သမ္မတ ဦးဝင်းမြင့် တရားခွင်မှာ ပထမဆုံးသက်သေထွက်ဆို

တိုက်ရိုက် ထုတ်လွှင့်ချက်

1. ၈ အောက်တိုဘာ ၂၀၂၁မြောင်မြို့၊ ပရိမ္မရွာကို စစ်ကောင်စီတပ်ဖွဲ့ဝင်တွေဝင်ရောက်ရှာဖွေ, ရွာသား (၂)ဦးဖမ်းဆီးခံရ

   စစ်ကိုင်းတိုင်း၊ မြောင်မြို့နယ်ထဲက ပရိမ္မရွာကို ဒီနေ့ စက်တင်ဘာ (၈)ရက်၊ မနက်ပိုင်းမှာ စစ်ကောင်စီတပ်ဖွဲ့ဝင်တွေ သေနတ်ပစ်ဖောက်ဝင်ရောက်တာကြောင့်ရွာသားတွေ ထွက်ပြေးတိမ်းရှောင်နေ ကြရပြီး ရွာသား (၂)ဦးဖမ်းဆီးခံလိုက်ရတယ်လို့ ဒေသခံတွေကပြောပါတယ်။ ဒါ့အပြင် ရွာအတွင်းမှာရှိတဲ့ ဘုန်းကြီးကျောင်းကိုပါ ဝင်ရောက်ရှာဖွေမှုတွေလုပ်ဆောင်နေတယ်လို့ ဆိုပါတယ်။

   “ဒီနေ့မနက်ပိုင်းမှာ ကျောက်ရစ်ရွာမှာတပ်စွဲထားတဲ့ အဖွဲ့တွေက ပရိမ္မရွာဘက်လာတယ်။ ပရိမ္မရွာဘက်သွားတဲ့လမ်းကိုက ဒေသကာကွယ်‌ရေးဘက်က သစ်ပင်တွေလှဲပြီး လမ်းတွေ ဒီ‌ရှေ့ရက်ကပဲ ပိတ်ဆို့ထားတာ၊ အဲ့ဒါကို ကျောက်ရစ်နဲ့ ပရိမ္မရွာကြားက အုတ်နှဲဘုက်ရွာက ရွာသား (၁၅)ယောက်လောက်ခေါ်ပြီးလမ်းရှင်းခိုင်းတယ်၊ ပြီးတာနဲ့ အခု ပရိမ္မရွာထဲ ဝင်ရောက်ရှာဖွေ တော့တာပဲ”လို့ ဒေသခံတဦးက ဘီဘီစီကိုပြောပါတယ်။

   ပရိမ္မရွာဘက်သွားတဲ့လမ်းဟာ ချင်းတွင်းမြစ်ကူးတံတားကတဆင့် ချောင်းဦးလမ်းမဘက်ကို သွားနိုင်ပြီး မုံရွာ၊ ပခုက္ကူဘက်ကိုပါသွားလာနိုင်တဲ့လမ်းဖြစ်တာကြောင့် စစ်ကောင်စီတပ်ကူတွေမလာနိုင်အောင် ဒေသခံကာကွယ်ရေးဘက်က လမ်းပိတ်ဆို့ထားတာလို့ သိရပါတယ်။

   မနေ့ အောက်တိုဘာ (၇)ရက် တစ်ရက်ထဲမှာပဲ မြောင်မြို့ပေါ် ကွက်သစ်ရပ်ကွက်က လူငယ် တချို့ ဖမ်းဆီးခံရသလို ဆွဲလဲအိုရွာအတွင်းက နေအိမ်တချို့ကိုလည်း ဝင်ရောက်ရှာဖွေမှုတွေလုပ်ဆောင်ခဲ့တယ်လို့ဆိုပါတယ်။ ဒါ့အပြင် မြောင်မြို့နယ်တောင်ပိုင်းမှာရှိတဲ့ မင်းတန်းရွာကိုလည်း မနေ့က ဝင်ရောက်ရှာဖွေမှုတွေ လုပ်ဆောင်တဲ့အပြင် ဒေသကာကွယ်ရေးအဖွဲ့တွေနဲ့ ဆက်စပ်တယ်လို့ ယူဆတဲ့ နေအိမ်(၂)လုံး၊ ရွာအစပ်နဲ့ တောထဲကတဲ (၅)လုံးကို မီးရှို့ဖျက်ဆီးသွားတယ်လို့ ရွာခံတွေက ဘီဘီစီကိုပြောပါတယ်။ မင်းတန်းရွာကမီးလောင်ကျွမ်းနေတဲ့နေအိမ်တွေကို မီးငြှိမ်းဖို့လာတဲ့ ရွာသား(၂)ဦးလည်း သေနတ်နဲ့ ပစ်ခတ်ခံရတယ်လို့ သတင်းတွေထွက်ပေါ်နေပေမယ့် ဘီဘီစီဘက်ကသီးသန့်အတည်မပြုနိုင်ခဲ့ပါဘူး။

   လက်ရှိမှာတော့ စစ်ကောင်စီတပ်ဖွဲ့ဝင်တွေဟာ မြောင်မြို့ပေါ်၊ နဂါးပေါက်ရွာ၊ ကျောက်ရစ်ရွာနဲ့ နဘက်ရွာ စတဲ့ နေရာ (၄) နေရာမှာ စခန်းချထားပြီး အနီးအနားရွာတွေကို နေ့စဉ်ရှာဖွေမှုတွေလုပ်တာကြောင့် ရှာဖွေနေတဲ့အချိန်ဆို ရွာခံတွေထွက်ပြေးကြရပြီး စစ်ကောင်စီတပ်ဖွဲ့ဝင်တွေပြန်သွားချိန်မှသာ ရွာထဲ ပြန်လာကြရတယ်လို့ပြောကြပါတယ်။ လူငယ်၊ လူလတ်အရွယ် အမျိုးသားရော အမျိုးသမီးတွေလည်း ရွာထဲမနေရဲကြဘဲ ရှောင်တိမ်းနေကြရတယ်လို့ မြောင်ဒေသခံတွေကပြောပါတယ်။ အခုလို ရွာတွေထဲ ဝင်ရောက်ရှာဖွေမှုနဲ့ နေအိမ်မီးရှို့တာတွေနဲ့ပတ်သက်ပြီး စစ်ကောင်စီဘက်က တစုံတရာ ထုတ်ပြန်ချက်မရှိသလို ဘီဘီစီဘက်ကလည်း မေးမြန်းဖို့ကြိုးစားနေပါတယ်။

   

   ဓာတ်ပုံ ရင်းမြစ်, CJ

2. ၈ အောက်တိုဘာ ၂၀၂၁မန္တလေးတိုင်းဝန်ကြီးချုပ်ဒေါက်တာဇော်မြင့်မောင်နဲ့ မိသားစုတို့တွေ့ခွင့်ရရေး တောင်းဆိုထား, လက်ရှိ ပုဒ်မ ၂ခုနဲ့တရားရင်ဆိုင်နေရသလို အဂတိအမှု ၅ မှုနဲ့လည်းစွပ်စွဲတရားစွဲဆိုခံထားရ

   မန္တလေးအိုဘိုထောင်မှာထိန်းသိမ်းခံထားရတဲ့ မန္တလေးတိုင်းဝန်ကြီးချုပ်ဒေါက်တာဇော်မြင့်မောင်နဲ့ မိသားစုတို့ တွေ့ခွင့်ရရေး အကျဉ်းထောင်တာဝန်ရှိသူတွေကို စာတင်ပြတောင်းဆိုထားတယ်လို့ရှေ့နေအဖွဲ့ကပြောပါတယ်။ လက်ရှိအချိန်အထိတော့တောင်းဆိုထားမှုနဲ့ပတ်သက်လို့ အကြောင်းပြန်တာမရှိသေးဘဲ မိသားစုအနေနဲ့ ဒေါက်တာဇော်မြင့်မောင်ရဲ့ကျန်းမာရေးကိုအလွန်စိုးရိမ်နေသလို ဒေါက်တာဇော်မြင့်မောင်ကလည်းမိသားစုနဲ့တွေ့ခွင့်ရရေးတောင်းဆိုတဲ့အတွက် ဆောင်ရွက်ပေးရတာဖြစ်တယ်လို့ရှေ့နေအဖွဲ့ကပြောပါတယ်။ ကင်ဆာရောဂါခံစားနေရသူဖြစ်တဲ့ဒေါက်တာဇော်မြင့်မောင်ကို တွေ့ခွင့်မရတာဟာ အာဏာသိမ်းချိန် ဖမ်းဆီးခေါ်ဆောင်သွားကတည်းကဖြစ်ပြီး ကိုဗစ်ရောဂါကိုလည်း အပြင်း အထန်ခံစားခဲ့ရတာကြောင့် ကျန်းမာရေးနဲ့ပတ်သက်လို့ မိသားစုကစိုးရိမ်တဲ့အတွက်တောင်းဆိုတာလို့ ရှေ့နေအဖွဲ့ဝင်တစ်ဦးကပြောပါတယ်။

   '' ဆရာဇော်ကိုစပြီးဖမ်းသွားကတည်းကနေအခုအချိန်အထိမိသားစုနဲ့တွေ့ခွင့်မရဘူး။အဓိကကတော့ကျန်းမာရေးကိုမိသားစုကစိတ်ပူတယ်။ဆေးရုံကနေကိုဗစ်ဖြစ်လို့ဆင်းရတယ်သာပြောတာ။မမြင်ရတဲ့အခါကတော့ မိသားစုကအရမ်းစိုးရိမ်နေကြတယ်။ဆရာဇော်ကလည်းမိသားစုနဲ့တွေ့ခွင့်ရဖို့တောင်းဆိုလာတယ်။တောင်းဆိုလာတဲ့အတွက်ရှေ့နေအဖွဲ့ကအိုးဘိုထောင်ကိုစာတင်ထားတယ်။ကိုဗစ်ဖြစ်ပြီးနောက်မှာလမ်းကောင်းကောင်းမလျှောက်နိုင်ဘူး။ ရုံးထုတ်ဖို့လာတဲ့အချိန် ထောင်နဲ့ ထောင်တွင်းအထူးတရားရုံးကိုလမ်းလျှောက်လာတဲ့အချိန်တောင် တော်တော်လေးကိုယိုင်နဲ့နဲ့ နဲ့မောမောပန်းပန်းကို လျှောက်လာရတယ်။မျက်မြင်အခြေအနေကတော့အဲဒီလိုရှိတယ် '' လို့ ဒေါက်တာဇော်မြင့်မောင်ရဲ့ရှေ့နေ အဖွဲ့ဝင်တစ်ဦးကပြောပါတယ်။ ဒေါက်တာဇော်မြင့်မောင်ဟာ လက်ရှိမှာ နိုင်ငံတော်အကြည်အညိုပျက်စေမှုဆိုင်ရာ ပုဒ်မ ၅၀၅(ခ) ၊ သဘာဝဘေးအန္တရာယ်စီမံခန့်ခွဲမှုဆိုင်ရာဥပဒေပုဒ်မ ၂၅/၃၀(က)တို့နဲ့ အောင်မြေသာစံမြို့နယ်အထူးတရားရုံးမှာ အမှုရင်ဆိုင်နေရပြီး စွဲချက်တင်ခံထားရတာဖြစ်ပါတယ်။လက်ရှိမှာတော့အဲဒီစွဲချက်တင်ခံထားရမှုကို ဒေါက်တာဇော်မြင့်မောင်ရဲ့ရှေ့နေတွေ ဘက်က ခရိုင်တရားရုံးကို စွဲချက်လျှောက်လဲချက်ထပ်တင်တဲ့အခါမှာလည်း ထပ်မံပယ်ချခံရတဲ့အတွက် တိုင်းတရားရုံးကိုထပ်မံတင်ထားတယ်လို့ သိရပါတယ်။ လာမယ့်အောက်တိုဘာ ၁၁ရက်မှာတော့ပုဒ်မ ၅၀၅(ခ)အတွက် ဒေါက်တာဇော်မြင့်မောင်ကို တရားခံစစ်ထပ်စစ်ဖို့ရှိနေပြီးသဘာဝဘေးအန္တရာယ်စီမံခန့်ခွဲမှုဆိုင်ရာဥပဒေပုဒ်မ ၂၅/၃၀(က)အတွက်ကတော့ ပြန်ခေါ်သက်သေဖြစ်တဲ့ရဲနှစ်ယောက်ကို စစ်ဖို့ရှိနေတယ်လို့ဆိုပါတယ်။ အဂတိလိုက်စားမှုတိုက်ဖျက်ရေးဥပဒေပုဒ်မ ၅၅ နဲ့ အမှု ၅မှု ကို မန္တလေးတိုင်းတရား လွှတ်တော်မှာထပ်မံတရားစွဲဆိုခံထားရပြီး လာမယ့် အောက်တိုဘာ ၁၅ရက်မှာရုံးချိန်းရှိလို့ ရှေ့နေအဖွဲ့နဲ့ဒေါက်တာဇော်မြင့်မောင်တို့အမှုကိစ္စသီးသန့်တွေ့ဆုံခွင့်ရရှိရေး တင်ပြထားတယ်လို့သိရပါတယ်။ အဂတိအမှုကို စွပ်စွဲတဲ့အခါမှာတော့ ဆေးကုသတဲ့အချိန်တုန်းက ဆေးကုသစရိတ်တွေရယူတာတွေရှိတယ်။ နောက် NLD ပါတီရုံးမြေနေရာရရှိရေးဆောင်ရွက်မှုမှာ အဂတိလိုက်စားမှုတွေရှိတယ်ဆိုတဲ့ စွပ်စွဲချက်တွေနဲ့ တရားစွဲဆိုခံထားရတာဖြစ်ပါတယ်။

   

   ဓာတ်ပုံ ရင်းမြစ်, MZT

3. ၈ အောက်တိုဘာ ၂၀၂၁IRI က ချီးမြှင့်တဲ့ လွတ်လပ်မှုဆု မြန်မာသံအမတ်ကြီး ဦးကျော်မိုးထွန်း ချီးမြှင့်ခံရ

   အမေရိကန်အခြေစိုက် International Republican Institute (IRI) က ချီးမြှင့်တဲ့ ၂၀၂၁ ခုနှစ်အတွက် လွတ်လပ်မှုဆု (Freedom award) ကို မြန်မာသံအမတ်ကြီး ဦးကျော်မိုးထွန်း ချီးမြှင့်ခံရကြောင်း အဲဒီအဖွဲ့က ထုတ်ပြန်ကြေညာလိုက်ပါတယ်။

   ၂၀၂၁ ခုနှစ်လွတ်လပ်မှုဆုကို လစ်သူယေးနီးယားဝန်ကြီးချုပ် မစ္စ Ingrida Simonyte၊ ကုလသမဂ္ဂဆိုင်ရာမြန်မာအမြဲတမ်းကိုယ်စားလှယ် သံအမတ်ကြီး ဦးကျော်မိုးထွန်း၊ ဘီလာရုစ်နိုင်ငံရေးအကျဉ်းသားများ ညှိနှိုင်းရေး ကောင်စီကိုယ်စားလှယ် Tatsiana Khomich နဲ့ ကျူးဘား ဆုရ အနုပညာရှင် Willy Chirino စတဲ့ ဒီမိုကရေစီသူရဲကောင်းတွေကို ဂုဏ်ပြုချီးမြှင့်ကြောင်း အဲဒီကြေညာချက်မှာ ဖော်ပြထားပါတယ်။

   IRI ဟာ ၁၉၉၅ ခုနှစ်ကစပြီး ဒီလွတ်လပ်မှုဆုကို ချီးမြှင့်လာတာဖြစ်ပြီး ကမ္ဘာတဝန်း ဒီမိုကရေစီဖြစ်ထွန်းတိုးတက်ရေး၊ လူ့အခွင့်အရေးနဲ့ လွတ်လပ်မှုတို့အတွက် မဆုတ်မနစ် ကြိုးပမ်းဆောင်ရွက်ခဲ့သူတွေ၊ အခွင့အလမ်းဖန်းတီးပေးခဲ့သူတွေကို ပေးအပ်ချီးမြှင့်ခဲ့တာ ဖြစ်ပါတယ်။

   ဒီဆုကို မြန်မာ့ဒီမိုကရေစီလှုပ်ရှားမှုခေါင်းဆောင် နိုဘယ်ဆုရှင်ဒေါ်အောင်ဆန်းစုကြည်လည်း ရရှိခဲ့ဖူးပါတယ်။ ဒီနှစ်အတွက် ဆုချီးမြှင့်ပွဲကို အောက်တိုဘာ ၁၉ ရက်မှာ အမေရိကန်ပြည်ထောင်စုမှာကျင်းပမှာဖြစ်ပြီး အမေရိကန် ဆီးနိတ် ရီပက်ဘလင်ကန်ခေါင်းဆောင် မစ်ချ် မက်ကောနယ်လည်း တက်ရောက်အမှာစကားပြောကြားဖို့ရှိပါတယ်။

   

   ဓာတ်ပုံ ရင်းမြစ်, Permanent Mission of Myanmar to the United Nations

4. ၈ အောက်တိုဘာ ၂၀၂၁NUG နဲ့ CRPH တို့ကို ထောက်ခံကြောင်း အပါအဝင် ထိန်းသိမ်းခံနိုင်ငံရေးသမားတွေကို ခြွင်းချက်မရှိလွှတ်ပေးဖို့ ဥရောပပါလီမန်အတည်ပြု, အာဆီယံအပါအဝင်နိုင်ငံတကာရဲ့ပူးပေါင်းပါဝင်မှုနဲ့မြန်မာ့အကျပ်အတည်းကိုငြိမ်းချမ်းတဲ့ နည်းနဲ့ဖြေရှင်းဖို့ တောင်းဆို

   အောက်တိုဘာ ၇ရက် ကပြုလုပ်ခဲ့တဲ့ အီးယူ ဥရောပ ပါလီမန်မှာ မြန်မာနိုင်ငံမှာလူ့အခွင့်အရေးချိုးဖောက်ခံရမှုတွေနဲ့ပတ်သက်လို့ အဆိုပြုချက်ကို မဲခွဲအတည်ပြုဆုံးဖြတ်ခဲ့ပါတယ်။ စစ်အာဏာသိမ်းပြီးနောက်ပိုင်း မြန်မာစစ်တပ်ရဲ့ လူ့အခွင့်အရေးချိုးဖောက်မှုတွေ၊ အကြမ်းဖက်မှုတွေ အဆုံးသတ်ဖို့အပါအဝင် နိုင်ငံရေးခေါင်းဆောင်တွေနဲ့ ဖမ်းဆီးခံထားရသူအားလုံးကို ပြန်လွှတ်ပေးဖို့ တောင်းဆိုထားတဲ့ ဆုံးဖြတ်ချက်တရပ်ကို အီးယူ ဥရောပ ပါလီမန်မှာ အများစုက သဘောတူထောက်ခံအတည်ပြုခဲ့ပါတယ်။အတည်ပြုချက်ရဲ့ နံပါတ်(၅)အချက် အရ အမျိုးသားညီညွတ်ရေးအစိုးရ -NUG နဲ့ ပြည်ထောင်စုလွှတ်တော်ကိုယ်စားပြုကော်မတီ CRPH တို့ကို မြန်မာပြည်သူတွေရဲ့ ဒီမိုကရေကိုလိုလားတဲ့စိတ်ဆန္ဒကိုကိုယ်စားပြုတဲ့တစ်ခုတည်းသောကိုယ်စားပြုအဖြစ်ထောက်ခံကြောင်း၊ အာဆီယံ အပါအဝင်နိုင်ငံတကာအသိုက်အဝန်းက မြန်မာ့အကျပ်အတည်းကိုဖြေရှင်းဖို့ ဝိုင်းဝန်းဆောင်ရွက်ပေးကြဖို့နဲ့ အားလုံးပါဝင်တဲ့နိုင်ငံရေးတွေ့ဆုံဆွေးနွေးရေးကို ငြိမ်းချမ်းတဲ့နည်းလမ်းနဲ့ ဆောင်ရွက်ပေးကြဖို့လည်း တောင်းဆိုထားပါတယ်။ နိုင်ငံတော်သမ္မတဦးဝင်းမြင့်၊နိုင်ငံတော်အတိုင်ပင်ခံ ဒေါ်အောင်ဆန်းစုကြည်အပါအဝင် စွပ်စွဲထိန်းသိမ်းခံထားရတဲ့ ခေါင်းဆောင်တွေ နိုင်ငံရေးသမားတွေ ကို ခြွင်းချက်မရှိလွှတ်ပေးဖို့ကို ကနဦးဆောင်ရွက်ဖို့ လိုအပ်ပြီး ငြိမ်းချမ်းတဲ့ဖြေရှင်းနည်းနဲ့ဆောင်ရွက်ဖို့ကို လည်းတောင်းဆိုထားပါတယ်။စစ်ကောင်စီတပ်ရဲ့ ပြည်သူတွေအပေါ် ကျူးလွန်တဲ့ လုပ်ရပ်တွေဟာ လူအမြောက်အများအပေါ် ရက်စက်စွာ ကျူးလွန်တဲ့ ရာဇဝတ်မှု Crimes Against Humanity မြောက်နိုင်တယ်လို့လည်း လွှတ်တော်ကိုယ်စားလှယ်တွေက ဆိုပါတယ်။ လူနည်းစု တိုင်းရင်းသားတွေနဲ့ ဘာသာတရားကိုးကွယ်ယုံကြည်မှု ကွဲပြားသူတွေအပေါ် ပစ်မှတ်ထားတိုက်ခိုက်နေမှုတွေကိုလည်း ပြင်းပြင်းထန်ထန် ကန့်ကွက်လိုက်တယ်လို့ ဒီဆုံးဖြတ်ချက်ထဲမှာ ပါရှိပါတယ်။ ခရစ်ယာန် ဘုရားရှိခိုးကျောင်း၊ အစ္စလာမ် ဘာသာဝင်တွေရဲ့ ဗလီ တို့လို ဘာသာရေး အဆောက်အအုံတွေ၊ ကျောင်းတွေ၊ ဆေးဘက်ဆိုင်ရာ အဆောက်အအုံတွေ မကြာခဏတိုက်ခိုက် ခံရပြီး ဘာသာရေးခေါင်းဆောင်တွေကို ဖမ်းဆီးမှုတွေကိုလည်း ရှုတ်ချတယ်လို့ ပြောပါတယ်။

   

   ဓာတ်ပုံ ရင်းမြစ်, European Parliament

5. ၇ အောက်တိုဘာ ၂၀၂၁စစ်ကောင်စီရဲ့ လူ့အခွင့်အရေးချိုးဖောက်မှုတွေကို ဥရောပ ပါလီမန်ရှုတ်ချ

   စစ်အာဏာသိမ်းပြီးနောက်ပိုင်း မြန်မာစစ်တပ်ရဲ့ လူ့အခွင့်အရေးချိုးဖောက်မှုတွေ၊ အကြမ်းဖက်မှုတွေ အဆုံးသတ်ဖို့အပါအ၀င် နိုင်ငံရေးခေါင်းဆောင်တွေနဲ့ ဖမ်းဆီးခံထားရသူအားလုံးကို ပြန်လွှတ်ပေးဖို့ တောင်းဆိုထားတဲ့ ဆုံးဖြတ်ချက်တရပ်ကို အီးယူ ဥရောပ ပါလီမန်မှာ အများစုက သဘောတူထောက်ခံခဲ့ကြပါတယ်။

   ဆန္ဒပြပွဲတွေကို အကြမ်းဖက် ကိုင်တွယ်ဖြေရှင်းပြီး မြန်မာပြည်သူတွေအပေါ် လူ့အခွင့်အရေးချိုးဖောက်မှုတွေ ဆိုးဆိုးဝါးဝါး ဆက်လက် ကျူးလွန်နေတယ်ဆိုပြီး စစ်ကောင်စီရဲ့ လုပ်ရပ်တွေကို ဥရောပ လွှတ်တော်က ရှုတ်ချလိုက်ပါတယ်။

   စစ်ကောင်စီတပ်ရဲ့ ပြည်သူတွေအပေါ် ကျူးလွန်တဲ့ လုပ်ရပ်တွေဟာ လူအမြောက်အများအပေါ် ရက်စက်စွာ ကျူးလွန်တဲ့ ရာဇ၀တ်မှု Crimes Against Humanity မြောက်နိုင်တယ်လို့လည်း လွှတ်တော်ကိုယ်စားလှယ်တွေက ဆိုပါတယ်။

   လူနည်းစု တိုင်းရင်းသားတွေနဲ့ ဘာသာတရားကိုးကွယ်ယုံကြည်မှု ကွဲပြားသူတွေအပေါ် ပစ်မှတ်ထားတိုက်ခိုက်နေမှုတွေကိုလည်း ပြင်းပြင်းထန်ထန် ကန့်ကွက်လိုက်တယ်လို့ ဒီဆုံးဖြတ်ချက်ထဲမှာ ပါရှိပါတယ်။

   ခရစ်ယာန် ဘုရားရှိခိုးကျောင်း၊ အစ္စလာမ် ဘာသာ၀င်တွေရဲ့ ဗလီ တို့လို ဘာသာရေး အဆောက်အအုံတွေ၊ ကျောင်းတွေ၊ ဆေးဘက်ဆိုင်ရာ အဆောက်အအုံတွေ မကြာခဏတိုက်ခိုက်ခံရပြီး ဘာသာရေးခေါင်းဆောင်တွေကို ဖမ်းဆီးမှုတွေကိုလည်း ရှုတ်ချတယ်လို့ ပြောပါတယ်။

   ကျန်းမာရေး၀န်ထမ်းတွေကို ဖမ်းဆီးတိုက်ခိုက် ညှဥ်းဆဲမှုတွေကြောင့်လည်း အင်မတန် စိုးရိမ်တုန်လှုပ်မိပြီး ကိုဗစ်တတိယလှိုင်းကြောင့် ပြည်သူတွေ ရင်ဆိုင်နေရတဲ့ ဘေးဒုက္ခကြီး ပိုမိုဆိုးဝါးလာခဲ့တဲ့အပေါ်မှာလည်း စိုးရိမ်မိတယ်လို့လည်း ဆိုပါတယ်။

   သမ္မတ ဦး၀င်းမြင့်၊ နိုင်ငံတော်အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည်အပါအ၀င် အာဏာသိမ်းပြီးနောက်ပိုင်း စစ်တပ်က ဖမ်းဆီးထားသူတွေအားလုံးကို ခြွင်းချက်မရှိ အမြန်ဆုံး ပြန်လွှတ်ပေးဖို့ကိုလည်း တောင်းဆိုထားပါတယ်။

   အာဏာသိမ်းစစ်တပ်ရဲ့ စီးပွားရေး ပင်မသွေးကြောကို ဖြတ်တောက်ဖို့အတွက် ပြင်းထန်တဲ့ ပစ်မှတ်ထား ဒဏ်ခတ်ပိတ်ဆို့မှုတွေ ဆက်လက်လုပ်ဆောင်ဖို့၊ အာဏာသိမ်းမှုမှာ တာ၀န်ရှိသူတွေအပေါ် ပစ်မှတ်ထား ကန့်သတ်အရေးယူတာတွေ လုပ်ဖို့ကိုလည်း ဥရောပအဖွဲ့၀င်နိုင်ငံတွေကို တိုက်တွန်းထားပါတယ်။

   

   ဓာတ်ပုံ ရင်းမြစ်, Getty Images

6. ၇ အောက်တိုဘာ ၂၀၂၁စစ်ကိုင်းတိုင်းဘက်မှာ တိုက်ပွဲတွေ ဆက်ပြင်းထန်

   စစ်ကိုင်းတိုင်း မင်းကင်းဒေသဘက်မှာ ဒေသကာကွယ်ရေးတပ်တွေနဲ့ စစ်ကောင်စီတပ်တွေကြား အပြန်အလှန် ပစ်ခတ်မှုတွေကြောင့် စစ်ကောင်စီတပ်ဖွဲ့၀င် ၁၀ ဦးကျော် သေဆုံးခဲ့တယ်လို့ ဒေသခံတွေက ပြောပါတယ်။

   မင်းကင်းအောက်မြစ်ရိုးဒေသ၊ အနောက်တော၊ ညောင်ပင်သာ အုန္နဲဘုတ်ဘက် ကိုဖြတ်သန်းသွားတဲ့ စစ်ကောင်စီတပ်တွေရဲ့စစ်ကြောင်း ကိုဒေသကာကွယ်ရေးတပ်ဘက်က မိုင်းခွဲတိုက်ခဲ့ရာကနေ အပြန်အလှန်ပစ်ခတ်မှုတွေဖြစ်ခဲ့တယ်လို့လည်း ဆိုပါတယ်။

   စစ်ကိုင်းတိုင်း ထီးချိုင့်မြို့နယ်မှာလည်း တုံလုံရွာဘက်ကို တက်လာတဲ့စစ်ကောင်စီတပ်ယာဉ်တန်းကို ထီးချိုင့်နဲ့သပိတ်ကျင်းPDF ပူးပေါင်းအဖွဲ့က မိုင်းဆွဲတိုက်ခိုက်ရာ စစ်ကောင်စီကား ၁ စီး မီးလောင်ပျက်စီးခဲ့သလို စစ်ကောင်စီတပ်သားအချို့ သေဆုံးထိခိုက်မှုရှိခဲ့တယ်လို့ ထီးချိုင့်PDF သတင်းရင်းမြစ်က ပြောပါတယ်။

   စစ်ကိုင်းတိုင်း၊ တန့်တည်မြို့နယ်မှာ အင်္ဂကုက္ကား- ဒေါင့်ကြီးရွာအကြား စစ်ကောင်စီယာဉ်တန်းမိုင်းဆွဲတိုက်ခိုက်ခံရပြီးနောက် လုံခြုံရေး အင်မတန် တင်းကျပ်ထားတယ်လို့ ဒေသခံတွေက ပြောပါတယ်။

   စစ်ကိုင်းတိုင်းဘက်က တိုက်ပွဲတွေနဲ့ ပတ်သက်လို့ စစ်ကောင်စီဘက်က တရား၀င် ထုတ်ပြန်ထားတာ မရှိသလို စစ်ကောင်စီတပ်ဖွဲ့၀င်တွေ သေဆုံးသူ အရေအတွက်ကိုလည်း ဘီဘီစီအနေနဲ့ သီးခြားအတည်ပြုနိုင်ဖို့ ကြိုးစားနေဆဲဖြစ်ပါတယ်။

   စစ်ကိုင်းတိုင်းအတွင်း စစ်ရေးတင်းမာမှုတွေ မြင့်တက်နေတာကြောင့် ပြည်သူတွေအနေနဲ့ ည ၇ နာရီကနေ ၅ နာရီအထိ ကားတွေ ဖြတ်သန်းမောင်းနှင်တာ မပြုလုပ်ကြဖို့နဲ့ စစ်ကောင်စီတပ်တွေနဲ့ အနီးကပ် မောင်းနှင်တာတွေ မလုပ်ကြဖို့ ထုတ်ပြန်ကြေညာထားပါတယ်။

   

   ဓာတ်ပုံ ရင်းမြစ်, Sagaing PDF

7. ၇ အောက်တိုဘာ ၂၀၂၁စစ်ကိုင်းတိုင်းထဲမှာ တိုက်ပွဲမစဲသေး

8. ၇ အောက်တိုဘာ ၂၀၂၁ဖားကန့်နဲ့တနိုင်းက တစ်ပတ်အတွင်း တိုက်ပွဲအခြေအနေ

9. ၇ အောက်တိုဘာ ၂၀၂၁နိုင်ငံခြားငွေ သတ်မှတ်ပမာဏထက်ပိုမိုကိုင်ဆောင်သူတိုင်းကို အရေးယူနိုင်မယ့် ဥပဒေတရပ်ကို စစ်ကောင်စီ ပြင်ဆင်

   ပြည်တွင်းဈေးကွက်ထဲမှာ နိုင်ငံခြားငွေရှားပါးပြီးဒေါ်လာလဲနှုန်းမြင့်တက်နေချိန်မှာပဲ နိုင်ငံခြားသုံးငွေစီမံခန့်ခွဲမှု ဥပဒေကိုပြင်ဆင်တဲ့ ဥပဒေကို စစ်ကောင်စီက အောက်တိုဘာလ ၆ ရက်နေ့မှာ ပြင်ဆင်လိုက်ပါတယ်။

   ဒီဥပဒေပြင်ဆင်ချက်အရ နိုင်ငံခြားသုံးငွေ လုပ်ငန်းလုပ်ကိုင်ခွင့် လိုက်စင်ရရှိသူ ဆိုတဲ့နေရာမှာ မည်သူမဆိုလို့ အစားထိုးလိုက်တာကြောင့် နိုင်ငံခြားငွေကိုင်ဆောင်သူအားလုံးကို ရည်ညွှန်းတာဖြစ်တယ်လို့လည်း စီးပွားရေး ပညာရှင်တွေက ဆိုပါတယ်။

   ဒါ့အပြင် ပုဒ်မ ၄၄-က အနေနဲ့ ထပ်တိုးဖြည့်စွက်ထားပြီး မည်သူမဆို နိုင်ငံခြားသုံးငွေစီမံခန့်ခွဲမှုဥပဒေ၊ နည်းဥပဒေများ၊ စည်းမျဉ်းစည်းကမ်းများ အမိန့်ကြော်ငြာစာတွေနဲ့ လုပ်ထုံးလုပ်နည်းတွေထဲက တားမြစ်ချက်တစ်ရပ်ရပ်ကို ဖောက်ဖျက်ကြောင်းထင်ရှားရင် တစ်နှစ်ထက်မပိုတဲ့ ထောင်ဒဏ်ဖြစ်စေ၊ငွေဒဏ်ဖြစ်စေ၊ နှစ်ရပ်လုံးဖြစ်စေ ချမှတ်ခံရမယ်လို့ ပြဋ္ဌာန်းထားပါတယ်။

   မြန်မာကျပ်ငွေတန်ဖိုး ယုံကြည်မှု နည်းလာတာနဲ့အတူ စျေးကွက်ထဲမှာ နိုင်ငံခြားငွေ ၀ယ်လိုအားများလာတဲ့အတွက် စျေးကစားချင်တဲ့သူတွေကို ထိန်းချုပ်ဖို့ ရည်ရွယ်တာ ဖြစ်သလို ဒေါ်လာငွေရှားပါးမှုကို ဖြေရှင်းနိုင်ဖို့ ဖြစ်တယ်လို့လည်း သုံးသပ်ကြပါတယ်။

   ဗဟိုဘဏ်အနေနဲ့ ပြည်တွင်းနိုင်ငံခြားငွေ လိုအပ်ချက်ကို အပြည့်အ၀ ဖြည့်ဆည်းမပေးနိုင်ဘူးလို့ စစ်ကောင်စီ ပြောခွင့်ရ ဗိုလ်ချုပ်ဇော်မင်းထွန်းက ပြောပါတယ်။

   အခုလိုမျိုး ပြင်ဆင်ချက်ကြောင့် မြန်မာကျပ်ငွေတန်ဖိုး တည်ငြိမ်လာနိုင်ပြီး စျေးနှုန်းတွေကို ထိန်းချုပ်နိုင်ဖို့ ကြိုးပမ်းချက်တွေဖြစ်တယ်လို့ ဗဟိုဘဏ်ဘက်က ဆိုပါတယ်။

   ဒီဥပဒေပြင်ဆင်ချက်အရ ပို့ကုန်လုပ်ငန်းလုပ်ဆောင်သူတွေဟာ ပိုလျှံနေတဲ့ နိုင်ငံခြားငွေတွေကို ရက် ၃၀ အတွင်း ဘဏ်တွေကို ပြန်လည်ရောင်းချရမှာ ဖြစ်တယ်၊ ပို့ကုန်လုပ်ငန်း ၀င်ငွေတွေ ပိုရလာရင် ဒေါ်လာငွေလဲနှုန်းလည်း ထပ်မံမြင့်တက်တော့မှာ မဟုတ်ဘူးလို့ ဗဟိုဘဏ် ဒုတိယ ဥက္ကဋ္ဌ ဦး၀င်းသော် ရိုက်တာသတင်းဌာနကို ပြောပါတယ်။

   နိုင်ငံခြားငွေလဲနှုန်းဟာ ပုံမှန်ဖြစ်သင့်တဲ့ စျေးနှုန်းကို ကျလာနေပြီလို့လည်း ဆိုပါတယ်။

   အရင်အစိုးရလက်ထက် ဗဟိုဘဏ်ရဲ့ သတ်မှတ်ချက်အရမြန်မာနိုင်ငံသားတွေအနေနဲ့ ဒေါ်လာတစ်သောင်းနဲ့ညီမျှတဲ့ မည်သည့် နိုင်ငံခြားငွေ ကိုမဆို ခြောက်လအထိ ကိုင်ဆောင်ခွင့်ရှိတယ်လို့ နားလည်ထားကြတာ ဖြစ်ပါတယ်။

   အခုလို ပြင်ဆင်တဲ့ဥပဒေမှာ မည်သူမဆိုလို့ ပြင်ဆင်တဲ့အတွက် နိုင်ငံခြားငွေလက်ဝယ်ရှိသူတိုင်းက စိုးရိမ်စရာရှိလာတယ်လို့လည်း ပြောပါတယ်။

   ၂၀၁၂ ခုနှစ်က ပြဋ္ဌာန်းထားတဲ့ နိုင်ငံခြားသုံးငွေ စီမံခန့်ခွဲမှု ဥပဒေကို ၂၀၁၅ ခုနှစ်မှာ တကြိမ်၊ အာဏာသိမ်းပြီး ၂၀၂၁ ခုနှစ်မှာ တကြိမ် ပြင်ဆင်ခဲ့ပါတယ်။

   

   ဓာတ်ပုံ ရင်းမြစ်, စစ်ကောင်စီသတင်းထုတ်ပြန်ရေး

10. ၇ အောက်တိုဘာ ၂၀၂၁ပုဂံ ခရီးသွားလုပ်ငန်း ဘယ်လိုအခြေအနေရှိလဲ

11. ၇ အောက်တိုဘာ ၂၀၂၁စစ်ဘေးနဲ့ကိုဗစ်ကပ်ဘေးကြားက ကရင်နီစစ်ရှောင်ပြည်သူတွေ

12. ၇ အောက်တိုဘာ ၂၀၂၁ဖားကန့်မှာ အင်တာနက်ဖြတ်ထားတာကြောင့် ဒေသခံတွေ မိုဘိုင်းငွေကြေး ဝန်ဆောင်မှုစနစ်သုံးဖို့ အခက်ကြုံနေ

    

    ဓာတ်ပုံ ရင်းမြစ်, Getty Images

    ကချင်ပြည်နယ် ဖားကန့်ဒေသမှာ အင်တာနက်ဖြတ်တောက်ထားတာကြောင့် မိုဘိုင်းငွေကြေး လွှဲပြောင်း ထုတ်ယူနိုင်တဲ့ ဝန်ဆောင်မှုကို သုံးဖို့ ခရီးဝေး သွားထုတ်ရတာ၊ ၀န်ဆောင်ခ ပိုပေးရတာ၊ သွားလာစရိတ်ပိုလာတာတွေ ကြုံနေရတယ်လို့ ဖားကန့်ဒေသခံတွေက ဘီဘီစီကို ပြောပါတယ်။

    ဖားကန့်မြို့နယ်မှာ အင်တာနက်ဖြတ်တောက်ခံထားရတာ သီတင်းပတ် ၇ ပတ်ထဲ ဝင်လာနေချိန်မှာပဲ ဒေသခံတွေဟာ မိုဘိုင်းအင်တာနက်အသုံးပြုတဲ့ငွေကြေးဝန်ဆောင်မှုတွေကို လွှဲပြောင်းထုတ်ယူရတာ ပိုခက်ခဲလာနေတယ်လို့ ဆိုပါတယ်။

    ''ကျွန်တော်နေတဲ့နေရာဆို ဖားကန့်က မှော်တွေဘက်နား နည်းနည်းကျတော့ ပိုက်ဆံ တစ်ခါထုတ်ဖို့ မိုင် ၂၀ လောက်ကို ဆိုင်ကယ်နဲ့သွားရတယ်။ အခုဆို စက်သုံးဆီဈေးကလည်းမြင့်လာတော့ အရင်က ငွေ ၂ ထောင်လောက်ခရီးက အခု ငွေ ၁ သောင်းလောက်ကုန်တယ်။

    ပြီးတော့ ငွေသွားထုတ်တော့လည်း အရင်ကဆို ဝန်ဆောင်ခက ၁ ထောင်ကျော် ၂ ထောင်ပဲပေးရတာက အခုဆို ငွေတစ်သိန်းကို ၅ ထောင်ကနေ ၇ ထောင်ကြားယူကြတယ်။ အမျိုးမျိုးပေါ့။'' လို့ ဖားကန့်ဒေသခံတစ်ဦးက ပြောပါတယ်။

    ဖားကန့်မှာ မိုဘိုင်းငွေကြေးဝန်ဆောင်မှုပေးသူတွေကလည်း အင်တာနက် မရတာကြောင့် မြစ်ကြီးနားမြို့ပေါ်မှာရှိတဲ့ကိုယ်ပိုင်ဆိုင်၊ နီးစပ်တဲ့ဆိုင်၊ ဆွေမျိုးသားချင်းတွေကို လှမ်းဖုန်းဆက်ပြီး ငွေကြေးလွှဲပြောင်း ထုတ်ယူမယ့်သူတွေအတွက် ဝန်ဆောင်မှုပေးနေရတယ်လို့လည်း သိရပါတယ်။

    ဖားကန့်မှာ အင်တာနက်ဖြတ်တောက်ခံထားရတာ သြဂုတ်လ ၂၀ ရက်နေ့ညပိုင်းကတည်းက ဖြစ်ပါတယ်။

    ဖားကန့်ဟာ ကချင်လွတ်မြောက်ရေးတပ်မတော်(KIA)လည်းလှုပ်ရှားတဲ့နယ်မြေဖြစ်လို့ ဒီလိုအင်တာနက်ဖြတ်တောက်ချိန်မှာ စစ်တပ်နဲ့ KIA တို့ကြား တိုက်ပွဲပြင်းထန်လာနိုင်လားဆိုတဲ့မေးခွန်းတွေလည်း ဒေသခံတွေကြားမှာ ဆက်ရှိနေဆဲဖြစ်ပါတယ်။

    KIA ဘက်ကတော့ ကချင်ပြည်နယ်ထဲမှာ သူတို့ဘက်က စပြီး ထိုးစစ်ဆင်ဖို့မရှိပေမဲ့ စစ်တပ်ဘက်က စစ်ကြောင်းနဲ့ထိုးစစ်ဆင်လာမယ်ဆိုရင်တော့ တိုက်မယ်လို့ ပြောသလို လက်ရှိအချိန်အထိတော့ စစ်တပ်ဘက်က အဲဒီအရိပ်အယောင်မမြင်ရသေးဘူးလို့ အစောပိုင်းမှာ ဘီဘီစီကို ပြောထားပါတယ်။

    ဒါပေမဲ့ အခုသီတင်းပတ်အတွင်း ဖားကန့်နဲ့ တနိုင်းမြို့နယ်တွေကို ဖြတ်သွားတဲ့ လီဒိုလမ်းမကြီးပေါ်မှာတော့ တိုက်ပွဲ ၁၀ ကြိမ်နီးပါးဖြစ်ခဲ့ပြီးဖြစ်ပါတယ်။

    တဖက်မှာလည်း ဖားကန့်က ကျောက်စိမ်းမှော်တွေမှာ စစ်ကောင်စီတပ်တွေ ဖြန့်ကြက်နေရာယူနေတာမျိုးရှိတာကြောင့် စွန့်ပစ်မြေစာပုံတွေထဲမှာ ရေမဆေးကျောက်ရှာဖွေသူပြီး ရပ်တည်နေရသူတွေ ဝမ်းရေးအတွက် အခက်တွေ့နေရပြီလို့ ဒေသခံတွေက ပြောနေကြပါတယ်။

13. ၇ အောက်တိုဘာ ၂၀၂၁ထားဝယ်၊တောင်ပျောက်တိုက်နယ်တိုက်ပွဲအပြီး ရွာလုံးကျွတ် တိမ်းရှောင်နေကြရ

14. ၇ အောက်တိုဘာ ၂၀၂၁စက်သုံးဆီဈေးနဲ့အတူ အခြေခံစားသောက်ကုန်ဈေးနှုန်းမြင့်လာမှုကို မုံရွာဒေသခံတွေ ဘယ်လိုရင်ဖွင့်ထားလဲ

    စစ်ကိုင်းတိုင်းထဲက မြို့နယ်တချို့ဟာ ဒေသခံကာကွယ်ရေးတပ်တွေနဲ့ စစ်ကောင်စီတပ်ဖွဲ့ဝင်တွေကြား နေ့စဉ်နီးပါး တိုက်ပွဲဖြစ်နေတဲ့နေရာတွေ ဖြစ်ပါတယ်။

    တစ်ချိန်တည်းမှာပဲ စစ်ကိုင်းတိုင်းထဲက စီးပွားရေးအချက်အခြာနေရာတစ်ခုလို့ ဆိုနိုင်သလို စစ်အာဏာရှင်ဆန့်ကျင်မှုလည်း လှုပ်လှုပ်ရှားရှားရှိတဲ့ မုံရွာမြို့မှာဆိုရင် ဒေသခံတွေဟာ စက်သုံးဆီဈေးနှုန်းနဲ့အတူ အပြိုင် တက်လာနေတဲ့ အခြေခံစားသောက်ကုန်ဈေးနှုန်းမြင့်တက်မှုကို ကြုံနေရပါတယ်။

    ဒီအခြေအနေဟာ မုံရွာမြို့က တနေ့လုပ်တနေ့စား အခြေခံလူတန်းစားတွေမှာ စစ်ဘေးထက် အငတ်ဘေးနဲ့အရင် ကြုံတွေ့ရတော့မယ့်အခြေအနေဖြစ်နေပြီလို့ ဒေသခံတွေကပြောပါတယ်။ အပြည့်အစုံကို ရုပ်သံမှာ ရှုစားနိုင်ပါပြီ။

15. ၇ အောက်တိုဘာ ၂၀၂၁အိန္ဒိယလက်နက်ကုမ္ပဏီ BEL က မြန်မာပွဲစားကနေတဆင့် စစ်တပ်ကို လက်နက်ဆက်လက်ရောင်းချနေ

    အိန္ဒိယလက်နက်ကုမ္ပဏီ Bharat Electronic Ltd(BEL)ဟာ မြန်မာပွဲစားကုမ္ပဏီတစ်ခုကနေတဆင့် စစ်တပ်ကို လက်နက်ရောင်းချနေဆဲဆိုပြီး Justice for Myanmar အဖွဲ့က သတင်းထုတ်ပြန်လာပါတယ်။

    BEL ကုမ္ပဏီဟာ စစ်တပ်က အာဏာသိမ်းထားတဲ့ မြန်မာနိုင်ငံကို အခုနှစ်ဇူလိုင်လထဲမှာပဲ တင့်ကားမှာ တပ်ဆင်နိုင်တဲ့လေကြောင်းကာကွယ်ရေး အဝေးထိန်းလက်နက်စနစ်တစ်စုံစာကို တင်ပို့ခဲ့တယ်လို့ ဆိုပါတယ်။

    သွင်းကုန်ပို့ကုန်အချက်အလက်တွေကို မှတ်တမ်းတင်နေတဲ့ Panjuva ကုမ္ပဏီရဲ့မှတ်တမ်းအရဆိုရင် BEL က မြန်မာစစ်တပ်ကို ပို့ခဲ့တဲ့လွှဲပြောင်းပစ္စည်းတစ်ခေါက်တည်းမှာတင် လက်နက်တပ်ဆင်စနစ်၊ လက်နက်လည်ပတ်စနစ်၊ မြင်ကွင်းစောင့်ကြည့်စနစ်၊ စနစ်ထိန်းချုပ်စက်နဲ့ လက်နက်စနစ်ကိုလည်ပတ်စေရေးအသုံးပြုရမယ့်စနစ် တို့ပါဝင်တယ်လို့ ဆိုပါတယ်။

    BEL ကုမ္ပဏီဟာ တင့်ကားတွေရဲ့ ၁၂.၇ မမ စက်သေနတ်မှာတပ်ဆင်နိုင်တဲ့ အဝေးထိန်းလက်နက်စနစ်ကို ၂၀၁၇ ခုနှစ်ကတည်းက စတင်ထုတ်လုပ်နေခဲ့တာဖြစ်ပါတယ်။

    အဲဒီလေကြောင်းကာကွယ်ရေးလက်နက်တစ်စုံဟာ အလိုအလျောက်ကျည်ဖြည့်တာ၊ ပစ်မှတ်ကို အလိုအလျောက်ခြေရာခံတာ၊ ပစ်လွှတ်တဲ့စနစ်မှာ ကျည်ကို အလိုအလျောက် ချိန်ဆ ထွက်စေတဲ့နည်းပညာတွေ ပါဝင်တယ်လို့လည်း BEL က သူ့ရဲ့အင်တာနက်စာမျက်နှာမှာရေးထားပါတယ်။

    ပစ္စည်းတင်ပို့မှုတန်ဖိုးဟာ အမေရိကန်ဒေါ်လာ ၆ သိန်းလို့ စာရင်းမှာဖော်ပြထားတာဖြစ်တာကြောင့် ဒါဟာ ထိန်းချုပ်စနစ် တစ်စုံစာပမာဏလို့ ယူဆရပေမဲ့ စစ်တပ်ဟာ နောက်ထပ် ထပ်ဝယ်လာတာမျိုးရှိနိုင်တယ်လို့ Justice for Myanmar အဖွဲ့က သုံးသပ်ပါတယ်။

    ဒီထိန်းချုပ်စနစ် တင်ပို့မှုနဲ့ပတ်သက်ပြီး အဖွဲ့က ကုမ္ပဏီဘက်ကို ဆက်သွယ်ပေမဲ့ ကုမ္ပဏီဘက်က တစ်စုံတရာမတုန့်ပြန်ခဲ့ဘူးလို့ ဆိုပါတယ်။

    အခုလက်နက်တင်ပို့မှုဟာ ဖေဖော်ဝါရီလ ၁ ရက်စစ်အာဏာသိမ်းမှု မတိုင်ခင်နဲ့ အာဏာသိမ်းမှုအပြီးမှာ BEL ကုမ္ပဏီက စစ်တပ်အတွက် ကမ်းခြေထောက်လှမ်းရေးစနစ်အပါအဝင် လက်နက်တင်ပို့မှုတစ်ကြိမ်ထက်မနည်းပြုလုပ်ခဲ့အပြီးမှာ ထွက်ပေါ်လာတာလို့လည်း Justice for Myanmar အဖွဲ့က ပြောထားပါတယ်။

16. ၇ အောက်တိုဘာ ၂၀၂၁စိတ်ကျန်းမာရေးချို့တဲ့သူညီမထံ ရိက္ခာပြန်ပို့တဲ့ ထန်တလန်ဒေသခံပစ်ခတ်ခံရ

17. ၇ အောက်တိုဘာ ၂၀၂၁လွိုင်ကော်မြို့ပေါ်က တိုက်ပွဲကြောင့် အရပ်သားတစ်ဦး သေဆုံး

    ကယားပြည်နယ်၊ လွိုင်ကော်မြို့ပေါ်မှာ မနေ့ အောက်တိုဘာလ ၆ ရက်ညပိုင်းက ဖြစ်ပွားခဲ့တဲ့ တိုက်ပွဲမှာ စစ်ကောင်စီဘက်က ပစ်ခတ်မှုကြောင့် အရပ်သားအမျိုးသားတစ်ဦး သေဆုံးတယ်လို့ တိုးတက်သောကရင်နီပြည်သူ့အင်အားစု(PKPF) က သတင်းထုတ်ပြန်လာပါတယ်။

    ဒေသခံတွေရဲ့အပြောအရဆိုရင် ဒေသခံကာကွယ်ရေးတပ်တွေနဲ့ စစ်ကောင်စီတို့ကြား ဖြစ်တဲ့တိုက်ပွဲဟာ မနေ့ည ၇ နာရီ ဝန်းကျင်ကနေစတင်ပြီး တစ်နာရီကျော်ကြာဖြစ်ပွားခဲ့တာလို့ သိရပါတယ်။

    ဒီတိုက်ပွဲမှာ စစ်ကောင်စီဘက်က ပစ်ခတ်မှုကြောင့် လူထုထဲက ဒဏ်ရာရသူရှိသလို နေအိမ်တွေလည်း လက်နက်ကြီးမှန်ပြီး ပျက်စီးခဲ့တယ်လို့ PKPF က ပြောပါတယ်။

    မနေ့ညပိုင်းတိုက်ပွဲနဲ့ပတ်သက်လို့ စစ်ကောင်စီဘက်က သတင်းထုတ်ပြန်တာမရှိသေးပါဘူး။

    မနေ့ညပိုင်းက တိုက်ပွဲဟာ မြို့မြောက်ဘက် လူနေရပ်ကွက်တွေရှိရာ စစ်ဆေးရုံဘက်မှာဖြစ်ခဲ့တာလို့ မြို့ခံတစ်ချို့က ပြောပေမဲ့ ဘီဘီစီအနေနဲ့ သီးခြားအတည်မပြုနိုင်သေးပါဘူး။

    လွိုင်ကော်မှာ စစ်ကောင်စီဘက်က ပစ်ခတ်မှုကြောင့် လူနေအိမ်ပျက်စီးပြီး ထိခိုက်ဒဏ်ရာရမှုတွေ အစောပိုင်းတုန်းကလည်း ဖြစ်ထားဖူးပေမဲ့ မြို့ခံတွေဟာ လက်နက်ထိမှန်နိုင်တယ်ဆိုတဲ့စိုးရိမ်စိတ်နဲ့ပဲ မြို့ထဲ ဆက်နေကြရဆဲလို့ ဒေသခံတွေက ဘီဘီစီကို ပြောပါတယ်။

    

    ဓာတ်ပုံ ရင်းမြစ်, PKPF

18. ၆ အောက်တိုဘာ ၂၀၂၁အာဆီယံ အထူးကိုယ်စားလှယ် မြန်မာခရီးစဥ်နဲ့ ပတ်သက်ပြီး စစ်ကောင်စီသဘောထား

    အာဆီယံ အထူးကိုယ်စားလှယ် လာဖို့ ပိတ်ပင်ထားတာ မရှိကြောင်း တရားဥပဒေနဲ့ ရင်ဆိုင်နေဆဲပုဂ္ဂိုလ်တွေမှအပ အကြမ်းဖက်လို့ ကြေညာခံထားရတဲ့ ပုဂ္ဂိုလ်တွေမှ အပ ကျန်တဲ့သူတွေနဲ့ အဖွဲ့စည်းအားလုံးနဲ့ တွေ့ဆုံနိုင်အောင် စီစဥ်ပေးမှာဖြစ်ကြောင်း စစ်ကောင်စီသတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက ဘီဘီစီကို ပြောပါတယ်။

    နိုင်ငံတော်အတိုင်ပင်ခံပုဂ္ဂိုလ်ဟောင်း ဒေါ်အောင်ဆန်းစုကြည် တစ်ယောက်တည်းနဲ့ တွေ့ဆုံပြီးမြန်မာနိုင်ငံရဲ့ လက်ရှိပြဿနာတွေကို ဖြေရှင်းဖို့ဖြစ်နိုင်မယ်လို့ ယုံကြည်ရင် အဲ့ဒီ ယုံကြည်မှုဟာ မျက်ကန်းယုံကြည်မှုလို့လည်း သူကပြောပါတယ်။

    လူပုဂ္ဂိုလ်ပိုင်း ဆိုင်ရာအကန့်အသတ် အဖွဲ့အစည်းပိုင်းဆိုင်ရာ အကန့်အသတ် တခုတည်းကိုသာ ရည်မှန်းပြီးလုပ်ရင်တော့ အတော့်ကို အခက်အခဲတွေ့လိမ့်မယ်လို့ သူကပြောပါတယ်။

    အာဆီယံနဲ့ သဘောတူထားတဲ့ လမ်းညွှန်ချက်အစီအစဉ်တွေနဲ့ ပတ်သက်လို့ စစ်ကောင်စီဘက်က ရှေ့တိုး ဆောင်ရွက်တာမျိုး မလုပ်ခဲ့ဘူးလို့ အာဆီယံ အထူးကိုယ်စားလှယ်က ပြောခဲ့ပါတယ်။

    စစ်တပ်က အာဏာသိမ်းခဲ့တဲ့ ဖေဖော်ဝါရီလကတည်းက အကျယ်ချုပ် ထိန်းသိမ်းခံထားရတဲ့ နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ သူ့ကို တွေ့ခွင့်ပေးဖို့ ပန်ကြားထားချက်ကိုလည်း စစ်ကောင်စီဘက်က တိုက်ရိုက် တုံ့ပြန်ဖြေကြားတာမျိုး မရှိခဲ့ဘူးလို့လည်း အာဆီယံ အထူးသံတမန် မစ္စတာ Erywan Yusof က ပြောပါတယ်။

    

    ဓာတ်ပုံ ရင်းမြစ်, Getty Images

19. ၆ အောက်တိုဘာ ၂၀၂၁ကမ်းခြေစောင့်တပ်ဖွဲ့ စတင်ဖွဲ့စည်းကြောင်း စစ်ကောင်စီ ထုတ်ပြန်

    မြန်မာနိုင်ငံ ကမ်းခြေစောင့်တပ်ဖွဲ့ကို စတင်ဖွဲ့စည်းကြောင်း စစ်ကောင်စီက သတင်းထုတ်ပြန်ပါတယ်၊

    ကမ်းခြေစောင့်တပ်ဖွဲ့ကို စစ်ရေယာဉ်များပေးအပ်ခြင်း အခမ်းအနားကိုလည်း အောက်တိုဘာလ ၆ ရက်နေ့ မွန်းလွဲပိုင်းက သန်လျင်မြို့နယ် ရေတပ်ဌာနချုပ်ဝင်းအတွင်းမှာ ကျင်းပ ပြုလုပ်ခဲ့တယ်လို့လည်း စစ်ကောင်စီက သတင်းကဆိုပါတယ်။

    အဲ့ဒီ အခမ်းအနားမှာ တပ်မတော်ရေက ကမ်းခြေစောင့်တပ်ဖွဲ့ ကို စစ်ရေယာဥ် ၄ စီးကို လွှဲပြောင်းပေးအပ်ခဲ့ပါတယ်။

    မြန်မာပင်လယ်ပြင်မှာ မူယစ်ဆေးတွေမကြာခဏဖမ်းမိတာရှိပြီးတော့ ၂၀၂၀ ခုနှစ်အတွင်း ရခိုင်ကမ်းရိုးတန်း၊ တနင်္သာရီကမ်းရိုးတန်းနဲ့ လက်ခုပ်ကုန်းကမ်းခြေတို့မှာ ပင်လယ်ရေကြောင်းက တဆင့် မလေးရှားနဲ့ ထိုင်းနိုင်ငံတို့ကို ပို့ဆောင်မယ့် အိုက်စ်မူးယစ်ဆေးများ တန်နှင့်ချီကာ ဖမ်းမိခဲ့ပါတယ်။

    အမျိုးသားရေကြောင်းအကျိုးစီးပွားများကာကွယ်ရန်၊ပင်လယ်ပြင်ရှာဖွေကယ်ဆယ်ရေးလုပ်ငန်းများ ဆောင်ရွက်ရန်၊ ပင်လယ်ဖြတ်ကျော် မှုခင်းများနှိမ်နှင်းခြင်းလုပ်ငန်းများ စတဲ့ရည်ရွယ်ချက်တွေ အပါအဝင် စစ်မက်ကာလမှာ တပ်မတော်ရေကို အ‌ထောက်အကူပြုရန်အတွက်ဖွဲ့စည်းခဲ့တာလို့ စစ်ကောင်စီဥက္ကဋ္ဌက အောက်တိုဘာလ ၆ ရက်နေ့မှာ ပြောသွားခဲ့ပါတယ်။

    

    ဓာတ်ပုံ ရင်းမြစ်, PPM

20. ၆ အောက်တိုဘာ ၂၀၂၁ဖိုင်ဇာ ကိုဗစ်ကာကွယ်‌ဆေး ၄ သန်းကျော် မြန်မာနိုင်ငံက ရဖို့ရှိ