ကြုံနေရတယ်လို့ စစ်ဆေးခံရတဲ့ ခရီးသွားတွေက ပြောပါတယ်။

    မြစ်ကြီးနားကနေ တနိုင်းကို ပြန်တဲ့ ခရီးသွားပြည်သူတစ်ယောက်ကတော့ ဖားကန့်မြို့နယ် ဝင်တာနဲ့ လမ်းတလျှောက်မှာ စစ်တပ်ကလုံခြုံရေးယူထားတာတွေကိုတွေ့ရတယ်လို့ပြောပါတယ်။

    အဲဒီစစ်ဆေးရေးဂိတ်တွေထဲမှာတော့ မှတ်ပုံတင်နဲ့လူတိုက်စစ်တာ ကားပေါ်ကပစ္စည်းတွေ စစ်ဆေးတာတွေရှိ နေပါတယ်။

    မနေ့က အောက်တိုဘာလ ၂ ရက်မနက်ပိုင်းတုန်းကလည်း မြစ်ကြီးနား -တနိုင်း- လီဒို လမ်းမကြီးအနီး ရှဒူဇွပ်ကျေးရွာ အလွန် ဘန်ကောက်ကျေးရွာနားမှာ လေက်နက်သံတွေ ကြားနေတယ်လို့ ရှဒူဇွပ် ဒေသခံတွေက ပြောပါတယ်။

    အဲ့ဒီရွာနားကို စစ်ကားတွေလဲဖြတ်သန်းသွားတာတွေ့ရသလို့ ရှဒူဇွပ် ရွာကနေ မှော်ထဲ သွားပြီး အလုပ်လုပ်သူတွေမှာလည်း လမ်းမှာလက်နက်သံတွေကြောင့် ခရီးလမ်းကနေ လှည့်ပြန်ခဲ့ရ တယ်လို့သိရပါတယ်။

    အခုတပတ်မှာတော့ ကချင်ပြည်နယ် မြစ်ကြီးနား တနိုင်း လီဒို လမ်းမကြီးဘေး ဖားကန့်မြို့နယ် အတွင်းမှာ မကြာခဏဆိုသလို တိုက်ပွဲတွေဖြစ်နေတာ ဖြစ်ပါတယ်။

    

    ဓာတ်ပုံ ရင်းမြစ်, cj

15. ၃ အောက်တိုဘာ ၂၀၂၁စစ်ကောင်စီရဲ့ လက်နက်ကြီးထိမှန်လို့ ဂန့်ဂေါနယ်က နှမ်းခါးရွာထဲ လူ ၂ ဦး ဒဏ်ရာရ

    မကွေးတိုင်း၊ ဂန့်ဂေါမြို့နယ်ထဲက နှမ်းခါးရွာကို စစ်ကောင်စီတပ်ဖွဲ့ဝင်တွေက မနေ့ အောက်တိုဘာလ ၂ ရက်မှာ လက်နက်ကြီးနဲ့ပစ်ခတ်ခဲ့တာကြောင့် အရပ်သား ၂ ဦး မစိုးရိမ်ရတဲ့ဒဏ်ရာရထားတယ်လို့ နှမ်းခါးရွာခံတစ်ဦးက ဘီဘီစီကိုပြောပါတယ်။

    ''ပစ်တာကတော့ နှမ်းခါးနဲ့ ၂ မိုင်လောက်အကွာက ရဲလှရွာကနေ ပစ်တာ။ ၁၀ ချက်ထက်မနည်းပဲ။ အရပ်သား ၂ ဦး ဒဏ်ရာရတယ်။ လူနေအိမ်တွေလည်း ထိကုန်တယ်ပြောတယ်။ အခုက အကုန်လုံးနီးပါး ထွက်ပြေးတိမ်းရှောင်နေကြတော့ ရွာထဲက အခြေအနေကို မသိရသေးဘူး။'' လို့ ထွက်ပြေးတိမ်းရှောင်နေတဲ့ဒေသခံတစ်ဦးကပြောပါတယ်။

    နှမ်းခါးရွာမှာ စက်တင်ဘာလ ၂၉ ရက် မနက်ပိုင်းတုန်းကလည်း စစ်ကောင်စီနဲ့ဗဒသကာကွယ်ရေးတပ်တွေကြား ထိတွေ့တိုက်ပွဲဖြစ်ခဲ့ပြီးတဲ့နောက် ရွာထဲက နေအိမ်တချို့ မီးရှို့ဖျက်ဆီးတာခံခဲ့ရတယ်လို့ ဒေသခံတွေက အစောပိုင်းက ပြောထားပါတယ်။

    ဒါပေမဲ့ အောက်တိုဘာလ ၂ ရက်က ပစ်ခတ်မှုမှာတော့ ဒေသခံကာကွယ်ရေးတပ်ဖွဲ့တွေနဲ့ ထိတွေ့တာမျိုးမဟုတ်ဘဲ စစ်ကောင်စီဘက်က ရဲလှရွာဘက်ကနေ လှမ်းပစ်ခတ်တာလို့ဆိုပါတယ်။

    နှမ်းခါးရွာမှာ ပြီးခဲ့တဲ့စက်တင်ဘာလအတွင်း မီးရှို့တာခံခဲ့ရလို့ နေအိမ် အလုံး ၅၀ ကျော် ပျက်စီးဆုံးရှုံးထားတယ်လို့ ဒေသခံတွေက ပြောပါတယ်။

    နှမ်းခါးရွာ ဖြစ်စဉ်နဲ့ပတ်သက်ပြီး မှတ်ချက်တစုံတရာရဖို့ ဘီဘီစီက စစ်ကောင်စီဘက်ကို မေးမြန်းဖို့ ကြိုးစားနေပါတယ်။

    

    ဓာတ်ပုံ ရင်းမြစ်, CJ

16. ၃ အောက်တိုဘာ ၂၀၂၁ပုလဲမြို့နယ် ဝမ်းပြင်ကျေးရွာအနီး ဖြတ်သန်းသွားတဲ့ စစ်ကောင်စီယာဉ်တန်း မိုင်းထောင်ဖောက်ခွဲခံရတယ်လို့ ဒေသခံတွေပြော

    စစ်ကိုင်းတိုင်းဒေသကြီး မုံရွာ - ဂန့်ဂေါကားလမ်းပိုင်း ပုလဲမြို့နယ်၊ လယ်သမားကျေးရွာအုပ်စု၊ ဝမ်းပြင်ကျေးရွာအနီး ဖြတ်သန်းသွားတဲ့ စစ်ကောင်စီစစ်ကြောင်းဟာ ဒီနေ့ အောက်တိုဘာ ၃ရက် မနက် ၈နာရီလောက်မှာ မိုင်းထောင်ဖောက်ခွဲခံခဲ့ရတယ်လို့ဒေသခံတွေ ဘီဘီစီကိုပြောပါတယ်။ပုလဲပြည်သူ့ကာကွယ်ရေးတပ်ဘက်ကတော့အဲဒီဖြစ်စဉ်နဲ့ ပတ်သက်ပြီးသတင်း ထုတ်ပြန်တာမတွေ့ရသေးပါဘူး။အဲဒီဖောက်ခွဲမှုကြောင့်စစ်ကောင်စီတပ်ဖွဲ့ဝင်တွေ ဒဏ်ရာရထိခိုက်ဒဏ်ရာရရှိခဲ့တာကြောင့် စစ်ကောင်စီတပ်ဖွဲ့တွေဟာဝမ်းပြင်ကျေးရွာအတွင်းဝင်ရောက်ကာ ပစ်ခတ်တာတွေ လုပ်ဆောင်နေတယ်လို့ ဝမ်းပြင်ဒေသခံတွေက ဘီဘီစီကိုပြောပါတယ်။

    '' ဝမ်းပြင်က လမ်းမကြီးဘေးက ရွာတန်းရှည်ပုံစံ၊ ရွာအလယ်တည့်တည့်က ကျွန်တော်တို့ အတွက်ဆိုရင် ဆိုင်ကြီးပေါ့ဗျာ၊ အဲဒီဆိုင် ၂ဆိုင်လုံးအဖျက်ဆီးခံလိုက်ရတယ်။ ဒီမနက် မိုင်းခွဲခံရပြီး စစ်တပ်က ဝင်ဖျက်ဆီးတာပဲ၊ ကျွန်တော်တို့ကတော့ အကုန်လုံးထွက်ပြေး ရတယ်''လို့ ဝမ်းပြင်ကျေးရွာဒေသခံအမျိုးသားတစ်ဦးက ပြောပါတယ်။

    ဝမ်းပြင်မှာ ဖြစ်ပြီးနောက် လက်ရှိအချိန်မှာတော့ လယ်သမားရွာနားမှာ ပစ်ခတ်တာတွေ ဆက်ဖြစ်နေတယ်လို့ ဆိုပါတယ်။အခုမိုင်းဆွဲခံရတဲ့ စစ်ကြောင်းဟာ တင့်ကားတွေအပါအဝင် အင်အားအများအပြားနဲ့ ပေါက်မြို့နယ်ဘက်ကို ဦးတည်တဲ့ လမ်းအတိုင်းသွားတာလို့ ဒေသခံတွေကတော့ ယူဆပြောဆိုကြပါတယ်။ အခုလိုမိုင်းထောင်ဖောက်ခွဲမှုတွေက အခုရက်ပိုင်းမှာ နေ့တိုင်းနီးပါး ပုလဲ - ဂန့်ဂေါလမ်းပိုင်းမှာ ဖြစ်နေပြီး ဖောက်ခွဲခံရပြီးအချိန်မှာတော့ နီးစပ်ရာရွာတွေအတွင်း အမြဲလိုဝင်ရောက်ပစ်ခတ်တာ မျိုးတွေရှိတယ်လို့ ဝမ်းပြင်အပါအဝင် ပုလဲ - ဂန့်ဂေါ လမ်းမကြီးဘေးက ကျေးရွာအချို့ထံကသိရပါတယ်။ ဒီကနေ့ဖောက်ခွဲမှုအပြင် ပြီးခဲ့တဲ့ရက်ပိုင်းက ဆက်တိုက်ဆိုသလို ဖောက်ခွဲမှုတွေဖြစ်ခဲ့တဲ့ ပုလဲ - ဂန့်ဂေါလမ်းပိုင်းက ဖြတ်သန်းတဲ့စစ်ကြောင်းတွေ မိုင်းထောင်ဖောက်ခွဲခံရမှုနဲ့ ပတ်သက်ပြီး စစ်ကောင်စီဘက်က တစ်စုံတရာ ထုတ်ပြန်တာမရှိသေးသလိုဘီဘီစီအနေနဲ့ လည်း ဆက်သွယ်မေးမြန်းဖို့ ကြိုးစားနေပါတယ်။

    

    ဓာတ်ပုံ ရင်းမြစ်, Social Media

17. ၃ အောက်တိုဘာ ၂၀၂၁ပူတာအိုမြို့ မူလာရှီးဒီကြိုးတံတားအနီးရှိ လုံခြုံရေးဂိတ် တိုက်ခိုက်ခံရ

    ကချင်ပြည်နယ် ၊ပူတာအိုမြို့ ရှိ မူလာရှီဒီး ကြိုးတံတားအနီးက မူလာရှီးဒီ အထူးစစ်ဆေးရေးစုပေါင်းလုံခြုံရေးဂိတ် ဒီကနေ့အောက်တိုဘာ ၃ရက် မနက် ၁ နာရီခန့်ကတိုက်ခိုက်ခံရတယ်လို့ ဒေသခံအချို့ကပြောပါတယ်။ အခုရက်ပိုင်းအတွင်း ကချင်ပြည်နယ် ၊ ပူတာအိုမြို့ကိုစစ်ကောင်စီဥက္ကဋ္ဌဗိုလ်ချုပ်မှူးကြီး မင်းအောင်လှိုင်သွားရောက်မယ်လို့ သတင်းတွေထွက်ပေါ်ပြီးနောက် အခုလိုတိုက်ခိုက်ခံရတာလို့လည်း ဒေသခံတွေကြားပြောဆိုနေကြတာပါ။ '' အရင်ဆုံး အသံအကျယ်ကြီး ၃ချက်လောက်ဆက်တိုက်ကြားတယ်။အဲဒီနောက်မှာ သေနတ်သံတွေ ဆက်တိုက်ကြားရတယ်။တော်တော်တော့ကြာတယ်။ဒီမနက်တော့ တိတ်ဆိတ်နေတာပဲဘာသံမှမကြားရဘူး။ ညကတော့ အသံအရမ်းကျယ်တော့ ကလေးတွေ လန့်ကုန်ကြတာတော့ရှိတယ်။သူတို့ထိခိုက်တာတော့သေချာမသိသေးဘူး။ အဲဒီဘက်ကို မသွားရဲကြသေးဘူး'' လို့ ပူတာအိုဒေသခံတစ်ဦးကပြောပါတယ်။ ပူတာအိုမြို့နယ်အဝင် မူလာရှီဂိတ်ဟာ စစ်ကောင်စီတပ်ဖွဲ့ဝင်တွေနဲ့ ရဲတပ်ဖွဲ့ဝင်တွေလုံခြုံရေးရယူထားတဲ့ဂိတ်ဖြစ်တယ်လို့ သိရပါတယ်။ တိုက်ခိုက်မှုကို ပြည်သူ့ကာကွယ်ရေးတပ် PDF အဖွဲ့က လုပ်ဆောင်တာလို့ ထုတ်ပြန်ထားပြီး စစ်ကောင်စီရဲ့ခရီးစဉ်ကိုလက်မခံလို့လုပ်ဆောင်တာလို့ ထုတ်ပြန်ထားတာတွေ့ရပါတယ်။ ဒီတိုက်ခိုက်ခံရမှုနဲ့ပတ်သက်လို့ စစ်ကောင်စီဘက်ကိုလည်းမေးမြန်းဖို့ကြိုးစားနေပါတယ်။ ပြီးခဲ့တဲ့ စက်တင်ဘာ ၁၉ရက်ကလည်း စစ်ကောင်စီဥက္ကဋ္ဌ ပူတာအိုသွားမယ်လို့ သတင်းထွက်ပေါ်ခဲ့ပေမယ့် လုံခြုံရေးအရလို့ဆိုကာ ခရီးစဉ်ပျက်ခဲ့တယ်လို့လည်း သတင်းတွေထွက်ပေါ်ခဲ့တာပါ။

    

    ဓာတ်ပုံ ရင်းမြစ်, KNG NEWS

18. ၃ အောက်တိုဘာ ၂၀၂၁မန္တလေးသံဃသမဂ္ဂသပိတ်စစ်ကြောင်း မှ သံဃာတော်အချို့ဖမ်းဆီးခံရပြီးနောက် ဘုန်းကြီးကျောင်းအချို့ကို ထပ်မံဝင်ရောက်ရှာဖွေတာတွေလုပ်နေ

    မနေ့ကအောက်တိုဘာ၂ရက် နေ့လယ်ပိုင်းက မန္တလေးမြို့ ၊မဟာအောင်မြေမြို့နယ် စိန်ပန်းရပ်ကွက်ထဲ သံဃသပိတ်စစ်ကြောင်းစတင်ချိန် မှာပဲ သံဃာ ၅ပါးနဲ့ လူ ၃ယောက် ဖမ်းဆီး ခံခဲ့ရပါတယ်။ အဲဒီနောက် ညပိုင်းမှာတော့ မြတောင်ကျောင်းတိုက်အပါအဝင်ဘုန်းကြီးကျောင်းအချို့ကိုစစ်ကောင်စီတပ်ဖွဲ့ဝင်တွေဘက်က ဝင်ရောက်ရှာဖွေတာတွေထပ်လုပ်တယ်လို့ သပိတ်ဦးဆောင်ဆရာတော်အချို့ကမိန့်ပါတယ်။

    '' မနေ့က သပိတ်စစ်ကြောင်းစချိန်မှာပဲ နောက်ကနေ ကားတွေကတိုက်တယ်။သေနတ်တွေ နဲ့ရမ်းသမ်းပစ်ပြီး ဖမ်းခေါ်သွားတာပါ။ အကုန်လုံးလည်းဖရိုဖရဲနဲ့ထွက်ပြေးကြရပါတယ်။ မိသွားတဲ့ဆရာတော်တွေကို အဲဒီနေရာမှာပဲချက်ချင်းလူဝတ်လဲခိုင်းပါတယ်။ကျည်မှန်တဲ့ သူလည်းရှိပါတယ်။ ညကထိတော့ အမှတ် ၇ ရဲစခန်းမှာလို့သိထားရတယ်။အဲဒီနောက်တော့ဘယ်ခေါ်သွားလဲမသိရသေးဘူး '' မန္တလေးသံဃသမဂ္ဂက ဆရာတော်တစ်ပါးကမိန့်ပါတယ်။

    အဖမ်းဆီးခံရတဲ့ သံဃာတော်တွေနဲ့ ကျောင်းသားအချို့ဖြစ်ပြီး ဖမ်းဆီးခံရတဲ့ဆရာတော်တွေထဲမှာ MA- Buddhism ဘွဲ့ရသံဃာတစ်ပါးအပါအဝင် ဓမ္မာစရိယတန်းအောင်ပြီးသားသံဃာတော်တွေပါဝင်တယ်လို့ ဆိုပါတယ်။ ၂၃၆ရက်မြောက်အထိ တစ်ရက်မပျက် ထွက်ခဲ့တဲ့ မန္တလေးသံဃသပိတ်စစ်ကြောင်းကို လက်ရှိဖမ်းဆီးခံရမှုနဲ့လုံခြုံရေး အခြေအနေကြောင့် ယာယီရပ်နားထားဖို့ရှိပေမယ့် ရတဲ့နည်းနဲ့တော်လှန်တာတွေဆက်လုပ်သွားမယ်လို့ မန္တလေးသံဃသမဂ္ဂက သိရပါတယ်။

    

    ဓာတ်ပုံ ရင်းမြစ်, မန္တလေးသံဃသမဂ္ဂ

19. ၂ အောက်တိုဘာ ၂၀၂၁စစ်ကောင်စီက ၁၂ နှစ်အထက် ကျောင်းသားတွေကို ဆိုင်နိုဗက် ကိုဗစ်ကာကွယ်ဆေးထိုးဖို့ စီစဉ်

    စစ်ကောင်စီဟာ မြန်မာနိုင်ငံ အလယ်တန်းနဲ့ အထက်တန်း အသက် ၁၂ နှစ် အထက် ကျောင်းသူ၊ ကျောင်းသားတွေကို စာသင်ကျောင်းတွေမှာပဲ လာမယ့် အောက်တိုဘာ လကုန်ပိုင်းလောက်မှာ ဆိုင်နိုဗက် ကိုဗစ်ကာကွယ်ဆေး ထိုးပေးဖို့ ပြင်ဆင်နေပါတယ်။

    လာမယ့် အောက်တိုဘာလလယ်လောက်မှာ အဲဒီကာကွယ်ဆေး အလုံးရေ ၂ သန်း မြန်မာနိုင်ငံကို ရောက်ရှိလာမှာ ဖြစ်ပြီး ကျောင်းသူ၊ ကျောင်းသား ၈ သိန်းလောက်ကို ထိုးပေးဖို့ ရည်မှန်းထားတယ်လို့ ဆိုပါတယ်။

    အခုလို ထိုးပေးမယ့် ဆိုင်နိုဗက် ကာကွယ်ဆေးကို အသက် ၁၈ နှစ်အောက်အတွက် စိတ်ချရတယ် ဆိုပြီး ကမ္ဘာ့ကျန်းမာရေးအဖွဲ့က ထုတ်ပြန်ထားတာ မရှိသေးပေမယ့် ဆိုင်နိုဗက်ရဲ့ လေ့လာစမ်းသပ်ချက်တွေအရ အသက် ၃ နှစ်ကနေ ၁၇ နှစ်အထိအတွက် စိတ်ချရတဲ့ ကိုဗစ်ကာကွယ်ဆေးဖြစ်တယ်ဆိုတာ သိရကြောင်း ပြည်သူ့ကျန်းမာရေးဦးစီးဌာန ဒုတိယ ညွှန်ကြားရေးမှူးချုပ် ဒေါက်တာ ကျော်ကံကောင်းက ဘီဘီစီကို ပြောပါတယ်။

    ဒါပေမဲ့လည်း ပြင်ပဆရာဝန်တဦးကတော့ အခုလို ၁၈ နှစ်အောက်ကို ဆိုင်နိုဗက် ကာကွယ်ဆေးမထိုးခင်မှာ ဆရာဝန်တွေက အသေအချာ စမ်းသပ်စစ်ဆေးသင့်ပြီး ဆိုင်နိုဗက်ကို ၁၈ နှစ်ထိုးနိုင်တဲ့ အခြေအနေရဲ့ အကျိုးဆက်ကို နိုင်ငံတကာမှာ ကျယ်ကျယ်ပြန့်ပြန့် မသိရသေးဘူးလို့ ဘီဘီစီကို ပြောပါတယ်။

    စစ်ကောင်စီဟာ မြန်မာနိုင်ငံ လူဦးရေ ၁၂ သန်းလောက်ကို ကိုဗစ်ကာကွယ်ဆေး ထိုးပေးနေပြီး လူမျိုးစုလက်နက်ကိုင် အဖွဲ့အစည်းတချို့ဘက်မှာလည်း ကိုဗစ်ကာကွယ်ဆေး ထိုးပေးမှုတွေ ရှိနေသလို အမျိုးသားညီညွတ်ရေးအစိုးရ အန်ယူဂျီကလည်း မြန်မာနိုင်ငံသားတွေအတွက် ကိုဗစ်ကာကွယ်ဆေးထိုးပေးဖို့ အစီအစဉ်ရှိတယ်လို့ ပြောဆိုထားပါတယ်။

    

    ဓာတ်ပုံ ရင်းမြစ်, Getty Images

20. ၂ အောက်တိုဘာ ၂၀၂၁တရုတ်နဲ့ ရုရှား ကိုဗစ်ကာကွယ်ဆေးတွေ ရန်ကုန်က ကာကွယ်ဆေးစက်ရုံနှစ်ရုံကနေ ထုတ်ဖို့ ပြင်ဆင်

    မြန်မာနိုင်ငံ စက်မှုဝန်ကြီးဌာနက ဦးစီးပြီး တရုတ် ကိုဗစ်ကာကွယ်ဆေး ဆိုင်နိုဖမ်းနဲ့ ရုရှားကိုဗစ်ကာကွယ်ဆေး စပွတ်နစ်တို့ရဲ့ အဆင်သင့်ဖြည့်သွင်းနိုင်တဲ့ ကာကွယ်ဆေးရည်တွေကို ဝယ်ယူပြီး မြန်မာနိုင်ငံက ဆေးဝါးစက်ရုံတွေမှာ တလုံးချင်း ပြန်လည် ဖြည့်သွင်း ဖြန့်ဖြူးဖို့ ပြင်ဆင်နေတယ်လို့ ပြည်သူ့ကျန်းမာရေးဦးစီးဌာန ဒုတိယ ညွှန်ကြားရေးမှူးချုပ် ဒေါက်တာ ကျော်ကံကောင်းက ဘီဘီစီကို ပြောပါတယ်။

    အခုလို ပြန်လည် ထုတ်လုပ်ဖို့အတွက် ရွာသာကြီးမှာရှိတဲ့ အသည်းရောင် အသားဝါ ကာကွယ်ဆေးစက်ရုံနဲ့ အင်းစိန်က ကာကွယ်ဆေး ဖြည့်သွင်း စက်ရုံတို့ကို အသုံးပြုဖို့ စီစဉ်ထားတယ်လို့လည်း ဒေါက်တာ ကျော်ကံကောင်းက ပြောပါတယ်။

    အခုလို ပြန်လည် တလုံးချင်း ဖြည့်သွင်းလိုက်မယ့် ကိုဗစ်ကာကွယ်ဆေးတွေကို ဘယ်အချိန်မှာ စတင် အသုံးပြုနိုင်မယ်ဆိုတာကတော့ အသေးစိတ် မသိရသေးဘူးလို့ ဆိုပါတယ်။

    အခုလို မြန်မာနိုင်ငံအတွင်းက ဆေးစက်ရုံတွေမှာ ဒီဆေးနှစ်မျိုးကို ပြန်လည် ဖြည့်သွင်း ထုတ်လုပ်ရာမှာ အဲဒီ ကုမ္ပဏီ နှစ်ခုက ကိုယ်စားလှယ်တွေက ဆေးအာနိသင် ပြည့်ဝပြီး လုံခြုံစိတ်ချရဖို့အတွက် လာရောက် စိစစ် စစ်ဆေးတာတွေလည်း ရှိနိုင်တယ်လို့ ဒေါက်တာ ကျော်ကံကောင်းက ဘီဘီစီကို ပြောဆိုထားပါတယ်။

    

    ဓာတ်ပုံ ရင်းမြစ်, Getty Images