ဒေါ်အောင်ဆန်းစုကြည်ရဲ့ ရန်ကုန်အမှုကို ပြည်ထောင်စုတရားလွှတ်တော်ချုပ်က တောင်းယူသွား, ရှေ့နေအဖွဲ့နဲ့ တွေ့ခွင့်ပေးဖို့ ဒေါ်အောင်ဆန်းစုကြည် တောင်းဆို
နိုင်ငံတော်လျှို့ဝှက်ချက်အက်ဥပဒေ ပုဒ်မ ၃(၁) (ဂ) နဲ့ တရားစွဲဆိုခံထားရတဲ့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ရဲ့အမှုကို ပြည်ထောင်စုတရားလွှတ်တော်ချုပ်က တောင်းခေါ်သွားတာကြောင့် အမှုတွဲဟာ ရန်ကုန်အရှေ့ပိုင်းခရိုင်တရားရုံးမှာ မရှိတော့ကြောင်း အမှုကိုလိုက်ပါဆောင်ရွက်နေတဲ့ ရှေ့နေအဖွဲ့ထဲက ဒေါ်စန်းမာလာညွန့်က ဘီဘီစီကိုပြောပါတယ်။
ရန်ကုန်အရှေ့ပိုင်းခရိုင်တရားရုံးမှာ ဒီမနက် ပြုလုပ်ခဲ့တဲ့ ရုံးချိန်းမှာ ဒေါ်အောင်ဆန်းစုကြည်နဲ့ တရားသူကြီးတို့ကြားအပြန်အလှန်ပြောကြားထားတဲ့ဗီဒီယိုဖိုင်ကို ဖွင့်ပြခဲ့ပြီး နောက်တစ်ကြိမ်ရုံးချိန်းကို ဇွန် ၃ ရက်ကို ပြန်လည်ချိန်းဆိုထားပါတယ်။ အဲဒီဗီဒီယိုဖိုင်ထဲမှာ ဒေါ်အောင်ဆန်းစုကြည်က တရားသူကြီးတွေထံ သူ့ရှေ့နေအဖွဲ့နဲ့ တွေ့ဆုံခွင့်ပေးဖို့ တောင်းဆိုထားပါတယ်။
လက်ရှိမှာ အမှုကို ပြည်ထောင်စုတရားလွှတ်တော်ချုပ်ရဲ့ လုပ်ပိုင်ခွင့်အရ တောင်းခေါ်သွားတာကြောင့် နောက်ရုံးချိန်းတွေကို မူလစွဲဆိုထားတဲ့ ရန်ကုန်အရှေ့ပိုင်းခရိုင်တရားရုံးမှာ စစ်ဖြစ်မစစ်ဖြစ်ဆိုတာကိုရှင်းရှင်းလင်းလင်းမသိရသေးပါဘူး။ ဒါကြောင့် နောက်တစ်ကြိမ်ရုံးချိန်းဖြစ်တဲ့ ဇွန်လ ၃ ရက်နေ့ကိုလည်း မူလတရားရုံးကိုပဲ လာရောက်ပြီး အမှုနဲ့ပတ်သက်လို့ ထပ်မံသိရှိနိုင်မယ့်အချက်အလက်တွေကိုစုံစမ်းရဖို့ရှိတယ်လို့ ဒေါ်စန်းမာလာညွန့်က ပြောပါတယ်။
ဒေါ်အောင်ဆန်းစုကြည်ဟာ ဖေဖော်ဝါရီ ၁ ရက် အာဏာသိမ်းပြီးကတည်းက ဖမ်းဆီးထိန်းသိမ်းခံထားရပြီး အမှုခြောက်မှုနဲ့တရားစွဲဆိုခံထားရပါတယ်။
ရန်ကုန်မှာစွဲဆိုထားတဲ့အမှုကတော့ စီးပွားရေးအကြံပေး မစ္စတာရှောင်တာနယ်ဆီက စာရွက်စာတမ်းတွေ တွေ့ရှိမှုကြောင့် ခုလို ဒေါ်အောင်ဆန်းစုကြည်ကို နိုင်ငံတော်လျှို့ဝှက်ချက်အက်ဥပဒေပုဒ်မ ၃ (၁) (ဂ) နဲ့ စစ်ကောင်စီက တိုင်ကြားတာလို့ အမှုတွဲအရသိရကြောင်း သူ့ရှေ့နေတွေကပြောကြားထားပါတယ်။
