မင်းပြား လက်မကျေးရွာဟာ အစ္စလာမ်ဘာသာဝင်တွေ အဓိကနေ ထိုင်တဲ့ ကျေးရွာ တစ်ရွာဖြစ်ပေမဲ့ ဘေးပတ်ဝန်းကျင်မှာ ရခိုင်တိုင်းရင်းသားတွေ နေထိုင်တဲ့ရွာတွေ ရှိတာကြောင့် လက်မ ကျေးရွာမှာ ဖြစ်ပျက်ခဲ့တာတွေနဲ့ ပတ်သက်လို့ လူမျိုးရေး ဘာသာရေး အဓိကရုဏ်း ဖြစ်လာမှာ စိုးရိမ်လို့ ဆိုပြီး အစ္စလာမ် ကောင်စီက ဖြေရှင်းချက် တစောင် ထုတ်ပြန်လိုက်ပါတယ်။
ဇူလိုင် ၂၄ရက်နေ့က လက်မရွာကို အေအေ ရခိုင်တပ်တော် အဖွဲ့က ၀င်ရောက် စီးနင်းမှု ဖြစ်စဥ်နဲ့ ပတ်သက်လို့မင်းပြားနဲ့ မြောက်ဦးမြို့နယ် အစ္စလာမ်သာသနာရေး ကောင်စီ အကြီးအကဲတွေက အသီးသီး လက်မှတ်ရေးထိုး ထုတ်ပြန်ခဲ့တာပါ။
လက်မ မွတ်ဆလင်ကျေးရွာကို အကြောင်းပြုလို့ အမှိုက်ကစ ပြသာဒ်မီးလောင် ဆိုသလို လူမျိုးရေးအဓိကရုဏ်း ဖြစ်ပေါ်လာမှာ အလွန်စိုးရိမ်တယ်လို့ ထုတ်ပြန်ချက်မှာ ဖော်ပြထားပါတယ်။
ရခိုင်ရော ၊ မွတ်ဆလင်ပါ အေးအေးဆေးဆေး ဖြစ်နေချိန်မှာ တချို့လူတွေက ဟိုရွာသွားခိုး ဒီရွာသွားခိုး လုပ်နေရင် လူမျိုးရေး အဓိကရုဏ်း ဖြစ်လာမှာ စိုးတယ်လို့ မင်းပြား အစ္စလာမ် သာသနာရေး ဆိုင်ရာ ဥက္ကဌ ဟာဂျီ ဦးစိန်မင်းက ဘီဘီစီကို ပြောပါတယ်။
ဒါ့အပြင် အခုလို လက်မ တစ်ရွာကြောင့် မင်းပြားက မွတ်ဆလင်တွေ အနစ်နာ မခံနိုင်ဘူး ၊ ဒုက္ခအရောက် မခံနိုင်ဘူး လို့လည်း သူက ဆိုပါတယ်။
အဖြစ်မှန်တစ်ခုကို အားလုံးသိရှိဖို့လိုတဲ့ အတွက်လည်း ဘာသာရေးအဖွဲ့အစည်းနှစ်ခုက သတင်းထုတ်ပြန်ပေး ရတာဖြစ်တယ်လို့ သူက ပြောပါတယ်။
မင်းပြားနဲ့မြောက်ဦးမြို့နယ် အစ္စလာမ်သာသနာရေးအဖွဲ့တို့ရဲ့ ထုတ်ပြန်ချက်ထဲမှာတော့ လက်မရွာမှာရှိတဲ့လူဆိုး သူခိုးတွေတွေကိုဖမ်းဆီးထိန်းသိမ်းဖို့ အေအေအဖွဲ့ကို မိမိတို့မှ အကူအညီတောင်းလို့ သူတို့ ဝင်ရောက်လာတာဖြစ်တယ်လို့ ဖော်ပြထားပါတယ်။
အေအေဖွဲ့တွေဟာ လက်မရွာထဲရှိနေစဉ် လက်မရွာက မွတ်ဆလင်တွေကို နှိပ်စက်ခြင်းစော်ကားခြင်းတွေ လုံးဝမလုပ်ခဲ့ကြောင်း ထုတ်ပြန်ချက်မှာ ရေးသားထားပါတယ်။
အခုတော့ အေအေအဖွဲ့တွေ လက်မရွာထဲမှာမရှိတော့ဘူးလို့ ဒေသခံရွာသားတစ်ယောက်က ပြောပါတယ်။
အရင် သုံးလေးရက်လောက်တုန်းက အေအေ တပ်ဖွဲ့တွေ သူတို့ရွာကို ၀ိုင်းထားခဲ့ပေမယ့် အခုတော့ သူတို့ရွာရဲ့ ဟိုဘက် ဒီဘက် အစွန်းမှာ ရှိတဲ့ ရခိုင်ရွာတွေဘက် ပြောင်းသွားပြီ ၊ သူတို့ ၀ိုင်းတုန်းကလဲ ရွာထဲက လူတွေ သွားခေါ်လို့ လာခဲ့တာ ဖြစ်တယ်လို့လည်း အဆိုပါ ဒေသခံက ပြောကြားခဲ့ပါတယ်။
သြဂုတ်လဆန်းကစလို့ လက်မကျေးရွာမှာရှိတဲ့ လူဆိုးလူမိုက်တွေလျော့ချရေးအတွက် မြို့နယ်အုပ်ချုပ်ရေး အဖွဲ့တွေ ဘာသာရေးခေါင်းဆောင်တွေ အုပ်ချုပ်ရေးမှူးတွေတိုင်ပင်ပြီး သူတို့အနေနဲ့ဖြေရှင်းလို့မရပါက အေအေအဖွဲ့ကို အကူအညီတောင်းဖို့ ဆွေးနွေးခဲ့ကြတယ်လို့လည်း သူတို့ ထုတ်ပြန်ချက်မှာ ဖော်ပြထားပါတယ်။
လက်ရှိမှာတော့ ရခိုင်ပြည်နယ်က ကျေးရွာအချို့မှာ စားဝတ်နေရေးအခက်အခဲတွေ ကြုံရတဲ့ သူတွေများ လာတဲ့အတွက်သူခိုးတွေပေါများလာနေကြောင်းနဲ့ အုပ်ချုပ်ရေးအဖွဲ့က လက်လှမ်းမမီတဲ့ ကျေးရွာတွေဆိုရင် အေအေအဖွဲ့ကို အကူအညီတောင်းရတွေ ရှိတယ်လို့တော့ ရခိုင်ဒေသခံ တချို့ကပြောပါတယ်။
ဇူလိုင်လ ၂၄ရက်နေ့တုန်းက အေအေ တပ်ဖွဲ့တွေ လက်မရွာထဲ ၀င်ရောက် စီးနင်းမှု နဲ့ ပတ်သက်လို့ စိုးရိမ် ပူပန်ကြောင်းBurma Campaign UKက သြဂုတ်လ ၂ရက်နေ့က သတင်းထုတ်ပြန်ခဲ့တာ ဖြစ်ပါတယ်။
အဲဒီ ရွာ စီးနင်းခံရမှုနဲ့ ပတ်သက်လို့Burma Campaign UKက ရထားတဲ့ အချက်အလက်တွေ အရ အေအေ တပ်ဖွဲ့၀င် ၃၀၀ လောက် ဇူလိုင် ၂၄ရက်နေ့ စတင် ၀င်ရောက် စီးနင်းခဲ့ပြီး ရွာသားတွေကို အသား ၊ နွားသားရေ နဲ့ တစ်အိမ် ကျပ်တစ်သောင်းခွဲစီ အခွန်ဆောင်ဖို့ အမိန့်ထုတ်ခဲ့ပြီး တချို့ရွာသားတွေကတော့ စစ်တပ် ထိန်းချုပ်ရာ ဒေသန္တရ အာဏာပိုင်တွေကို အခွန်ပေးနေရတဲ့ အတွက် အေအေကို အခွန်ထပ်ပေးဖို့ ငြင်းဆန်ခဲ့တယ်လို့ ဆိုပါတယ်။
အခုလို အေအေကို အခွန်ဆောင်ဖို့ ငြင်းတဲ့ ရွာသား ၁၂ယောက်ကို ဖမ်းဆီးပြီး ဗလီထဲမှာ အစာရေစာ ဖြတ်တောက်ထားတာကြောင့် မိခင်ဖြစ်သူနဲ့ ခွဲခံထားရတဲ့ တစ်လသားလေးကတော့ သတိလက်လွတ်ဖြစ်နေတယ်လို့ သတင်းရကြောင်း Burma Campaign UK ထုတ်ပြန်ချက်မှာ ဖော်ပြထားပါတယ်။
အေအေ အနေနဲ့ အဲဒီရွာက ဆုတ်ခွာပေးဖို့နဲ့ ရွာသားတွေ ထိခိုက် သေဆုံးမှု ၊ လူ့အခွင့်အရေးချိုးဖောက်မှုတွေ ကျူးလွန်မှု မရှိစေဖို့ Burma Campaign UK က ပန်ကြားခဲ့ပြီးနောက် အဲဒီရွာကနေ အေအေ တပ်ဖွဲ့တွေ ထွက်ခွာသွားပြီဖြစ်ကြောင်း ၊ ဖမ်းဆီးထိန်းသိမ်းထားသူ အားလုံးကို လွှတ်ပေးခဲ့ပေမဲ့ လူ၂ ယောက်ကို ဖမ်းသွားတဲ့ အတွက် အဲဒီဖမ်းသွားသူတွေကို ပြန်လွှတ်ပေးဖို့ကိုလည်း Burma Campaign UK နောက်ထပ်ထုတ်ပြန်ချက်မှာ ထည့်သွင်း ရေးသားထားတာ တွေ့ရပါတယ်။
ဓာတ်ပုံ ရင်းမြစ်, Getty Images
ဓာတ်ပုံ ရင်းမြစ်, Getty Images
