မြန်မာ့လက်ရွေးစင်
ဘောလုံးအသင်း နည်းပြ Antoine Hey က သူ့အနေနဲ့ မြန်မာလက်ရွေးစင် ဘောလုံးသမားတချို့ စစ်အာဏာသိမ်းမှုကို
ဆန့်ကျင်တဲ့ အနေနဲ့ အသင်းက နုတ်ထွက်သွားကြပေမယ့် ၅၅ နှစ်ကြာ ကွဲကွာနေတဲ့ အာရှဖလား ပြိုင်ပွဲမှာ
ပြန်လည် ယှဥ်ပြိုင်နိုင်ရေး မျှော်လင့်ချက်တွေကို မစွန့်လွှတ်သေးဘူးလို့ ပြောပါတယ်။
ဖေဖော်ဝါရီလမှာ လူထုခေါင်းဆောင် ဒေါ်အောင်ဆန်းစုကြည်နဲ့အတူ
လူထုရွေးကောက်တင်မြှောက်ထားတဲ့ အစိုးရကို စစ်တပ်က အာဏာသိမ်းခဲ့တဲ့ နောက်ပိုင်းမှာ ဒီလုပ်ရပ်ကို
ဆန့်ကျင်တဲ့ အနေနဲ့လက်ရွေးစင် ဘောလုံးသမား
တချို့ အသင်းမှာ ဆက်မကစားဖို့ ဆုံးဖြတ်ပြီး နုတ်ထွက်သွားခဲ့ကြပါတယ်။ ဒါကြောင့်အသင်းဟာ
အားနည်းနေပေမယ့် နည်းပြ Antoine Hey နဲ့ မြန်မာ့လက်ရွေးစင် အသင်းကတော့ ဂျပန်မှာ ပူးတွဲ
ကျင်းပမယ့် ၂၀၂၂ ကမ္ဘာ့ဖလား ခြေစစ်ပွဲနဲ့ ၂၀၂၃ အာရှဖလား ခြေစစ်ပွဲတွေမှာ ယှဥ်ပြိုင်ဖို့
ဒီသီတင်းပတ်ကုန်ပိုင်းမှာ ထွက်ခွာတော့မှာ ဖြစ်ပါတယ်။
မြန်မာနိုင်ငံမှာ ဖေဖော်ဝါရီလက
စစ်တပ်က အာဏာသိမ်းခဲ့တဲ့ နောက်ပိုင်း ဆန့်ကျင် ဆန္ဒပြသူတွေကို အကြမ်းဖက် နှိမ်နင်းမှုတွေကြောင့်
လူပေါင်း ၇၈၀ ထက်မနည်း သေဆုံးခဲ့ရပြီး ဖြစ်ပါတယ်။
လာမယ့် မေလ ၂၈ ရက်
ဂျပန်နိုင်ငံမှာ ခြေစစ်ပွဲတွေ စတင်တော့မှာ ဖြစ်ပြီး လက်ရွေးစင် အသင်းသား ထက်ဝက်လောက်
ကစားနိုင်ကြမှာ မဟုတ်ဘူးလို့ မြန်မာနိုင်ငံဘောလုံးအဖွဲ့ချုပ်က တာဝန်ရှိသူ တယောက်က အေအက်ဖ်ပီကို
ပြောပါတယ်။
လက်ရွေးစင် တချို့က
သူတို့ရဲ့ ပြည်နယ်တချို့က ဇာတိမြို့ရွာတွေကို ပြန်သွားခဲ့ကြသလို တချို့ကတော့ လက်ရွေးစင်အသင်းမှာ
မကစားလိုကြောင်း လူသိရှင်ကြား ကြေညာခဲ့ကြတာ ဖြစ်ပါတယ်။
မြန်မာ့လက်ရွေးစင်
ဂိုးသမားကျော်ဇင်ထက်ကလည်း ရန်ကုန်မှာ ဘောလုံးသမားတွေ
ဆန္ဒပြစဥ်အတွင်း ဒီမိုကရေစီ ပြန်မရမချင်း လမ်းပေါ်မှာပဲ ဘောလုံး ကစားမယ်လို့ ဂျာမန်
သတင်းဌာနDW World ကို ပြောခဲ့ပါတယ်။ သူက စစ်အာဏာရှင်အောက်မှာ
လက်ရွေးစင်အသင်းမှာ ဝင်မကစားဘူး၊ဒါကို သိအောင်
ဆန္ဒပြကြတာလို့ ပြောခဲ့ပါတယ်။
၂၀၁၉ မှာ မြန်မာဘောလုံး
လောကကို ဒုတိယအကြိမ် ရောက်လာခဲ့တဲ့ ဂျာမန်လူမျိုး နည်းပြ Antoine Hey ကတော့ ဘာပဲ ဖြစ်ဖြစ်
ခြေစစ်ပွဲကန်ဖို့ သွားမယ်လို့ ဆိုပါတယ်။
သူက ဘောလုံးသမားတွေရဲ့
ခံစားချက်ကို လက်ခံပါတယ်။ တဖက်မှာလည်း ဘောလုံးအားကစားနဲ့ နောက်မျိုးဆက်တွေအတွက် တာဝန်ကျေဖို့လည်း
လိုပါတယ်လို့ အေဖက်ပီကို ပြောခဲ့ပါတယ်။
မြန်မာအသင်းဟာ အာရှရဲ့
အဆင့်အမြင့်အဆုံး ဂျပန်အသင်းနဲ့ ဘယ်လို ရလဒ်မျိုးပဲ ထွက်လာသည် ဖြစ်စေ ကမ္ဘာ့ဖလားကန်ခွင့်
ရဖို့ကတော့ မျှော်လင့်ချက် နည်းနေပါပြီ။ လာမယ့် ဇွန်လ ၁၁ ရက်နေ့ အိုဆာက မှာ ကာဂစ်စတန်
နဲ့ နောက် ၄ ရက်အကြာတာဂျီကစ္စတန် တို့နဲ့
ပွဲတွေမှာ အနိုင်ရခဲ့ရင်တော့ အာရှဖလားကို ၁၉၆၈ ခုနှစ် နောက်ပိုင်း ပထမဆုံးအကြိမ် ဝင်ရောက်
ယှဥ်ပြိုင်ခွင့် ရမှာ ဖြစ်ပါတယ်။
Antoine Hey ကတော့
မြန်မာ့လက်ရွေးစင်အသင်းရဲ့ အဓိက ရည်မှန်းချက်က ၂၀၂၃ တရုတ် အာရှဖလား ဘောလုံး ပြိုင်ပွဲမှာ
ဝင်ရောက် ယှဥ်ပြိုင်ခွင့်ရဖို့ ဖြစ်ကြောင်း ပြောပါတယ်၊ နှစ်ပေါင်း ၅၀ ကျော် စောင့်နေခဲ့ရတဲ့
ဒီအခွင့်အရေးကို ဒီတခါတော့ ရအောင် ယူနိုင်မယ်လို့ မျှော်လင့်ထားကြောင်း ပြောပါတယ်။
တကယ်တော့ စစ်ကောင်စီ
လက်အောက်မှာ နိုင်ငံကို ကိုယ်စားပြု မယှဥ်ပြိုင်ချင်ကြတာဟာ ဘောလုံးသမားတွေတင် မကပါဘူး။
သြစတေးလျ နိုင်ငံ မဲလ်ဘုန်းမြို့ အခြေစိုက် မြန်မာ့ ထိပ်တန်း ရေကူးသမား ဝင်းထက်ဦးကလည်း
ပြည်သူလူထုရဲ့ သွေးတွေစွန်းနေတဲ့ အလံအောက်မှာ နိုင်ငံကို ကိုယ်စားမပြုချင်ဘူး ဆိုပြီး
ပြောထားပါတယ်။
မြန်မာနိုင်ငံအတွင်းမှာ
မကြာသေးခင်ကစလို့ ဗုံးပေါက်ကွဲမှုတွေ နေ့စဥ် ဆိုသလို နေရာစုံမှာ ဖြစ်လာနေရာမှာ သိုင်းပေါင်းစုံ
ကစားသမား ဖိုးသော်လည်း ရန်ကုန်မြို့မှာ အားကစားခန်းမ အနီး ဗုံးခွဲတိုက်ခိုက်မှုမှာ
ဒဏ်ရာတွေ ရသွားခဲ့ပါတယ်။ နိုင်ငံပိုင် မီဒီယာတွေ ဘက်ကတော့ ဗုံးပေါက်ကွဲမှုတွေနဲ့ ပတ်သက်လို့
ဖိုးသော်ကိုပဲ အပြစ်ဖို့ထားပြီး ဖမ်းဆီးထားကြောင်း ပြောပါတယ်။
ဓာတ်ပုံ ရင်းမြစ်, MFF
