မြန်မာနိုင်ငံမှာ ဖြစ်ပေါ်နေတဲ့ အကြပ်အတည်းကို ဖြေရှင်းနိုင်ဖို့အတွက် အာဆီယံက ထုတ်ပြန်ထားတဲ့ အချက် ၅ ချက်ပါ သဘောတူချက်ကို အကောင်အထည်ဖော်နိုင်ရေးမှာ တရုတ်အစိုးရက ကူညီဆောင်ရွက်ပေးမယ်ဆိုရင် အာဆီယံအဖွဲ့ကြီးအနေနဲ့ ကျေးဇူး အထူးတင်မှာ ဖြစ်တယ်လို့ အင်ဒိုနီးရှား နိုင်ငံခြားရေးဝန်ကြီး ရက်တနို မာဆူဒီက ပြောပါတယ်။
တရုတ်နိုင်ငံ ချုန်ချင်းမြို့မှာ ကျင်းပတဲ့ အာဆီယံ-တရုတ် နိုင်ငံခြားရေးဝန်ကြီးများ အထူးအစည်းအဝေး အပြီးမှာ သတင်းထောက်တွေကို အွန်လိုင်းကနေ မစ္စစ် မာဆူဒီက ပြောကြားသွားခဲ့တာပါ။
အဲဒီအစည်းအဝေးဟာ တစ်နှစ်ကျော်ကာလအတွင်း အာဆီယံ နိုင်ငံခြားရေးဝန်ကြီးတွေရဲ့ ပထမဆုံးအကြိမ် အစည်းအဝေး ဖြစ်ပြီး မြန်မာနိုင်ငံအရေးကို ထည့်သွင်း ဆွေးနွေးခဲ့ကြပါတယ်။ အာဏာသိမ်း စစ်ကောင်စီက ခန့်အပ်ထားတဲ့ နိုင်ငံခြားရေးဝန်ကြီး ဦးဝဏ္ဏမောင်လွင်လည်း ဒီအစည်းအဝေးကို တက်ရောက်ခဲ့တယ်လို့ သိရပါတယ်။
"အာဆီယံ အထူးအစည်းအဝေး တစ်ခုကို အင်ဒိုနီးရှားနိုင်ငံ ဂျာကာတာမြို့မှာ ကျင်းပနိုင်အောင် အာဆီယံအဖွဲ့က အားကြိုးမာန်တက် ကြိုးပမ်းခဲ့ပြီး အဲဒီအစည်းအဝေးမှာ အချက် ၅ ချက်ပါ သဘောတူချက် ရနိုင်ခဲ့ပါတယ်"
"အာဆီယံရဲ့ လက်ရှိတာဝန်က ဒီသဘောတူချက်ကို အမြန်ဆုံး အကောင်အထည်ဖော်ဖို့ ဖြစ်ပါတယ်။ ဒီအချက် ၅ ချက်ပါ သဘောတူချက်ကို အကောင်အထည်ဖော် ရှေ့ဆက်ဆောင်ရွက်သွားဖို့ အာဆီယံကို တရုတ်က အားပေးကူညီမယ်ဆိုရင် မြန်မာနိုင်ငံရဲ့ အကြပ်အတည်းကို ငြိမ်းချမ်းစွာ ဖြေရှင်းနိုင်ရေးမှာ အထောက်အကူ ပြုနိုင်ပါလိမ့်မယ်" လို့ အင်ဒိုနီးရှား နိုင်ငံခြားရေးဝန်ကြီး ရက်တနို မာဆူဒီက ပြောပါတယ်။
အဲဒီ အာဆီယံ အထူးအစည်းအဝေးအတွင်း အာဏာသိမ်းစစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်နဲ့ အာဆီယံအကြား သဘောတူခဲ့တဲ့ အချက် ၅ ချက်ထဲမှာ အကြမ်းဖက်တိုက်ခိုက်မှုတွေ အမြန်ဆုံး ရပ်ဆိုင်းပေးဖို့နဲ့ မြန်မာပြည်သူတွေအကျိုးအတွက် ငြိမ်းချမ်းစွာ ဖြေရှင်းနိုင်ရေးအတွက် အပြုသဘောဆောင်တဲ့ တွေ့ဆုံဆွေးနွေးမှုတွေ စလုပ်ဖို့ ဆိုတဲ့ အချက်တွေ ပါဝင်ပါတယ်။ ဒါ့အပြင် ဒီတွေ့ဆုံဆွေးနွေးမှုတွေကို ကြားဝင် ဆောင်ရွက်ပေးဖို့ အာဆီယံ အထူးကိုယ်စားလှယ် ခန့်ထားရေး ဆိုတဲ့ အချက်လည်း ပါပါတယ်။
"အာဆီယံရဲ့ အထူးကိုယ်စားလှယ်အနေနဲ့ မြန်မာ့အရေးမှာ ပါဝင်ပတ်သက်နေသူ အားလုံးနဲ့ တွေ့ခွင့် ရှိရမှာ ဖြစ်ပါတယ်။ ဒါကို မြန်မာစစ်တပ်ဘက်က လုပ်ဆောင်ပေးဖို့ လိုပါတယ်" လို့ သူက ပြောသွားပါတယ်။
ပြီးခဲ့တဲ့ သီတင်းပတ်ကုန်ရက်က အာဆီယံ ကိုယ်စားလှယ်အဖွဲ့ တစ်ဖွဲ့ မြန်မာနိုင်ငံကို လာရောက်ခဲ့ပြီး အာဏာသိမ်း စစ်ကောင်စီက ထိပ်တန်းခေါင်းဆောင်တွေနဲ့ တွေ့ဆုံခဲ့ပါတယ်။
ဒါပေမဲ့လည်း အာဆီယံ ကိုယ်စားလှယ်အဖွဲ့ရဲ့ မြန်မာနိုင်ငံ ခရီးစဉ်အတွင်း အမျိုးသားညီညွတ်ရေးအစိုးရ NUG နဲ့ရော၊ တိုင်းရင်းသားခေါင်းဆောင်တွေ၊ CDM လှုပ်ရှားမှု အဖွဲ့တွေနဲ့ပါ တွေ့ဆုံဆွေးနွေးတာမျိုး မလုပ်ခဲ့တဲ့အတွက် FORUM-ASIA၊ Progressive Voice နဲ့ ALTSEAN-Burma အဖွဲ့တွေနဲ့ အရပ်ဘက် အဖွဲ့အစည်း ၄၀၇ ဖွဲ့က ဒီကနေ့မှာပဲ အာဆီယံကို ပြင်းပြင်းထန်ထန် ဝေဖန်လိုက်ပါတယ်။
အာဆီယံ တရုတ် နိုင်ငံခြားရေးဝန်ကြီးများ အစည်းအဝေးမတိုင်ခင် ဒီကနေ့မနက်မှာ တရုတ်နိုင်ငံခြားရေး ဝန်ကြီးနဲ့ အာဆီယံ နိုင်ငံခြားရေးဝန်ကြီးတွေ အလွတ်သဘော တွေ့ဆုံဆွေးနွေးခဲ့ကြပြီး အာဆီယံ ကိုယ်စားလှယ်အဖွဲ့ရဲ့ မြန်မာနိုင်ငံခရီးစဉ်အကြောင်း အကျဉ်းချုံး ပြောဆိုခဲ့ကြတယ်လို့ မစ္စစ် မာဆူဒီက ပြောပါတယ်။
မနေ့တုန်းကတော့ ရန်ကုန်မြို့က မြန်မာနိုင်ငံဆိုင်ရာ တရုတ်သံအမတ်ကြီးက ဗိုလ်ချုပ်မှူးကြီး မင်းအောင်လှိုင်နဲ့ တွေ့ဆုံခဲ့ပြီး အာဆီယံနဲ့ စစ်ကောင်စီအကြား သဘောတူထားချက်တွေကို အကောင်အထည်ဖော်နိုင်ရေးမှာ အပြုသဘောဆောင်တဲ့ အခန်းကဏ္ဍကနေ ဆက်လက် ပါဝင် ဆောင်ရွက်သွားမယ်လို့ ပြောခဲ့ပါတယ်။
ဓာတ်ပုံ ရင်းမြစ်, Getty Images
