ဓာတ်ပုံ ပုံစာ, တောင်ကုတ်မှာ အခုတစ်ကြိမ်ရေကြီးမှုက သီတင်း ၂ ပတ်အတွင်း ဒုတိယအကြိမ်ဖြစ်ပါတယ်။ရခိုင်ပြည်နယ်တောင်ပိုင်း၊ တောင်ကုတ်မြို့နယ်မှာ အခုရက်ပိုင်းအတွင်း မိုးအဆက်မပြတ်ရွာနေတဲ့အတွက် ရေကြီးမှုတွေဖြစ်နေပြီး ညနေပိုင်းမှာ ရေပိုတိုးလာနိုင်တယ်လို့ သိရပါတယ်။
လက်ရှိမှာတော့ တောင်ကုတ်မြို့ပေါ်က ချောင်းကောက်၊ ကိုင်းရှည်၊ သိမ်တောင်၊ ကံပြင်၊ ဆေးရုံကွက်သစ် စတဲ့ရပ်ကွက်တွေမှာ ရေဝင်နေပြီး နေအိမ်တချို့လည်း နစ်မြုပ်နေပြီလို့ ကိုင်းရှည်ကျေးရွာမှာနေထိုင်တဲ့ ကိုမိုးနိုင်စိုးက ပြောပါတယ်။
တောင်ကုတ်မြို့တွင်းကို ဒီကနေ့ သြဂုတ်လ ၆ ရက် မနက်ပိုင်းအရုဏ်တက်ချိန်လောက်ကစတင်ပြီးတော့ ရေတွေဝင်လာတာဖြစ်ပြီး နေ့လယ်ပိုင်းမှာ ၅ ပေ ဝန်းကျင်အထိနစ်မြုပ်နေပြီလို့ဒေသခံတွေက ပြောပါတယ်။
တောင်ကုတ်-ပန်းတောင်း အဝေးပြေးလမ်းမရဲ့အနီးဝန်းကျင်နေရာတွေမှာရှိတဲ့ သိမ်တောင်နဲ့ရပ်ကွက်တချို့မှာ ရေနစ်မြုပ်မှု မရှိသေးပေမဲ့ ကျန်တဲ့ရပ်ကွက်တွေမှာတော့ နေအိမ်အများစု ရေနစ်မြုပ်နေပြီလို့ ကိုမိုးနိုင်စိုးက ပြောပါတယ်။
အနိမ့်ပိုင်းနေရာတွေမှာ နေအိမ်တွေရေနစ်မြုပ်နေတဲ့အတွက် တချို့မိသားစုတွေဆို ဘေးလွတ်ရာနေရာတွေကို ပြောင်းရွှေ့နေကြရပြီး ရပ်ကွက်ထဲက မြို့ပေါ်ကပရဟိတအဖွဲ့တွေက ကူညီကယ်ဆယ်ရေးလုပ်ပေးနေတယ်လို့ သိရပါတယ်။
“ရေက မနက်အရုဏ်လောက်မှာ စတက်လာတယ်။ တရိပ်ရိပ်ကိုတက်လာတာ။ အခုနောက်ပိုင်းက တစ်နာရီကို ၂ ပေ လောက် တက်လာတယ်။ အနီးဝန်းကျင်မှာမြင်တွေ့နေရသလောက်ဆိုရင် အိမ်အကြီးတွေနဲ့နေတဲ့သူတွေထက် ဓနိမိုးထရံကာအိမ်ကလေးတွေနဲ့နေတဲ့မိသားစုတွေဆို ပြောင်းရွှေ့နေကြရပြီ”လို့ ကိုမိုးနိုင်စိုးက ပြောပါတယ်။
မြို့ပေါ်ရပ်ကွက်တွေ ရေကြီးနစ်မြုပ်လာနေတဲ့အတွက် နေအိမ် ၂၀၀ ကျော်နီးပါး ရေမြုပ်နေပြီး အဲ့ဒီမိသားစုတွေကိုဘေးလွတ်ရာကိုပြောင်းရွှေ့ပေးနေကြရတယ်လို့ ကူညီကယ်ဆယ်ရေးလုပ်နေသူတွေဆီကနေသိရပါတယ်။
တောင်ကုတ်မြို့ပေါ်အပြင် ကျေးလက်တွေဖြစ်တဲ့ မအီ၊လမု စတဲ့ကျးရွာကြီးတွေလည်း ရေနစ်မြုပ်နေပြီး ညနေပိုင်းမှာ ရေပိုတက်လာနိုင်ခြေရှိနေတာကြောင့် ရေနစ်မြုပ်တဲ့နေရာတွေမှာ ဆိုးဆိုးရွားရွားကြုံရနိုင်တယ်လို့ စည်ပင်သာယာရေးကော်မတီ ဥက္ကဋ္ဌဟောင်း ဦးဇေယျကျော်က ပြောပါတယ်။
အခုရက်ပိုင်းမိုးကြီးနေတဲ့အတွက် ရိုးမတောင်တန်းကနေ ဆင်းလာတဲ့တောင်ကျရေတွေကြောင့် တောင်ကုတ်ချောင်းရေမြင့်တက်ခဲ့ပြီး ချောင်းနှစ်ဖက်က နေရာတွေကို ရေလွှမ်းနေတာဖြစ်ပါတယ်။
“အခုက သိပ်မများသေးဘူး။ နောက်ထပ် သုံးနာရီလောက်ဆိုရင်တော့ ပိုကြီးလာမယ့်သဘောရှိတယ်။ အခုဒီရေကျချိန်မှာတောင် ရေတက်နေတုန်းဆိုတော့ ညနေပိုင်း ဒီရေပြန်တက်တဲ့အချိန်မှာဆို မြို့တွင်းနေရာတွေအကုန်မြုပ်မှာပဲ။ ရိုးပေါ်ကဆင်းလာတဲ့ရေတွေက များနေတယ်”လို့ ဦးဇေယျကျော်က ပြောပါတယ်။
တောင်ကုတ်မြို့နယ်အတွင်း မိုးကြီးရေလျှံခဲ့တဲ့အတွက် ဇူလိုင်လ ၂၇ ရက်နေ့ကလည်း ကျေးရွာရပ်ကွက်တချို့ ရေနစ်မြုပ်ခဲ့တာကြောင့် အခုလအတွင်းမှာ ဒုတိယအကြိမ်ရေနစ်မြုပ်မှုနဲ့ကြုံရတာဖြစ်ပါတယ်။
ဇူလိုင်လ ၂၇ နေ့က မိုးကြီးရေလျှံမှုအတွင်း ရခိုင်ပြည်နယ်မှာ သံတွဲ၊ မောင်တော၊ တောင်ကုတ်နဲ့ ဘူးသီးတောင်မြို့နယ်တွေမှာ ရေကြီးနစ်မြုပ်မှုတွေဖြစ်ပွားခဲ့ပါတယ်။
သံတွဲမြို့နယ်ထဲက နေအိမ်ပေါင်း ၄၀ ကျော်နဲ့ မောင်တောမြို့နယ်မှာ တံတားတွေကျိုးပျက် ပျက်စီးခဲ့တယ်လို့ ရခိုင်ပြည်နယ်ကောင်စီဘက်က ပြောထားပါတယ်။
သံတွဲမြို့နယ်မှာဆို ရေမြုပ်တာကြုံရတဲ့ အိမ်ထောင်းစုပေါင်း ၇၅၀ ကျော်ရှိခဲ့ပြီး မျောပါပျက်စီးခဲ့တဲ့နေအိမ်ပေါင်း ၄၆ ကျော်နဲ့ နေအိမ်ပျက်စီးခဲ့ရသူတွေအတွက် ပြည်နယ်ကောင်စီက တစ်အိမ်ကို ငွေကျပ် ၅ သိန်းအပြင် ပြည်နယ်လူမှုဝန်ထမ်းကယ်ဆယ်ရေးနဲ့ပြန်လည်နေရာချထားရေးက ၁ သိန်းစီထောက်ပံ့ထားတယ်လို့သိရပါတယ်။
