မင်းတပ်မြို့ပေါ်မှာ အခုရက်ပိုင်း ပစ်ခတ်မှု မရှိပေမယ့် စစ်ကောင်စီ တပ်ဖွဲ့၀င်တွေက ဘော၃ ရွာသား နှစ်ယောက်ကို သြဂုတ်လ ၁၃ရက်နေ့က လမ်းပြ ခေါ်သွားတာ ပြန်မလွှတ်ပေးသေးဘူးလို့ မင်းတပ်မြို့ပေါ်က ဒေသခံ တယောက်က ပြောပါတယ်။
သူတို့ဟာ စစ်ကောင်စီ တပ်ဖွဲ့တွေရဲ့ ခြိမ်းခြောက်မှုတွေကြောင့် ကြောက်လန့်ပြီး လိုက်သွားခဲ့ရတယ်လို့ ပြောပါတယ်။
စစ်ကောင်စီ တပ်ဖွဲ့တွေဟာ ရွာသားနှစ်ယောက်ကို ပေါ်တာဆွဲပီး ယှက်ကျေးရွာ ၊ မွီတွီ ကျေးရွာ ဘက်ကို ခေါ်ဆောင်သွားကြတယ်လို့ ဆိုပါတယ်၊
ဒါ့အပြင် အဲဒီ ဒေသတ၀ိုက် စစ်ကောင်စီတပ်တွေရဲ့ တပ်အင်အား ဖြည့်တင်း ပြောင်းရွှေ့မှု လက္ခဏာ တွေ့မြင်နေရတယ်လို့လည်း ဒေသခံတွေက ပြောပါတယ်။
မင်းတပ်မြို့ပေါ်မှာ တိုက်ပွဲ မဖြစ်ပေမယ့် ယှက်ကျေးရွာ ၊ မွီတွီ ကျေးရွာ မုန်းချောင်း တိုက်နယ်ဘက်မှာ စစ်သားတွေက ချီတက်နေကြတာကြောင့် အဲဒီဒေသတ၀ိုက် လူငယ်တွေကို ရှောင်နေကြဖို့ တိုက်တွန်း ဆော်သြ ထားတယ်လို့ သိရပါတယ်။
တခါ မင်းတပ်-မတူပီလမ်း ဆင်တဲရွာဘက်တွေမှာတော့ တိုက်ပွဲ ပြင်းထန်နေတယ်လို့ ယူဆရတယ်လို့ ဒေသခံတွေက ဆိုပါတယ်။
မင်းတပ်မြို့ကနေ ၁၄ မိုင်အကွာ ၊ မတူပီ မင်းတပ်လမ်းဘက်မှာ လက်နက်ကြီးသံတွေ ၊ ပစ်ခတ်သံတွေ တရစပ် ကြားနေရပြီး ရဟတ် ယာဥ်တွေလည်း ရောက်လာတယ်လို့ ဒေသခံတွေက ပြောပါတယ်။
မင်းတပ်မြို့ပေါ်မှာတော့ ငြိမ်းချမ်းရေး ဆွေးနွေးမှုတွေကလည်း ခရီးမရောက်သေးဘဲ အပစ်အခတ်တွေကလည်း ကြိုကြားကြိုကြား ရှိနေသလို ကိုရိုနာဗိုင်းရပ်စ် ကူးစက်မှုတွေကလည်း ရှိနေတာကြောင့် မင်းတပ် မြို့တ၀ိုက် လူသူအသွားအလာ ကျဲပါးလျက်ရှိတယ်လို့ မင်းတပ်မြို့ခံတွေက ပြောပါတယ်။
Chin Defence Force - Mindat က သြဂုတ်လ ၁၄ရက် မနက် ၇ နာရီမှာ ၁၄ မိုင်အနီးမှာ ဒေသခံ ကာကွယ်ရေး တပ်ဖွဲ့တွေနဲ့ စစ်ကောင်စီ တပ်တွေ တိုက်ပွဲဖြစ်ပွားရာ စစ်ကောင်စီဘက်က နှစ်ယောက်ကျပြီး ၄ ယောက်အပြင်းအထန်ဒဏ်ရာရသွားတယ်လို့ ထုတ်ပြန်ထားပေမယ့် ချင်းပြည်နယ်ဘက်က တိုက်ပွဲတွေ အကြောင်း စစ်ကောင်စီဘက်က ထုတ်ပြန် အတည်ပြုတာမျိုး မရှိသေးပါဘူး။
ဒါ့အပြင် ယှက်ယာယော ချီတုပ်ဘက်မှာလည်း နှစ်ဖက် ထိတွေ့မှုရှိခဲ့ကြောင်းနဲ့ CDF(Mindat) ဘက်က အထိအခိုက်မရှိခဲ့ကြောင်း CDF(Mindat)က ထုတ်ပြန်ထားပါတယ်။
တချိန်တည်းမှာ ယူနီဆက်ဖ် အဖွဲ့က မင်းတပ်မှာ အကူအညီ လာရောက် ဖြန့်ဝေလျက် ရှိတယ်လို့ ဒေသခံတွေက ပြောပါတယ်။
မင်းတပ်မြို့ပေါ်က ဒုက္ခသည်တွေ ခိုလှုံရာ ဘုရားကျောင်းတွေမှာ မိခင်နဲ့ ကလေး အသုံးအဆောင်တွေ ၊ ကိုယ်၀န်ဆောင် နဲ့ ကလေး အ၀တ်အစား ၊ ကလေးအသုံးအဆောင်၊ ရေပုံး စသဖြင့် အိမ်ထောင်စု မိသားစု ရာဂဏန်း နဲ့ချီပြီး ပေးအပ်သွားဖို့ ပြင်ဆင်နေတယ်လို့ ဆိုပါတယ်။
လတ်တလောမှာ အခုလို ကုလသမဂ္ဂ လက်အောက်ခံ အဖွဲ့အစည်းတွေ အပါအ၀င် လူမှုကယ်ဆယ်ရေး အဖွဲ့တွေဟာ မင်းတပ်မြို့ပေါ်ကလွဲလို့ လမ်းခရီးလုံခြုံရေးအရ စစ်ကောင်စီ တပ်တွေရဲ့ ခွင့်ပြုချက် မရတာကြောင့် စစ်ရှောင် ဒုက္ခသည်တွေ အမှန်တကယ် စုဝေးနေရာ စခန်းတွေကို သွားခွင့် မရဘဲ တကယ်လိုအပ်သူတွေ လက်ထဲ သွားပေးခွင့် မရ ဖြစ်နေတယ်လို့ ဆိုပါတယ်။
ပြီးခဲ့တဲ့ လတွေတုန်းကလည်း WFP က ရိက္ခာနဲ့ ဆေးဝါးအကူအညီတွေ မင်းတပ်ကို လာရောက် ဖြန့်ဖြူးဖို့ ကြိုးစားခဲ့ပေမယ့် မြို့ပေါ်က စခန်းတွေမှာ သုံးလေးရာစာကိုဘဲ ပေးခွင့် ရခဲ့တာကြောင့် ကျန်တာတွေကို သူတို့ အခြေစိုက်ရာ ပခုက္ကူမှာ ဒုက္ခသည်တွေ လက်ထဲ ပေးနိုင်ဖို့ ပြင်ဆင်နေတယ်လို့ သိရကြောင်း မင်းတပ် ဒေသခံက ဘီဘီစီကို ပြောပါတယ်။
ဓာတ်ပုံ ရင်းမြစ်, Getty Images
ဓာတ်ပုံ ရင်းမြစ်, Getty Images
